News @ M-Media

Tag: mmFootballNews

  • ဖာဂူဆန်ပြောပြသည့် ရွိုင်ကိန်းနှင့် သူ၏ကြားက ပြဿနာ

    ဖာဂူဆန်ပြောပြသည့် ရွိုင်ကိန်းနှင့် သူ၏ကြားက ပြဿနာ

    ဖေဖော်၀ါရီ ၄၊ ၂၀၂၄
    M-Media

    ရွိုင်ကိန်းနဲ့ ပတ်သက်ရင် ကြီးကြီးမားမား အကွဲပြဲဇာတ်လမ်းတွေ ရှိခဲ့ဘူးပါတယ်။ သူ့သဘောအတိုင်း အသင်းကို ခြယ်လှယ်ချင်တာကနေ စတာပါ။ 

    တစ်ခေါက် အ၀တ်လဲခန်းထဲရောက်သွားတော့ ရွိုင်(ရွိုင်ကိန်း) နဲ့ ရုဒ်(နစ္စတယ်ရွိုင်း) တို့ အကြီးအကျယ် ပြဿနာတက်နေကြတယ်။ အခြားကစားသမားတွေက သူတို့ကို ၀င်ဆွဲရတဲ့အထိပါပဲ။ ဗန် နစ္စတယ်ရွိုင်းဟာ ရွိုင်ကို တုန့်ပြန်ရဲတဲ့ သတ္တိတော့ရှိတယ်။ လူတိုင်းမှာ ဒီလိုသတ္တိမျိုးမရှိကြဘူး။ သူက ကြမ်းတမ်းပြီး ကြောက်စရာကောင်းသူ တစ်ယောက်ပါ။ 

    ဒေါသထွက်လာရင် လူတွေကို ထိုးချင်ကြိတ်ချင်တယ်။

    ရွိုင်ကိန်းရဲ့ အပြုအမူအပြောအဆိုတွေ ပြောင်းသွားပြီဆိုတာကို ကျွန်တော့်လိုပဲ ကားလို့စ် ကွီယော့ဇ် (ဖာဂူဆန်လက်ထောက်) လည်းလက်ခံတယ်လို့ ကျွန်တော် ယုံကြည်ပါတယ်။ အရင်က ရွိုင်ကိန်း မဟုတ်တော့ဘူးဆိုတာ သူသိသွားပြီ။ ဒါကတော့ သေချာပါတယ်။

    အသက်အရွယ်နဲ့ ဒဏ်ရာက သူ့ရဲ့စွမ်းရည်တွေကို ခိုးယူသွားပြီဆိုတာ ကျွန်တော် ရဲရဲကြီးပြောရဲပါတယ်။ သူ့ဖက် ကိုယ့်ဖက် နှစ်ဖက်စလုံး အဆင်ပြေအောင် သူ့တာ၀န်တွေကိုလျှော့ဖို့ ကျွန်တော်တို့ ကြိုးစားတယ်။ 

    တစ်ကွင်းလုံးပတ်ပြေးပြီး အရှေ့ကိုလိုက်ရတဲ့ သူ့ရဲ့ကစားပုံကို ပြောင်းဖို့ ကျွန်တော်တို့ လုပ်ပါတယ်။ အသင်းသားတွေ ဘောလုံးရတာနဲ့ သူက သူ့ကိုပေးစေချင်တယ်။ ဒီစိတ်ဓာတ်ကိုတော့ ချီးကျူးရမယ်။

    မန်ယူရဲ့ပုံစံကိုက တစ်ယောက်ဘောလုံးရရင် အားလုံးက လိုက်ပြီး ပံပို့ပေးကြတယ်။ ရွိုင်ရဲ့ အသက်အရွယ်က အဲဒီကစားပုံမျိုးနဲ့ မသင့်တော်တော့ဘူး။ ဒါပေမယ့် သူ့အခြေအနေကို သူက လက်ခံပါဘူး။ 

    ကျွန်တော်တို့ပြောပြလိုက်တော့ အခြေအနေမှန်ကို သူသဘောပေါက်သွားတယ်။ ဒါပေမယ့် ဂုဏ်သိက္ခာ ထိခိုက်မှာဆိုးတော့ လက်မခံခဲ့ဘူး။ သူဟာ ကိုယ်ဖြစ်ချစ်တဲ့၊ လုပ်ချင်တဲ့ စိတ်ဆန္ဒမျိုးပေါ်မှာ တည်ဆောက်ထားတဲ့ ကစားသမားမျိုးပါ။ 

    ပြဿနာတွေဖြစ်တော့မယ့် ဘောလုံးရာသီ မစခင် သူယူထားတဲ့ ခံစစ်တာ၀န်တွေ မထမ်းဆောင်နိုင်တော့တဲ့ လက္ခဏာတွေ ခန္ဓာကိုယ်က ပြလာတယ်။ အရင်လို ဒေါင်ဒေါင်မြည် မဟုတ်တော့ဘူး။ 

    ကြမ်းတမ်းတဲ့ ပွဲတော်တော်များများမှာ အမာခံပါ၀င်ခဲ့ပြီး တင်ပါးနဲ့ တံကောက်ကွေးအရွတ်ဒဏ်ရာ ခွဲထားစိပ်ကုသထားရတဲ့ ကစားသမားတစ်ယောက်က အရင်လို ဘယ်ဟုတ်တော့မလဲ။ 

    ပွဲအတွင်း သူရဲ့ကြိုးစားအားထုတ်မှုက ပြောစရာမရှိဘူး။ ဒါပေမယ့် အသက် ၃၀ ကျော် ကစားသမားတစ်ယောက်ဟာ သူ ဘာတွေ အားနည်းလာပြီလဲဆိုတာကို သိတိမူမိဖို့ သိပ်မလွယ်ဘူး။ အောင်မြင်မှုတွေရအောင် မောင်းနှင်ပေးနိုင်ခဲ့တဲ့ အမူအကျင့်ကို ပြောင်းလို့လည်း မရပါဘူး။ 

