သြဂုတ် ၂၊ ၂၀၂၃
M-Media
-အိန္ဒိယနိုင်ငံတောင်ပိုင်း ကီရာလာပြည်နယ်က သန့်ရှင်းရေးအလုပ်သမား ၁၁ ဦးဟာ ရူပီး သန်း ၁၀၀ အထူးဆုကြီးကို ဆွတ်ခူးသွားပါတယ်။
ပါရက်ပါနန်ဂါဒီလို့ခေါ်တဲ့ မြို့ငယ်လေးမှာ အမှိုက်လိုက်သိမ်းကြသူတွေပါ။ တစ်ရက်လုပ်ခ ရူပီး ၂၅၀ လောက်သာရပြီး မိသားစု စား၀တ်နေရးအတွက် မလောက်ငှကြပါဘူး။
ဒါပေမယ့် အဲ့ဒီ သန့်ရှင်းရေးအလုပ်သမား ၁၁ ဦးဟာ လစဥ် ထီစပ်တူထိုးလေ့ ရှိကြပါတယ်။
“ရူပီးတစ်ထောင်ပေါက်လည်း ကျွန်မတို့ ၀ေမျှယူကြတယ်” လို့ အမ်ပီ ရဒ်ဟာဆိုတဲ့ အမျိုးသမီးက ပြောပါတယ်။
ပြီးခဲ့တဲ့လမှာ မိုးရာသီအထူးဆုကြီး ဆွတ်ခူးဖို့အတွက် သူတို့ ၁၁ ဦးဟာ ရူပီး ၂၅၀ တန်ထီကို ထိုးခဲ့ကြပါတယ်။
အသက် ၇၂ နှစ်အရွယ် ကူတီမာလူက သူ့မှာ ပိုက်ဆံမလောက်တဲ့အတွက် ထီထိုးဖို့ ရဒ်ဟာ ပိုက်ဆံလာကောက်တဲ့အချိန် စိတ်မကောင်းဖြစ်ခဲ့တယ်လို့ ပြောပါတယ်။
“ချယ်ရူမန်နီ ဘေဘီ(အဖွဲ့ထဲမှ တစ်ဦး) က သူ့မှာ ၂၅ ရူပီးရှိတယ်။ ထီဖိုးအတွက် ချေးပေးမယ်လို့ ပြောပါတယ်”
ချယ်ရူမန်နီနဲ့ ကူတီမာလူတို့ဟာ တစ်ယောက် ၁၂ ရူပီးခွဲစီ ထည့်၀င်ခဲ့ပြီး ကျန်တဲ့ အမျိုးသမီး ၉ ဦးကတော့ ၂၅ ရူပီးစီ ထည့်၀င်ခဲ့ပါတယ်။
“ဘာဆုပဲပေါက်ပေါက် ခွဲယူကြမယ်လို့ ကျွန်မတို့ သဘောတူခဲ့ကြတာပါ။ ဒီလိုဆုကြီး ပေါက်လိမ့်မယ်လို့လည်း မထင်ထားပါဘူး” လို့ ကူတီမာလူက ဆိုပါတယ်။
ထီထွက်ပြီး နောက်တစ်ရက်အကြာမှ အဖွဲ့ထဲက အမျိုးသမီးတစ်ဦးဟာ သူ့အမျိုးသားကို ထီတိုက်ခိုင်းခဲ့ပြီး ကံထူးတယ်ဆိုတာ သိခဲ့ရတာ ဖြစ်ပါတယ်။
“အထူးဆုကို ကျွန်မတို့ထိုးတာ ၄ ခါရှိပြီ။ ၄ ကြိမ်မြောက်မှာ ကံထူးသွားတာပေါ့” လို့ ရဒ်ဟာက ပြောပါတယ်။
ဒီလိုအထူးဆု ပေါက်တယ်ဆိုတာ မယုံခဲ့ဘူးလို့ အသက် ၆၂ နှစ်အရွယ် ချယ်ရူမန်နီက ပြောပါတယ်။
“ကျွန်မက သိပ်ကံကောင်းလေ့ မရှိဘူး”
၂၀၁၈ ခုနှစ် ကီရာလာရေကြီးမှုမှာ ချယ်ရူမန်နီတစ်ယောက် နေအိမ်ဆုံးရှုံးခဲ့ရပြီး ထီပေါက်ပြီးနောက် အိမ်အသစ်ပြန်ဆောက်ဖို့ စီစဥ်နေပါတယ်။
