ဇန်နဝါရီ ၂၊ ၂၀၁၉
M-Media
-အရှေ့တောင်အာရှက အသန့်ရှင်းဆုံး၊ အစိမ်းလမ်းဆုံးနဲ့ ခရီးသွားတွေအတွက် အဆင်အပြေဆုံး မြို့တွေကို ရွေးချယ်ချီးမြှင့်တဲ့ဆုတွေကို မြန်မာနိုင်ငံက မြို့တစ်ချို့ ရရှိခဲ့ပါတယ်။
ရှမ်းပြည်နယ်က တောင်ကြီး၊ ကယားပြည်နယ်က လွိုင်ကော်နဲ့ တနင်္သာရီတိုင်းဒေသကြီးက ထားဝယ်မြို့တွေဟာ သန်းရှင်းမှုနဲ့ ခရီးသွားဆိုင်ရာဆု Asean Clean Tourist City Standard ကို ရရှိခဲ့တာပါ။ ဒီဆုကို သဘာ၀ပတ်ဝန်းကျင်ဆိုင်ရာ စီမံခန့်ခွဲမှု၊ သန့်ရှင်းမှု၊ စွန့်ပစ်ပစ္စည်း စီမံခန့်ခွဲမှု၊ သဘာ၀ပတ်ဝန်းကျင်နှင့် သန့်ရှင်းမှုဆိုင်ရာ အသိပညာပေးနိုင်မှု၊ စိမ်းလန်းတဲ့နေရာ၊ ကျန်းမာရေးနဲ့ လုံခြုံမှု၊ မြို့ပြဘေးအန္တရာယ်ကင်းမှုနှင့် လုံခြုံရေး၊ ခရီးသွားဆိုင်ရာ အခြေခံအဆောက်အဦး စတဲ့ အချက်အလက် ၇ ချက်နဲ့ ဆုံးဖြတ်တာ ဖြစ်ပါတယ်။
ဒီမြို့ ၃ မြို့ဟာ အခုနောက်ပိုင်းမှာ ပြည်တွင်း၊ ပြည်ပ ခရီးသွားတွေ စိတ်ဝင်မှုစားမှု မြင့်တက်လာတဲ့ မြို့တွေလည်း ဖြစ်ပါတယ်။
တနင်္သာရီတိုင်းဒေသကြီးက မြိတ်မြို့ဟာ မြို့ပြဆိုင်ရာ ခရီးသွားကဏ္ဍဆုကို ရရှိခဲ့ပြီး၊ မကွေးတိုင်းဒေသကြီးက မြိုင်မြို့ကတော့ ကျေးလက်ဆိုင်ရာ ခရီးသွားကဏ္ဍဆုကို ရရှိခဲ့ပါတယ်။
ဆုတွေကို ဇန်နဝါရီလ ၁၆ ရက်နေ့ ဘရူးနိုင်းမှာ ကျင်းပပြုလုပ်မယ့် အာဆီယံခရီးသွားဖိုရမ်မှာ ချီးမြှင့်မှာဖြစ်ပြီး မြန်မာနိုင်ငံ ဟိုတယ်နှင့် ခရီးသွားလာရေး ဝန်ကြီးဌာနနဲ့ သက်ဆိုင်ရာမြို့တွေက တာဝန်ရှိသူတွေ တက်ရောက်ဖို့ ရှိနေပါတယ်။
၂၀၁၈ ခုနှစ်တုန်းကလည်း ရှမ်းပြည်နယ် ကလောမြို့၊ မန္တလေးတိုင်းဒေသကြီး ပုဂံနဲ့ ပြင်ဦးလွင်မြို့တွေဟာ Asean Clean Tourist City Standard ဆုကို ရရှိခဲ့ပါတယ်။
Ref: Irrawaddy English