    ကျွန်တော်တို့ကတော့ အရင်က ရွိုင်ကိန်း မဟုတ်တော့ဘူးဆိုတာ သိသိသာသာကို မြင်လာပါတယ်။ ကွင်းလယ်မှာပဲ အထိုင်နေခိုင်ပြီး ဒီကိစ္စကိုဖြေရှင်းဖို့ ကျွန်တော်တို့ ကြိုးစားတယ်။ အဲဒီနေရာကနေ ပွဲကို ထိန်းချုပ်နိုင်ပါတယ်။ 

    သူ့အနေအထားကို သူကိုယ်တိုင်လည်း ကောင်းကောင်းသိပါတယ်။ ဒါပေမယ့် တစ်ကွင်းလုံးကို လွှမ်းမိုးထားတဲ့ အရင်က သူ့ကစားပုံကို မစွန့်လွှတ်ခဲ့ပါဘူး။ 

    ဒီကိစ္စဟာ တော်တော်ကြာကြာ အခြေအတင်ဖြစ်ခဲ့ပြီး အသင်းကနေထွက်ကာ ဆဲလ်တစ်ရောက်သွားတဲ့ အခြေအနေမျိုးနဲ့ အဆုံးသတ်သွားရပါတယ်။ 

    သူ့ကိုယ့်သူ ပီတာပန်(အသက်မကြီးတော့သူ) လို့ ထင်တယ်။ ပီတာပန်လို စိတ်ကူးယဥ် ကာတွန်းဇာတ်ကောင်မျိုးနဲ့ နှိုင်းပြောကြေးဆိုရင် ရွိုင်ယန်ဂစ်ကို ပြောလို့ရလိမ့်မယ်။ ရွိုင်ယန်(ဂစ်)က ဒဏ်ရာကြီးကြီးမားမား မရဖူးဘူး။ ရွိုင်(ရွိုင်ကိန်း)က ဒဏ်ရာကြီးတစ်ချို့ရဖူးပါတယ်။ 

    တင်ပါးဒဏ်ရာဆိုရင် သူ့ရဲ့ ရုပ်ပိုင်းဆိုင်ရာကြံ့ခိုင်မှုကို ဆိုးဆိုးရွားရွား ထိခိုက်စေတဲ့အထိ ဖြစ်ခဲ့ပါတယ်။ 

    ပေါ်တူဂီခြေစမ်းပွဲ

    ကျွန်တော်တို့ရဲ့ဆက်ဆံရေးမှာ ပထမဆုံး ကြီးကြီးမားမား အကွဲအပြဲက ၂၀၀၅-၀၆ ဘောလုံးရာသီမစခင်မှာ ပေါ်လာတယ်။ ပေါ်တူဂီကိုသွားတဲ့ ရာသီကြို ခြေစမ်းပွဲ ခရီးမှာပါ။ 

    ကားလို့စ် ကွီယော့ဇ်ရဲ့ အိုက်ဒီယာဆိုတော့ ဒီခရီးကို သူကပဲ စီစဥ်တယ်။ အသင်းအတွက် တော်တော်လေးကောင်းတဲ့ နေရာကို သူက ရှာပေးထားတယ်။ Vale do Lobo လို့ ခေါ်ပါတယ်။ တစ်ခြားကမ္ဘာလို့တောင် ပြောလို့ရပါတယ်။ 

    လေ့ကျင့်ကွင်းတွေရှိတယ်။ Gym တစ်ခုနဲ့ အိမ်သေးသေးလေးတွေလည်း ပါပါတယ်။ ကစားသမားတွေနေဖို့ အဆင်ပြေတာပေါ့။

    နွေရာသီ ပြင်သစ်မှာ အနားယူပြီးတဲ့နောက် အဲဒီကို ကျွန်တော် လိုက်သွားတယ်။ ၀န်ထမ်းတွေ၊ ကစားသမားတွေ အားလုံးအေးဆေးပဲ။ အိမ်လေးတွေထဲ ငြိမ့်နေကြတယ်။ 

    ဒါပေမယ့် သတင်းဆိုးတစ်ခု ကျွန်တော့်ကို ဆီးကြိုနေတယ်။ ရွိုင်မွှေလို့ ကားလို့စ် ဒုက္ခရောက်နေတယ်။ ပြဿနာကို မေးတော့ Vale do Lobo က အိမ်လေးတွေဟာ အဆင့်နိမ့်တော့ အဲဒီမှာ မနေချင်ဘူးလို့ ရွိုင်က ပြဿနာရှာတာ။ 

    အဲကွန်းမရှိလို့ဆိုပြီး ပထမအိမ်တစ်လုံးကို ရွိုင်က ငြင်းလိုက်တယ်။ နောက်တစ်လုံးထပ်ပေးတော့လည်း ဒီလိုစကားမျိုးပဲ ပြောတယ်တဲ့။ တတိယတစ်လုံးကိုတော့ ကျွန်တော် လိုက်ကြည့်လိုက်တယ်။ အိမ်က တော်တော်အဆင်ပြေပါတယ်။ 

    ရွိုင်က ဒီအိမ်မှာလည်း မနေချင်ဘူးလုပ်ပြန်တယ်။ ဘေးနားက Quinta do Lago ဆိုတဲ့ရွာမှာ မိသားစုနဲ့ သွားနေမယ်ပေါ့။ 

    ပထမဦးဆုံးည ဟော်တယ်ရှေ့က မြေကွက်လပ်မှာ ဘာဘီကျူးလုပ်စားကြတယ်။ တော်တော်မိုက်ပါတယ်။ ရွိုင်က ကျွန်တော့်ဆီလာပြီး စကားပြောစရာရှိတယ်လို့ ပြောတယ်။ 

    “ရွိုင် အခုတော့နေပါအုံးကွာ။ နောက်နေ့မနက်ကြရင် ပြောကြတာပေါ့” လို့ ကျွန်တော် ပြန်ပြောလိုက်ပါတယ်။ 

