News @ M-Media

Tag: M-MediaKnowledge

  • Malleefowl (သို့မဟုတ်) သာမိုမီတာငှက်

    Malleefowl (သို့မဟုတ်) သာမိုမီတာငှက်

    မတ် ၂၅ ၊ ၂၀၁၆
    M-Media
    အေးထွန်း ရှာဖွေတင်ဆက်သည်။

    09.Malleefowl

    ဩစတေးလျှက Malleefowl ငှက်အဖိုဟာ သူ့ရဲ့အသိုက်တောင်ပို့ကြီးကို အပူချိန်အမြဲတိုင်းတာ စစ်ဆေးနေတယ်။

    ဘာလို့လဲဆိုရင် သူ့ဇနီး ဥမဲ့ ဥတွေဟာ အပူချိန် ၃၃ ဒီဂရီ ဆဲလ်စီးရက်စ် မှာမှ ပေါက်ဖွားဖို့ အကောင်းဆုံးအခြေအနေရှိတယ်လေ။

    ဒီငှက်မဟာ တစ်ခြားငှက်တွေလို ဥတွေပေါ် တက်ထိုင်ဝပ်ပြီး ဖောက်တာမဟုတ်ဘူး။

    အသိုက်အပူချိန်ကိုသာ အသုံးပြုပြီး ဖောက်တာ။

    ဆိုတော့ ငှက်ဖိုဟာ ဥကျင်းအပူချိန် ၃၃ဒီဂရီဆဲလ်စီးရက် တစ်သမတ်တည်း ရှိမရှိ ကိုအမြဲစစ်ဆေးနေတယ်။

    ငှက်ဖိုရဲ့ လျှာနဲ့ နှုတ်သီးဟာ အပူချိန်တိုင်းကိရိယာတွေ (Thermometer) ပေါ့။

    ဥကျင်းမှာ အပူဓာတ်ရရှိအောင် ဘယ်လိုလုပ်ပါသလဲ၊

    ငှက်ဖိုဟာ ဥကျင်းထဲကို သစ်ရွက်တွေ၊ သစ်ခေါက်တွေ နဲ့ သစ်ကိုင်းစတွေကို ထည့်သွင်းလိုက်ပါတယ်။ ပြီးရင် အဲဒီအပေါ်ကနေ သဲမြေတွေနဲ့ အုပ်ထားလိုက်ပါတယ်။

    မိုးရွာတဲ့ အခါမှာ စွတ်စိုလာတဲ့ ဒီသစ်ရွက်၊သစ်ခေါက်၊ သစ်ကိုင်းစတွေဟာ ဘက်တီးရီးယားတွေကြောင့် တစ်ဖြည်းဖြည်း ဆွေးမြေ့ပြိုကွဲ (Decompose) သွားပါတယ်။ ဒီဖြစ်စဉ်ဟာ အပူဓာတ်ကို ထုတ်လွှတ်ပါတယ်။

    အပူချိန်ဟာ ၃၃ဒီဂရီဆဲလ်စီးရက်စ်ကို ရောက်ပြီဆိုမှ ငှက်မဟာ ဥကျင်းထဲ ဥဥချပါတယ်။

    ငှက်ဖိုဟာ တောက်လျှောက်အပူချိန်ကို စစ်ဆေးနေပါတယ်။

    တကယ်လို့များ ဥကျင်းထဲက သစ်ရွက်၊သစ်ခေါက်၊ သစ်ကိုင်းစတွေရဲ့ ပုတ်သိုးပျက်ဆီးမူနှုန်းဟာ အရမ်းမြန်ပြီး အပူချိန်ဟာ ၃၃ဒီဂရီဆဲလ်စီးရက်အထက်ကို ရောက်ခဲ့မယ်ဆိုတာနဲ့ ငှက်ဖိုဟာ ဖုံးအုပ်ထားတဲ့ သဲမြေတွေကို ဖယ်ထုတ်လိုက်ပြီး ပိုလျှံနေတဲ့ အပူဓာတ်တွေ အပြင်ကို လွတ်ထွက်သွားအောင် လုပ်လိုက်ပါတယ် ။

    တကယ်လို့များ အပူဓာတ်လွန်ကဲမူဟာ သစ်ရွက်စတာတွေရဲ့ ပုတ်သိုးပျက်ဆီးမူ အမြန်နှုန်းကြောင့် မဟုတ်ပဲ၊ ပြင်းထန်တဲ့ နေအပူချိန်ကြောင့်ဆိုရင် ငှက်ဖိုဟာ ဒီနေအပူကို ကာကွယ်ဖို့ အသိုက်ကို သဲမြေတစ်ထပ် ထပ်မံအုပ်လိုက်ပါတယ်။

