News @ M-Media

Tag: Hajj2023

  • ဗီအိုင်ပီ ဟဂျ်ဘုရားဖူးသူများကို ဆော်ဒီအိမ်ရှေ့မင်းသား လက်ခံကြိုဆို

    ဗီအိုင်ပီ ဟဂျ်ဘုရားဖူးသူများကို ဆော်ဒီအိမ်ရှေ့မင်းသား လက်ခံကြိုဆို

    ဇွန် ၃၀၊ ၂၀၂၃

    M-Media 


    -ဆော်ဒီ အိမ်ရှေ့မင်းသား မိုဟာမက် ဘင် ဆလ်မန်ဟာ မနေ့က VIP 

    ဟဂျ်ဘုရားဖူးခရီးသည်တွေကို မက္ကာမြို့မှာ လက်ခံတွေ့ဆုံ ကြိုဆိုခဲ့ပါတယ်။ 

    ကမ္ဘာတစ်၀ှမ်းက ဘုရင်တွေ၊ အစိုးရအရာရှိတွေ၊ ဘာသာရေးခေါင်းဆောင်တွေ၊ အခြား ထင်ရှားတဲ့ ပုဂ္ဂိုလ်တွေ ပါ၀င်ပါတယ်။ 

    မလေးရှားနိုင်ငံ ဘုရင်၊ ဆီနီဂေါ၊ ဘင်္ဂလားဒေ့ရှင်၊ ပါကစ္စတန်က သမ္မတတွေ၊ မော်လ်ဒိုက်နိုင်ငံ ဒုတိယသမ္မတ၊ အီဂျစ်၊ လက်ဘနွန်၊ ပါလက်စတိုင်း၊ ဆိုမာလီယာနဲ့ နိုင်ဂျာနိုင်ငံတိုက ၀န်ကြီးချုပ်တွေ စတဲ့ ခေါင်းဆောင်တွေ ဒီတွေ့ဆုံပွဲမှာ ပါ၀င်ခဲ့ပါတယ်။ 

    မြင့်မြတ်တဲ့ ဗလီ၀တ်ကျောင်းတော် ပရ၀ုဏ်အတွင်းမှာ ဘုရားဖူးခရီးသည်တွေကို ဒီလို လက်ခံကြိုဆို နှုတ်ဆက်ခွင့်ရတဲ့အတွက် ကျေနပ်ပီတိဖြစ်မိတယ်လို့ အိမ်ရှေ့မင်းသား ဘင် ဆလ်မန်က ပြောကြားခဲ့ပါတယ်။ 

    ဘုရားဖူးတွေ အေးအေးချမ်းချမ်း ဟဂျ်ပြုနိုင်ဖို့အတွက် ဆော်ဒီအစိုးရဟာ တတ်နိုင်သမျှ စွမ်းဆောင်ပေးထားတယ်လို့လည်း သူက ဆိုပါတယ်။ 

    အခုနှစ် ဟဂျ်ဘုရားဖူးရာသီမှာ ကမ္ဘာတစ်၀ှမ်းက အစ္စလာမ်ဘာသာ၀င် ၂ သန်းခွဲလောက် လာရောက်မယ်လို့ ဆော်ဒီအာဏာပိုင်တွေက ခန့်မှန်းထားပါတယ်။ 

    Ref: Arab News 

  • သမိုင်းတစ်လျှောက် လူအများဆုံးဖြစ်လာမယ့် ဟဂျ်ဘုရားဖူး ခရီးစဥ်

    သမိုင်းတစ်လျှောက် လူအများဆုံးဖြစ်လာမယ့် ဟဂျ်ဘုရားဖူး ခရီးစဥ်

    ဇွန် ၂၆၊ ၂၀၂၃

    M-Media 


    -အခုနှစ် ဟဂျ်ဘုရားဖူးကာလမှာ ကမ္ဘာတစ်၀ှမ်းက အစ္စလာမ်ဘာသာ၀င် ၂ ဒဿမ ၅ သန်းလောက် လာရောက်မယ်လို့ ဆော်ဒီအာဏာပိုင်တွေက ခန့်မှန်းတွက်ချက်ထာပါတယ်။ 

    ဒီအတိုင်းသာ ဖြစ်လာခဲ့ရင် သမိုင်းတစ်လျှောက် လူအများဆုံးလာရောက်တဲ့ ဟဂျ်ဘုရားဖူးကာလ ဖြစ်လာမှာ ဖြစ်ပါတယ်။ ဟဂျ်ကာလ ဘာသာရေးဆိုင်ရာ ၀တ်ပြုဆုတောင်းမှုတွေ၊ ဆောက်တည်မှုတွေဟာ တနင်္ဂနွေနေ့မှာ စတင်ခဲ့ပါတယ်။ 

