News @ M-Media

Tag: M-Media Tech

  • လကမ္ဘာတွင် တစ်ကိုယ်ရေ တပ်ဆင်နေထိုင်နိုင်မည့်တဲများ စတင်ထုတ်လုပ်နေပြီ

    လကမ္ဘာတွင် တစ်ကိုယ်ရေ တပ်ဆင်နေထိုင်နိုင်မည့်တဲများ စတင်ထုတ်လုပ်နေပြီ

    မတ် ၂၈၊ ၂၀၂၄

    M-Media 


    -လကမ္ဘာမှာ လူသားတွေ လွယ်ကူကူ ကိုယ်တိုင် တပ်ဆင်နေထိုင်နိုင်မယ့် ရွှေ့ပြောင်းလွယ် တဲတွေကို မက်ဆာချူးဆက်သိပ္ပံအသင်း (MIT) က ဖန်တီးထုတ်ပြလာပါတယ်။ 

    အဲဒီတဲတွေကို MOMO လို့ အမည်ပေးထားပြီး၊ အမေရိကန်အာကာသအေဂျင်စီ (နာဆာ)၊ SpaceX နဲ့ Brookhaven National Laboratory တို့လို အာကာသ စူးစမ်းရှာဖွေရေး ကုမ္ပဏီတွေ ပူးပေါင်းဖန်တီးထားတာပါ။ 

    MOMO ကို ဗိသုကာပညာ၊ အာကာသအင်ဂျင်နီယာ ပညာရပ်၊ မီဒီယာနည်းပညာတွေနဲ့ အချိုးကျကျ ပေါင်းစပ်ဖန်တီးထားတာ ဖြစ်ပါတယ်။ 

    ပိုလီအီသိုင်းလင်း အပြားတွေ၊ အလူမီနီယံ ဖရိန်တွေနဲ့ ဖန်တီးထားတဲ့ MOMO တဲတွေကို လကမ္ဘာသွားမယ့် Starship ယာဥ်တွေမှာ အလွယ်တကူ သယ်ဆောင်သွားနိုင်ရေး၊ လကမ္ဘာက ရာသီဥတု အခြေအနေအမျိုးမျိုးကို ခံနိုင်ရည်ရှိရေး၊ ဘက်စုံအသုံးပြုနိုင်ရေး စတဲ့ အချက် ၃ သုံးချက်နဲ့ ကိုက်ညီအောင် တည်ဆောက်ထားပါတယ်။ 

    MOMO တဲတွေဟာ ခေါက်ရ၊ ဖြန့်ရလွယ်ကူပြီး လူနေထိုင်ဖို့ တစ်ခုတည်းသာမဟုတ်ဘဲ အာကာသခရီးစဥ်တွေက လိုအပ်တဲ့ နေရာတိုင်းမှာ အသုံးပြုနိုင်မှာပါ။ 

    အာကာသကိုထွက်ဖို့ ဆွဲအားညှိပေးတဲ့ အခန်း (airlock)၊ အာကာသပြတင်းပေါက်၊ နေရောင်ခြည်ကနေ လျှပ်စစ်စွမ်းအင် ပြောင်းပေးနိုင်မယ့် PV panel တွေ၊ အလုပ်စားပွဲ၊ လေ့ကျင့်ခန်းလုပ်ရာနေရာ၊ သုတေသနအခန်း စသဖြင့် လိုအပ်သလို ပြောင်းလဲ အသုံးပြုနိုင်မှာ ဖြစ်ပါတယ်။ 

    MOMO တဲတွေမှာ အိပ်ခန်း၊ ရေချိုးခန်း၊ အနားယူရာနေရာ စတာတွေကိုလည်း အကန့်လိုက် ထည့်သွင်းပေးထားပါတယ်။ တဲတစ်ခုလုံးက အစိတ်အပိုင်းတွေကို ဖြုတ်တတ်နိုင်တာကြောင့် ပျက်ဆီးတဲ့အခါမှာလည်း အလွယ်တကူ လဲလှယ်နိုင်မှာ ဖြစ်ပါတယ်။ 

    MOMO တဲတွေကို လက်ရှိ အာကာသခရီးစဥ်တွေအတွက် ရည်ရွယ်ဖန်တီးတာမဟုတ်ပါဘူး။ ၂၀၂၆ နှောင်းပိုင်း၊ ဒါမှမဟုတ် ၂၀၂၇ ခုနှစ် အစောပိုင်းမှာ စတင်မယ့် နာဆာရဲ့ Artemis III ခရီးစဥ်တွေအတွက် ရည်ရွယ်ပါတယ်။ 

