News @ M-Media

Tag: Hajj2020

  • ယခုနှစ်ဟဂျ်ကို လူအကန့်အသတ်ဖြင့် ခွင့်ပြုမည်ဟု ဆော်ဒီကြေငြာ

    ယခုနှစ်ဟဂျ်ကို လူအကန့်အသတ်ဖြင့် ခွင့်ပြုမည်ဟု ဆော်ဒီကြေငြာ

    ဇွန် ၂၃၊ ၂၀၂၀
    M-Media

    -ကိုရိုနာဗိုင်းရပ်စ် ပြန့်နှံ့နေမှုကြောင့် အခုနှစ် ဟဂျ်ဘုရားဖူးခရီးစဉ်ကို လူအကန့်အသတ်နဲ့သာ ခွင့်ပြုသွားမယ်လို့ ဆော်ဒီအာရေဗျက မနေ့မှာ ထုတ်ပြန်ကြေငြာလိုက်ပါတယ်။

    ငွေကြေးတတ်နိုင်ပြီး ကျန်းမာရေးကောင်းမွန်တဲ့ အစ္စလာမ်ဘာသာဝင် အမျိုးသား၊ အမျိုးသမီးတိုင်း တစ်သက်မှာတစ်ကြိမ် ဆော်ဒီအာရေဗျကို သွားရောက်ပြီး ဟဂျ်ဘုရားဖူးဖို့ဟာ မလုပ်မနေရ ဘာသာရေးတာဝန် ဖြစ်ပါတယ်။ အခုနှစ် ဟဂျ်ကာလကဇူလိုင်လမှာ ကျရောက်မှာ ဖြစ်ပါတယ်။

    ကိုရိုနာဗိုင်းရပ်စ် ပြန့်နှံ့မှုကြောင့် ဆော်ဒီဟာ အွမ္မရာဘုရားဖူးခရီးစဉ် ခွင့်ပြုမှုကို မတ်လမှာ ရပ်ဆိုင်းခဲ့ပြီး ဟဂျ်ခရီးစဉ်အတွက် ပြင်ဆင်မှုကို ရပ်ဆိုင်းထားဖို့လည်း ကမ္ဘာတစ်ဝှမ်းက အစ္စလာမ်ဘာသာဝင်တွေကို တိုက်တွန်းခဲ့ပါတယ်။

    ဆော်ဒီ ဟဂျ်နဲ့ အွမ္မရာဟ်ဝန်ကြီးဌာနရဲ့ မနေ့က ထုတ်ပြန်ချက်မှာတော့ အခုနှစ် ဟဂျ်ဘုရားဖူးခရီးစဉ်ကို လူအကန့်အသတ်နဲ့ ခွင့်ပြုသွားမယ်လို့ ဖော်ပြထားပြီး ဆော်ဒီအာရေဗျမှာ နေထိုင်သူတွေသာ ဟဂျ်ပြုခွင့် ရမှာ ဖြစ်ပါတယ်။

    “ဆော်ဒီအာရဗျမှာ နေထိုင်နေတဲ့ နိုင်ငံသားပေါင်းစုံကို အရေအတွက်အကန့်အသတ်နဲ့ ဟဂျ်လုပ်ဖို့ ခွင့်ပြုမှာ ဖြစ်ပါတယ်။ ပြည်သူ့ကျန်းမာရေး အန္တရာယ်ကင်းစေဖို့အတွက် ဒီလိုစီစဉ်တာဖြစ်ပြီး ကြိုတင်ကာကွယ်ရေးနဲ့ ခပ်ခွာခွာနေထိုင်ရေး စည်းမျဉ်းစည်းကမ်းတွေအားလုံးကို လိုက်နာရမှာ ဖြစ်ပါတယ်”

    ပြီးခဲ့တဲ့နှစ် ဟဂျ်ဘုရားဖူးကာလမှာ ကမ္ဘာတစ်ဝှမ်းက အစ္စလာမ်ဘာသာဝင် ၁.၈ သန်းလောက် ဆော်ဒီအာရေဗျကို လာရောက်ခဲ့ကြပါတယ်။