    “သမိုင်းတစ်လျှောက် လူအများဆုံး ဟဂျ်ကျင့်စဥ်ကို ကျွန်တော်တို့ မြင်ရတော့မှာပါ” လို့ ဆော်ဒီ ဟဂျ်နှင့် အွမ္မရာဟ်၀န်ကြီးဌာနက တာ၀န်ရှိသူတစ်ဦးက ပြောပါတယ်။ 

    ကိုဗစ်ကပ်ရောဂါကြောင့် ၂၀၂၀ ခုနှစ်မှာ လူတစ်သောင်းသာ ဟဂျ်ပြုခွင့်ရခဲ့ပြီး၊ ၂၀၂၁ မှာ ၅၉၀၀၀၊ မနှစ်က လူတစ်သန်း အသီးသီး တိုးလာခဲ့ပါတယ်။ 

    အခုနှစ် ကမ္ဘာတစ်၀ှမ်းက ဟဂျ်ဘုရားဖူး ခရီးသည်တွေ ရင်ဆိုင်ရမယ့် စိန်ခေါ်မှုဟာ အပူလွန်ကဲမှု ဖြစ်ပါတယ်။ ဆော်ဒီအာရေဗျမှာ ပျမ်းမျှအပူချိန်ဟာ ၄၅ ဒီဂရီ ဆဲလ်စီးယက်စ် ရှိပါတယ်။ 

    အပူကြောင့်ဖြစ်လာနိုင်တဲ့ ကျန်းမာရေးပြဿနာတွေကို ဖြေရှင်းနိုင်ဖို့အတွက် ကျန်းမာရေး၀န်ထမ်း ၃၂၀၀၀ ကျော်၊ အရေးပေါ်လူနာတင်ယာဥ် ထောင်နဲ့ချီ ပြင်ဆင်ထားတယ်လို့ ဆော်ဒီအာာပိုင်တွေက ပြောပါတယ်။ 

    Ref: Aljazeera 

  • ဆော်ဒီအာရေဗျ၏ ဟဂျ်လုံခြုံရေးအဖွဲ့ စစ်ရေးပြ အခမ်းအနား

    ဆော်ဒီအာရေဗျ၏ ဟဂျ်လုံခြုံရေးအဖွဲ့ စစ်ရေးပြ အခမ်းအနား

    ဇွန် ၂၂၊ ၂၀၂၃

    M-Media 


    -ဟဂျ်ဘုရားဖူးကာလ လုံခြုံရေးအဖွဲ့ရဲ့ စစ်ရေးပြအခမ်းအနားကို မနေ့က ကျင်းပပြုလုပ်ခဲ့ပြီး ဆော်ဒီအာရေဗျ ပြည်ထဲရေး၀န်ကြီး အဘ်ဒူလ် အဇစ် ဘင် ဆာအွဒ် တက်ရောက်ခဲ့ပါတယ်။ 

    ဒီစစ်ရေးပြအခမ်းအနားကို လုံခြုံရေးတပ်ဖွဲ့ လေ့ကျင့်ပြင်ဆင်မှု ပြီးမြောက်တဲ့ အထိမ်းအမှတ်အနေနဲ့ ပြုလုပ်တာပါ။ မက္ကာနဲ့ မဒီနာမြို့တွေမှာ တပ်ဖွဲ့၀င်တွေ စတင် တာ၀န်ထမ်းဆောင်နေပြီလို့ ဆော်ဒီ ပြည်သူ့လုံခြုံရေး ညွှန်ကြားရေးမှူး မိုဟာမက် အလ်-ဘာဆာမီက ပြောပါတယ်။ 

    ဟဂျ်လုံခြုံရေးတပ်ဖွဲ့ဟာ တာ၀န်ထမ်းဆောင်ရာမှာ ဉာဏ်ရည်တုလို အဆင့်မြင့် နည်းပညာတွေကို သုံးစွဲမှာဖြစ်ပြီး စစ်တပ်၊ ရဲနဲ့ အခြား ဆော်ဒီအစိုးရဌာနတွေနဲ့ ပူးပေါင်းဆောင်ရွက်သွားမှာ ဖြစ်ပါတယ်။  

    မကြာခင်ကျရောက်မယ့် ဟဂျ်ဘုရားဖူးကာလမှာ ကမ္ဘာတစ်၀ှမ်းက သန်းနဲ့ချီတဲ့ အစ္စလာမ်ဘာသာ၀င်တွေ ဆော်ဒီအာရေဗျကို လာရောက်ပြီး ဟဂျ်ပြုကြမှာ ဖြစ်ပါတယ်။ 