    Artemis III ခရီးစဥ်မှာ နာဆာဟာ လကမ္ဘာပေါ်ကို လူစေလွှတ်မှာဖြစ်ပြီး အဲဒီနောက် အာကာသအတွင်းပိုင်း စူးစမ်းရှာဖွေရေးမှာ လကမ္ဘာကို တစ်ထောက်နားနေရာအဖြစ် လူသားတွေ အခြေချနေထိုင်ဖို့ စီစဥ်သွားမှာ ဖြစ်ပါတယ်။ 

    MOMO တဲတွေကို ရေအရင်းမြစ် ရှိတယ်လို့ ယူဆထားပြီး၊ လူသားတွေ ရေရှည် နေထိုင်နိုင်တဲ့ အခြေအနေရှိတဲ့ လရဲ့ တောင်၀င်ရိုးစွန်းမှာ ချထားမှာ ဖြစ်ပါတယ်။ 

    Ref: Interesting Engineering 

  • လမြေကြီးတွင် သိပ္ပံပညာရှင်များ အပင်စိုက်နိုင်ပြီ

    လမြေကြီးတွင် သိပ္ပံပညာရှင်များ အပင်စိုက်နိုင်ပြီ

    မေ ၁၃၊ ၂၀၂၂

    M-Media 


    -လပေါ်ကယူဆောင်လာတဲ့ မြေကြီးမှာ သိပ္ပံပညာရှင်တွေက ပထမဆုံးအကြိမ် အောင်မြင်စွာ အပင်စိုက်နိုင်ခဲ့ပါတယ်။ 

    ဒီအောင််မြင်မှုဟာ တစ်ခြားဂြိုဟ်တွေမှာ လူတွေ အခြေချ နေထိုင်နိုင်ရေး အရေးပါတဲ့ ခြေလှမ်းတစ်ခုလည်း ဖြစ်ပါတယ်။ 

    ၁၉၆၉-၁၉၇၂ ခုနှစ် Apollo အာကာသယာဥ်ရဲ့ လသွားခရီးစဥ်ကနေ ယူဆောင်လာတဲ့ မြေသားနမူနာမှာ သိပ္ပံပညာရှင်တွေက ဟင်းခတ်ပင်တစ်မျိုးကို စိုက်ပျိုးခဲ့တာပါ။ 

    လမြေဟာ မှုန့်ညက်ပြီး ကမ္ဘာမြေကြီးနဲ့ မတူဘဲ အော်ဂဲနစ် ဓာတ်ပစ္စည်းတွေ မပါ၀င်ပါဘူး။ ဒါပေမယ့် အစေ့ချပြီး ၂ ရက်အကြာမှာ အပင်ပေါက်လာတာ ဖြစ်ပါတယ်။ 

    စမ်းသပ်မှုမှာပါ၀င်တဲ့ သိပ္ပံပညာရှင်တွေက လမြေမှာ ဒီလို အပင်စိုက်နိုင်တာဟာ လနဲ့ အင်္ဂါဂြိုဟ်ပေါ်မှာရှိတဲ့ ရင်းမြစ်တွေကို အသုံးချကာ အနာဂတ် အာကာသ ရှာဖွေမှုတွေ လုပ်ဆောင်နိုင်မယ့် ကြီးမားတဲ့ လမ်းကြောင်းတစ်ခု ပွင့်သွားတာဖြစ်တယ်လို့ ပြောကြားခဲ့ပါတယ်။ 

    အမေရိကန် အာကာသအေဂျင်စီဖြစ်တဲ့ နာဆာဟာ လပေါ်မှာ လူတွေအခြေစိုက်ပြီး နက်ရှိုင်းတဲ့ အာကာသထဲကို ဆက်လက်စူးစမ်းလေ့လာဖို့ ရည်ရွယ်ထားတာဖြစ်ပါတယ်။ 

    လမြေကြီးပေါ်မှာ အပင်စိုက်နိုင်တာဟာ စိုက်ပျိုးရေးကဏ္ဍမှာ ထူးခြားတဲ့ နည်းလမ်းသစ်တစ်ခုဖြစ်ပြီး ကမ္ဘာပေါ်က စိုက်ပျိုးရခက်တဲ့ ဒေသတွေမှာပါ ဒီနည်းလမ်းကို အသုံးပြုနိုင်ဖို့ ပညာရှင်တွေက မျှော်လင့်နေပါတယ်။

