ဒီဇင်ဘာ ၁၄၊ ၂၀၂၀
M-Media
-အာဖရိကက မွတ်စလင်နိုင်ငံတစ်ခုဖြစ်တဲ့ မော်ရိုကိုရဲ့ ကျောင်းပြဌာန်းစာအုပ်မှာ နိုင်ငံအတွင်းက ဂျူးလူမျိုးတွေရဲ့ သမိုင်းကြောင်း၊ ယဉ်ကျေးမှု အနုပညာတွေအကြောင်း ထည့်သွင်းသင်ကြားတော့မယ်လို့ သိရပါတယ်။
မော်ရိုကိုနိုင်ငံဟာ မြောက်အာဖရိကမှာ ဂျူးလူမျိုးအများဆုံးရှိတဲ့ နိုင်ငံတစ်ခုပါ။
ဂျူးလူ့အဖွဲ့အစည်းဟာ မော်ရိုကိုမှာ လွန်ခဲ့တဲ့ နှစ်ပေါင်း ရာချီအရင်ကတည်းက ရှိခဲ့ကြတာဖြစ်ပြီး၊ အများစုဟာ ၁၄ ရာစုနှောင်းပိုင်း စပိန်နဲ့ ပေါ်တူဂီက ခရစ်ယာန်ဘာသာရေး အုပ်ချုပ်မှုစနစ်အောက် ဖိနှိပ်ညှမ်းပမ်း မောင်းထုတ်မှုကြောင့် ထွက်ပြေး ခိုလှုံလာရသူတွေ ဖြစ်ပါတယ်။
၁၉၄၀ ပြည့်နှစ်မှာ မော်ရိုကိုက ဂျူးလူမျိုးအရေအတွက်ဟာ ၂ သိန်းခွဲလောက်ရှိပြီး အဲဒီအချိန်က နိုင်ငံလူဦးရေရဲ့ ၁၀ ရာခိုင်နှုန်းဖြစ်ပါတယ်။
အရှေ့ဥရောပကဂျူးတွေ ပါလက်စတိုင်းနယ်မြေမှာ အစ္စရေးနိုင်ငံအဖြစ်ထူထောင်တဲ့
၁၉၄၈ ခုနှစ်နောက်ပိုင်း မော်ရိုကိုက ဂျူးတွေဟာ အစ္စရေးကို ပြောင်းရွှေ့သွားကြပြီး လက်ရှိမှာ ဂျူးလူမျိုးအရေအတွက် ၃ ထောင်ဝန်းကျင်သာ မော်ရိုကိုမှာ ကျန်ပါတော့တယ်။
ပညာရေးသင်ရိုးညွှန်းတမ်းစနစ် ပြုပြင်ပြောင်းလဲကိုရေးကို မော်ရိုကိုက ၂၀၁၄ ခုနှစ်က စတင်ကာ လုပ်ဆောင်ခဲ့တာဖြစ်ပြီး၊ ဂျူးလူမျိုးသမိုင်းကြောင်းနဲ့ ယဉ်ကျေးမှုအကြောင်း ထည့်သွင်းသင်ကြားရေးလည်း ဒီစီမံကိန်းမှာ ပါဝင်ပါတယ်။
လာမယ့်စာသင်နှစ်ကစပြီး မူလတန်းအဆင့် သင်ရိုးညွှန်းတမ်းမှာ ဂျူးလူမျိုးတွေအကြောင်း ထည့်သွင်းသင်ကြားမှာ ဖြစ်ပါတယ်။ ၂၀၂၂ စာသင်နှစ်ရောက်ရင် အလယ်တန်းအဆင့် သင်ရိုးညွှန်းတမ်းမှာ ထည့်သွင်းသင်ကြားဖို့လည်း မော်ရိုကိုက စီစဉ်ထားပါတယ်။
မော်ရိုကိုမှာ ဂျူးသမိုင်းပြတိုက်တစ်ခုလည်း ရှိနေပြီး အာဖရိကမှာ တစ်ခုတည်းသော ဂျူးလူမျိုးဆိုင်ရာ သမိုင်းပြတိုက် ဖြစ်ပါတယ်။
မော်ရိုကိုဟာ ပြီးခဲ့တဲ့သီတင်းပတ်မှာ အစ္စရေးနဲ့ သံတမန်ဆက်ဆံရေးထူထောင်ဖို့ သဘောတူညီခဲ့ပြီး၊ ယူအေအီး၊ ဘာရိန်း၊ ဆူဒန်တို့နောက် ပြီးခဲ့တဲ့လတွေအတွင်း မွတ်စလင်ကမ္ဘာမှာ အစ္စရေးနဲ့ ဆက်ဆံရေးထူထောင်တဲ့နိုင်ငံ စတုတ္ထမြောက်နိုင်ငံ ဖြစ်လာတာပါ။
မော်ရိုကိုဟာ အရင်ကတည်းက အစ္စရေးနဲ့ လျှို့ဝှက်ဆက်ဆံရေးရှိနေတာ ဖြစ်ပါတယ်။ အစ္စရေးက မော်ရိုကိုနွယ်ဖွားဂျူးတွေဟာ မော်ရိုကိုကို နှစ်စဉ် လာရောက်လည်ပတ်မှုတွေလည်း ရှိပါတယ်။
Ref: Arab News