    လေ့ကျင့်ရေးပြီးတော့ သူ့ကို တစ်ဖက်ကိုခေါ်ပြီး 

    “ရွိုင် ဘာဖြစ်နေတာလဲ။ ငါအိမ်တွေကြည့်ပြီးသွားပြီး။ အဆင်ပြေနေတာပဲ” လို့ ပြောတယ်။ 

    ရွိုင်က ပေါက်ကွဲသွားပြီး အဲကွန်းမကောင်းတဲ့အကြောင်းအပါအ၀င် မကျေနပ်တာတွေ အများကြီး ပြောတော့တာပဲ။ ပြီးတော့ ကားလို့စ်အကြောင်းလဲ ပါတယ်။ 

    ဒီလိုနေရာမှာ ဘာလို့ ရာသီအကြို ခြေစမ်းပွဲ လာတာလဲ ဘာညာဆိုပြီးတော့ ပြောသေးတယ်။ အားလုံးက သက်သက် အပြစ်ရှာနေတာ။ ကျွန်တော်တို့ဆက်ဆံရေးမှာ အဖုအထစ်က အဲဒီကနေ စတာပါပဲ။ 

    အဲဒီခရီးစဥ်မှာ သူက တစ်သီးတစ်သန့်ကြီးနေလာတယ်။ ကျွန်တော်လည်း စိတ်ပျက်သွားတယ်။ ကားလို့စ်က အားလုံး လိုလေသေးမရှိအောင် အားကြိုးမာန်တက် လုပ်ပေးရှာပါတယ်။ 

    အဲဒီခရီးစဥ်ပြီးသွားတော့ ရွိုင်ကို ရုံးခန်းခေါ်ပြီး ပြဿနာပြေလည်သွားအောင် ကြိုးစားတယ်။ ကားလို့စ်ကို တောင်းပန်လိုက်ပေါ့။ သူကတော့ လုံး၀ပဲ။ 

    တစ်ခေါက် သူနဲ့ အကြီးအကျယ်စကားများတော့ 

    “ခင်ဗျားပြောင်းလဲသွားပြီ” လို့ ရွိုင်က ပြောလာတယ်။ 

    “ရွိုင်။ ငါပြောင်းလဲရမယ်လေ။ ဒီနေ့ဆိုတာ မနေ့ကလိုမဟုတ်ဘူးကွ။ ငါတို့ကမ္ဘာကြီးက ပြောင်းလဲနေတယ်။ နိုင်ငံ ၂၀ ကျော်က ကစားသမားတွေကို ငါထိန်းရတယ်။ မင်းက ငါ့ကို ပြောင်းလဲသွားပြီလို့ ပြောတယ်။ အေး ငါပြောင်းလဲသွားပြီ။ အပြောင်းအလဲတွေသာ မလုပ်ဘူးဆိုရင် ငါဟာ ရှင်သန်နေမှာတောင် မဟုတ်ဘူး” လို့ ကျွန်တော် ပြန်ပြောလိုက်တယ်။ 

    သူက “ခင်ဗျား အရင်ကလို မဟုတ်တော့ဘူး” တဲ့။ 

    ပြောစရာရှိတာကို ပြတ်ပြတ်ပဲပြောကြတယ်။ ထိရောက်အငြင်းပွားမှုပါပဲ။ သူလွန်တယ်ဆိုတဲ့အကြောင်း ကျွန်တော်ပြောလိုက်တယ်။

    “မင်းက အသင်းခေါင်းဆောင်။ အခြားကစားတွေအပေါ်မှာ မင်း နည်းနည်းလေးမှ တာ၀န်ခံစိတ်မရှိတော့ဘူး။ တဲစုတ်မှာ မင်းကို နေခိုင်းတာမဟုတ်ဘူး။ အိမ်ကောင်းအိမ်သန့်တွေကွ”

    ဒေါသတွေ ပေါက်ကွဲထွက်လာတယ်။ ကျွန်တော်တို့ကြား ဆက်ဆံရေးက အဲဒီကတည်းကစပြီး ပျက်သုဥ်းသွားတာပါပဲ။ 

    မန်ယူတီဗီ အင်တာဗျူး

    ပြီးတော့ MUTV နဲ့ အင်တာဗျူးတဲ့ပြဿနာ ပေါ်လာတယ်။ အသင်းက လူငယ်ကစားသမားတွေ တာ၀န်မကျေဘူးဆိုပြီး ရွိုင်က အပြစ်တင်တယ်။ 

    အင်တာဗျူးကို အလှည့်နဲ့လုပ်တာပါ။ အဲဒီတုန်းက ဂယ်ရီနဗီလ်း ဖြေရမယ့်အလှည့်။ 

    မစ်ဒယ်ဘရော့နဲ့ကစားပြီးတဲ့နောက် တနင်္လာနေ့မှာ ပြန်ကြားရေးအရာရှိက ကျွန်တော့်ဆီ အကြောင်းကြားလာတယ်။ ရွိုင်က ဂယ်ရီ့အလှည့်ကို ယူလိုက်မယ်ဆိုပြီး ပြောတာ။ ကျွန်တော်လည်း အမှုမဲ့ အမှတ်မဲ့ပဲ။ သိပ်အရေးကြီးတယ်လည်း မထင်ဘူးလေ။ 

    စနေနေ့ကပွဲအတွက် ကစားမားတွေကို ရွိုင်က ဖဲ့တော့တာဗျ။ ညနေ ၄ နာရီလောက်ကြတော့ ဖုန်းတစ်ခု၀င်လာပါရော။ 

    “အင်တာဗျူးကို ကြည့်လိုက်ပါအုံး” တဲ့

    အင်တာဗျူးမှာ ရွိုင်က ကီရင် ရစ်ချက်ဆန်ကို ငပျင်းနောက်ခံလူ၊ ဒါရင်ဖလက်ချာလိုကောင်မျိုးကို စကော့တလန်ကလူတွေက ဘာလို့ ချီးကျူးနေကြတာလဲ – အဲဒီလို ပြောတာ။ 