    Ref: Reuters 

  • မိုက်ခရို၀ေ့ဗ်နှင့် လေဆာလက်နက်တွင် တရုတ်က ပိုမိုအားကောင်းလာ

    မိုက်ခရို၀ေ့ဗ်နှင့် လေဆာလက်နက်တွင် တရုတ်က ပိုမိုအားကောင်းလာ

    မတ် ၂၂၊ ၂၀၂၂

    M-Media

    -မိုက်ခရို၀ေ့ဗ်လို၊ လေဆာလို လျှပ်စစ်သံလိုက်စွမ်းအင်ကို အသုံးပြုရတဲ့ လက်နက်စနစ် တီထွင်ဖန်တီးမှုမှာ တရုတ်နိုင်ငံက မြန်မြန်ဆန်ဆန်ပဲ တိုးတက်မှုတွေ ရရှိလာပါတယ်။ 

    တရုတ် သိပ္ပံပညာရှင်တွေဟာ RKA လို့ ခေါ်တဲ့ စွမ်းအားမြင့် မိုက်ခရို၀ေ့ဗ် ကိရိယာတစ်ခုက တီထွင်ဖန်တီးနိုင်ခဲ့ပါတယ်။ ဂြိုဟ်တု ဆက်သွယ်ရေးမှာသုံးတဲ့ Ka-band ဖရီကွင်စီမှာ ၅ မီဂါ၀ပ်ရှိတဲ့ ရောင်ခြည်တစ်ခုကို ဒီကိရိယာက ထုတ်ပေးနိုင်ပါတယ်။ 

    အရင် တရုတ်ပညာရှင်တွေ ဖန်တီးတဲ့ PKA မိုက်ခရို၀ေ့ဗ် ကိရိယာတွေဟာ စွမ်းအင် ကီလို၀ပ်လောက်သာ ထုတ်ပေးနိုင်ပေမယ့် နောက်ဆုံးဖန်တီးထားတဲ့ ကိရိယာကို စမ်းသပ်မှုအရ ၅၀၁ မီဂါ၀ပ် ထုတ်နိုင်တာကို တွေ့ရပြီး ဒီထက်ပိုများတဲ့ စွမ်းအင်ပမာဏကို ထုတ်နိုင်မယ့် အနေအထား ရှိနေပါတယ်။ 

    ဒါဟာ ဂြိုဟ်တုဖျက် မိုက်ခရို၀ေ့ဗ်လက်နက်ထုတ်နိုင်ဖို့ တော်တော်လေး အလားအလာ ကောင်းနေတာပါ။ မြေပြင်မှာ အထိုင်ထားမယ့် လက်နက်မျိုးဆိုရင် စွမ်အင် ဂီဂါ၀ပ် တော်တော်များများ ထုတ်နိုင်ဖို့ လိုအပ်နေပါသေးတယ်။

    ဒီမိုက်ခရို၀ေ့ဗ်လက်နက်ကို အာကာသထဲလွှတ်တဲ့ ဂြိုဟ်တုမှာ တပ်ပြီး ထိုးစစ်၊ ခံစစ် နှစ်ခုစလုံးအတွက် အသုံးပြုလို့ပါတယ်။ မိုက်ခရို၀ေ့ဗ် ရောင်ခြည်တွေ ထုတ်တဲ့အခါ အပူရှိန် အလွန်အမင်းမြင့်တက်တဲ့ အန္တရာယ်က ဒီကိရိယာကို ဂြိုဟ်တုတွေမှာ တပ်ဆင်ဖို့ အဟန့်အတား ဖြစ်နေအုံးမှာပါ။ 

    လေဆာ 

    တရုတ်ဟာ ဂြိုဟ်တုတွေမှာ တပ်ဆင်အသုံးပြုလို့ရမယ့် လေဆာလက်နက်တစ်မျိုးကိုလည်း ဖန်တီးထုတ်လုပ်ထားပါတယ်။ 

    မီဂါ၀ပ်များတဲ့ လေဆာရောင်ခြည်တွေကို ထုတ်လုပ်နိုင်ပြီး တစ်စက္ကန့်ကို အကြိမ် ၁၀၀ လောက်နဲ့ အာကာသကနေ နာရီ၀က်လောက် မနားတမ်း ပစ်နိုင်စွမ်းရှိပါတယ်။ 

