News @ M-Media

Tag: Myanmar Military

  • မြန်မာစစ်တပ်နှင့် ရဲတပ်ဖွဲ့တို့၏ အကောင့်အသေးစိတ်ကို Facebook က ထုတ်ပြန်ရေး နိုင်ငံတကာရှေ့နေများက ကန်တရားရုံးတစ်ခုကို လျှောက်ထား

    မြန်မာစစ်တပ်နှင့် ရဲတပ်ဖွဲ့တို့၏ အကောင့်အသေးစိတ်ကို Facebook က ထုတ်ပြန်ရေး နိုင်ငံတကာရှေ့နေများက ကန်တရားရုံးတစ်ခုကို လျှောက်ထား

    ဇွန် ၁၁၊ ၂၀၂၀
    M-Media

    (ဓာတ်ပုံ – တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်)

    -မြန်မာစစ်တပ်ဟာ ရိုဟင်ဂျာတွေအပေါ် လူမျိုးတုန်းသတ်ဖြတ်တယ်ဆိုတဲ့ စွဲချက်နဲ့ နိုင်ငံတကာခုံရုံးမှာ တရားစွဲဆိုထားတဲ့ ဂမ်ဘီယာနိုင်ငံကိုယ်စားပြု ရှေ့နေတွေက မြန်မာစစ်တပ်နဲ့ ရဲတပ်ဖွဲ့ တာဝန်ရှိသူတွေရဲ့ ပို့စ်တွေ၊ ဆက်သွယ်ပြောကြားမှုတွေကို Facebook က ထုတ်ပြန်ရေး ဆုံးဖြတ်ပေးဖို့ အမေရိကန် ခရိုင်တရားရုံးတစ်ခုကို လျှောက်ထားလိုက်ပါတယ်။

    ၁၉၄၈ ခုနှစ် သဘောတူညီချက်အရ ရိုဟင်ဂျာတွေအပေါ် လူမျိုးတုန်းသတ်ဖြတ်မှု လုပ်တယ်ဆိုတဲ့ စွဲချက်နဲ့ပတ်သက်ပြီး ဂမ်ဘီယာနိုင်ငံရဲ့ တိုင်ကြားမှုကို နယ်သာလန်နိုင်ငံ သည်ဟေ့ဂ်အခြေစိုက် နိုင်ငံတကာ ခုံသမာဓိရုံးက လက်ခံစစ်ဆေးနေတာပါ။

    Facebook ပေါ်မှာ အမုန်းစကားပြန့်နှံမှုဟာ ၂၀၁၂ ခုနှစ်နောက်ပိုင်း မြန်မာနိုင်ငံမှာ ဖြစ်ပွားခဲ့တဲ့ အစ္စလာမ်ဘာသာဝင်တွေအပေါ် အကြမ်းဖက်တိုက်ခိုက်မှုတွေမှာ အဓိကအခန်းကဏ္ဍကနေ ပါဝင်ခဲ့တယ်လို့ ကုလ လူ့အခွင့်အရေးဆိုင်ရာ စုံစမ်းစစ်ဆေးသူတွေက ၂၀၁၈ ခုနှစ်မှာ ထုတ်ဖော်ပြောဆိုခဲ့ပါတယ်။

    Facebook ကတော့ အမုန်းစကားတွေကို ဟန့်တားနိုင်ရေး ဆောင်ရွက်နေတယ်လို့ ထုတ်ပြန်ခဲ့ပါတယ်။

    အမေရိကန်ပြည်ထောင်စု ကိုလံဘီယာခရိုင်တရားရုံးကို ဂမ်ဘီယာနိုင်ငံက ဇွန်လ ၈ ရက်နေ့ လျှောက်ထားမှုမှာ မြန်မာစစ်တပ်နဲ့ ရဲတပ်ဖွဲ့က တာဝန်ရှိသူတွေ “Facebook စာမျက်နှာမှာ လွှင့်တင်ထုတ်ပြန်ခဲ့တဲ့၊ draft အဖြစ်ထားတဲ့ စာရွက်စာတမ်းတွေ၊ ဆက်သွယ်ပြောဆိုမှုတွေအားလုံး” ထုတ်ပြန်ပေးရေး Facebook ကို တိုက်တွန်းဖို့ တောင်းဆိုထားပါတယ်။

    Facebook ကလည်း ဂမ်ဘီယာနိုင်ငံရဲ့ ဒီတောင်းဆိုချက်ကို သိရှိပြီး တည်ဆဲဥပဒေနဲ့ ညီညွတ်မှု ရှိ၊ မရှိ သုံးသပ်သွားမယ်လို့ ထုတ်ပြန်ခဲ့ပါတယ်။

