Tag: Islam in US

ဇွန် ၂၂၊ ၂၀၂၀
M-Media

-အစ္စလာမ်ဘာသာနဲ့ပတ်သက်ပြီး လုပ်ကြံဝါဒဖြန့် ရေးသားခဲ့မှုတစ်ခုအတွက် အမေရိကန်သတင်းစာတစ်စောင်က လူသိရှင်ကြား တောင်းပန်လိုက်ပါတယ်။

နိုင်ငံအလယ်ပိုင်း တန်နက်ဆီပြည်နယ်က နာမည်ကြီး The Tennessee သတင်းစာရဲ့ ကြော်ငြာကဏ္ဍမှာ တနင်္ဂနွေနေ့က ဖော်ပြခဲ့တဲ့ ဝါဒဖြန့် ဆောင်းပါးတစ်ပုဒ်မှာ အစ္စလာမ်သာသနာကို လုပ်ကြံစော်ကား ရေးသားခဲ့တာပါ။

ထရမ့်သမ္မတဖြစ်တာဟာ သမ္မာကျမ်းစာပါ ဗျာဒိတ်တော်ရဲ့ တစ်စိတ်တစ်ပိုင်းဖြစ်ပြီး၊ ပြည်တွင်းစစ် ထပ်ဖြစ်နိုင်တဲ့အတွက် သတိထားဖို့လိုကြောင်း၊ အစ္စလာမ်ဟာ ပြည်နယ်မြို့တော် နက်ရှ်ဗီလီမှာ နျူဗုံးခွဲမှာဖြစ်ကြောင်း အဲဒီဆောင်းပါးမှာ ရေးသားထားပါတယ်။

ဆောင်းပါးခေါင်းစဉ်ကို Dear Citizen of Nashville လို့ ပေးထားပြီး အပိုဒ် ၈ ပိုဒ် ပါဝင်ကာ အမေရိကန်သမ္မတ ဒေါ်နယ်ထရမ့်နဲ့ ပုပ်ရဟန်းမင်းကြီး ဖရန်စစ်တို့ တွဲရိုက်ထားတဲ့ ဓာတ်ပုံကို မျက်နှာဖုံးအဖြစ် ဖော်ပြထားပါတယ်။

ဒီဝါဒဖြန့်ဆောင်းပါးကို Ministry of Future for America ဆိုတဲ့ ခရစ်ယာန်အဖွဲ့က ရေးတာပါ။ အဲဒီအဖွဲ့က သူတို့ဟာ သမ္မာကျမ်းစာရဲ့ နောက်ဆုံး သတိပေးသတင်းစကားကို ဖြန့်ချီတဲ့အဖွဲ့ဖြစ်တယ်လို့ ကြွေးကျော်ထားပါတယ်။

ဆောင်းပါးမှား ရုရှားသမ္မတ ဗလာဒီမီရ် ပူတင်အကြောင်း၊ အတိုက်အခံ ဒီမိုကရက်တစ် ပါတီအကြောင်းနဲ့ ၉/၁၁ အကြမ်းဖက်တိုက်ခိုက်မှုအကြောင်းတွေကို ဇောင်းပေးရေးသားထားပါတယ်။

သတင်းစာတိုက်ရဲ့ ဥက္ကဌဖြစ်ပြီး အယ်ဒီတာလည်းဖြစ်တဲ့ မီခေးလ် အန်နက်စ်တာဆီက ဒီဆောင်းပါးဟာ ​မိမိတို့ရဲ့ ကြော်ငြာဆိုင်ရာ စည်းမျဉ်းစည်းကမ်းတွေကို ပြောင်ပြောင်တင်းတင်း ချိုးဖောက်ခဲ့ကြောင်း ဝန်ခံပြောကြားခဲ့ပါတယ်။

“ဒီကိစ္စဟာ ဆိုးရွားလွန်းလှပြီး၊ ဘယ်လိုမှ ဆင်ခြေဆင်လတ်ပေးလို့မရတဲ့ ကိစ္စမျိုးပါ။ ဆောင်းပါးဟာ မှားယွင်းပြီး မဖော်ပြသင့်တဲ့ ဆောင်းပါးလည်းဖြစ်ပါတယ်”