    လေဆာရောင်ခြည်ကလည်း ဂြိုဟ်တုတွေကို ကောင်းကောင်း ဒုက္ခပေးနိုင်ပါတယ်။ တရုတ်က ဖန်တီးထားတဲ့ လေဆာလက်နက်ဟာ ၅ နာနိုစက္ကန့်လောက်သာ ရောင်ခြည်လွှတ်နိုင်ပေမယ့် လူသားတွေ မျက်လုံးကန်းသွားဖို့၊ ပစ်မှတ်မျက်နှာပြင် အငွေ့ပျံ ပျောက်ကွယ်သွားဖို့အထိ အားကောင်းပါတယ်။ 

    ကော့ပါးနဲ့ မြေရှားသတ္တုကရတဲ့ အင်ဒီယန်တို့ ပေါင်းစပ်ပြီး ဖန်တီးတဲ့ အအေးပေးနည်းပညာ မကြာသေးခင်က ပေါ်လာတာကြောင့် လေဆာလက်နက် ထုတ်လုပ်မှုကဏ္ဍလည်း ပိုမိုအားကောင်းလာပါတယ်။ 

    လေဆာဟာ ရွေ့လျားနေတဲ့ လေယာဥ်ပျံတွေကို အပိုင်းပိုင်း အတစ်တစ် ဖြစ်စေနိုင်သလို၊ ဒုံးကျည်စနစ်တွေကို ဖျက်ဆီးနိုင်တဲ့ စွမ်းအားလည်း ရှိပါတယ်။

    ရွေ့လျားစွမ်းအင်လိုမဟုတ်ဘဲ လျှပ်စစ်သံလိုက်စွမ်းအင်ကို အသုံးပြုတဲ့ မိုက်ခရို၀ေ့ဗ်လို၊ လေဆာလို လက်နက်မျိုးတွေဟာ လျင်လျင်မြန်မြန် တိုက်ခိုက်နိုင်တာ၊ တိကျတာ၊ ကြားဖြတ်တားဆီးဖို့ ခက်တာ စတဲ့ အားသာချက်တွေ ရှိပါတယ်။ 

    အမေရိကန်နဲ့ ဆိုဗီယက်တို့ အားပြိုင်တဲ့ စစ်အေးခတ်ကတည်းက စတင်ဖန်တီးခဲ့တဲ့ ဒီလက်နက်တွေဟာ အခုတော့ စမ်းသပ်ခန်းအဆင့်ကိုကျော်ပြီး မြေပြင်မှာ လက်တွေ့ အသုံးပြုနေတဲ့ အခြေအနေကို ရောက်ရှိနေပြီ ဖြစ်ပါတယ်။ 

    ၂၀၂၅ ခုနှစ်အရောက်မှာတော့ မိုက်ခရို၀ေ့ဗ်နဲ့ လေဆာလက်နက်တွေကို သမရိုးကျ လက်နက်တွေနဲ့ တွဲဖက်အသုံးပြုတာမျိုးအထိ ဖြစ်လာလိမ့်မယ်လို့ ကျွမ်းကျင်သူတွေက ခန့်မှန်းထားပါတယ်။ 

    Ref: Asia Times 

  • ရေအမြောက်အများရှိသည့် ချောက်တစ်ခု အင်္ဂါဂြိုဟ်တွင် တွေ့ရှိ

    ရေအမြောက်အများရှိသည့် ချောက်တစ်ခု အင်္ဂါဂြိုဟ်တွင် တွေ့ရှိ

    ဒီဇင်ဘာ ၁၇၊ ၂၀၂၁
    M-Media

    -အင်္ဂါ​ဂြိုဟ်မှာ ရေအမြောက်အများရှိတဲ့ ချောက်နက်ကြီးတစ်ခု ​တွေ့ရတယ်လို့ ဥရောပအာကာသ အေဂျင်စီက ထုတ်ပြန်ပါတယ်။

    Valles Marineris လို့ အမည်ပေးထားတဲ့ အဲဒီချောက်ကြီးကို အင်္ဂါဂြိုဟ်ပတ်ယာဉ် ExoMars Trace Gas Orbiter က တွေ့ရှိခဲ့တာပါ။ ဒီချောက်ကြီးဟာ အမေရိကန်က နာမည်ကျော် Grand Canyon ချောက်ထက် ၁၀ ဆပိုကြီးပြီး၊ ၅ ဆ ပိုနက်ကာ၊ အဆ ၂၀ ပိုကျယ်တယ်လို့ သိပ္ပံပညာရှင်တွေက ပြောပါတယ်။

