News @ M-Media

Tag: Islam In UK

  • ဓားနဲ့ထိုးသူကို ခွင့်လွှတ်သည်ဟု လန်ဒန်ဗလီမှ မုအ်ဇင်ပြော

    ဓားနဲ့ထိုးသူကို ခွင့်လွှတ်သည်ဟု လန်ဒန်ဗလီမှ မုအ်ဇင်ပြော

    ဖေဖော်ဝါရီ ၂၂၊ ၂၀၂၀
    M-Media

    ဓားထိုးခံရသူ ရာဖတ် မဂ်လဒ်

    -မိမိကို ဓားနဲ့ထိုးသူကို ခွင့်လွှတ်တယ်လို့ လန်ဒန်ဂျာ‌မေဗလီဝတ်ကျောင်းတော်ရဲ့ မုအ်ဇင် နိဗ္ဗာန်ဆော်က ပြောကြားလိုက်ပါတယ်။

    အသက် ၇၀ ကျော်အရွယ် ရာဖတ် မဂ်လဒ်ဟာ ကြာသာပတေးနေ့က ဗလီထဲမှာ အသက် ၂၉ နှစ်အရွယ် လူဖြူအမျိုးသား ဒန်နီယဲလ် ဟော်တွန်ရဲ့ ဓားနဲ့ထိုးခြင်းကို ခံခဲ့ရတာပါ။ ဒီအဖြစ်အပျက်ကြောင် မဂ်လဒ်တစ်ယောက် လည်ပင်းမှာ ထိုးသွင်းဒဏ်ရာ ရသွားခဲ့ပြီး ဆေးကုသမှု ခံခဲ့ရပါတယ်။ တိုက်ခိုက်သူကိုတော့ ဝတ်ပြုဖို့လာသူတွေက ၀ိုင်းဖမ်းကာ ရဲလက်အပ်ခဲ့ပါတယ်။

    မနေ့က ဆေးရုံကနေဆင်းကာ သောကြာနေ့ဝတ်ပြုဖို့ ဗလီကိုပြန်လာတဲ့ မဂ်လဒ်က တိုက်ခိုက်ခဲ့သူကို ခွင့်လွှတ်တယ်လို့ ပြောကြားခဲ့ပါတယ်။

    စကော့တလန်ယာ့ဒ် စုံထောက်အဖွဲ့က ဒီအဖြစ်အပျက်ကို အကြမ်းဖက်မှုမဟုတ်ဘဲ ရိုးရိုးဓားထိုးမှုအဖြစ်နဲ့သာ စုံစမ်းစစ်ဆေးနေပါတယ်။ တိုက်ခိုက်ခဲ့သူ ဒန်နီယဲလ် ဟော်တွန်ဟာ အပြင်းအထန်နာကျင်စေမှု၊ ချွန်ထက်တဲ့လက်နက် ကိုင်ဆောင်မှုတွေနဲ့ တရားစွဲဆို ခံထားရပါတယ်။

    ‌လန်ဒန်မြို့တော်ဝန် ဆာဒစ်ခန်းဟာ သောကြာနေ့က လန်ဒန်ဂျာမေဗလီကို သွားရောက်ကာ ဝတ်ပြုဆုတောင်းခဲ့ပြီး လန်ဒန်ပြည်သူတွေအနေနဲ့ သတိဝိရိယရှိကြဖို့ တိုက်တွန်းခဲ့ပါတယ်။

    Ref: BBC

  • ဥရောပ၏ ပထမဆုံး Eco-friendly ဗလီကို ကမ်းဘရစ်ဂျ်မြို့တွင် ဖွင့်လှစ်

    ဥရောပ၏ ပထမဆုံး Eco-friendly ဗလီကို ကမ်းဘရစ်ဂျ်မြို့တွင် ဖွင့်လှစ်

    ဒီဇင်ဘာ ၆၊ ၂၀၁၉
    M-Media

    -ယူကေ ကမ်းဘရစ်ဂျ်မြို့က နာမည်ကျော် ‘ကမ်းဘရစ်ဂျ် ဂျာမေဗလီ’ (Cambridge Central Mosque) ကို မနေ့မှာ ဖွင့်လှစ်ခဲ့ပြီး ပြည်တွင်း၊ ပြည်ပက ဧည့်သည်ပေါင်း ရာနဲ့ချီ တက်ရောက်ချီးမြှင့်ခဲ့ကြပါတယ်။

