Tag: Moroco

သြဂုတ် ၄၊ ၂၀၂၃

M-Media 

-မော်ရိုကို အမျိုးသမီး ဘောလုံးအသင်းဟာ မနေ့က ကိုလံဘီယာအသင်းနဲ့ အုပ်စုနောက်ဆုံးပွဲမှာ ၁ ဂိုး ဂိုးမရှိနဲ့ အနိုင်ကစားပြီး ၁၆ သင်း ရှုံးထွက်အဆင့်ကို တက်ရောက်သွားပါပြီ။ 

ဒါဟာ မော်ရိုကိုအမျိုးသမီးအသင်း ၄ ခုမြောက် မှတ်တမ်းသစ် ရေးထိုးနိုင်ခဲ့တာဖြစ်ပါတယ်။ 

ကမ္ဘာ့ဖလား၀င်ခွင့်ရတဲ့ ပထမဆုံး မြောက်အာဖရိကနဲ့ အာရပ်အသင်း၊ အုပ်စုဒုတိယပွဲ တောင်ကိုရီးယားကို အနိုင်ကစားကာ ကမ္ဘာ့ဖလား ပထမဆုံးနိုင်ပွဲစံချိန်၊ အခု ရှုံးထွက်အဆင့်ကို ပထမဆုံး တက်ရောက်နိုင်တဲ့မှတ်တမ်းတွေ ဖြစ်ပါတယ်။

နောက်ခံလူ ဘန်ဇီနာဟာ ဟီဂျဘ်ပု၀ါနဲ့ ကမ္ဘာ့ဖလားမှာ ကစားတဲ့ ပထမဆုံး အမျိုးသမီးအဖြစ် မှတ်တမ်း၀င်ပါတယ်။ 

နာမည်ကြီး ဂျာမနီအသင်းဟာ တောင်ကိုရီးယားနဲ့ သရေကျပြီး နှစ်သင်းလုံး အုပ်စုနေ လှည့်ပြန်ခဲ့ရပါတယ်။ 

မော်ရိုကိုအသင်းဟာ ၁၆ သင်းအဆင့်မှာ ပြင်သစ်နဲ့ တွေ့မှာပါ။ 

အသင်းခေါင်းဆောင် ရိုဆဲလာ အေယာနီက လက်ဖျားခါလောက်တဲ့ အသင်းလိုက်ကစားပုံကြောင့် အခုလိုအောင်ပွဲ ရခဲ့တာလို့ ပြောပါတယ်။ 

“နောက်တစ်ဆင့်တက်ဖို့ ခက်ခဲမယ်ဆိုတာ ပြိုင်ပွဲစကတည်းက ကျွန်မတို့ သိပါတယ်။ တစ်သင်းလုံး ကြိုးစားခဲ့ကြပြီး အောင်ပွဲလည်း ရခဲ့ပါပြီ။ သမိုင်းသစ်တွေ ဖန်တီးခွင့်ရတဲ့အတွက် အံ့သြ၀မ်းသာမိပါတယ်။ ကျွန်မတို့ရဲ့ ကမ္ဘာ့ဖလားခရီး ဆက်လက်ရှင်သန်နေပြီး ပြင်သစ်နဲ့ပွဲကို အာရုံစိုက်သွားမှာပါ”

အမျိုးသမီးအသင်းရဲ့ အခုအောင်ပွဲအတွက် မော်ရိုကိုပြည်သူတွေကလည်း ဆိုရှယ်မီဒီယာကနေတစ်ဆင့် ချီးကျူးခဲ့ကြပါတယ်။ 

Ref: Aljazeera

ဒီဇင်ဘာ ၁၆၊ ၂၀၂၂

M-Media

-မော်ရိုကိုတိုက်စစ်မှုး ဟာကင်မ် ဇီယက်ချ်ဟာ ကမ္ဘာ့ဖလားပြိုင်ပွဲကနေ ရရှိတဲ့ ဆုကြေးငွေအားလုံးကို ချို့တဲ့သူတွေထံ လှူဒါန်းခဲ့တယ်လို့ သိရပါတယ်။ 

ကာတာကမ္ဘာ့ဖလားမှာ မော်ရိုကိုအသင်းဟာ ခြေစွမ်းပြပြီး သမိုင်းသစ် ရေးထိုးနိုင်ခဲ့တာပါ။ 

အုပ်စုအဆင့်မှာ ဘယ်သူမှ မထင်မှတ်ထားတဲ့ စွမ်းဆောင်မှုနဲ့ ရှုံးထွက်ကို တက်ရောက်ခဲ့ပြီး ၁၆ သင်းအဆင့်မှာ စပိန်၊ ကွာတားဖိုင်နယ်မှာ ပေါ်တူဂီတို့ကို အနိုင်ယူကာ ပထမဆုံး ဆီမီးဖိုင်နယ်ရောက်တဲ့ အာဖရိကအသင်းအဖြစ် မှတ်တမ်း၀င်ပါတယ်။  