    အချက်အလက်တွေထုတ်ပြန်ပေးရေး တောင်းဆိုခံရတဲ့ မြန်မာအာဏာပိုင်တွေရဲ့ Facebook အကောင့်တွေထဲမှာ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ရဲ့အကောင့်လည်း ပါဝင်ပါတယ်။

    မြန်မာစစ်တပ်က အရာရှိတွေ၊ အဖွဲ့အစည်းတွေနဲ့ သက်ဆိုင်ပြီး ၂၀၁၈ ခုနှစ် ဩဂုတ်လမှာ Facebook က ဖယ်ရှားခဲ့တဲ့ အကောင့် ၂၀ လောက်ရဲ့ အသေးစိတ်အချက်အလက်​တွေ ထုတ်ပြန်ပေးဖို့လည်း တောင်းဆိုမှုမှာ ပါဝင်ပါတယ်။

    မြန်မာအာဏာပိုင်တွေရဲ့ Facebook က ပို့စ်တွေဟာ ရိုဟင်ဂျာတွေအပေါ် “လူမျိုးတုန်းသတ်ဖြတ်မှု ရည်ရွယ်ချက် ရှိခဲ့တယ်ဆိုတာအတွက် အထောက်အထား ဖြစ်လာနိုင်တယ်” လို့ ဂမ်ဘီယာရှေ့နေတွေက ပြောကြားခဲ့ပါတယ်။

    နိုင်ငံတကာဥပဒေမှာ အဆိုးဝါးဆုံး ရာဇဝတ်မှုအဖြစ်သတ်မှတ်ထားတဲ့ လူမျိုးတုန်းသတ်ဖြတ်မှုဖြစ်တယ်ဆိုတာကို သက်သေပြနိုင်ဖို့အတွက် ကျူးလွန်သူတွေဟာ ရိုဟင်ဂျာလူမျိုးစုကို ‘အကုန်လုံးဖြစ်စေ၊ တစ်စိတ်တစ်ပိုင်းဖြစ်စေ’ ဖျက်ဆီးသုတ်သင်လိုတဲ့ ရည်ရွယ်ချက်မျိုး ရှိခဲ့တယ်ဆိုတာကို ဖော်ထုတ်နိုင်ဖို့ လိုအပ်ပါတယ်။

    နိုင်ငံတကာ ခုံသမာဓိရုံးကတော့ အမှု ကြားနာမှုမပြီးမချင်း ရိုဟင်ဂျာတွေကို လူမျိုးတုန်းသတ်ဖြတ်မှု၊ အခြား အကြမ်းဖက်မှုတွေကနေ မြန်မာနိုင်ငံက ကာကွယ်ပေးရထားရမယ်လို့ အမိန့်ပေးခဲ့ပါတယ်။

    Ref:Reuters

  • AA သံသယဖြင့် ဖမ်းဆီးထားသူများကို ဥပဒေပ ပြုမူခဲ့ကြောင်း မြန်မာစစ်တပ် ဝန်ခံ

    AA သံသယဖြင့် ဖမ်းဆီးထားသူများကို ဥပဒေပ ပြုမူခဲ့ကြောင်း မြန်မာစစ်တပ် ဝန်ခံ

    မေ ၁၃၊ ၂၀၂၀
    M-Media

    -ရခိုင်လက်နက်ကိုင်အဖွဲ့ AA နဲ့ ဆက်နွယ်တယ်ဆိုတဲ့ သံသယနဲ့ ဖမ်းဆီးထားသူတွေကို တပ်ဖွဲ့ဝင်တွေက ညှင်းပမ်းမှုတွေ ရှိခဲ့တယ်လို့ မြန်မာအစိုးရ စစ်တပ်က ဝန်ခံပြောကြားလိုက်ပါတယ်။

    လက်ထိပ်ခပ်ထားပြီး၊ မျက်လုံးကို အဝတ်စီးထားသူတွေရဲ့ခေါင်းကို အရပ်ဝတ် ဝတ်ထားသူတွေက ထိုးတာ၊ ကန်တာတွေလုပ်တဲ့ ဗီဒီယိုတစ်ခု တနင်္ဂနွေနေ့က ဆိုရှယ်မီဒီယာမှာ ပြန့်နှံ့ပြီးနောက်ပိုင်း အစိုးရစစ်တပ်ဖက်က ဒီလိုဝန်ခံမှု ပေါ်ထွက်လာတာပါ။