    ရေဟာ အဲဒီချောက်ရဲ့ အောက်​မှာ တည်ရှိနေတာကို ဂြိုဟ်ပတ်ယာဉ်မှာ ပါဝင်တဲ့ နျူထရွန်ရှာဖွေရေးကိရိယာနဲ့ တွေ့ရှိခဲ့တာဖြစ်ပါတယ်။

    အင်္ဂါဂြိုဟ်မှာ ရေရှိကြောင်း အရင်ကတည်းက သိရှိထားပေမယ့် ဒီရေတွေဟာ ဝင်ရိုးစွန်းဒေသမှာဖြစ်တာကြောင့် ရေခဲအဖြစ်နဲ့ ရှိနေတာပါ။ အခု Valles Marineris ချောက်ကြီးက အင်္ဂါဂြိုဟ်အီကွေတာရဲ့ တောင်ဘက်မှာ ရှိနေတာကြောင့် ရေဟာ သာမန်အရည်အဖြစ် ရှိလိမ့်မယ်လို့ ပညာရှင်တွေက ခန့်မှန်းပါတယ်။

    ဂြိုဟ်ပတ်ယာဉ် ExoMars Trace Gas Orbiter ကို ၂၀၁၆ ခုနှစ်က လွှတ်တင်ခဲ့တာဖြစ်ပြီး ၂၀၁၈ ခုနှစ်ကနေ ၂၀၂၁ ခုနှစ်အတွင်း လေ့လာမှုတွေကနေ အခုတွေ့ရှိချက်ကို ထုတ်ပြန်တာဖြစ်ပါတယ်။

    တွေ့ရှိချက်ကို ရေးသားသူ ဟာကန် ဆဗ်ဟမ်က အခုတွေ့ရှိမှုဟာ အံ့ဩစရာကောင်းတဲ့ ကနဦးခြေလှမ်းတစ်ခုဖြစ်ပြီး ချောက်ထဲမှာရေဟာ ဘယ်လိုအနေအထားနဲ့ တည်ရှိနေလဲဆိုတာ ထပ်မံလေ့လာဖို့ လိုအပ်တယ်လို့ ပြောကြားခဲ့ပါတယ်။

    အနာဂတ် အင်္ဂါဂြိုဟ်စူးစမ်းရေးခရီးစဉ်မှာ Valles Marineris ချောက်ကို ပိုမိုအသားပေး လေ့လာဖို့ ဥရောပအာကာသအေဂျင်စီက စီစဉ်နေပါတယ်။

    Ref: CNN

  • တစ်ပတ်အတွင်း သိပ္ပံနှင့် နည်းပညာသတင်းများ

    တစ်ပတ်အတွင်း သိပ္ပံနှင့် နည်းပညာသတင်းများ


    နိုဝင်ဘာ ၃၀၊ ၂၀၂၀
    M-Media

    တရုတ်ဖုန်းကုမ္ပဏီ ဟွာဝေးကို ယူကေက ပိတ်ပင်တော့မည်
    ============
    နိုင်ငံရဲ့ 5G ကွန်ယက် တည်ဆောက်ရေးမှာ တရုတ်နည်းပညာကုမ္ပဏီ Huawei ကို ဖယ်ရှားနိုင်ဖို့အတွက် ဥပဒေသစ်တစ်ခုကို ယူ​ကေက မနက်ဖြန် လွှတ်တော်မှာ ဆွေးနွေးဖို့ ရှိနေပါတယ်။

    Huawei ဟာ တရုတ်အစိုးရရဲ့ သူလျှိုလုပ်ငန်းမှာ ပါဝင်ပတ်သက်နေတယ်လို့ အမေရိကန်က စွပ်စွဲထားတာပါ။ 5G ကွန်ယက်တည်ဆောက်ရေးမှာ ဟွာဝေးကုမ္ပဏီကို ဖယ်ထုတ်နိုင်ဖို့အတွက် ယူကေအစိုးရဟာ လွန်ခဲ့တဲ့ တစ်နှစ်လောက်ကတည်းက ကြိုစားနေတာဖြစ်ပါတယ်။ စီမံကိန်းမှာ ပါ၀င်နေတဲ့ ဖုန်းကုမ္ပဏီတွေအနေနဲ့ Huawei က ထုတ်တဲ့ ပစ္စည်းတွေကို အသုံးမပြုရဆိုတဲ့ အမိန့်တစ်ရပ်ကိုလည်း စက်တင်ဘာလမှာ ထုတ်ပြန်ခဲ့ပါတယ်။