    ဆော်ဒီ အစ္စလာမ့်သာသနာ့ပညာရှင်များကောင်စီကလည်း အစိုးရရဲ့ ဒီဆောင်ရွက်ချက်ကို ထောက်ခံတယ်လို့ ထုတ်ပြန်ခဲ့ပါတယ်။

    Ref: Arab News

  • ယခုနှစ် ဟဂျ်ခရီးသည်အရေအတွက်ကို လျှော့ချရန် ဆော်ဒီစဉ်းစားနေ

    ယခုနှစ် ဟဂျ်ခရီးသည်အရေအတွက်ကို လျှော့ချရန် ဆော်ဒီစဉ်းစားနေ

    ဇွန် ၁၀၊ ၂၀၂၀
    M-Media

    လှုပ်ရှားသွားလာမှု ကန့်သတ်မိန့်ထုတ်ပြန်ပြီးနောက် တွေ့ရသည့် မက္ကာမြို့မှ ကအ်ဘာ ဝတ်ကျောင်းတော်

    -ကိုရိုနာရောဂါ ထပ်မံ မပြန့်ပွားရေးအတွက် အခုနှစ် ဟဂျ်ကာလမှာ ကမ္ဘာတစ်ဝှမ်းက ဘုရားဖူးခရီးသည် အရေအတွက်ကို သိသိသာသာလျှော့ချဖို့ ဆော်ဒီအစိုးရက စဉ်းစားနေတယ်လို့ နီးစပ်သူတွေက တနင်္လာနေ့မှာ Reuters သတင်းဌာနကို ပြောကြားခဲ့ပါတယ်။

    ကျန်မာရေးကောင်းမွန်ပြီး ငွေကြေးတတ်နိုင်တဲ့ အစ္စလာမ်ဘာသာဝင် အမျိုးသား၊ အမျိုးသမီးတွေအတွက် တစ်သက်မှာတစ်ကြိမ် ဟဂျ်ဘုရားဖူးသွားဖို့ ဟာ မလုပ်မနေရ ဘာသာရေးတာဝန်တစ်ခု ဖြစ်ပါတယ်။

    ပြီးခဲ့တဲ့နှစ် ဟဂျ်ကာလအတွင်း ကမ္ဘာတစ်ဝှမ်းက အစ္စလာမ်ဘာသာဝင် ၂.၅ သန်းလောက် ဆော်ဒီအာရဗျကို လာရောက်ခဲ့ကြပါတယ်။ အခုနှစ်မှာတော့ Covid-19 ပြန့်နှံ့နေတာကြောင့် ဟဂျ်ဘုရားဖူးခရီး လာရောက်ဖို့ စီစဉ်ထားမှုကို ခေတ္တရပ်ဆိုင်းထားကြဖို့ ဆော်ဒီအာဏာပိုင်တွေက မတ်လမှာ အစ္စလာမ်ဘာသာဝင်တွေကို ဆော်ဩထားပါတယ်။

    ဇူလိုင်လမှာ ကျရောက်မယ့် ဟဂျ်ကာလမှာ ဘုရားဖူးခရီးသည်တွေ ဝင်ရောက်ခွင့်ပြုမလား၊ မပြုဘူးလားဆိုတာကို ဆော်ဒီက တိတိကျကျထုတ်ပြန်ခြင်း မရှိသေးပါဘူး။

    ဆော်ဒီက ဒီကိစ္စနဲ့နီးစပ်တဲ့ ရင်းမြစ်နှစ်ခုကတော့ နိုင်ငံတစ်နိုင်ငံချင်းစီ မူလကသတ်မှတ်ထားတဲ့ ဟဂျ်ဘုရားဖူးခရီးသည် ပမာဏရဲ့ ၂၀ ရာခိုင်နှုန်းလောက်ကိုသာ လာခွင့်ပြုဖို့ စဉ်စားနေတယ်လို့ ပြောကြားခဲ့ပါတယ်။