    တပ်မတော် ကာကွယ်ရေးဦးစီးချုပ်ရုံးက ထုတ်ပြန်တဲ့ကြေငြာချက်မှာ ဖမ်းခံထားရသူ ၅ ဦးဟာ ရခိုင်လက်နက်ကိုင်အဖွဲ့ AA နဲ့ ဆက်နွယ်တယ်ဆိုတဲ့ သံသယနဲ့ ဖမ်းဆီးခံထားရတာဖြစ်ပြီး ဧပြီလ ၂၁ ရက်နေ့ ရခိုင်ပြည်နယ်မြို့တော် စစ်တွေကို စက်လှေနဲ့ ပို့ဆောင်စဉ်မှာ ဒီအဖြစ်အပျက် ဖြစ်ပွားတာဖြစ်တယ်လို့ ဖော်ပြထားပါတယ်။

    တစ်ချို့ တပ်ဖွဲ့ဝင်တွေဟာ ဥပဒေနဲ့မညီတဲ့ပုံစံနဲ့ စစ်ကြောရေးလုပ်ဆောင်ခဲ့ပြီး အရေးယူမှုတွေ ပြုလုပ်သွားမယ်လို့လည်း ကြေငြာချက်က ဆိုပါတယ်။ ဘယ်လို အရေးယူအပြစ်ပေးမလဲဆိုတာကိုတော့ အသေးစိတ် မဖော်ပြထားပါဘူး။

    ဖမ်းဆီးခံထားရသူတွေရဲ့ မိသားစုဝင်တွေကတော့ AA နဲ့ ဆက်သွယ်မှုရှိတယ်ဆိုတဲ့ သတင်းတွေကို ငြင်းပါတယ်။

    “ကျွန်မသားက ဆန်ဆိုင်မှာ အလုပ်လုပ်တာပါ။ AA နဲ့ပတ်သက်ပြီး သူ ဘာမှ မသိပါဘူး” လို့ ဖမ်းဆီးခံထားရသူ အသက် ၂၄ နှစ်အရွယ် ကိုညီညီအောင်ရဲ့ မိခင်ဖြစ်သူ ဒေါ်နီနီက ပြောကြားခဲ့ပါတယ်။

    AA နဲ့ တိုက်ပွဲတွေဖြစ်ပွားတဲ့ ရခိုင်ပြည်နယ်မှာ အစိုးရစစ်တပ်ဟာ အရပ်သားတွေအပေါ် ညှမ်းပမ်းနှိပ်စက်မှု ရှိတယ်ဆိုတဲ့ သတင်းတွေ ကျယ်ကျယ်ပြန့်ပြန့် ထွက်ပေါ်နေပြီး စစ်တပ်ဖက်ကတော့ ဒါကို ငြင်းဆိုပါတယ်။

    Ref: Frontier Myanmar

  • ကိုဗစ်တိုက်ဖျက်ရေးအတွက် မြန်မာစစ်တပ်က ၄ လနီးပါး အပစ်ရပ်မည်

    ကိုဗစ်တိုက်ဖျက်ရေးအတွက် မြန်မာစစ်တပ်က ၄ လနီးပါး အပစ်ရပ်မည်

    မေ ၁၀၊ ၂၀၂၀
    M-Media

    -Covid-19 တိုက်ဖျက်ရေးမှာ အထောက်အကူဖြစ်စေဖို့အတွက် ၄ လနီးပါးကြာ အပစ်ရမယ်လို့ တပ်မတော် ကာကွယ်ရေး ဦးစီးချုပ်ရုံးက ဒီကနေ့မှာ ကြေငြာချက် ထုတ်ပြန်လိုက်ပါတယ်။

    မေလ ၁၀ ရက်နေ့ကနေ ဩဂုတ်လ ၃၁ ရက်နေ့အထိ ကြာမြင့်မယ့် ဒီအပစ်ရပ်မှုဟာ အစိုးရက အကြမ်းဖက်အဖွဲ့အစည်းလို့ ကြေငြာထားတဲ့ လက်နက်ကိုင်အဖွဲ့တွေ တည်ရှိရာ​ နေရာဒေသမှအပ ကျန်တဲ့ နေရာဒေသအားလုံးမှာ သက်ရောက်မှာ ဖြစ်ပါတယ်။

    သတ်မှတ်ထားတဲ့ စည်းကမ်းချက် ၄ ချက်ကို တိုင်းရင်းသား လက်နက်ကိုင်အဖွဲ့တွေက လိုက်နာဖို့လည်း ကြေငြာချက်မှာ အကြံပြုထားပါတယ်။ စည်းကမ်းချက် ၄ ချက်က သဘောတူညီချက်တွေကို လိုက်နာဖို့၊ ငြိမ်းချမ်းရေး သဘောတူညီချက်ကို အလွဲသုံးစားမပြုဖို့၊ ပြည်သူတွေအပေါ် ဝန်ထုပ်ဝန်ပိုး မဖြစ်စေဖို့နဲ့ တည်ဆဲဥပဒေတွေကို လိုက်နာဖို့ ဖြစ်ပါတယ်။