    ရီယိုဖာဒီနန်ကိုလည်း တစ်ပတ် ပေါင်း ၁ သိန်း ၂ သောင်းယူထားပြီး တော့တင်ဟမ် (စပါး)နဲ့ပွဲမှာ မိနစ် ၂၀ လောက်ပဲ ကောင်းကောင်းကစားနိုင်တဲ့ကောင်က သူ့ကိုယ်သူ စူပါစတားလို့ ထင်နေတယ် – တဲ့

    အသင်းပြန်ကြားရေးရုံးက ဒေးဗစ်ဂီးလ်(အမှုဆောင်အရာရှိ) ကို ချက်ခြင်းဖုန်းဆက်တယ်။ အင်တာဗျူးလွှင့်နေတာကို ရပ်လိုက်ပြီ။ အဒီအခွေကို ဘယ်လိုလုပ်ရမလဲဆိုတာ ကျွန်တော့်ဆုံးဖြတ်ချက်ကို စောင့်နေတယ်တဲ့။ 

    “ကျွန်တော်ကလည်း အိုကေ နက်ဖြန်ကျရင် ရုံးခန်းကို တိပ်ခွေယူလာခဲ့။ ကြည့်လိုက်မယ်” ဆိုပြီး ပြန်လိုက်တယ်။ 

    ဘုရားရေ။ ကျွန်တော် တော်တော် အံ့သြသွားတယ်။ အားလုံးကို သူက ဖဲ့ထားတာ။ ဒါရင် ဖလက်ချာ၊ အလန်စမစ်၊ ဗန်ဒါဆား တစ်ယောက်မှ မလွတ်ဘူး။ 

    အဲဒီအပတ်က ပွဲမရှိဘူး။ ဒူဘိုင်းက မန်ယူဘောလုံးကျောင်းကို သွားဖို့ ကျန်တော် စီစဥ်ထားတယ်။ သွားမယ့်နေ့မနက် ဂယ်ရီနဗီးလ်က အ၀တ်လဲခန်းကနေ ကျွန်တော့်ကို ဖုန်းခေါ်ပြီး လာခဲ့ဖို့ပြောတယ်။ 

    ချက်ခြင်းသွားလိုက်တယ်။ ရွိုင်က တောင်းပန်လိမ့်မယ်လို့ ကျွန်တော် ထင်ထားတာ။ ကျွန်တော် ခုံမှာထိုင်လိုက်တယ်။ လေ့ကျင့်ကွင်းမှာ အသင်းသားတွေ မပျော်ကြဘူးလို့ ဂယ်ရီက ကျွန်တော့်ကို ရုတ်တရက် ပြောချလိုက်တယ်။ ကျွန်တော့်နားတောင် ကျွန်တော် မယုံနိုင်ဘူး။ 

    “ဘာပြောတယ်”

    အ၀တ်လဲခန်းမှာ ရွိုင်က တော်တော်သြဇာရှိတယ်။ ဒီသြဇာကိုသုံးပြီး အခြေအနေတွေကို ပြောင်းလဲအောင် လုပ်ခဲ့တယ်ဆိုတာ ကျွန်တော် ယုံကြည်ပါတယ်။

    ငါပြောမယ်နားထောင်။ ကားလို့ကွီယော့ဇ်က လေ့ကျင့်မှုကောင်းကောင်းပေးနိုင်တဲ့ နည်းပြကောင်းတစ်ဦး။ တစ်ချို့လေ့ကျင့်ခန်းတွေကို ထပ်ခါထပ်ခါ သူလုပ်ခိုင်းတာမျိုး ရှိမယ်။ လေ့ကျင့်သားပြည့်မှ ဘောလုံးသမားကောင်းဖြစ်တာ။ အကျင့်ဖြစ်သွားအောင် လုပ်တာပါ။ အဲဒီကိစ္စမှာ ကျွန်တော် ၀င်မစွက်ဘူး။

    “ထရိန်နင်ကိစ္စတိုင်ဖို့ ငါ့ကို ခေါ်လိုက်တာလား။ မင်းတို့ ထရိန်နင် မစကြသေးဘူးလား။ ဘာတွေလာပြောနေတာလဲ” 

    အဲဒီလိုပြောပြီး ကျွန်တော် ထထွက်သွားလိုက်တယ်။ 

    နောက်တော့ ရွိုင်ရောက်လာပြီး ကျွန်တော့်ကို လာတွေ့တယ်။ 

    “ဘာတွေဖြစ်လဲဆိုတာ ငါသိတယ်” လို့ ကျွန်တော်သူ့ကို ပြောလိုက်တယ်။ 

    နောက်တော့ အင်တာဗျူးအကြောင်း ကျွန်တော်စကားစတယ်။ 

    “အင်တာဗျူးမှာ မင်းပြောတွေက ရှက်ဖို့ကောင်းတယ်။ ရယ်စရာလည်းကောင်းတယ်။ ကိုယ့်အသင်းဖော်တွေကို ၀ေဖန်တယ်။ သူတို့နဲ့ မင်းက ထိပ်တိုက်တွေ့ချင်တာမျိုးလား”

    ကစားသမားတွေကို ဗီဒီယိုပြပြီး သူတို့ဟာသူတို့ ဆုံးဖြတ်ခိုင်းဖို့ ရွိုင်က အကြံပေးတယ်။ ကျွန်တော် သဘောတူလိုက်ပြီး တစ်သင်းလုံးကို ခေါ်လိုက်တယ်။ ဒေးဗစ်ဂီးလ် (အမှုဆောင်အရာရှိ) လည်း အဆောက်အဦးထဲမှာ ရှိနေတယ်။ လာကြည့်ဖို့ ဖိတ်ပေမယ့် သူက ငြင်းပါတယ်။ 

    ကျွန်တော်ကိုယ်တိုင် ကိုင်တွယ်တာ အကောင်းဆုံးလို့ သူက ယူဆပါတယ်။ ကားလို့စ်နဲ့ အသင်း၀န်ထမ်းအားလုံး လာကြည့်ကြတယ်။  