    ပြောင်းပြန်ဖြစ်စဉ်အနေနဲ့ တကယ်လို့များ အပူချိန်ဟာ ၃၃ဒီဂရီဆဲလ်စီးရက်အောက် ကျဆင်းနေပြီဆိုရင်တော့ ငှက်ဖိုဟာ ဥကျွင်းထဲကို နေရဲ့အပူဓာတ်တွေဝင်လာနိုင်အောင် သဲမြေတွေကို ဖယ်ရှားပစ်ပါတယ်။

    (Nest Kept Warm: Mallee fowl , AskNature.org)
    (International Wildlife Encyclopedia: Leopard -marten By Maurice Burton and Robert Burton , Pg . 1528)
    (The Atlas of Endangered Animals: Wildlife Under Threat Around the World By Paula Hammond , Pg. 108-109)

    ဒီငှက်တွေအကြောင်း ဖတ်အပြီးမှာ ကျွန်တော့်ကိုယ် ကျွန်တော် အောက်ပါမေးခွန်းတွေ မေးနေမိပါတယ်။

    ၁) ဒီငှက်တွေဟာ သူတို့ဥတွေပေါက်ဖွားဖို့အတွက် ဥကျင်းမှာ အပူချိန် ၃၃ဒီဂရီဆဲလ်စီးရက်စ်ကို ထိန်းသိမ်းထားရမယ်လို့ ဘယ်လိုများသိနေပါသလဲ၊

    ၂) သစ်ရွက်၊သစ်ခေါက်တွေ ဆွေးမြေ့ပျက်ဆီးမူဟာ ဥကျင်းအတွင်း အပူဓာတ်ကို ဖြစ်တည်စေမယ်ဆိုတာ သူတို့ဘယ်လိုသိနေကြပါသလဲ

    ၃) တကယ်လို့ အပူဓာတ် လွန်ကဲလာပြီဆိုရင် ဒါဟာ သစ်ရွက်၊သစ်ခေါက်တွေ ရဲ့ မြန်ဆန်သော ဆွေးမြေ့မူကြောင့်လား ၊ ဒါမှမဟုတ် နေအပူရှိန်ကြောင့်လား ဆိုတာ ဘယ်လိုခွဲခြားနိုင်ပါသလဲ

    ၄) ပြီးတော့ ငှက်ဖိုရဲ့ လျှာနဲ့နှုတ်သီးမှာ ဘယ်လိုများ အပူချိန်တိုင်း ကိရိယာ သာမိုမီတာ ပါဝင်နေရတာလဲ ?????

  • ဓါတ်ဆီ/ဒီဇယ်တွေကို ဘယ်လိုထိထိရောက်ရောက် ဖြည့်သုံးမလဲ?

    စက်တင်ဘာ ၁၀၊ ၂၀၁၃
    M-Media Knowledge ကဏ္ဍ
    ရှာဖွေတင်ဆက်သူ – မိုးတိမ်

    petol

    ၁။ ညမိုးချုပ် (ဒါမှမဟုတ်) မနက်စောစာ ဆီဖြည့်ပါ
    မနက်စောစော ဆီဖြည့်ရင် ဆီဆိုင်ရဲ့မြေအောက်ဆီခန်းဟာ အေးနေပါတယ်။ ကြမ်းပြင်အေးလေ ဆီကပိုသိပ်သည်းလေ ဖြစ်ပါတယ်။ အပူချိန် တစ်ရာခိုင်နှုန်းလောက် ပြောင်းသွားတာနဲ့ တစ်လီတာချင်းရဲ့ ပမာဏမတူတော့ပါဘူး။

    ၂။ ဆီတိုင်ကီ တစ်ဝက်ကုန်တာနဲ့ ဆီပြန်ဖြည့်ပါ
    ဆီတိုင်ကီမှာ တစ်ဝက်လောက် ကျန်တာနဲ့ ပြန်ဖြည့်ခြင်းဟာ ဆီအငွေ့ပျံခြင်းကို သက်သာစေပါတယ်။ တိုင်ကီထဲမှာ ဆီပိုရှိရင် လေနည်းနည်းပဲ ရှိနိုင်လို့ဖြစ်ပါတယ်။ ဆီတွေဟာ ကျွန်တော်တို့ထင်တာထက် ပိုမြန်မြန် အငွေ့ပြန်ပါတယ်။