    သက်ကြီးရွယ်အိုတွေကို လာခွင့်မပြုတာ၊ လာခွင့်ပြုတဲ့သူတွေကိုလည်း ကျန်းမာရေး တင်းတင်းကြပ်ကြပ်စစ်ဆေးတာလို ကန့်သတ်မှုတွေလည်း လုပ်ဆောင်ဖို့ရှိတယ်လို့ ဆိုပါတယ်။

    ဒါပေမယ့် တစ်ချို့ ဆော်ဒီအာဏာပိုင်တွေက ဟဂျ်ခရီးစဉ်ကို လုံး၀ ဖျက်သိမ်းဖို့ ဆန္ဒရှိနေကြတယ်လို့ အဲဒီရင်းမြစ်တွေက ထည့်သွင်းပြောဆိုခဲ့ပါတယ်။ လက်ရှိမှာတော့ ဟဂျ်ရဲ့ အဓိကနေရာဖြစ်တဲ့ မက္ကာမြို့ကို ဆော်ဒီအာဏာပိုင်တွေက တံခါးပိတ်ထားပါတယ်။

    ဆော်ဒီဟဂျ်နဲ့ အွမ္မရာဝန်ကြီးဌာနကတော့ ဒီသတင်းအတွက် မှတ်ချက်ပေးတာမျိုး မရှိသေးပါဘူး။

    Ref: Reuters

  • ယခုနှစ် ဟဂျ်ဘုရားဖူးခရီးစဉ်ကို ဖျက်သိမ်းဟု အင်ဒိုနီးရှား ကြေငြာ

    ယခုနှစ် ဟဂျ်ဘုရားဖူးခရီးစဉ်ကို ဖျက်သိမ်းဟု အင်ဒိုနီးရှား ကြေငြာ

    ဇွန် ၃၊ ၂၀၂၀
    M-Media

    -Covid-19 ကပ်ရောဂါ ပြန်နှံ့ကူးစက်မှာကို စိုးရိမ်တဲ့အတွက် ယခုနှစ် ဟဂျ်ဘုရားဖူးခရီးစဉ် စေလွှတ်မှုကို ဖျက်သိမ်းလိုက်တယ်လို့ အင်ဒိုနီးရှားနိုင်ငံက​ ဒီကနေ့မှာ ကြေငြာလိုက်ပါတယ်။

    ဟဂျ်ဘုရားဖူးခရီးစဉ်ဟာ ငွေကြေးတတ်နိုင်ပြီး ကျန်းမာရေးကောင်းမွန်တဲ့ အစ္စလာမ်ဘာသာဝင် အမျိုးသား၊ အမျိုးသမီးတိုင်း တစ်သက်မှာ တစ်ကြိမ် မလုပ်မနေရ သတ်မှတ်ထားတဲ့ ဘာသာရေးတာဝန်တစ်ရပ်ဖြစ်ပါတယ်။ အခုနှစ် ဟဂျ်ဘုရားဖူးကာလဟာ ဇူလိုင်လကုန်မှာ ကျရောက်မှာပါ။

    ဒီခရီးစဉ်ကို အင်ဒိုနီးရှားက အစ္စလာမ်ဘာသာဝင် ၂ သိန်း ၂ သောင်းကျော်လောက် သွားဖို့ စီစဉ်ထားတာ ဖြစ်ပါတယ်။

    အင်ဒိုနီးရှား သာသနာရေးဝန်ကြီး ဖက်ချ်ရူလ် ရာဇီရဲ့ ဂျကာတာမြို့က ဒီကနေ့ သတင်းစာရှင်းလင်းပွဲမှာ ဆော်ဒီအာဏာပိုင်တွေက အာမခံချက် မပေးတဲ့အတွက် ဟဂျ်အစီအစဉ်ကို ဖျက်သိမ်းလိုက်တယ်လို့ ပြောကြားခဲ့ပါတယ်။