မိမိတို့ရဲ့ ကြော်ငြာစံချိန်စံညွှန်းတွေထဲမှာ အမုန်းစကား တားမြစ်ပိတ်ပင်မှု ပါဝင်ပြီး၊ ဒီဆောင်းပါးမျိုးကို နောက်ထပ် ထပ်မပါအောင် ဆောင်ရွက်ထားကာ စုံးစမ်းစစ်ဆေးမှုလည်း ပြုလုပ်နေတယ်လို့ သတင်းစာတိုက်က ထုတ်ပြန်ထားပါတယ်။

ကြော်ငြာလက်ခံရာမှာ အဓိကကျတဲ့ အရောင်းချဲ့ထွင်ရေးအဖွဲ့ ဒုတိယဥက္ကဌ ရိုင်ယန် ကဒ်ဇီယာစကီးကလည်း ဒီဆောင်းပါးအတွက် တောင်းပန်ခဲ့ပါတယ်။

“ဒီလိုဆောင်းပါးမျိုး ပါသွားတဲ့အတွက် လူထုကို ကျွန်တော်တို့ အနူးအညွတ် တောင်းပန်ပါတယ်။ ဘာ့ကြောင့် ဒီလိုဖြစ်သွားတယ်ဆိုတာကို စုံစမ်းစစ်ဆေးနေပြီး ချက်ခြင်းလက်ငင်း အရေးယူသွားမှာပါ”

Ministry of Future for America အဖွဲ့ရဲ့ ပြောရေးဆိုခွင့်ရှိသူလို့ဆိုတဲ့ ဂျက်ဖ် ပစ်ပန်ဂျာက သတင်းစာတိုက်ဟာ သူတို့ကို ကြေငြာဆောင်းပါးအတွက် ငွေပြန်မအမ်းသေးကြောင်း၊ သတင်းစာနဲ့ ဝဘ်ဆိုက်တို့မှာ ဖော်ပြထားတဲ့ အဲဒီဆောင်းပါးပါ အကြောင်းအရာတွေပေါ်မှာ ခိုင်ခိုင်မာမာ ရပ်တည်ကြောင်း တုန့်ပြန်ပြောကြားခဲ့ပါတယ်။

Ref: New York Times

ဧပြီ ၂၄၊ ၂၀၂၀
M-Media

-အစ္စလာမ်ဘာသာဝင်တွေရဲ့ ရမ်ဇာန်ဥပုသ်လ လှူဒါန်းထောက်ပံ့မှုအစီအစဉ်အဖြစ် အမေရိကန်ပြည်ထောင်စု နယူးယော​က်မြို့ အစိုးရဟာ ဟာလာ ထမင်းဘူး ၅ သိန်းလောက်ကို လိုအပ်နေသူတွေထံ ဝေငှသွားမယ်လို့ သိရပါတယ်။

“ရမ်ဇာန်ဥပုသ်လရဲ့ အရေးပါတဲ့ သတင်းစကားတွေက ဆာလောင်နေသူတွေရဲ့ဝမ်းကို ငြိမ်းအေးစေဖို့၊ ချို့တဲ့သူတွေကို လက်ပေးဖို့ပါ ” လို့ နယူးယောက်မြို့တော်ဝန် ဘီလ် ဒီ ဘလာစီယိုက ပြောကြားခဲ့ပါတယ်။

ဗလီတွေကို သွားရောက်ခွင့်မရတဲ့အတွက် အခုနှစ် ရမ်ဇာန်ဥပုသ်လဟာ အရင်နှစ်တွေကထက် ပိုမို ခက်ခဲတယ်လို့လည်း ဘလာစီယို ဆိုပါတယ်။