    ၃။ ဆီဖြည့် မမြန်ပါစေနဲ့
    ဆီဖြည့်ပန့်တွေမှာ အနှေး၊ ပုံမှန်နဲ့ အမြန်ဆိုပြီး ၃ မျိုးဖြည့်လို့ရပါတယ်။ အမြန်နဲ့ ဆီဖြည့်တဲ့ အခါမှာ ဆီတွေနဲ့အတူ အငွေ့တွေပါ ပါလာတတ်ပါတယ်။ ဒါကြောင့် ဖြစ်နိုင်ရင် အနှေးနဲ့ ဆီဖြည့်ပြီး ဆီများများပိုယူလိုက်ပါ။

    ၄။ ဆီဆိုင် ဆီချနေတဲ့အချိန် ဆီမဖြည့်ပါနဲ့
    ဆီဆိုင်ကို ဆီကားတွေနဲ့ ဆီချနေတဲ့အချိန်မှာ ဆီဆိုင်ရဲ့ကန်အောက်မှာ အနည်ထိုင်နေတဲ့ အညစ်အကြေးတွေဟာ အနည်ထလာပြီး သင့်ကားထဲဝင်လာမှာပါ။ ဒါဆိုရင်တော့ ဆီအရနည်းတဲ့အပြင် အင်ဂျင်ပါ နာပြီပေါ့။

    ၅။ လေပေါင်ချိန် မှန်အောင် ထိန်းထားပါ
    ဘီးလေပေါင်ချိန်ကို ၂ ပတ် တစ်ခါလောက် စစ်သင့်ပါတယ်။ လေပေါင်ချိန်မှန်ရင် ကားမောင်းတဲ့အခါ ပွန်းပြီးဆွဲရတာ သက်သာစေပြီး မိုင်များများပိုသွားနိုင်ပါတယ်။ ဒရိုင်ဘာခုံကို လှန်လိုက်ရင် လေပေါင်ချိန်ကိုပြတဲ့ မီတာတစ်ခု ပါတတ်ပါတယ်။

    ၆။ ဆားဗစ်ပုံမှန်လုပ်ပါ
    ကားဆားဗစ်လုပ်တိုင်း ၃ ခုကို အမြဲလဲပါ။ ဆီ၊ ဆီစကာ (Oil filter) နဲ့ လေစကာ (Air filter)

    ၇။ Spark Plug တွေကိုလဲပါ
    ၅ နှစ်တိုင်း Spark plug တစ်ခုလဲပါ။ အပေါစားမဟုတ်ပဲ အရည်အသွေးကောင်းတဲ့ အော်ရဂျင်နယ်နဲ့လဲပါ။ ဆီလောင်ကျွမ်းမှုကို ကောင်းစေပြီး ဆီစားသက်သာစေတဲ့အပြင် Air-Con ကောင်းကောင်း အလုပ်လုပ်စေပါတယ်။

    ၈။ မလိုတဲ့ ပစ္စည်းတွေ ကားထဲထည့်မထားပါနဲ့
    ကားပေါ်မှာ ရှိတဲ့ပစ္စည်းတိုင်းအတွက် ဆီပိုကုန်တာမို့ မလိုတာတွေ ကားထဲကနေ ထုတ်ထားဖို့လည်း အရေးကြီးပါတယ်။

    အခုပဲ အသုံးချပြီး ဟုတ် မဟုတ် ကော်မန့်တွေ ပေးကြပါဦး။

    ကိုးကား – GK

  • အာကာသက မြင်ရမယ့် ဧရာမမှန်

    စက်တင်ဘာ ၀၅၊ ၂၀၁၃
    M-Media Knowledge ကဏ္ဍ
    ရှာဖွေတင်ဆက်သူ – မိုးတိမ်

    mirror

    စတုရန်းမိုင်းပေါင်း ၄၀၈၆ ရှိတဲ့ Salar de uyuni လို့ခေါ်တဲ့ သဘာဝကမ္ဘာ့မှန်ကြီးကို အာကာသကနေတောင် မြင်ရမှာဖြစ်ပါတယ်။ Bolivia နိုင်ငံ အနောက်တောင်ဘက်မှာရှိတဲ့ Salar de uyuni ဟာ မြေပြန့်ဆားမြေဖြစ်ပါတယ်။ နှစ်တိုင်းနှစ်တိုင်း ဒီမြေပြန့်ဟာ ရေပြင်ပါးပါးလေး လွှမ်းသွားတဲ့အခါ ပုံမှာမြင်ရတဲ့ အတိုင်း ကမ္ဘာ့အကြီးဆုံးမှန်ကြီး ဖြစ်စေပါတယ်။