    “ဆော်ဒီအာဏာပိုင်တွေဖက်က ရေရေရာရာ မသိရတဲ့အတွက် ၂၀၂၀ ခုနှစ် ဟဂျ်ခရီးစဉ်ကို ဖျက်သိမ်းဖို့ ဆုံးဖြတ်လိုက်ပါတယ်။ သိပ်ကို ခါးသီးပြီး ခက်ခဲတဲ့ ဆုံးဖြတ်ချက်ပါ။ ဒါပေမယ့် ဘုရားဖူးသူတွေ၊ ဒီခရီးစဉ်က ဝန်ထမ်းတွေကို ကာကွယ်ပေးဖို့ ကျွန်တော်တို့မှာ တာဝန်ရှိပါတယ်”

    Covid-19 ပြန့်နှံ့မှုကြောင့် ဟဂျ်နဲ့ အွမ္မရာဟ် ဘုရားဖူးခရီးစဉ်ကို ရပ်ဆိုင်းထားတယ်လို့ မတ်လမှာ ဆော်ဒီအာဏာပိုင်တွေက ကြေငြာခဲ့ပါတယ်။ မကြာခင်ကျရောက်တော့မယ့် ဟဂျ်ကာလနဲ့ပတ်သက်လို့ တိတိကျကျ ထုတ်ပြန်ပေးဖို့အတွက် ပြီးခဲ့တဲ့မေလမှာ အင်ဒိုနီးရှားက တောင်းဆိုခဲ့ပေမယ့် ဆော်ဒီဖက်က မတုန့်ပြန်ခဲ့ပါဘူး။

    မဒီနာက ‘မတ်စ်ဂျစ်ဒ်နဗဝီ’ ဗလီ အပါအဝင် နိုင်ငံတစ်ဝှမ်းက ဗလီဝတ်ကျောင်းတော်တွေကို စည်းကမ်းချက်တွေနဲ့ ပြီးခဲ့တဲ့တစ်ပတ်မှာ ဆော်ဒီအာဏာပိုင်တွေက ပြန်လည်ဖွင့်လှစ်ပေးခဲ့ပေမယ့် မက္ကာမြို့ကိုတော့ ပြန့်ဖွင့်ပေးခြင်း မရှိသေးပါဘူး။

    ပြီးခဲ့တဲ့နှစ် ဟဂျ်ဘုရားဖူးကာလအတွင်း ကမ္ဘာတစ်ဝှမ်းက အစ္စလာမ်ဘာသာဝင် ၂.၅ သန်းလောက် ဆော်ဒီကို သွားရောက်ခဲ့ကြပါတယ်။ အင်ဒိုနီးရှားဟာ ကမ္ဘာပေါ်မှာ ဟဂျ်ခရီးစဉ်သွားရောက်သူ အများဆုံးနိုင်ငံလည်း ဖြစ်ပါတယ်။

    Ref: Aljazeera

  • ဟဂျ်ဘုရားဖူးခရီးစဉ်အတွက် တိတိကျကျ ထုတ်ပြန်ပေးရန် ဆော်ဒီကို အင်ဒိုနီးရှား တိုက်တွန်း

    ဟဂျ်ဘုရားဖူးခရီးစဉ်အတွက် တိတိကျကျ ထုတ်ပြန်ပေးရန် ဆော်ဒီကို အင်ဒိုနီးရှား တိုက်တွန်း

    မေ ၂၀၊ ၂၀၂၀
    M-Media

    -အခုနှစ် ဟဂျ်ဘုရားဖူးခရီးစဉ်ကို ခွင့်ပြုမလား၊ ခွင့်မပြုဘူးလားဆိုတာနဲ့ပတ်သက်ပြီး တိတိကျကျ ထုတ်ပြန်ပေးဖို့ ဆော်ဒီအာရေဗျကို အင်ဒိုနီးရှားက တိုက်တွန်းလိုက်ပါတယ်။

