Tag: google

အောက်တိုဘာ ၂၉၊ ၂၀၁၅
M-Media

– ကျွန်းပေါင်း ၁၇၀၀၀ ကျော်ဖြင့် ဖွဲ့စည်းထားသော အင်ဒိုနီးရှားနိုင်ငံရှိ ဝေးလံခေါင်ဖျားဒေသများတွင် ပြည်သူများ ကမ္ဘာကြီးနှင့် ချိတ်ဆက်နိုင်ရန်အတွက် အင်တာနက်လိုင်းလွှင့်ပေးနိုင်သည့် လေပူဖောင်းများကို တပ်ဆင်ပေးသွားရန် ဂူးဂဲလ်က စီစဉ်နေသည်ဟု သိရသည်။

အဆိုပါ စီမံကိန်းကို Project Loon ဟု အမည်ပေးထားပြီး အင်ဒိုနီးရှားရှိ အင်တာနက် ကုမ္ပဏီများဖြစ်သော Telkomsel၊ Axiata၊ Inmost တို့နှင့် ပူးပေါင်းဆောင်ရွက်သွားမည်ဖြစ်သည်။ ထိုစီမံကိန်းမှာ ကမ္ဘာတစ်ဝှမ်း အင်တာနက်မရရှိသောသူများအား ကူညီရန် အစီအစဉ်၏ တစ်စိတ်တစ်ပိုင်းလည်းဖြစ်သည်။

“Projct Loon အတွက် အင်ဒိုနီးရှားဟာ အဆင်အပြေဆုံးပါပဲ” ဟု အဆိုပါ စီမံကိန်းခေါင်းဆောင် မိုက် ကက်စီဒီက ပြောကြားခဲ့သည်။

အင်ဒိုနီးရှား၏ ၂၂၅ သန်းသော လူဦးရေတွင် အင်တာနက်သုံးစွဲသူ အရေအတွက်မှာ ၂၉ ရာခိုင်နှုန်းသာ ရှိသေးပြီး၊ ကျွန်းများတွင် အင်တာနက်လိုင်း ရရှိရန်အတွက် ရေအောက်ကေဘယ်လ်ကြိုးများ တပ်ဆင်ရန် လိုအပ်ပြီး ထိုအတွက် အကုန်အကျ အလွန်များမည်ဖြစ်သည်။

လက်ရှိအချိန်တွင် ဂြိုဟ်တုသုံး အင်တာနက်လိုင်းကို အင်ဒိုနီးရှားပြည်သူများက အသုံးပြုနေရပြီး ဂြိုဟ်တုစလောင်းများ တပ်ဆင်ခြင်းနှင့် အသုံးပြုခ ဈေးကြီးသောကြောင့် ၀င်ငွေနည်းသည့် ပြည်သူများအတွက် အင်တာနက်သုံးစွဲရန် အခက်အခဲဖြစ်နေသည်။

ဂူးဂဲလ်၏ စီမံကိန်းတွင် အသုံးပြုမည့် လေပူဖောင်းများမှာ ဟီလီယံဓာတ်ငွေ့ဖြည့်ထားကာ ၁၂ မီတာ အရှည်ရှိမည်ဖြစ်ပြီး လေထုအမြင့် ၁၈ ကီလိုမီတာနှင့် ၂၅ ကီလိုမီတာအကြား အကွာအဝေးတွင် လွှင့်တင်ထားမည်ဖြစ်သည်။ အဆိုပါ လေပူဖောင်းတစ်ခုစီမှာ LTE ကြိုးမဲ့ဆက်သွယ်မှုဖြင့် အင်တာနက်လိုင်းကို လွှင့်ထုတ်ပေးမည်ဖြစ်ပြီး ပူဖောင်း၏ ကီလိုမီတာ ၄၀ တစ်ဝိုက်မှ ဖမ်းယူ အသုံးပြုနိုင်မည်ဖြစ်သည်။

အဆိုပါ လေပူဖောင်းမှ အင်တာနက်ကို အသုံးပြုရန်အတွက် မိုဘိုင်းဖုန်းသာ လိုအပ်မည်ဖြစ်ပြီး အမြန်နှုန်းမှာ တစက္ကန့်လျှင် ၁၀ mbps ရှိမည်ဖြစ်သည်။ အင်ဒိုနီးရှားရှိ အင်တာနက်မရရှိသော ဒေသများအားလုံးတွင် အင်တာနက်အသုံးပြုနိုင်ရန်အတွက်မူ လေပူဖောင်း ရာနှင့်ချီ၍ လိုအပ်မည်ဖြစ်သည်။