    ဒီဆားမြေဟာ နှစ်ပေါင်းများစွာအရင်က တည်ရှိခဲ့တဲ့ ရေကန်ပေါင်းများစွာ ပုံပြောင်းပြီး ဖြစ်ပေါ်လာတာပါ။ ဆားမြေအထူဟာ မီတာအနည်းငယ်ရှိပြီး ထူးထူးခြားခြား မျက်နှာပြင်တစ်ခုလုံးဟာ တစ်ပြင်ညီတည်းဖြစ်နေပါတယ်။ အထူဆုံးနှင့် အပါးဆုံးဟာ အလွန်ဆုံးကွာမှ တစ်မီတာသာကွာပါတယ်။

    ဒီလို ကြီးမားတဲ့ မျက်နှာပြင်ညီကြီးဟာ ကြည်လင်ပြီး တိမ်ကင်းတဲ့ ကောင်းကင်ရှိတာကြောင့် ဂြိုလ်တုတွေအတွက် ကမ္ဘာမြေရဲ့ အမြင့်ကိုတိုင်းတဲ့နေရာမှာ အထောက်အကူ ဖြစ်စေပါတယ်။ ဒီ Salar ဟာ Lithium အလွန်ကြွယ်ဝပြီး ကမ္ဘာ့ Lithium ရဲ့ ၅၀ ကနေ ၇၀ ရာခိုင်နှုန်းရှိပြီး Lithium ထုတ်ယူနေကြပါပြီ။

    ကိုးကား – GK, Wikipedia

  • ရေဘူးဟောင်း တလုံးကို ဘယ်လိုပြန်သုံးမလဲ?

    သြဂုတ် ၂၇၊ ၂၀၁၃
    M-Media Knowledge ကဏ္ဍ
    ရှာဖွေတင်ဆက်သူ – မိုးတိမ်

    bottle

    လူဦးရေထူထပ် များပြားလာတဲ့ ကမ္ဘာကြီးမှာ Ready-Made ပစ္စည်းတွေသုံးပြီး စွန့်ပစ်ပစ္စည်းတွေပေါများလာပါတယ်။ တစ်ချို့စွန့်ပစ် ပစ္စည်းတွေကို ပြန်လည်ပြုပြင် ထုတ်လုပ်တဲ့ Recycle လုပ်ငန်းကလည်း ကမ္ဘာကြီးကို ကုစားတဲ့နေရာမှာ အရေးပါလာပါတယ်။

    အခုအိမ်မှာတင် လုပ်လို့ရမယ့် Home-Made Recycle နည်းတနည်းကို တင်ဆက်ပေးပါမယ်။ ဒီနည်းနဲ့ တခါမှမသုံးဘူးသေးတဲ့ ပစ္စည်းအသစ် ဖန်တီးကြည့်ကြရအောင်။

    လုပ်မယ့်ပစ္စည်းကတော့ သားရေကွင်းအစားထိုး ပလတ်စတစ်အိပ်ပိတ် ပစ္စည်းပါ။ လိုအပ်တဲ့ ပစ္စည်းတွေကတော့ ရေဘူးဟောင်း တစ်လုံးနဲ့ ဓါး (သို့) ကက်ကြေးတစ်လက် ပါပဲ။

    ၁။ ပထမဆုံး ပုံမှာပြထားတဲ့အတိုင်း ရေဘူးထိပ် အဖုံးနားကို ဖြတ်ချလိုက်ပါ။
    ၂။ လိုအပ်သည့်အရွယ် အဝိုင်းညီအောင် ညှပ်ပါ။
    ၃။ ပိတ်ချင်သည့် ပလတ်စတစ်အိပ်ကို ပုံပါအတိုင်း အပေါက်ထဲမှ စွပ်ပါ။
    ၄။ အိပ်အနားစများကို ဖြန့်ချပြီး အဖုံးပိတ်ကာ လေလုံသည့် အိပ်တလုံးကို ရရှိပါပြီ။