    ဟဂျ်ဘုရားဖူးခရီးစဉ်ဟာ ငွေကြေးတတ်နိုင်ပြီး၊ ကျန်းမာရေးကောင်းမွန်တဲ့ အစ္စလာမ်ဘာသာဝင် အမျိုးသား၊ အမျိုးသမီးတိုင်း တစ်သက်မှာ တစ်ကြိမ် မလုပ်မနေရ တာဝန်ဖြစ်ပါတယ်။ ပြီးခဲ့တဲ့နှစ် ဟဂျ်ကာလအတွင်း ကမ္ဘာတစ်ဝှမ်းက အစ္စလာမ်ဘာသာဝင် ၂.၅ သန်းလောက် ဆော်ဒီအာရေဗျကို သွားရောက်ခဲ့ပါတယ်။

    အခုနှစ်မှာတော့ ကိုရိုနာဗိုင်းရပ်စ် ပြန့်နှံ့နေမှုအတွက် အွမ္မရာဟ်ဘုရားဖူး အစီအစဉ်ကို ဆော်ဒီအစိုးရက မတ်လမှာ ဖျက်သိမ်းခဲ့ပြီး၊ ဟဂျ်ခရီးစဉ် လာရောက်ဖို့ စီစဉ်နေမှုကို ခေတ္တ ဆိုင်းငံ့ပေးထားဖို့လည်း ကမ္ဘာတစ်ဝှမ်းက မွတ်စလင်တွေကို တိုက်တွန်းခဲ့ပါတယ်။

    အခုနှစ်ဟဂျ်ဘုရားဖူးကာလဟာ ဇူလိုင်လအကုန်မှာ ကျရောက်မှာဖြစ်ပြီး ခွင့်ပြုမှာလား၊ ခွင့်မပြုဘူးလားဆိုတာကို ဆော်ဒီအစိုးရက မထုတ်ပြန်သေးပါဘူး။

    အင်ဒိုနီးရှား သာသနာရေးဝန်ကြီးဌာနက ရမ်ဇန်ဥပုသ်လမကုန်ခင် ဒီကိစ္စအတွက် ဆုံးဖြတ်ချက် ထုတ်ပြန်ပေးဖို့ ဆော်ဒီအာရေဗျကို တိုက်တွန်းခဲ့ပါတယ်။

    “ဟဂျ်ကို ခွင့်ပြုမှာလား၊ ရပ်ဆိုင်းမှာလားဆိုတဲ့ တရားဝင်ဆုံးဖြတ်ချက်မျိုး မကြာမီ ထုတ်ပြန်ပေးဖို့ ကျွန်တော်တို့ မျှော်လင့်ပါတယ်” လို့ ဝန်ကြီးဌာန ပြောရေးဆိုခွင့်ရှိသူ အိုမန် ဖာသူရဟ်မန်က ပြောပါတယ်။

    အင်ဒိုနီးရှားဟာ ကမ္ဘာပေါ်မှာ အစ္စလာမ်ဘာသာဝင်အများဆုံးရှိတဲ့ တိုင်းပြည်ဖြစ်ပြီး ယခုနှစ် ဟဂျ်ခရီးစဉ်သွားရောက်ဖို့အတွက် လူပေါင်း ၂၃၁၀၀၀ လောက် စာရင်းပေးထားပါတယ်။

    ဖာသူရဟ်မန်က ဟဂျ်ခရီးစဉ် ဝန်ဆောင်မှုအတွက် အင်ဒိုနီးရှားက ဆော်ဒီကို ငွေကြိုပေးထားတာမျိုး မရှိဘူးလို့ ထည့်သွင်းပြောဆိုခဲ့ပါတယ်။

    Ref: Daily Mail

  • ရမ်ဇာန်ဥပုသ်လနှင့် ဝါကျွတ်အီးဒ်နေ့ ဝတ်ပြုဆုတောင်းမှုကို အိမ်တွင်ပြုလုပ်ဖို့ ဆော်ဒီအမိန့်ထုတ်

    ရမ်ဇာန်ဥပုသ်လနှင့် ဝါကျွတ်အီးဒ်နေ့ ဝတ်ပြုဆုတောင်းမှုကို အိမ်တွင်ပြုလုပ်ဖို့ ဆော်ဒီအမိန့်ထုတ်