အရင်နှစ်တွေက ယူးယောက်မြို့မှာရှိတဲ့ ဗလီတွေဟာ ချို့တဲ့သူတွေကို ကူညီတာ၊ အစားအသောက် လှူဒါန်းတာတွေ လုပ်ဆောင်ခဲ့တာပါ။ ဒါပေမယ့် အခုနှစ်မှာတော့ Covdi-19 ပြန့်နှံ့မှုကြောင့် ဝတ်ပြုရာနေရာတွေ၊ အများပြည်သူတွေနဲ့ သက်ဆိုင်တဲ့နေရာတွေကို ပိတ်ထားပြီး ရွေ့လျားသွားလာမှု ကန့်သတ်မိန့်လည်း ထုတ်ပြန်ထားပါတယ်။

ဟာလာလ် ထမင်းဘူး ၄ သိန်းကို နယူးယောက်မြို့ ပညာရေးဌာနတွေက တာဝန်ယူ ဝေငှပေးသွားမှာဖြစ်ပြီး၊ နောက်ထပ် တစ်သိန်းကိုတော့ အရပ်ဖက် အဖွဲ့အစည်းတွေကနေတစ်ဆင့် ဝေငှမှာဖြစ်ပါတယ်။ နယူးယောက်မြို့မှာ လူဦးရေ ၂ သန်းလောက် နေထိုင်ပါတယ်။

ဂျူးလူ့အဖွဲ့အစည်းအတွက် ခိုရှာထမင်းဘူးတွေ ဝေငှဖို့လည်း နယူးယောက်အစိုးရက စီစဉ်ထားပါတယ်။

Ref: Middel Easteye

ဇန်နဝါရီ ၂၇၊ ၂၀၂၀
M-Media

-မွတ်စလင် ခရီးသွား ၃ ဦးကို လေယာဉ်ပေါ်ကနေ ဆင်းခိုင်းတဲ့ ခွဲခြားဆက်ဆံမှုလုပ်ရပ်အတွက် Delta လေကြောင်းလိုင်းကို အမေရိကန် ပို့ဆောင်ရေးဝန်ကြီးဌာနက ကန်ဒေါ်လာ ၅ သောင်း ဒဏ်ရိုက်လိုက်ပါတယ်။

ပြီးခဲ့တဲ့ နှစ်အနည်းငယ်က အဖြစ်အပျက်၂ ခုအတွင်း အစ္စလာမ်ဘာသာဝင် ၃ ဦးဟာ အခုလို ခွဲခြားဆက်ဆံခံခဲ့ရတာပါ။ ပို့ဆောင်ရေးဝန်ကြီးဌာနကတော့ ခရီးသည်တွေကို လေယာဉ်ပေါ်ကနေ ဆင်းခိုင်းတာဟာ ခွဲခြားဆက်ဆံမှု ကင်းရှင်းရေးဥပဒေတွေကို ချိုးဖောက်မှုဖြစ်တယ်လို့ ပြောကြားခဲ့ပြီး ပါဝင်တဲ့ လေယာဉ်မှူးတွေ၊ လေယာဉ်အမှုထမ်းတွေနဲ့ ခရီးသွားတွေကို ဝန်ဆောင်မှုပေးတဲ့ ဝန်ထမ်းတွေကို ဘာသာရေးနဲ့ ယဉ်ကျေးမှုဆိုင်ရာ ဆောင်ရန်ရှောင်ရန်တွေ လေ့ကျင့်သင်ကြားပေးဖို့လည်း အမိန့်ပေးခဲ့ပါတယ်။

၂၀၁၆ ခုနှစ် ဇူလိုင်လ ၁၆ ရက်နေ့က ဖြစ်ပွားခဲ့တဲ့ အဖြစ်အပျက်အတွင်း ပြင်သစ်နိုင်ငံ Charles de Gaulle လေဆိပ်မှာ မွတ်စလင်ဇနီးမောင်နှံနှစ်ဦးဟာ Delta လေယာဉ်အမှတ် ၂၂၉ က‌နေ မောင်းထုတ်ခံခဲ့ရတာပါ။