    Cambridge Central Mosque ဟာ ဥရောပရဲ့ ပထမဆုံး သဘာ၀ပတ်ဝန်းကျင်နဲ့ ကိုက်ညီတဲ့ ဗလီဖြစ်ပြီး အစ္စလာမ်ဘာသာဝင်တွေရဲ့ လှူဒါန်းငွေတွေနဲ့ တည်ဆောက်ထားတာပါ။ ဗိသုကာလက်ရာပိုင်းမှာလည်း ပြောင်မြောက်တယ်လို့ နာမည်ကြီးပါတယ်။

    ဗလီဟာ ကာဘွန်ထုတ်လွှတ်မှု လုံးဝမရှိတဲ့ အဆောက်အဦးတစ်ခုဖြစ်ပြီး နေစွမ်းအင်၊ လေစွမ်းအင်၊ မိုးရေစုဆောင်း ပြန်လည်အသုံးပြုရေး နည်းပညာလို ပြည့်ဖြိုးမြဲရင်းမြစ်တွေကို အသုံးပြုထားပါတယ်။ ဗလီဝတ်ကျောင်းတော်ကို ဗြိတိန်ရဲ့ နာမည်ကျော်အဆိုတော် ကက်စတီဗင်က ကမကထပြု တည်ဆောက်တာပါ။ ကက်စတီဗင်ဟာ ၁၉၇၇ ခုနှစ်မှာ အစ္စလာမ်သာသနာကို ပြောင်းလဲသက်ဝင်ခဲ့တာ ဖြစ်ပါတယ်။

    ဗလီ၀တ်ကျောင်းတော်ရဲ့ ဂေါပကအဖွဲ့ Cambridge Mosque Trust က လူမျိုးပေါင်း ၇၀ ကျော်လောက် စုစည်းထားတဲ့ ကမ်းဘရစ်ဂျ်မြို့ မွတ်စလင်လူအဖွဲ့အစည်းဟာ သဘာ၀ပတ်ဝန်းကျင်နဲ့ ကိုက်ညီတဲ့ ဗလီဝတ်ကျောင်းတော်တစ်လုံး ပေါ်ပေါက်လာဖို့ အချိန်တော်ကြာကတည်းက စီစဉ်လာတာဖြစ်ပြီး အခု အိပ်မက်တွေ အမှန်တကယ် ဖြစ်လာပြီလို့ ထုတ်ပြန်ခဲ့ပါတယ်။

    “လှူဒါန်းသူတွေ၊ ဒေသခံတွေအားလုံးကို ကျေးဇူးတင်ပါတယ်။ ကမ်းဘရစ်ဂျ်မြို့ရဲ့ မိုးကုပ်စက်၀ိုင်းမှာ ငှားငှားစွင့်စွင့် တည်ရှိနေမယ့် ဒီအဆောက်အဦး ပေါ်ပေါက်လာဖို့အတွက် ၁၀ နှစ်လောက် စိတ်ရှည်ရှည်စောင့်ဆိုင်းခဲ့သူတွေကိုလည်း ကျွန်တော်တို့ ကျေးဇူးတင်ပါတယ်။ အရှေ့တိုင်းနဲ့ အနောက်တိုင်းအကြား သဟဇာတဖြစ်မှုဆိုတဲ့ ပြယုဂ်နဲ့အတူ ဗလီဟာ ငြိမ်းချမ်းရေး၊ ဝတ်ပြုဆုတောင်းမှုနဲ့ အပြန်အလှန်နားလည်မှုတွေကို ဖြန့်ဖြူးသွားမှာ ဖြစ်ပါတယ်”

    Cambridge Mosque Trust ဗလီဝတ်ကျောင်းတော် တည်ဆောက်ရေးကို ၂၀၀၈ ခုနှစ်ကတည်းက စီစဉ်ခဲ့တာဖြစ်ပြီး အကြောင်းအမျိုးမျိုးကြောင့် ၁၀ နှစ်လောက်ကြာပြီးမှ အကောင်အထည်ပေါ်လာတာ ဖြစ်ပါတယ်။

    ဗလီဝတ်ကျောင်းတော်မှာ ဝတ်ပြုဆောင်၊ စာသင်ဆောင်တွေအပြင် အများပြည်သူ အပန်းဖြေနိုင်မယ့် ပန်းခြံတစ်ခုလည်း ပါဝင်ပါတယ်။ ပန်းခြံထဲမှာတော့ ယူကေ၊ အရှေ့အလယ်ပိုင်းနဲ့ အာရှက အပင်မျိုးစုံကို စိုက်ပျိုးထားပါတယ်။