    ဧပြီ ၁၇၊ ၂၀၂၀
    M-Media

    -Covid-19 ကူးစက်ပြန့်နှံ့မှာကို စိုးရိမ်တဲ့အတွက် ရမ်ဇာဥပုသ်လ သာရာဝီ ဝတ်ပြုမှုနဲ့ အီးဒ်နေ့ ဝတ်ပြုဆုတောင်းမှုတွေကို မိမိတို့အိမ်မှာသာ ဆောင်ရွက်ကြဖို့ ဆော်ဒီအာရေဗျ အစ္စလာမ်ဓမ္မသတ်မှူးချုပ်က ဒီကနေ့မှာ ညွှန်ကြားချက် ထုတ်ပြန်လိုက်ပါတယ်။

    တစ်လတာကြာမြင့်မယ့် ရမ်ဇာန်ဥပုသ်လဟာ လာမယ့်တစ်ပတ်မှာ ကျရောက်မှာ ဖြစ်ပါတယ်။

    ဆော်ဒီမှာ Covid-19 ကူးစက်ပြန့်နှံ့မှုကြောင့် မက္ကာနဲ့ မဒီနာက မြင့်မြတ်ရာ ဗလီဝတ်ကျောင်းတော် ၂ လုံး အပါအဝင် နိုင်ငံအတွင်းက ဗလီအားလုံးမှာ လူစုလူဝေးနဲ့ ဝတ်ပြုဆုတောင်းခွင့်ကို ပိတ်ထားပါတယ်။

    အခုနှစ် အွမ္မရာဟ်ဘုရားဖူးအစီအစဉ်ကို ရပ်ဆိုင်းခဲ့သလို၊ ဇူလိုင်လမှာ ကျရောက်မယ့် ဟဂျ်ဘုရားဖူးကာလအတွက် ပြင်ဆင်နေမှုကို ခေတ္တရပ်ဆိုင်းထားဖို့လည်း ကမ္ဘာတစ်ဝှမ်းက အစ္စလာမ်ဘာသာဝင်တွေကို ဆော်ဒီအစိုးရက မေတ္တာရပ်ခံထားပါတယ်။

    ဆော်ဒီ ဓမ္မသတ်မှူးချုပ် မွဖ်သီ ရှိခ် အဘ်ဒူလ်အဇစ် အလ်-ရှိခ်က ဗိုင်းရပ်စ်မပြန့်နှံ့ရေး ကြိုတင်ကာကွယ်မှုအတွက် အခုနှစ် ရမ်ဇာန်ဥပုသ်လအတွင်း ညပိုင်း သာရာဝီ ဝတ်ပြုဆုတောင်းမှုကို ဗလီဝတ်ကျောင်းတော်တွေမှာ ပြုလုပ်မှာမဟုတ်ဘူးလို့ ဒီကနေ့ ထုတ်ပြန်ချက်မှာ ပြောကြားခဲ့ပါတယ်။

    ဥပုသ်လအကုန် ဝါကျွတ်အီးဒ်ပွဲတော်မှာလည်း ဝတ်ပြုဆုတောင်းမှုတွေကို ဗလီတွေ၊ ကွင်းပြင်တွေမှာ လုပ်ဆောင်မှာမဟုတ်ဘဲ မိမိတို့အိမ်မှာသာ ဝတ်ပြုဖို့ မွဖ်သီက တိုက်တွန်းခဲ့ပါတယ်။

    လက်ရှိ ဆော်ဒီအာရေဗျမှာ ကိုဗစ်ကူးစက်သူအရေအတွက် ၆၃၈၀ ဦး ရှိနေပြီး သေဆုံးသူ ၈၃ ဦး ရှိပါတယ်။ ပြန်လည်ကောင်းမွန်သူအရေအတွက်လည်း ထောင်ချီရှိနေပါတယ်။

    Ref: Alarabiya