အဲဒီစုံတွဲက အမျိုးသမီးဟာ မျက်နှာဖုံးဝတ်ထားပြီး၊ အမျိုးသားက နာရီထဲကို တစ်ခုခုထည့်သွင်းလိုက်တယ်လို့ ခရီးသည်တစ်ဦးက ပြောကြားခဲ့ပြီး၊ လေယာဉ်အမှုထမ်းတစ်ဦးကလည်း အမျိုးသားဟာ Allah စကားလုံးကို အကြိမ်ကြိမ်သုံးကာ စာတို့ပေးပို့တာကို တွေ့ခဲ့တယ်လို့ ဆိုပါတယ်။

လေကြောင်းလိုင်း လုံခြုံရေးတာဝန်ရှိသူတွေက ဒီဇနီးမောင်နှံနှစ်ဦးဟာ အမေရိကန်နိုင်ငံသားတွေဖြစ်ပြီး အိမ်ပြန်မှာဖြစ်ကာ လုံခြုံရေးအရ စိုးရိမ်စရာမရှိဘူးလို့ အတည်ပြုပေးခဲ့ပေမယ့် လေယာဉ်မှူးက လေယာဉ်ပေါ်တင်ဆောင်သွားဖို့ ငြင်းဆန်ခဲ့ပါတယ်။

အ‌မေရိကန် ပို့ဆောင်ရေးဝန်ကြီးဌာနက လေယာဉ်မှူးဟာ လေကြောင်းလိုင်းရဲ့ လုံခြုံရေးဆိုင်ရာ လုပ်ထုံးလုပ်နည်းတွေကို လိုက်နာခြင်းမရှိဘဲ ဘာသာရေးအရ ဒီလိုဆက်ဆံခဲ့တာဖြစ်တယ်လို့ ပြောကြားခဲ့ပါတယ်။

နောက်ထပ်အဖြစ်အပျက်တစ်ခုက ၂၀၁၆ ခုနှစ် ဇူလိုင်လ ၂၁ ရက်နေ့ နယ်သာလန်နိုင်ငံ အမ်စတာဒမ်မြို့ကနေ နယူးယောက်မြို့ကို ထွက်ခွာမယ့် လေကြောင်းခရီးစဉ်တစ်ခုမှာ‌ ဖြစ်ပွားခဲ့တာပါ။ ခရီးသည်တစ်ဦးရဲ့ တိုင်ကြားမှုကြောင့် လေယာဉ်ပျံတက်ကာနီးမှာ လေဆိပ်ကို ပြန်သွားကာ မွတ်စလင်အမျိုးသားတစ်ဦးနဲ့ သူထိုင်ရာနေရာကို လေယာဉ်အမှုထမ်းတွေက ရှာဖွေစစ်ဆေးမှုလုပ်ကာ လေဆိပ်မှာ ချန်ထားခဲ့ပါတယ်။

အဲဒီမွတ်စလင်အမျိုးသားဟာ နောက်ပိုင်းထွက်တဲ့လေယာဉ်နဲ့ လိုက်ပါခွင့်ရခဲ့ပေမယ့် ပထမလေယာဉ်ကနေ ဖယ်ရှားခံရတဲ့လုပ်ရပ်ဟာ ခွဲခြားဆက်ဆံမှုလုပ်ရပ် ဖြစ်ပြီး ဥပဒေချိုးဖောက်မှုဖြစ်တယ်လို့ ပို့ဆောင်ရေးဝန်ကြီးဌာနက ဆုံးဖြတ်ခဲ့ပါတယ်။

Delta လေကြောင်းလိုင်းက အဖြစ်အပျက် ၂ ခုစလုံးမှာ ခရီးသွားတွေရဲ့ ပြောဆိုတိုင်ကြားမှုကြောင့် လေယာဉ်အမှုထမ်းတွေက သင့်လျော်သလို ဆောင်ရွက်ခဲ့တာဖြစ်ပြီး မိမိတို့မှာ အပြစ်မရှိဘူးလို့ တုန့်ပြန်ခဲ့ပါတယ်။ ဒါပေမယ့် ပို့ဆောင်ရေးဝန်ကြီးဌာနရဲ့ ဆုံးဖြတ်ချက်ကို လိုက်နာဆောင်ရွက်သွားမယ်လို့ ပြောကြားခဲ့ပါတယ်။

Ref: Aljazeera