    ဗီဒီယိုကြည့်ပြီးတော့ ပြောစရာရှိလားလို့ အသင်းသားတွေကို ရွိုင်က မေးတယ်။ အဒ်၀င် ဗန်ဒါဆားက ရှိတယ် တဲ့။ အသင်းသားတွေကို ၀ေဖန်တာဟာ လွန်တယ်လို့ သူက ပြောတယ်။ ရွိုင်က အဒ်၀င် (ဗန်ဒါဆား) ကို ပြန်ပက်တယ်။ 

    မင်းကိုမင်းဘာထင်နေလဲ။ မန်ယူအကြောင်း မင်းဘယ်လောက်သိလဲပေါ့။ 

    အဲဒီမှာ ချီးကျူးရမှာက ဗန် နစ္စတယ်ရွိုင်း၊ ချက်ခြင်းပဲ ဗန်ဒါဆားဖက်က ၀င်ပြောတယ်။ ရွိုင်က ရုဒ်(နစ္စတယ်ရွိုင်း) ကို ကောပါလေရော။ ပြီးတော့ ကားလို့စ်(ကွီယော့ဇ်) ဖက်လှည့်တယ်။ ကျွန်တော့်ကိုတော့ နောက်ဆုံးမှ ဖဲ့တယ်။

    “မဂ္ဂနီယာ(ပြိုင်မြင်းကိစ္စကြောင့် ဖာဂူဆန်နှင့် ပြဿနာတက်ခဲ့သည့် အိုင်းရစ် စီးပွားရေးလုပ်ငန်းရှင်) နဲ့ ပြဿနာတက်တဲ့ ခင်ဗျားရဲ့ ပါဆင်နယ်ကိစ္စကို အသင်းဆီ ခင်ဗျား ယူလာတယ်” 

    ဒီစကားကြားတော့ အသင်းသားတွေ အခန်းထဲက ထွက်သွားကြတယ်။ စခိုး၊ ဗန်နစ္စတယ်ရွိင်း၊ ဖော်ကျွန်း။ 

    ရွိုင်ရဲ့ခန္ဓာကိုယ်တစ်ခုလုံးမှာ အဆိုးဆုံးက သူ့ပါးစပ်ပဲ။ ပါးစပ်ဆိုးချက်က စဥ်းစားလို့တောင်မရဘူး။ 

    ကမ္ဘာပေါ်က ကိုယ့်ကိုယ်ကိုယ် ယုံကြည်မှုအရှိဆုံးသူတောင် သူ့ပါးစပ်နဲ့တွေရင် စက္ကန့်ပိုင်းအတွင်း ပြိုလဲသွားမယ်။

    သူနဲ့ အဲဒီနေ့က စကားများနေတုန်း သတိထားမိတာတစ်ခုရှိတယ်။ သူ့မျက်လုံးတွေက ကျဥ်းသွားပြီး အမည်းစက်လေးတစ်စက် သာသာလောက်ပဲ ရှိတော့တယ်။ (စာတန်ရဲ့ မျက်လုံးမျိုး)

    ဂလက်စကိုသားကျွန်တော်တောင် သူ့ကို မကြည့်ရဲလောက်အောင် ကြောက်သွားတယ်။ 

    ရွိုင်ပြန်သွားတော့ ကျွန်တော် တော်တော်မကျေမနပ်ဖြစ်နေတာကို ကားလို့စ်က တွေ့သွားတယ်။ သူ့ဘ၀မှာ ဒီလိုအနေအထားမျိုး တစ်ခါမှ မမြင်ဖူးဘူးလို့ သူက ပြောတယ်။ ပရော်ဖက်ရှင်နယ် ဘောလုံးအသင်းတစ်ခုမှာ စဥ်စားမရနိုင်တဲ့ ဆိုးဆိုးရွားရွား အဖြစ်အပျက်မျိုးလို့လည်း သူက သတ်မှတ်ခဲ့ပါတယ်။ 

    “သူ့ကိုအသင်းကထုတ်ရတော့မယ် ကားလို့စ်”

    ကျွန်တော်က ပြောလိုက်တယ်။ 

    “ရာနှုန်းပြည့်ထောက်ခံတယ်။ သူ့ကို ထုတ်လိုက်ပါတော့”လို့ ကားလို့စ်က ပြန်ပြောပါတယ်။ 

    နောက်တစ်ပတ် ဗုဒ္ဓဟူးနေ့အထိ အသင်းမှာ ကျွန်တော်မရှိဘူး။ ဒါပေမယ့် ဒေးဗစ်ဂီးလ်ကို ဒူဘိုင်းကနေ ဖုန်းဆက်ပြီး ပြောလိုက်တယ်။ 

    “ရွိုင်ကို ကျွန်တော်တို့ထုတ်ဖို့လိုပြီ” 

    ကျွန်တော်ပြောပြတဲ့ ပုံစံမျိုးဆိုရင် ရွေးချယ်စရာမရှိဘူးလို့ သူကလည်း ပြောပါတယ်။  ဂလေဇာမိသားစု (အသင်းပိုင်ရှင်) ကို ပြောပြဖို့ လိုမယ်လို့ သူက ဆိုတယ်။ ကျွန်တော်လည်း ဒေးဗစ်ဂီးလ်သဘောနဲ့ တစ်ထပ်တည်းပါပဲ။ 

    စာချုပ်ဖျက်ဖို့အတွက် ရွိုင်ကို အသင်းက နစ်နာကြေးပေးရမယ်။ သူ့ရဲ့ တုန့်ပြန်မှုကိုလည်း ကျွန်တော်တို့ အလေးထားပေးရမယ်။ ဒါမှ ရွိုင်ကို ကျွန်တော်တို့ မတရားလုပ်ပါတယ်လို့ ဘယ်သူမှ ပြောလို့မရမှာ။

    အရှေ့အလယ်ပိုင်းကနေ အသင်းကို ပြန်ရောက်တော့ ဒေးဗစ်(ဂီးလ်)က ဂလေဇာမိသားစု သောကြာနေ့လာမယ်ဆိုပြီး ကျွန်တော့်ဆီ အကြောင်းကြားတယ်။ မိုက်ကယ်ကနေဒီ (အေးဂျင့်) ကိုလည်း တွေ့ဖို့ ဖုန်းဆက်ချိန်းပြီးပြီ။ 