    Ref: Arab News 

  • ယခုနှစ်ဟဂျ်ရာသီတွင် ကိုဗစ်မဖြစ်ခင်ကအတိုင်း လူသန်းချီ ဘုရားဖူးခွင့် ပြန်ရမည်

    ယခုနှစ်ဟဂျ်ရာသီတွင် ကိုဗစ်မဖြစ်ခင်ကအတိုင်း လူသန်းချီ ဘုရားဖူးခွင့် ပြန်ရမည်

    ဇန်န၀ါရီ ၁၀၊ ၂၀၂၃

    M-Media 


    – အခုနှစ် ဟဂျ်ဘုရားဖူးရာသီမှာ ကမ္ဘာတစ်၀ှမ်းက အစ္စလာမ်ဘာသာ၀င်တွေကို ကန့်သတ်ချက်မရှိဘဲ လာရောက်ဘုရားဖူးခွင့်ပြုမယ်လို့ ဆော်ဒီအာဏာပိုင်တွေက ပြောပါတယ်။ 

    ကိုဗစ်မဖြစ်ခင် ၂၀၁၉ ခုနှစ်က ဟဂျ်ပြုသူ ၂.၄ သန်းရှိခဲ့တာပါ။ ၂၀၂၀ ခုနှစ် ကိုဗစ်ကပ်ရောဂါကြောင့် ဆော်ဒီအာရေဗျမှာ နေထိုင်တဲ့ လူ တစ်ထောင်ကိုသာ အာဏာပိုင်တွေက ဟဂျ်ပြုခွင့် ပေးခဲ့ပါတယ်။

    ၂၀၂၁ ခုနှစ်မှာ နိုင်ငံအတွင်းနေထိုင်တဲ့ လူ ၆ သောင်းကို ခွင့်ပြုပေးခဲ့ပြီး ၂၀၂၂ ခုနှစ်မှာ ကမ္ဘာတစ်၀ှမ်းက အသက် ၆၅ နှစ်အောက် ကိုဗစ် Negative ရလဒ်ပြနိုင်တဲ့သူတွေကို ဘုရားဖူးခွင့်ပြုခဲ့ပါတယ်။ 

    ၂၀၂၂ ခုနှစ် ဟဂျ်ကာလမှာ ကမ္ဘာတစ်၀ှမ်းက လူပေါင်း ၉ သိန်းလောက် လာရောက်ခဲ့ကြပါတယ်။ 

    အခုနှစ်မှာတော့ ကန့်သတ်ချက်တွေအားလုံးကို ဆော်ဒီအာဏာပိုင်တွေက ဖယ်ရှားပေးမှာ ဖြစ်ပါတယ်။ 

    “ဒီအစည်းအ၀ေးမှာ သတင်းကောင်းနှစ်ခု ပြောချင်ပါတယ်။ တစ်ခုက အခုနှစ်ဟဂျ်ရာသီမှာ အသက်ကန့်သတ်ချက် မထားတော့ဘဲ ကိုဗစ်မဖြစ်ခင်က အရေအတွက်အတိုင်း ခွင့်ပြုပေးမှာ ဖြစ်ပါတယ်” လို့ ဆော်ဒီ ဟဂျ်နှင့် အွမ္မရာရေးရာ၀န်ကြီး သောင်ဖီက် ဘင် ဖောင်ဇန် အလ်-ရာဘီယာက မနေ့က အစည်းအ၀ေးမှာ ပြောကြားခဲ့ပါတယ်။ 

    နောက်ထပ်သတင်းတစ်ခုက ဟဂျ်ခရီးစဥ်အတွက် ကမ္ဘာတစ်၀ှမ်းက လိုင်စင်ရကုမ္ပဏီတွေကိုသာ လုပ်ကိုင်ခွင့်ပေးမယ်လို့ သူက ဆိုပါတယ်။ 

    ၂၀၂၃ ခုနှစ် ဟဂျ်ဘုရားဖူးကာလဟာ ဇွန်လနှောင်းပိုင်းမှာ ကျရောက်မှာဖြစ်ပြီး ကျန်းမာရေးဆိုင်ရာ ကြိုတင်ကာကွယ်မှုကို ဆော်ဒီအာဏာပိုင်တွေက လုပ်ဆောင်မလားဆိုတာ တိတိကျကျ မသိရပါဘူး။

    Ref: Aljazeera