သူတို့အဖွဲ့ထဲက လူတိုင်းဟာ အကျပ်အတည်း တစ်ခုမဟုတ် တစ်ခုနဲ့ ရင်ဆိုင်နေရသူတွေပါ။
အသက် ၅၀ အရွယ် ကေဘင်ဒူရဲ့ ခင်ပွန်းဟာ ကျောက်ကပ်ရောဂါနဲ့ ပြီးခဲ့တဲ့နှစ်မှာ ဆုံးပါးသွားခဲ့ပါတယ်။ ငွေမရှိတဲ့အတွက် ကျောက်ကပ်အစားထိုးဖို့ မတတ်နိုင်ခဲ့ပါဘူး။
“ကျောက်ကပ်ဆေးဖို့ ဖယ်ထားတဲ့ ငွေထဲကနေ ကျွန်မခင်ပွန်းက ထီဖဲ့ထိုးခဲ့သေးတယ်။ အိမ်ကိုလည်း သူ အပြီးသတ် မဆောက်သွားနိုင်ခဲ့ဘူး။ အခု ကျွန်မ အပြီးသတ်ပေးရေတာ့မှာပေါ့”
အသက် ၁၅ နှစ်အရွယ် သမီးဖြစ်သူ ပညာတတ်ဖြစ်ကာ အလုပ်ကောင်းကောင်းရဖို့အတွက် ထီပေါက်တဲ့ငွေကို သုံးစွဲသွားမယ်လို့လည်း သူမက ပြောပါတယ်။
မိမိတို့အိမ်ထောင်ရေးကို တွေးပူနေကြောင်း ထီမထွက်ခင် ၁ ရက်အလိုက မိဘတွေ ပြောခဲ့သေးတယ်လို့ အသက် ၄၉ နှစ်အရွယ် လက်ရှမီးက ပြောပါတယ်။
သူမအမျိုးသားဟာ ဆောက်လုပ်ရေးလုပ်သားတစ်ဦးဖြစ်ပြီး ပြည်နယ်အတွင်း မိုးကြီးနေတဲ့အတွက် လတ်တလောမှာ အလုပ်မရှိပါဘူး။
ထီပေါက်တဲ့ငွေနဲ့ သမီးရဲ့ ပညာရေးကို ပံ့ပိုးပေးနိုင်မယ့်အတွက် လက်ရှမီးတို့ ဇနီးမောင်နှံ စိတ်အေးသွားရပါပြီ။
အဖွဲ့ထဲက အသက် ၅၆ နှစ်အရွယ် လီလာမှာ ခွဲစိပ်ကုသဖို့လိုအပ်နေတဲ့ သမီးတစ်ယောက် ရှိပါတယ်။
“သူ့ကို မင်္ဂလာဆောင်ပေးဖို့ ကျွန်မရဲ့အိမ်ကို ပေါင်ခဲ့ရပါတယ်”
အစိုးရက အခွန်နှုတ်ပြီးရင် သူတို့ ၁၁ ဦးဟာ ရူပီး ၆၃ သန်း ရရှိမှာ ဖြစ်ပါတယ်။
၉ ယောက်က တစ်ဦးကို ၆ ဒဿမ ၃ သန်း ရရှိမှာဖြစ်ပြီး ချယ်ရူမန်နီနဲ့ ကူတီမာလူတို့က ၃ ဒဿမ ၁၅ သန်းစီ ရရှိမှာပါ။
သူတို့ ၁၁ ဦးဟာ အမှိုက်သိမ်းတဲ့အလုပ်နဲ့ မလောက်ငှတာကြောင့် အိမ်သာဆောက်တာလို အခြားအောက်ခြေသိမ်းအလုပ်တွေလည်း လိုက်လုပ်ရပါတယ်။
ထီပေါက်သွားပေမယ့် သူတို့ ဒီအလုပ်ကို ဆက်လုပ်နေကြအုံးမှာပါ။
“ကျွန်မတို့ ဆုံးဖြတ်ထားတာ တစ်ခုရှိတယ်။ ဒီအလုပ်ကြောင့် ကျွန်မတို့ စုစည်းမိပြီး အခုလို ချမ်းသာလာတဲ့အတွက် ဒီအလုပ်ကို မထွက်ဘူး ဆိုပြီးတော့ပေါ့” လို့ လီလာက ပြောပါတယ်။
Ref: BBC