ထို့ပြင် လက်ရှိအချိန်တွင် နိုင်ငံအတွင်း၌ စမတ်ဖုန်းသုံးစွဲသူ အရေအတွက်မှာ ၂၃ ရာခိုင်နှုန်းသာရှိပြီး အင်တာနက်လိုင်း ရရှိပါကလည်း ပြည်သူများမှာ သုံးစွဲရန် ကိရိယာမရှိမှု ပြဿနာနှင့် ကြုံတွေ့ရနိုင်သည်။

Project Loon စီမံကိန်းမှာ ဂူးဂဲလ်၏ စူးစမ်းလေ့လာရေးဌာန Google X မှ ၂၀၁၁ ခုနှစ်တွင် စတင်ပေါက်ဖွားခဲ့ခြင်းဖြစ်ပြီး ၂၀၁၃ ခုနှစ်တွင် ကမ္ဘာသို့ တရားဝင်ကြေငြာခဲ့ကာ အင်တာနက်လိုင်း မရရှိသော ကမ္ဘာ့လူဦးရေ၏ ၃ ပုံ ၂ ပုံကို ကူညီပေးရန်အတွက်ဖြစ်သည်ဟု ပြောကြားခဲ့သည်။

ထို့နောက် လေပူဖောင်း ၃၀ ဖြင့် နယူးဇီလန်နိုင်ငံတွင် စတင်စမ်းသပ်ခဲ့ပြီး ထိုအချိန်မှစ၍ သြစတေးလျ၊ ဘရာဇီးလ်နှင့် သီရိလင်္ကာတို့မှ ကုမ္ပဏီများနှင့် ပူးပေါင်းကာ ထိုစီမံကိန်းကို အကောင်အထည်ဖော်ခဲ့ကာ လက်ရှိတွင် အင်ဒိုနီးရှားသို့ ရောက်ရှိလာခြင်းဖြစ်သည်။

အဆိုပါ လေပူဖောင်းများကို မြေပြင်မှ ထိန်းချုပ်ထားမည်ဖြစ်ပြီး လေတိုက်ခတ်မှုကြောင့် ပူဖောင်းတစ်ခုက အခြားတစ်နေရာသို့ ရောက်သွားပါက အခြားပူဖောင်းတစ်ခုမှာ ထိုနေရာသို့ အစားဝင်နိုင်အောင်လည်း စနစ်တကျပြုလုပ်ထားသည်ဟု ဂူးဂဲလ်က ပြောကြားခဲ့သည်။

သို့သော်လည်း အင်ဒိုနီးရှားရှိ အင်တာနက်ဝန်ဆောင်မှုပေးနေသော ကုမ္ပဏီအချို့ကမူ ဂူးဂဲလ်၏ ထိုအစီအစဉ်မှာ ၎င်းတို့၏ စီးပွားရေးကို ပျက်ဆီးစေနိုင်သည်ဟု ဆိုကာ ကန့်ကွက်မှုများ ရှိနေသည်။

Ref: The Guardian

ဧပြီ ၁၆၊ ၂၀၁၅
M-Media

– ဥရောပသမဂ္ဂ အလွဲသုံးစားဆန့်ကျင်ရေး အကြီးအကဲဖြစ်သူ မာဂရက်သီ ဗက်စတာဂါက Google မှာ ပြိုင်ဘက်များ အသာမရစေရန်အတွက် ၎င်း၏ Google Search ကို အမြတ်ထုတ်ခဲ့သည်ဟု စွပ်စွဲပြောကြားလိုက်ပြီး အန်ဒရွိုက်သုံးစွဲသူများ
အင်တာနက်တွင် ရှာဖွေသည့်အခါ ၎င်းတို့ကုမ္ပဏီ၏ ၀န်ဆောင်မှုများနှင့် အက်ပလီကေးရှင်းများကိုသာ ဦးစားပေး ဖော်ပြခဲ့လားဆိုသည်နှင့် ပတ်သက်၍လည်း စုံစမ်းမှုများကို စတင်ပြုလုပ်နေသည်။

ယမန်နေ့တွင် ထိုကဲ့သို့ ပြောကြားလိုက်ခြင်းဖြစ်ပြီး Google အနေဖြင့် ၎င်းတို့ ထုတ်ကုန်များ၏ ၀ဘ်ဆိုက်များကိုသာ ဖော်ပြခြင်းဖြင့် ပြိုင်ဘက်များအပေါ် မမျှမတ အသာစီးရယူခဲ့သလားဆိုသည်ကို မိမိက စိုးရိမ်မိကြောင်း ဗက်စတာဂါက ထည့်သွင်း ပြောကြားခဲ့သည်။ သူမမှာ ဥရောပယှဉ်ပြိုင်မှု ကော်မရှင်နာလည်း ဖြစ်သည်။