    အခုဥပဒေသစ်အရ နိုင်ငံရဲ့ အမျိုးသားလုံခြုံရေးနဲ့ပတ်သက်လာရင် နည်းပညာကုမ္ပဏီတွေအပေါ်မှာ ယူကေအစိုးရက တင်းကြပ်ခွင့်ရလာမှာဖြစ်ပါတယ်။

    အသုံးပြုသူများအပေါ် ခေါင်းပုံဖြတ်မှုအတွက် Apple က ဒေါ်လာသန်းရာချီ ဒဏ်ရိုက်ခံရ
    ============
    မော်ဒယ်အဟောင်း အိုင်ဖုန်းတွေကို နှေးသွားအောင် တမင်လုပ်ခဲ့တဲ့အတွက် အမေရိကန်က ပြည်နယ် ၃၄ ခုမှာ နစ်နာ​ကြေး ၁၁၃ သန်းပေးဖို့ Apple ကုမ္ပဏီက သဘောတူလိုက်ပါတယ်။

    ၂၀၁၆ ခုနှစ်က ဆော့ဖ်ဝဲ Update မှာ ဒီလိုလုပ်တာဖြစ်ပြီး မော်ဒယ်အဟောင်းဖုန်းတွေမှာ ဘတ္ထရီသက်တမ်း ပိုခံအောင်လုပ်တာလို့ Apple က ပြောပေမယ့် အသုံးပြုသူတွေက ဖုန်းအသစ်တွေရောင်းရအောင် တမင်လုပ်ခဲ့တာလို့ စွပ်စွဲကာ တရားစွဲခဲ့တာပါ။

    အရီဇိုးနားပြည်နယ် ရှေ့နေချုပ် မာ့ခ် ဘာနိုဗစ်က ဖုန်းကုမ္ပဏီတွေအနေနဲ့ အသုံးပြုသူတွေအပေါ် အမြတ်ထုတ်တာကို ရပ်တန့်သင့်ပြီး ထုတ်ကုန်တွေအကြောင်း အဖြစ်မှန်ကို အသိပေးသင့်တယ်လို့ ပြောကြားခဲ့ပါတယ်။

    Apple ဟာ ဒီကိစ္စအတွက် အရင်က တောင်းပန်ခဲ့သလို၊ ထိခိုက်ခံစားရတဲ့ ဖုန်းတွေအတွက် ဘတ္ထရီအပိုကို ဒေါ်လာ ၈၀ ကနေ ၃၀ အထိ လျော့ရောင်းခဲ့ပါတယ်။

    eBay နှင့် Amazon တို့၏ စျေးဝယ်သူမသမာမှုကိစ္စတွင် Amazon က အနိုင်ရ
    =====================
    အမေရိကန်က ထိပ်တန်းအွန်လိုင်းရှော့ပင်း ကုမ္ပဏီတွေဖြစ်တဲ့ Amazon နဲ့ eBay တို့ရဲ့ ၀ယ်ယူ စျေးဝယ်သူမသမာမှုကိစ္စမှာ Amazon က အနိုင်ရသွားပါတယ်။

    Amazon ဟာ သူတို့ဝန်ထမ်းတွေကို မိမိတို့ ဝဘ်ဆိုက်မှာ အဖွဲ့ဝင်အဖြစ် ဝင်စေပြီး မိမိတို့စျေးဝယ်သူတွေကို သွေးဆောင်ဖျားယောင်းခဲ့တယ်လို eBay က ၂၀၁၈ နဲ့ ၂၀၁၉ ခုနှစ်အတွင်း အမေရိကန်တရားရုံးနှစ်ခုမှာ တရားစွဲဆိုခဲ့တာပါ။

    ကြားနာမှုတွေအရ ဒီလိုချိုးဖောက်မှုရှိကြောင်း eBay က သက်သေပြနိုင်ခဲ့ပေမယ့်၊ ကုမ္ပဏီကို ထိခိုက်မှုရှိတယ်ဆိုတာကို သက်သေမပြနိုင်ခဲ့တာကြောင့် ခုံသမာဓိအဖွဲ့က စွပ်စွဲချက်အားလုံးကို ပယ်ချဖို့ ဆုံးဖြတ်ခဲ့ပါတယ်။

    ဆုံးဖြတ်ချက်ကို တရားရုံးက တရားဝင်မထုတ်ပြန်သေးဘဲ ကုမ္ပဏီနှစ်ခုစလုံးကလည်း ဒီကိစ္စနဲ့ပတ်သက်ပြီး မှတ်ချက်မပေးခဲ့ပါဘူး။

    Ref: BBC, CNN