    သုံးပြီးသား ရေဘူးတွေကို ပစ်လိုက်မယ့်အစား ဒီနည်းနဲ့ ပြန်သုံးကြည့်ပါ။ သားရေကွင်းထက် သုံးရတာပိုလွယ်တယ်။ လေပိုလုံတယ်။ အမှုန့်တွေဆို ရေဘူးထဲထည့်လို့ရပေမယ့် မုန့်ကြွတ်လို ပစ္စည်းတွေကျ ဒါကပိုအသုံးဝင်တယ်။ အခေါက်ခေါက် အခါခါ ပြန်သုံးလို့ရတယ်။ အခုဆို ပစ်ရမယ့် ရေဘူးဟောင်းကနေ အသုံးဝင်မယ့် ပစ္စည်းအသစ် တစ်ခုရပါပြီ။ ကျေးဇူးတင်ပါတယ်။

  • ပျားရည်လွယ်တဲ့ ပုရွက်ဆိတ်

    သြဂုတ် ၀၇၊ ၂၀၁၃
    M-Media Knowledge ကဏ္ဍ
    ရှာဖွေတင်ဆက်သူ – မိုးတိမ်

    Ant
    ပျားရည်တွေကို ပျားတွေဆီကရတာပဲ စားဖူးကြတယ်မဟုတ်လား။ ဒီတစ်ခါတော့ ပုရွက်ဆိတ်တွေဆီက စားကြရအောင် ….

    ” ပျားရည်ပုရွတ်ဆိတ်” Honeypot ant တွေကို သြစတေးလျ အနောက်ဘက်ကန္တာရမှာ တွေ့ရပါတယ်။ အစာရှာမရတဲ့ အချိန်တွေအတွက် ပတ်ဝန်းကျင်နှင့်လိုက်လျောညီထွေစွာ အစာသိုလှောင်နည်းတစ်မျိုးနဲ့အတူ တွေ့ရတာပါ။

    သူတို့ဟာ ဖြုတ်စိမ်းတွေရဲ့ အစာကနေတဆင့် ပျားရည်တွေကိုရယူပါတယ်။ ပထမ ဖြုတ်စိမ်းတွေဟာ သစ်ပင်တွေရဲ့ သစ်ရည်တွေကိုစုပ်ယူပြီး ပျားရည်တွေစစ်ထုတ်ပါတယ်။ ထို့နောက် ပုရွက်ဆိတ်တွေဟာ ဖြုတ်စိမ်းတွေ ပျားရည်စစ်ထုတ်စေဖို့ သူတို့ရဲ့ ဦးမျှင်တွေနဲ့ ညှို့ယူပါတယ်။ ပျားရည်အမြဲတမ်းရစေဖို့ ဖြုတ်စိမ်းတွေကို ပုရွက်ဆိတ်တွေက စောင့်ရှောက်တဲ့ အံ့သြစရာကောင်းလောက်တဲ့ ဆက်ဆံမှုမျိုးရှိကြပါတယ်။

    သူတို့အတွက် ရာသီဥတုကောင်းဖြစ်တဲ့မိုးရာသီမှာ ပျားရည်အပိုတွေကို လုပ်သားပုရွက်ဆိတ်တွေဖြစ်တဲ့ replete တွေမှာ သိုလှောင်ထားပါတယ်။ ပျားရည်တွေသိုလှောင်ထားတဲ့ ဝမ်းဗိုက်ဟာ စပျစ်သီးငယ် အရွယ်လောက်ထိအောင် ဖောင်းလာကြပါတယ်။ လုပ်သားပုရွက်ဆိတ်တွေဟာ မြေအောက်ပုရွက်ဆိတ်အုံတွေရဲ့ မျက်နှာကျက်ကနေ တွဲလောင်းခိုနေပြီး အစာရေစာ ရှားပါးတဲ့အချိန်တွေမှာ မြေအောက်ရေခဲသေတ္တာတွေကဲ့သို့ အားလုံးအတွက် အစာပြန်ပေးတာပါ။

    သြစတေးလျ အနောက်ဘက်ကန္တာရက ဌာနေလူမျိုးစုတွေဟာ ပုရွက်ဆိတ်အသိုက်ကိုတူးပြီး ပုရွက်ဆိတ်အုံကိုရှာကြပါတယ်။ ပြီးတော့ စားကောင်းသောက်ကောင်းလို့ သတ်မှတ်ထားတဲ့ ပုရွတ်ဆိတ်ပျားရည်တွေကို စားသုံးကြပါတယ်။ Papunya အနီးအနား ပတ်ဝန်းကျင်ကို “ပျားရည်ပုရွက်ဆိတ် အိပ်မက်ကမ္ဘာ” အဖြစ် သိကြပါတယ်။

    ကိုးကား – PSAA