    ဂလေဇာနဲ့မီတင်ကိုလာဖို့ မိုက်ကယ်နဲ့ ရွိုင်ကို ကျွန်တော်တို့ခေါ်လိုက်တယ်။ ဆုံးဖြတ်ချက်ရော၊ အသေးစိတ်ကိစ္စတွေပါ အဲဒီအစည်း၀ေးမှာ ပြောလိုက်ပါတယ်။ 

    ဒီအတွက် သူစိတ်ပျက်ရတယ်လို့ ရွိုင်က နောက်ပိုင်းမှာ လူသိရှင်ကြားပြောလာတယ်။ 

    ကျွန်တော့်သဘောနဲ့ကျွန်တော် မန်ယူက သူ့ကစားသမားဘ၀ကို အဆုံးသတ်လိုက်တာ မဟုတ်ပါဘူး။ ပထမဆုံးအကြိမ် စကားများကတည်းက သူ့ကို ကျွန်တော် စိတ်ကုန်ခဲ့တာ။ သူနဲ့ နောက်ထပ် ပြဿနာတွေ ဆက်မဖြစ်ချင်ဘူး။ သူ့ပြဿနာတွေကိုလည်း မဖြေရှင်းပေးနိုင်တော့ဘူး။ 

    (အစည်းအ၀ေးပြီးတော့) လေ့ကျင့်ကွင်းကိုသွားပြီး အသင်းသားတွေကို အကျိုးအကြောင်း ပြောပြလိုက်တယ်။ လူတိုင်း အံ့သြနေကြပါတယ်။ 

    ဒွိဟဖြစ်စရာမလိုတဲ့ ကိစ္စတွေမှာ ဆုံးဖြတ်ချက် မြန်မြန်ဆန်ဆန် ချနိုင်တာဟာ နည်းပြဘ၀မှာ အကောင်းဆုံး အခိုက်အတန့်တွေပဲလို့ ကျွန်တော် ခံစားရတယ်။ ဒီပြဿနာကို ခပ်မြန်မြန်ပဲ အဆုံးသတ်ရမယ်ဆိုတာ ကျွန်တော် ရှင်းရှင်းလင်းလင်း သိထားပါတယ်။ 

    ကျွန်တော်သာ တွန့်ဆုတ်တွန့်ဆုတ်လုပ်နေရင် အ၀တ်လဲခန်းမှာ ရွိုင်က ပိုပြီး အာဏာပြလာမယ်။ သူမှန်တယ်ဆိုပြီး စိတ်ထဲမှာ ထင်လာမယ်။ သူက မှန်တာတွေလုပ်နေတာလို့ လူတိုင်းကို သိမ်းသွင်းဖို့ အချိန်ပိုရသွားပါလိမ့်မယ်။ 

    သူလုပ်နေတာတွေက မမှန်ဘူး။ မှားနေပါတယ်။ 

    (Alex Ferguson : My Autobiography စာအုပ်မှ ကောက်နှုတ် ဘာသာပြန်ဆိုပါသည်)

  • လီဗာပူးလ်ပွဲတွင် အမှားအယွင်းရှိခဲ့ကြောင်း ၀န်ခံလိုက်ရတဲ့ ပရီးမီးယားလိဂ် ဒိုင်အဖွဲ့

    လီဗာပူးလ်ပွဲတွင် အမှားအယွင်းရှိခဲ့ကြောင်း ၀န်ခံလိုက်ရတဲ့ ပရီးမီးယားလိဂ် ဒိုင်အဖွဲ့

    အောက်တိုဘာ ၁၊ ၂၀၂၃

    M-Media 


    ဓာတ်ပုံ – လူကျွံဘောလိုင်း မပါခဲ့သည့် VAR စစ်ဆေးမှု

    -မနေ့ကစားခဲ့တဲ့ စပါး-လီဗာပူးလ်ပွဲမှာ ဒိုင်လူကြီးရဲ့အမှား ထင်ထင်ရှားရှားရှိခဲ့တယ်လို့ အင်္ဂလိပ် ဘောလုံးဒိုင်လူကြီးများအဖွဲ့ PGMOL က ၀န်ခံလိုက်ပါတယ်။ 

    ၂၆ မိနစ်မှာ ကွင်းလယ်လူ ကာတစ်ဂျုံး အထုတ်ခံရပြီး ၁၀ ယောက်နဲ့ ကစားခဲ့ရတဲ့ လီဗာပူးလ်အသင်းဟာ ၃၆ မိနစ်မှာ ဂိုးရခဲ့ပါတယ်။ လူး၀စ်ဒီယက်ဇ်က လူကျွံထောင်ချောက်ကနေ ဖောက်ထွက်ပြီး သွင်းယူခဲ့တာပါ။ 

    ဒါပေမယ့် ကွင်းလယ်ဒိုင် ဒါရန် အင်္ဂလန်က VAR ပြန်ကြည့်ကာ လူကျွံဘောသတ်မှတ်ပြီး ဂိုးကို ပယ်ဖျက်ခဲ့ပါတယ်။ VAR မှာ လူကျွံဘောလိုင်း မပြခဲ့သလို၊ ဒိုင်အဖွဲ့ကလည်း သေသေချာချာ မစစ်ဆေးခဲ့ပါဘူး။ 

    အင်္ဂလိပ်ဒိုင်လူကြီးများအဖွဲ့ PGMOL က ဒီကိစ္စအတွက် နောက်ပိုင်းမှာ ဖြေရှင်းချက် ထုတ်ခဲ့ပါတယ်။ 

