Tag: Myanmar in Thailand

မေ ၈၊ ၂၀၁၈
M-Media

– ကာမဆန္ဒ ဖြည့်ဆည်းချင်သူတွေကို မြန်မာအမျိုးသမီးတွေနဲ့ ချိတ်ပေးတဲ့ ပြည့်တန်ဆာခေါင်း အမေရိကန်နိုင်ငံသားတစ်ဦးကို ဖမ်းဆီးလိုက်တယ်လို့ ထိုင်းရဲတပ်ဖွဲ့က ဒီကနေ့မှာ သတင်းထုတ်ပြန်ပါတယ်။

အသက် ၆၆ နှစ်အရွယ် ဗစ်ဂို အလ်ဘာ့တ်ဆန်ဆိုတဲ့ အဲဒီအမျိုးသားဟာ Chiang Rai ပြည်နယ်မှာ အငြိမ်းစားဗီဇာနဲ့ နေထိုင်နေတာဖြစ်ပြီး Burmese Border Chicks for Hire ဆိုတဲ့ ၀ဘ်ဆိုက်နဲ့ Facebook စာမျက်နှာတွေကို လွှင့်တင်ထားကာ ဘတ် ၆၅၀၀ နဲ့ မြန်မာအမျိုးသမီးတွေနဲ့ ပျော်ပါးနိုင်အောင် စီစဉ်ပေးတာဖြစ်ပါတယ်။

အလ်ဘာ့ဆန်ဟာ သူ့ဖောက်သည်တွေကို မယ်ဆိုင်မှာ မြန်မာမိန်းကလေးတွေနဲ့တွေ့ဖို့ စီစဉ်ပေးသလို၊ မြန်မာနိုင်ငံထဲ ၀င်ရောက်ပျော်ပါးနိုင်အောင်လည်း ပြုလုပ်ပေးတယ်လို့ ထိုင်းရဲတပ်ဖွဲ့က ဆိုပါတယ်။

“သူ ဒီအလုပ်လုပ်နေတာ အနည်းဆုံး ၁၀ နှစ်လောက်ရှိပါပြီ” လို့ ထိုင်း ရာဇ၀တ်မှုနှိမ်နှင်းရေးဌာနက ဒုတိယအကြီးအကဲ ကာနယ် Jirabhob Bhuridej က ပြောကြားခဲ့ပါတယ်။

မယ်ဆိုင် ဟိုတယ်တစ်ခုမှာ ဖောက်သည်အဖြစ် ဟန်ဆောင်ထားတဲ့ ထိုင်းရဲတပ်ဖွဲ့က အသွင်ယူရဲသားတွေကို မြန်မာနိုင်ငံက အသက် ၂၅ နှစ်နဲ့ ၁၈ နှစ်အရွယ်ရှိတဲ့ မိန်းကလေးနှစ်ယောက်နဲ့ တွေ့ဆုံဖို့ စီစဉ်ပေးခဲ့ပြီးတဲ့နောက် အလ်ဘာ့တ်ဆန်ကို ဖမ်းဆီးခဲ့တာဖြစ်ပါတယ်။

အလ်ဘာတ်ဆန်အပြင် အဲဒီ မြန်မာမိန်းကလေးနှစ်ဦး၊ ကူညီပေးခဲ့တဲ့ မြန်မာပွဲစား အမျိုးသမီးတစ်ဦးတို့ကိုလည်း ပြည့်တန်ဆာဆိုင်ရာ ဥပဒေနဲ့ တရားစွဲဆိုထားပါတယ်။

ထိုင်းနိုင်ငံမှာ တွင်ကျယ်နေတဲ့ လိင်ဖျော်ဖြေရေးလုပ်ငန်းတွေနဲ့ပတ်သက်လို့ ဝေဖန်မှုတွေ ကျယ်လောင်လာခဲ့ပြီးတဲ့နောက် ဒီလို ဖမ်းဆီးမှု ပေါ်ထွက်လာတာ ဖြစ်ပါတယ်။

ထိုင်းနိုင်ငံက လိင်လုပ်ငန်းအတွက် အိမ်နီးချင်းမြန်မာနိုင်ငံက မိန်းကလေးတွေဟာ လူကုန်ကူးမှုသားကောင် ဖြစ်နေရပါတယ်။

Ref: Straits Times