နည်းပညာဆိုင်ရာ လေ့လာစူးစမ်းမှု ကုမ္ပဏီဖြစ်သော Gartner ၏ ပြောကြားမှုအရ ဆမ်ဆောင်းကဲ့သို့ ဆဲလ်ဖုန်းထုတ်လုပ်သည့် ကုမ္ပဏီများက ကျယ်ကျယ်ပြန့်ပြန့် အသုံးပြုကြသော အန်ဒရွိုက်ဆော့ဖ်ဝဲမှာ ကမ္ဘာ့အကြီးဆုံး OS ဖြစ်ပြီး အကြမ်းဖျင်းအားဖြင့် ဈေးကွက်ပမာဏ၏ ၈၁ ရာခိုင်နှုန်းကို သိမ်းပိုက်ထားသည်ဟု ဆိုသည်။ Apple ကမူ ဈေးကွက်၏ ၁၅ ရာခိုင်နှုန်းရရှိထားပြီး မိုခရိုဆော့ဖ်က ၃ ရာခိုင်နှုန်းအောက် ရရှိနေသည်။

Google အနေဖြင့် လွန်ခဲ့သည့် ၅ နှစ်တာကာလအတွင်း ၎င်းတို့၏ ထုတ်လုပ်မှုများကို ကိုယ်တိုင် ပရိုမိုးရှင်း လုပ်ခဲ့သည်ဟူသော စွပ်စွဲချက်အတွက် ဥရောပသမဂ္ဂက စုံစမ်းစစ်ဆေးမှုများ ပြုလုပ်နေကာ Goolge နှင့် ပြေငြိမ်းရန်လည်း ကြိုးစားနေသည်။ သို့သော်လည်း ယခုအချိန်အထိ ထိုကိစ္စအတွက် တိုင်ကြားမှုများ မပြုလုပ်ရသေးဘဲ ထိုစိုးရိမ်မှုများကို Google အနေဖြင့် ပြည့်ပြည့်၀၀ ဖြေရှင်းမှုလည်း မရှိသေးဟု ဥရောပသမဂ္ဂက ပြောကြားခဲ့သည်။

တရားဝင်စွပ်စွဲမှုများ ဖြစ်လာပါက နှစ်ရှည်ကြာမြင့်မည့် တရားစွဲဆိုမှုနှင့် Google အပေါ် ဒေါ်လာ ဘီလီယံနှင့်ချီ၍ ဒဏ်ငွေရိုက်ခြင်းတို့ ဖြစ်လာနိုင်သည်။ ဥရောပသမဂ္ဂအနေဖြင့် ကုမ္ပဏီအမြတ်၏ ၁၀ ရာခိုင်နှုန်းကို ဒဏ်ရိုက်နိုင်ခွင့်နှင့် ဥရောပရှိ ၀ဘ်ဆိုက်များအား Google Search တွင် အကြံပြုသည့် စနစ်ကို ပြန်လည် စစ်ဆေးပြုပြင်သွားရန် အမိန့်ပေးနိုင်သည့် အာဏာလည်း ရှိနေသည်။

Google အား ထိန်းချုပ်ရန် ဥရောပတာဝန်ရှိသူများကို တိုက်တွန်းသော အဖွဲ့ဖြစ်သည့် FairSearch Europe အဖွဲ့မှ ဥပဒေရေးရာ အကြံပေးဖြစ်သူ သောမတ်စ် ဗင်ဂျီက ဥရောပသမဂ္ဂ၏ ထိုသို့ဆောင်ရွက်မှုမှာ တီထွင်မှုနှင့် ဈေးဝယ်သူများ၏ ရွေးချယ်မှုကို ပျက်ဆီးစေသော Google ၏ ယှဉ်ပြိင်မှုမပေးသည့် လုပ်ရပ်များကို အဆုံးသတ်ရန် အရေးပါသည့် ခြေလှမ်းဖြစ်သည်ဟု ပြောကြားခဲ့သည်။

Google Search ဒုတိယဥက္ကဌဖြစ်သူ အေမစ် ဆစ်ဂ်နယ်လ်ကမူ Google မှာ လူသုံးများဆုံး search engine ဖြစ်ပြီး လက်ရှိအချိန်တွင် မတူညီသော နည်းလမ်းများဖြင့် လူများက သတင်းအချက်အလက်များကို ရှာဖွေရယူနေကြကြောင်း၊ သုံးစွဲသူများနှင့် ယှဉ်ပြိုင်သူများအတွက် ထိခိုက်သည်ဟု စွပ်စွဲချက်များမှာလည်း မှားယွင်းသည်ဆိုသည်ကို သက်သေပြပြီးဖြစ်ကြောင်း ပြောဆိုခဲ့သည်။

Google အနေဖြင့် ထိုစွပ်စွဲချက်များကို တုံ့ပြန်ရန် သီတင်းပတ် ၁၀ ပတ် အချိန်ရှိနေသည်။

Ref: Aljazeera