    “လူသားအမှား ထင်ထင်ရှားရှားရှိခဲ့တယ်ဆိုတာ PGMOL က ၀န်ခံပါတယ်။ သုံးသပ်မှု ပြည့်ပြည့်စုံစုံ ကျွန်တော်တို့ ပြုလုပ်သွားမှာပါ။ ပွဲတာ၀န်ရှိသူတွေထဲမှာ ကွင်းထဲက အဖွဲ့က လူး၀စ်ဒီယက်ဇ်ရဲ့ဂိုးကို ပယ်ဖျက်ခဲ့တယ်။ ဒါဟာ သိသာတဲ့ မှားယွင်းမှု  ဖြစ်ပါတယ်။ VAR ကြည့်ပြီး ဒီဂိုးကို ပေးလိုက်ရမှာပါ။ ဒါပေမယ့် VAR အဖွဲကလည်း မလုပ်နိုင်ခဲ့ပါဘူး” လို့ PGMOL က ထုတ်ပြန်တဲ့ ကြေငြာချက်မှာ ဖော်ပြထားပါတယ်။ 

    လီဗာပူးလ်နည်းပြ ယာဂန်ကလော့ပ်က ပွဲအပြီးမှာ ဒိုင်လူကြီးတွေကို ပြင်းပြင်းထန်ထန် ၀ေဖန်ခဲ့ပါတယ်။ 

    “မမျှတတဲ့အဖြစ်အပျက်တွေ၊ ကြောင်တောင်တောင် ဆုံးဖြတ်ချက်တွေကြောင့် ကျွန်တော်တို့ ရှုံးခဲ့ရတာပါ။ (ဒီယက်ဇ်ဂိုးဟာ) လူကျွံဘောမဟုတ်တာကို ခင်ဗျားတို့လည်း မြင်မှာပါ”

    ရာသီအစ မန်ယူနဲ့ ၀ုလ်ဗ်ပွဲမှာ ၀ုလ်ဗ်ဖက်က ရသင့်တဲ့ ပင်နယ်တီကို ကွင်းလယ်ဒိုင်က မပေးခဲ့မှုကြောင့် PGMOL အဖွဲ့က တောင်းပန်ခဲ့ရပါသေးတယ်။ 

    အခုကိစ္စမှာလည်း ၀ုလ်ဗ်တုန်းကလိုပဲ PGMOL ရဲ့ ကြေငြာချက်က ဘာမှ အရာမရောက်ဘူးလို့ ကလော့က ဆိုပါတယ်။ 

    “ကြေငြာချက်အကြောင်း ထွေထွေထူးထူး ဘာမှပြောစရာမလိုဘူးလို့ ကျွန်တော်ကတော့ ယူဆတယ်။ ဘာအရာမှ မရောက်ပါဘူး”

    Ref: BBC

  • E Sport ပြိုင်ပွဲတွင် ဗိုလ်စွဲခဲ့သည့်အတွက် တောင်ကိုရီးယား ဂိမ်မာများ စစ်မှုမထမ်းရတော့

    E Sport ပြိုင်ပွဲတွင် ဗိုလ်စွဲခဲ့သည့်အတွက် တောင်ကိုရီးယား ဂိမ်မာများ စစ်မှုမထမ်းရတော့

    စက်တင်ဘာ ၃၀၊ ၂၀၂၃

    M-Media 


    -အာရှအားကစားပြိုင်ပွဲက League of Legends မှာ ဗိုလ်စွဲခဲ့တဲ့ တောင်ကိုရီးယား ဂိမ်မာတွေဟာ စစ်မှုမထမ်းမနေရ အမိန့်ကနေ ကင်းလွတ်ခွင့် ရရှိသွားပါတယ်။ 

    တောင်ကိုရီးယားအသင်းဟာ မနေ့က ဗိုလ်လုပွဲမှာ ထိုင်၀မ်ကို အနိုင်ရပြီး ရွှေတံဆိပ်ဆု ရရှိခဲ့တာပါ။ 

    တောင်ကိုရီးယားနိုင်ငံမှာ အသက် ၁၈ နှစ်ကနေ ၂၈ နှစ်အရွယ် အမျိုးသားတိုင်း စစ်မှုမထမ်းမနေရအမိန့် ပြဌာန်းထားပြီး အားကစားသမားတွေ၊ အနုပညာရှင်တွေ၊ ပရော်ဖက်ရှင်နယ် အကသမားတွေဟာ ထင်ရှားတဲ့ ပြိုင်ပွဲတွေမှာ ဆုတံဆိပ်ရရှိရင် စစ်မှုထမ်းခြင်းကနေ ကင်းလွတ်ခွင့်ရမယ်လို့ သတ်မှတ်ထားပါတယ်။ 

    E Sport ကစားသမားတွေ ဒီကင်းလွတ်ခွင့်မှာ ပါ၀င်လားဆိုတာ အရင်က တိတိကျကျ မထုတ်ပြန်ထားပါဘူး။ League of Legends  အောင်ပွဲအပြီးမှာတော့ ရှင်းရှင်းလင်းလင်း သိရှိခဲ့ရပြီ ဖြစ်ပါတယ်။ 

    တောင်ကိုရီးယား E Sport အသင်းဟာ အာရှအားကစားပြိုင်ပွဲမှာ ရှုံးပွဲမရှိ ဗိုလ်စွဲခဲ့တာပါ။ အိမ်ရှင်တရုတ်ကိုပါ အနိုင်ရရှိခဲ့တာ ဖြစ်ပါတယ်။ 

     Ref: AFP

  • အသင်းနဲ့ ပြဿနာတက်နေတဲ့ နာပိုလီတိုက်စစ်မှူး အိုဆိုင်မန်

    အသင်းနဲ့ ပြဿနာတက်နေတဲ့ နာပိုလီတိုက်စစ်မှူး အိုဆိုင်မန်

    စက်တင်ဘာ ၂၈၊ ၂၀၂၃

    M-Media 


    -Tiktok မှာ လှောင်ပြောင်တဲ့ ဗီဒီယို တင်တာကြောင့် အသင်းကို တရားစွဲသွားမယ်လို့ တိုက်စစ်မှူး ဗစ်တာ အိုဆိုင်မန်က ခြိမ်းခြောက်လိုက်ပါတယ်။ 

    မနှစ်က စီးရီးအေချန်ပီယံဖြစ်ခဲ့တဲ့ နာပိုလီအသင်းမှာ အိုဆိုင်မန်ဟာ အရေးပါတဲ့နေရာကနေ ပါ၀င်ခဲ့တာပါ။ 