ဆီမီးဖိုင်နယ်မှာတော့ ပြင်သစ်ကို ရှုံးနိမ့်ကာ ခရိုအေးရှားနဲ့ ဒီကနေ့မှာ တတိယနေရာလုပွဲ ကစားရမှာပါ။

ဇီယက်ချ်ဟာ ပြိုင်ပွဲကနေ အနည်းဆုံး ဆုကြေးငွေ ပေါင် ၂၆၂၀၀၀ လောက်ရရှိခဲ့ပါတယ်။

၂၀၁၅ ခုနှစ် မော်ရိုကိုလက်ရွေးစင်အသင်းမှာ စတင်ကစားကတည်းက ဇီယက်ချ်ဟာ နိုင်ငံအသင်းက ရရှိတဲ့ ဆုကြေးငွေအားလုံးကို ချို့တဲ့သူတွေ၊ ပရဟိတအဖွဲ့အစည်းတွေ၊ အားကစားအသင်းအဖွဲ့တွေကို လှူဒါန်းလေ့ရှိပါတယ်။ 

ဇီယက်ချ်ဟာ အသက် ၂၉ နှစ်အရွယ် ရှိနေပြီး လက်ရှိ ချယ်ဆီးအသင်းမှာ ကစားနေပါတယ်။ 

Ref: The Sun

ဖေဖော်ဝါရီ ၆၊ ၂၀၂၂
M-Media

-ရေတွင်းထဲကျသွားတဲ့ အသက် ၅ နှစ်အရွယ် ရိုင်ယန် အောင်ရမ်ဟာ ကယ်ဆယ်ရေးသမားတွေ မရောက်ခင်မှာပဲ သေဆုံးသွားတယ်လို့ မော်ရိုကိုအစိုးရက ထုတ်ပြန်ပါတယ်။

နိုင်ငံမြောက်ပိုင်းက တောင်တန်းဒေသဖြစ်တဲ့ Chefchaouen မှာ ရိုင်ယန်တစ်ယောက် အင်္ဂါနေ့က ရေတွင်းထဲ ပြုတ်ကျသွားတာဖြစ်ပါတယ်။ ရိုင်ယန်ကို ကယ်ဖို့အတွက် မော်ရိုကိုအစိုးရက အစွမ်းကုန် ကြိုးစားခဲ့ကြပြီး တစ်ကမ္ဘာလုံးက စောင့်ကြည့်ခဲ့ကြတဲ့ အဖြစ်အပျက်လည်း ဖြစ်ပါတယ်။

ရေတွင်းအ၀ဟာ ၁၈ လက်မသာကျယ်ပြီး အတွင်းပိုင်းမှာ ပိုကျဉ်းသွားတာကြောင့် ကယ်ဆယ်ရေးသမား​တွေ ဆင်းကယ်ဖို့ မလွယ်ကူပါဘူး။ ရိုင်ယန်ဟာ ရေတွင်းအောက် ပေ ၁၀၀ လောက်မှာ ညပ်နေတာ ဖြစ်ပါတယ်။

ကယ်ဆယ်ရေးသမားတွေဟာ ရေတွင်းဘေးနားက မြေတွေကို ဖြိုချပြီး အလျားလိုက် မြောင်းဖောက်ကာ ကယ်ဖို့ ကြိုးစားခဲ့ကြတာပါ။ တောင်ကုန်းဖြစ်ပြီး မြေကလည်း ပျော့တာကြောင့် မြေပြိုမယ့်အန္တရာယ်ကို အထူးရှောင်ရှားပြီး တူးခဲ့ရတာ ဖြစ်ပါတယ်။

မနေ့ကညပိုင်းက ရိုင်ယန်ညပ်နေတဲ့နေရာကို ရောက်ရှိခဲ့ပေမယ့် အသက်မမီတော့ပါဘူး။

ရေတွင်းထဲပြုတ်ကျပြီးပြီးချင်းမှာ ရိုင်ယန်ဟာ အသက်ရှင်သေးပြီး ကယ်ဆယ်ရေးသမားတွေက အောက်ဆီဂျင်နဲ့ ရေတွေကို အပေါ်ကနေ ချကာ အသက်ဆက်နိုင်အောင် ကြိုးစားခဲ့ကြပါသေးတယ်။​ Chefchaouen ဒေသဟာ ဆောင်းတွင်းမှာ အလွန်အေးတဲ့ ဒေသလည်း ဖြစ်ပါတယ်။

ရိုင်ယန်လေးသေဆုံးသွားမှုအတွက် ဝမ်းနည်းကြောင်း မော်ရိုကိုဘုရင် မိုဟာမက်က ကြေငြာချက် ထုတ်ပြန်ခဲ့သလို၊ မော်ရိုကိုနဲ့ ကမ္ဘာတစ်ဝှမ်း ပြည်သူတွေကလည်း ဆိုရှယ်မီဒီယာတွေမှာ ဝမ်းနည်းကြောင်း ရေးသားခဲ့ကြပါတယ်။

Ref: Reuters