    ကိုယ်လက်ဆေးကြောသန့်စင်ရာနေရာ၊ တရားဟောစင်မြင့်၊ ရှေ့ဆောင်အီမာန် ဝတ်ပြုရာနေရာတွေကိုတော့ တူရကီဗိသုကာပညာရှင် Hüseyin Kutlu က ဒီဇိုင်းဆွဲတည်ဆောက်ပေးထားတာ ဖြစ်ပါတယ်။ ဗလီရဲ့ တစ်ခြားအစိတ်အပိုင်းတွေကို ဗြိတိန်ဗိသုကာပညာရှင်တွေက ဒီဇိုင်းဆွဲပေးတာပါ။

    ဗလီဟာ British Construction Industry Awards ဆုပေးပွဲမှာ ‘၂၀၁၉ ခုနှစ် ယဉ်ကျေးမှုနှင့် အပန်းဖြေမှုဆိုင်ရာ စီမံကိန်းဆု'(Culture and Leisure Project of the Year) ဆုကို ရရှိထားသလို၊ ဒေသတွင်းက Royal Town Planning Institute ဆု၊ Wood Award ဆုပေးပွဲမှာ ‘ပညာရေးနှင့် အများပြည်သူဆိုင်ရာဆု’ (Education and Public Sector) ဆု၊ ဗြိတိန်သျှနိုင်ငံလုံးဆိုင်ရာ Best Community and Faith Project စီမံကိန်းမှာ
    ‘အကောင်းဆုံး ဗိသုကာလက်ရာဆု’ (AJ Architecture Awards) တွေကို ရရှိထားပါတယ်။

    Ref : Cambridge Independent

  • မွတ်စလင်အမျိုးသမီးများကို စော်ကားသည့် မှတ်ချက်အတွက် ဗြိတိန်ဝန်ကြီးချုပ် ပြန်တောင်းပန်

    မွတ်စလင်အမျိုးသမီးများကို စော်ကားသည့် မှတ်ချက်အတွက် ဗြိတိန်ဝန်ကြီးချုပ် ပြန်တောင်းပန်

    ဒီဇင်ဘာ ၅၊ ၂၀၁၉
    M-Media

    -မွတ်စလင်အမျိုးသမီးတွေကို စော်ကားရာရောက်တဲ့ အရင်ကမှတ်ချက်တစ်ခုအတွက် ဗြိတိန်ဝန်ကြီးချုပ် ဘောရစ်ဂျွန်ဆင်က ပြန်လည်တောင်းပန်လိုက်ပါတယ်။

    ဂျွန်ဆင်ဟာ ပြီးခဲ့တဲ့နှစ်က Telegraph သတင်းစာမှာ ဆောင်းပါတစ်ပုဒ် ရေးသားခဲ့ပြီး အဲဒီဆောင်းပါးမှာ ဘုရ်ခါဝတ်ရုံဝတ်တဲ့ မွတ်စလင်အမျိုးသမီးတွေကို ‘စာတိုက်ပုံး’ ‘ဘဏ်ဓားပြ’ စသဖြင့် ရေးသားခဲ့တာပါ။

    မနေ့က ITV ရဲ့ This Morning အစီအစဉ်မှာ အစီအစဉ်တင်ဆက်သူတွေက ဒီမှတ်ချက်ဟာ မွတ်စလင်တွေကို စော်ကားသလိုဖြစ်ပြီး ထိခိုက်နာကျင်စေခဲ့ရတယ်လို့ ပြောကြားရာမှာတော့ ဘောရစ်ဂျွန်ဆင်က ပြန်လည်တောင်းပန်ခဲ့ပါတယ်။

    “ဆောင်းပါးအမျိုးမျိုးကနေ လူတွေက လိုချင်တာ ဆွဲထုတ်ပြောကြတယ်။ ကျွန်တော်ရေးတာဟာ စော်ကားသလိုဖြစ်သွားရင်တောင်းပန်တယ်လို့ အရင်က ကျွန်တော်ပြောခဲ့ပြီး အခုလည်း ထပ်ပြောပါတယ်”

    သူ့ရဲ့ ကွန်ဆာဗေးတစ်ပါတီဟာ နိုင်ငံခြားသားကြောက်ရောဂါ၊ သမရိုးကျ ထင်မြင်ယူဆ စွပ်စွဲမှုတွေအားလုံးကို စုံစမ်းကိုင်တွယ်နေတယ်လို့လည်း ဘောရစ်ဂျွန်ဆင်က ထည့်သွင်းပြောကြားခဲ့ပါတယ်။