    ပြီးခဲ့တဲ့စနေနေ့ ဘိုလော့နာအသင်းနဲ့ ဂိုးမရှိသရေကျခဲ့တဲ့ ပွဲအပြီးမှာတော့ အကွဲအပြဲဇာတ်လမ်းတစ်ခု စခဲ့ပါတယ်။

    ပွဲမှာ ပင်နယ်တီမ၀င်တဲ့ အိုဆိုင်မန်ကို လှောင်ပြောင်တဲ့ ဗီဒီယိုတစ်ခု Tiktok မှာ အသင်းက တင်ခဲ့တာပါ။ နောက်ပိုင်းမှ ၀ေဖန်မှုတွေကြောင့် ပြန်ဖျက်သွားခဲ့ပါတယ်။ 

    အိုဆိုင်မန်ရဲ့ အေးဂျင့်ဖြစ်သူ ရော်ဘတ်တို ကလင်ဒါက ဒီလုပ်ရပ်ဟာ လက်သင့်မခံနိုင်စရာ လုပ်ရပ်မျိုးဖြစ်တယ်လို့ ပြောပါတယ်။ 

    ကစားသမားကို ကာကွယ်ဖို့အတွက် မိမိတို့မှာ ဥပဒေလမ်းကြောင်းအရ အခွင့်အရေးရှိတယ်လို့လည်း ကလင်ဒါက ဆိုပါတယ်။ 

    ဘိုလော့နာနဲ့ပွဲမှာ အိုဆိုင်မန်ဟာ နည်းပြ ရူဒီ ဂါစီယာနဲ့လည်း မကျေမလည်ဖြစ်ခဲ့ပါတယ်။ ပွဲပြီးဖို့ ၄ မိနစ်အလိုမှာ လူစားလဲခဲ့မှုအတွက် အိုဆိုင်မန်က ဒေါသထွက်ခဲ့တာ ဖြစ်ပါတယ်။ 

    နာပိုလီအသင်းနဲ့ ၂၀၂၅ ခုနှစ်အထိ စာချုပ်ရှိတဲ့ အိုဆိုင်မန်ဟာ သက်တမ်းထပ်တိုးဖို့ကိစ္စ ပျက်ပြယ်ခဲ့ပါတယ်။ လက်ရှိမှာတော့ မန်ယူအသင်းက ခေါ်ယူဖို့ စိတ်၀င်စားနေပါတယ်။ 

    Ref: Sky News

  • MMA လောကမှာ မင်းမူတော့မယ့် ဆော်ဒီ

    MMA လောကမှာ မင်းမူတော့မယ့် ဆော်ဒီ

    သြဂုတ် ၃၁၊ ၂၀၂၃

    M-Media 


    (ဆော်ဒီ MMA ကစားသမား အဘ်ဒူလာ အလ် ကာတာနီ)

    -အမေရိကန် ကိုယ်ခံပညာပေါင်းစုံ(MMA) တိုက်ခိုက်ရေး လိဂ်တစ်ခုဖြစ်တဲ့ PFL ရှယ်ယာတစ်ချို့ကို ဆော်ဒီအာရေဗျ နိုင်ငံပိုင် အားကစားလုပ်ငန်း SRJ က ၀ယ်ယူလိုက်ပါတယ်။ 

    SRJ ကို ဆော်ဒီအစိုးရက သြဂုတ်လအစောပိုင်းကမှ ဖွဲ့စည်းတည်ထောင်လိုက်တာပါ။ ရှယ်ယာတွေ ၀ယ်ယူကြောင်း မနေ့က ကြေငြာခဲ့ပြီး အရှေ့အလယ်ပိုင်းမှာ MMA ပြိုင်ပွဲကြီးတစ်ခု ဦးစီး ကျင်းပသွားမယ်လို့လည်း ထုတ်ပြန်ခဲ့ပါတယ်။ 

    ပြိုင်ပွဲသစ်ကို ‘အရှေ့အလယ်ပိုင်းနှင့် မြောက်အာဖရိက တိုက်ခိုက်ရေးလိဂ်’ MENA လို့ အမည်ပေးကာ လာမယ့်နှစ်ကစတင်ပြီး ကျင်းပသွားမှာဖြစ်ပါတယ်။

    PFL ရှယ်ယာတွေကို ဒေါ်လာသန်း ၁၀၀ ဖိုး ဆော်ဒီက ၀ယ်ယူခဲ့ကြောင်း နီးစပ်သူတွေက ပြောပါတယ်။  

    နိုင်ငံစီးပွားရေး ရေနံအပေါ် မှီခိုနေရမှုကို လျှော့ချဖို့ ရည်ရွယ်တဲ့ ဆော်ဒီရဲ့ ၂၀၃၀ စီမံကိန်းမှာ အားကစားလုပ်ငန်းအတွင်း အကြီးအကျယ် ရင်းနှီးမြှုပ်နှံပြီး အဓိကပြိုင်ပွဲတွေ ဆော်ဒီမှာ ကျင်းပလာနိုင်အောင် လုပ်ဆောင်ဖို့လည်း ပါ၀င်ပါတယ်။ 

    လက်ရှိမှာ ဂေါက်သီး၊ ဖော်မြူလာ၀မ်း ကားပြိုင်ပွဲနဲ့ ဘောလုံးကဏ္ဍတွေမှာ ရင်းနှီးမြှုပ်နှံမှုတွေ ပြုလုပ်ထားပါတယ်။ 

    MMA ပြိုင်ပွဲကို Desert Force အမည်နဲ့ ၂၀၁၄ ခုနှစ်က ဆော်ဒီမှာ ကျင်းပခဲ့ဖူးပြီး အဲဒီနောက်ပိုင်း ဆော်ဒီအာရေဗျနဲ့ အရှေ့အလယ်ပိုင်းမှာ ဒီအားကစားကို လူကြိုက်များမှု မြင့်တက်လာပါတယ်။ 

    Ref: Aljazeera