စက်တင်ဘာ ၂၂၊ ၂၀၁၉
M-Media
-အဘူဒါဘီမြို့မှာ ဂျူးဘုရားကျောင်း၊ ခရစ်ယာန်ဘုရားကျောင်းနဲ့ ဗလီဝတ်ကျောင်းတော်တို့ ပါဝင်မယ့် အထိမ်းအမှတ်နေရာတစ်ခု ဖန်တီးသွားမယ်လို့ အာရပ်စော်ဘွားများပြည်ထောင်စု (ယူအေအီး) အာဏာပိုင်တွေက ကြေငြာလိုက်ပါတယ်။
Abrahamic Family House လို့ အမည်ပေးမယ့် အဲဒီ အထိမ်းအမှတ်နေရာကို လက်ရှိမှာ စတင်အကောင်အထည်ဖော်နေပြီး ၃ နှစ်အကြာ ၂၀၂၂ ခုနှစ်မှာ ဖွင့်လှစ်နိုင်ဖို့ စီစဉ်ထားပါတယ်။
စီမံကိန်းဟာ ယူအေအီး လူသားထုချစ်ကျည်ရင်းနှီးရေး အဆင့်မြင့်ကော်မတီ ( Higher Committee of Human Fraternity) က ဆောင်ရွက်တဲ့ ပထမဆုံး စီမံကိန်းလည်း ဖြစ်ပါတယ်။
ကော်မတီရဲ့ ရည်ရွယ်ချက်က ဘာသာစုံ၊ လူမျိုးစုံ၊ အသိုင်းအဝိုင်းစုံက လူတွေအကြား အပြန်အလှန် လေးစားမှု၊ ဆွေးနွေးညှိနှိုင်းမှုတွေ ပိုမိုအားကောင်းလာစေဖို့ ဖြစ်ပါတယ်။
အခုနှစ် ဖေဖော်ဝါရီလ ပုပ်ရဟန်းမင်းကြီး ဖရန်စစ် ယူအေအီးနိုင်ငံကို လာရောက်စဉ်မှာ အီဂျစ် အလ်-အဇ်ဟာရ် အစ္စလာမ်တက္ကသိုလ်က မွဖ်သီ ဒေါက်တာ အဟ်မဒ် အလ် တိုင်ယစ်ဘ်နဲ့ တွေ့ဆုံကာ ‘ကမ္ဘ္ဘာကြီးငြိမ်းချမ်းရေးနှင့် ညီညွတ်စွာ အတူယှဉ်တွဲနေထိုင်ရေး စာတမ်း’ တစ်ခုကိုလက်မှတ်ရေးထိုးခဲ့ပါတယ်။
ယူအေအီးရဲ့ လူသားထုချစ်ကျည်ရင်းနှီးရေး အဆင့်မြင့်ကော်မတီက ဒီစာတမ်းပါ ရည်ရွယ်ချက်တွေကို အကောင်အထည်ဖော် ဆောင်ရွက်မှာ ဖြစ်ပါတယ်။
Abrahamic Family House ကို အဘူဒါဘီက ဆာဒီယက်ကျွန်းမှာ တည်ဆောက်မှာ ဖြစ်ပါတယ်။ ဂျူးဘုရားကျောင်း၊ ခရစ်ယာန်ဘုရားကျောင်းနဲ့ ဗလီဝတ်ကျောင်းတော်တွေကို အတူတကွ တည်ဆောက်ကာ မတူညီတဲ့ လူမျိုးတွေ၊ ဘာသာတရားတွေအကြား စည်းလုံးညီညွတ်မှု ပိုမိုရရှိလာအောင် ဆောင်ရွက်သွားမှာ ဖြစ်ပါတယ်။
အဆောက်အဦးဒီဇိုင်းကို နာမည်ကျော် ဗိသုကာပညာရှင် ဆာ ဒေးဗစ် အဒ်ဂျာယီက ဆွဲပေးထားတာပါ။
Ref: Gulf News