    Telegraph က ဆောင်းပါးမှာ လူတွေက စာတိုက်ပုံးလိုအဖြစ်ခံပြီး ဘုရ်ခါဝတ်ဆင်တာမျိုးဟာ ရူးနှမ်းပေမယ့် ဘုရ်ခါဝတ်ဆင်မှုကို မပိတ်ပင်သင့်ဘူးလို့ ရေးသားခဲ့တာပါ။ ဒီလိုရေးသားမှုအတွက် အဲဒီတုန်းက ဝန်ကြီးချုပ် ထရီဇာမေအပါအဝင် ကွန်ဆာဗေးတစ်ပါတီ အကြီးအကဲတွေက တောင်းပန်ဖို့ ပြောခဲ့ပေမယ့် ဂျွန်ဆင်ကတော့ မလိုက်နာခဲ့ပါဘူး။

    ဂျွန်ဆင်ဟာ Single mother နဲ့ သူတို့ရဲ့ကလေးတွေအကြောင်း ဝေဖန်ရေးသားတာမျိုး ရှိခဲ့ပြီး အဲဒီအတွက် ITV အစီအစဉ်တင်ဆက်သူတွေရဲ့ မေးမြန်းမှုမှာ တောင်းပန်ဖို့ ငြင်းဆိုခဲ့ပါတယ်။

    Ref: The Guardian

  • ဗြိတိန်၏ အကောင်းဆုံး ဗိသုလက်ရာဆုကို ကမ်းဘရစ်ဂျ်ဗလီက ရရှိ

    ဗြိတိန်၏ အကောင်းဆုံး ဗိသုလက်ရာဆုကို ကမ်းဘရစ်ဂျ်ဗလီက ရရှိ

    နိုဝင်ဘာ ၂၆၊ ၂၀၁၉
    M-Media

    ဆုရသွားသည့် ကမ်းဘရစ်ဂျ်ဗလီ

    -ယူကေတစ်ဝှမ်းက ဘာသာ၊ လူမျိုးပေါင်းစုံရဲ့ လူသာအကျိုးပြု လုပ်ငန်းတွေ၊ စီမံကိန်းတွေကို စောင့်ကြည့်မှတ်တမ်းတင်တဲ့ Community and Faith စီမံကိန်းရဲ့ ‘၂၀၁၉ ခုနှစ် ဗိသုကာဆု’ ကို ကမ်းဘရစ်ဂျ်‌မြို့မှာရှိတဲ့ ဗလီဝတ်ကျောင်းတော်က ရရှိသွားပါတယ်။

    ဆုရသွားတဲ့ ‘ကမ်းဘရစ်ဂျ် ဗလီ’ (Cambridge Mosque) ဟာ ဥရောပရဲ့ ပထမဆုံး ဂေဟစနစ်နဲ့ကိုက်ညီတဲ့ ဗလီတစ်လုံးဖြစ်ပြီး ဆန်းသစ်တဲ့ ဗိသုကာလက်ရာ၊ အမြဲမပြတ်ရရှိနိုင်တဲ့ ရင်းမြစ်တွေကို အသုံးပြုထားမှု၊ သက်တောင့်သက်သာရှိမှုတွေကြောင့် Community and Faith စီမံကိန်းရဲ့ Architects’ Awards ဆုကို ရရှိခဲ့တာ ဖြစ်ပါတယ်။

    ဗလီရဲ့ ဗိသုကာလက်ရာဟာ မွတ်စလင်ရိုးရာနဲ့ ခေတ်သစ်အမြင်တွေကို ပေါင်းစပ်ထားတာပါ။ ကာဘွန်ထုတ်လွှတ်မှုကို အနည်းဆုံးဖြစ်အောင် စီမံထားသလို၊ သဘာ၀ပတ်ဝန်းကျင်နဲ့ ကိုက်ညီတဲ့ နည်းပညာတွေကိုလည်း အသုံးပြုထားပါတယ်။ မိုးရေကို ဗလီရဲ့ ရေအရင်းအမြစ်အဖြစ် စီစဉ်ထားပြီး၊ လေအားအသုံးပြု အပူစုပ်စက်တွေ၊ နေစွမ်းအင်အသုံးပြု ဓာတ်အားပေးနည်းလမ်းတွေကိုလည်း အသုံးပြုထားပါတယ်။

    Community and Faith စီမံကိန်းရဲ့ ဗိသုကာဆိုင်ရာဆုဟာ စာသင်ကျောင်းတွေ၊ ဝတ်ပြုရာအဆောက်အဦးတွေ၊ လူနေအိမ်ယာတွေ၊ အပန်းဖြေနေရာတွေလို ယူကေအတွင်း နယ်ပယ်စုံက ဗိသုကာလက်ရာတွေကို စာရင်းပြုစု ရွေးချယ်တာ ဖြစ်ပါတယ်။ ဇကာတင်စာရင်းမှာ ပါဝင်တဲ့ အဆောက်အဦးတွေကို ဆုရွေးချယ်ရေးအဖွဲ့က တာဝန်ရှိသူတွေကိုယ်တိုင် သွားရောက်လေ့လာ သုံးသပ်တာဖြစ်ပါတယ်။

    စီမံကိန်းရဲ့ ၂၀၁၉ ခုနှစ် ဆုပေးပွဲကိုတော့ လန်ဒန်မြို့မှာ နိုဝင်ဘာ ၂၀ ရက်နေ့က ကျင်းပပြုလုပ်ခဲ့ပါတယ်။

    Ref: Cambridge Independent

  • ဗလီမှ ဝတ်ပြုသူများအား ဓားနဲ့ထိုးခဲ့သူကို ယူကေတရားရုံးက ထောင် ၅ နှစ်ချ

    ဗလီမှ ဝတ်ပြုသူများအား ဓားနဲ့ထိုးခဲ့သူကို ယူကေတရားရုံးက ထောင် ၅ နှစ်ချ

    နိုဝင်ဘာ ၅၊ ၂၀၁၉
    M-Media

    ပြစ်မှုကျူးလွန်သူ လုသောမတ်စ်

    -ပြီးခဲ့တဲ့ ရမ်ဇာန်ဥပုသ်လက ကာဒစ်ဖ်မြို့မှာရှိတဲ့ ဗလီဝတ်ကျောင်းတော်တစ်လုံးမှာ ဝတ်ပြုသူတွေကို ဓားမြှောင်နဲ့ တိုက်ခိုက်ခဲ့တဲ့ လူငယ် ၂ ဦးကို ယူကေတရားရုံးက ထောင်ဒဏ်၊ ငွေဒဏ်တွေ ချမှတ်လိုက်ပါတယ်။

    အသက် ၂၀ အရွယ် လုသောမတ်စ်နဲ့ သူ့ရဲ့ညီ အသက် ၁၈ နှစ်အရွယ် လီယမ် သောမတ်စ်တို့ဟာ ဇွန်လ ၂ ရက်နေ့ မနက် ၁ နာရီအချိန်က ကသ်ဟေးမြို့နယ် ‘ဒါရွလ်အစ္စရာဗလီ’ အပြင်ဘက်မှာ ဝတ်ပြုသူတွေကို ဓားနဲ့ လိုက်ထိုးခဲ့တာဖြစ်ပါတယ်။

    တိုက်ခိုက်မှုအတွင်း လူ ၂ ဦး ဒဏ်ရာရရှိခဲ့ပါတယ်။ သောမတ်စ်တို့ညီအစ်ကို ၂ ဦးဟာ ဗလီအရှေ့ကနေ စက်ဘီးနဲ့ဖြတ်သွားစဉ်အတွင်း ဗလီက အစ္စလာမ်ဘာသာဝင်တွေကို ဘာသာရေးအရ စော်ကား ဆဲဆိုတာတွေ လုပ်ခဲ့ပြီးတဲ့နောက် ဓားနဲ့ဝင်ထိုးခဲ့တာပါ။

    သောမတ်စ်ကတော့ ဒီတိုက်ခိုက်မှုဟာ စက်ဘီးကိစ္စနဲ့ စကားများရင်း ဖြစ်သွားတာဖြစ်ပြီး ဘာသာရေးကြောင့်မဟုတ်ဘူးလို့ ပြောကြားခဲ့ပါတယ်။

    တရားရုံးက လုသောမတ်စ်ကို ထောင်ဒဏ် ၅ နှစ်နဲ့ ၃ လ ချမှတ်ခဲ့သလို ညီဖြစ်သူ လီယမ်သောမတ်စ်ကိုတော့ ဆိုင်းငံ့ထောင်ဒဏ် ၁၈ လနဲ့ လခမဲ့အလုပ် နာရီ ၂၅၀ လုပ်ဆောင်ဖို့ ဆုံးဖြတ်ခဲ့ပါတယ်။ သူတို့ ညီအစ်ကို ၂ ဦးဟာ ဗလီကို နစ်နာကြေး ပေါင် ၅၀၀ လည်း ပေးဆောင်ရမှာ ဖြစ်ပါတယ်။

    Ref: Daily Mail