    လက်နက်ကိုင်အဖွဲ့အချင်းအချင်း မတိုက်ခိုက်ရေး၊ တိုင်းရင်းသား ပြည်သူတွေအပေါ် ဖိနှိပ်ချုပ်ချယ်မှု မပြုရေး၊ အစိုး အုပ်ချုပ်ရေး ယန္တရားတွေကို မနှောက်ယှက်ရေး၊ သယ်ယူပို့ဆောင်မှု ချောမွေ့စေရေး စတဲ့ ကိစ္စရပ်တွေမှာ တိုင်းရင်းသား လက်နက်ကိုင်အဖွဲ့တွေက တာဝန်ယူဖို့၊ တာဝန်ခံဖို့ တိုက်တွန်းခဲ့ပြီး၊ စည်းကမ်းချက် ဖောက်ဖျက်သူတွေကို အရေးယူသွားမယ်လို့လည်း ကြေငြာချက်မှာ ဖော်ပြထားပါတယ်။

    နိုင်ငံတစ်ဝှမ်း Covid-19 တားဆီးရေး၊ ထိန်းချုပ်ရေးနဲ့ တိုက်ဖျက်ရေးမှာ ဆက်လက် ပါဝင်ဆောင်ရွက်သွားမယ်လို့လည်း စစ်တပ်က ကတိပြုခဲ့ပါတယ်။

    Ref: Xinhua

  • မြန်မာအရပ်သားအစိုးရက တရုတ်ကို ပိုမိုအားကိုနေရဟု သုတေသီများသုံးသပ်

    မြန်မာအရပ်သားအစိုးရက တရုတ်ကို ပိုမိုအားကိုနေရဟု သုတေသီများသုံးသပ်

    ဒီဇင်ဘာ ၂၅၊ ၂၀၁၉
    M-Media

    နိုင်ငံတော်အတိုင်ပင်ခံနှင့် တရုတ်နိုင်ငံခြားရေးဝန်ကြီးတို့ တွေ့ဆုံစဉ်

    -တရုတ်နိုင်ငံရဲ့ ဆောင်ရွက်ချက်တွေအပေါ် သံသယတွေ ရှိနေပေမယ့် နိုင်ငံတကာအသိုင်းအ၀ိုင်းကို ရင်ဆိုင်ဖို့အတွက် မြန်မာအရပ်သားအစိုးရဟာ တရုတ်ကို ပိုမိုအားကိုးလာရတယ်လို့ နိုင်ငံရေးကျွမ်းကျင်သူတွေက သုံးသပ်ပြောကြားလိုက်ပါတယ်။

    ရခိုင်ပြည်နယ်က ရိုဟင်ဂျာမွတ်စလင်တွေ အိုးအိမ်စွန့်ခွာ ထွက်ပြေးရမှု၊ သတ်ဖြတ်ခံရမှုတွေအတွက် မြန်မာနိုင်ငံဟာ နိုင်ငံတကာအသိုင်းအ၀ိုင်းရဲ့ ဖိအားပေးမှုကို ခံနေရပြီး အခုလအစောပိုင်းက နိုင်ငံတကာ ခုံသမာဓိရုံး ICJ မှာ သွားရောက်ရင်ဆိုင်ရတဲ့အထိ ဖြစ်ခဲ့ပါတယ်။

    ထိုင်းနိုင်ငံ Chulalongkorn တက္ကသိုလ်က နိုင်ငံရေးသိပ္ပံ ပရော်ဖက်ဆာ Thitinan Pongsudhirak က ‌ရိုဟင်ဂျာကိစ္စကြောင့် နိုင်ငံတကာရဲ့ ဖယ်ကျဉ်မှုကို ခံနေရတဲ့အတွက် မြန်မာအာဏာပိုင်တွေဟာ တရုတ်နဲ့ ဆက်ဆံရေး ပိုမိုနီးကပ်အောင် ကြိုးစားလာတာဖြစ်တယ်လို့ သုံးသပ်ခဲ့ပါတယ်။

    တရုတ်ဟာ ၂၀၁၁ ခုနှစ်မတိုင်ခင် တိုင်းပြည်ကိုကြီးစိုးခဲ့တဲ့ စစ်အစိုးရကို ကုလလုံခြုံရေးကောင်စီမှာ တောက်လျှောက်ကာကွယ်ပေးခဲ့တာပါ။

    ICJ မှာ ‌သွားရောက် တရားမရင်ဆိုင်ခင် ဒီဇင်ဘာ ၇-၈ ရက်နေ့တွေမှာ တရုတ်နိုင်ငံခြားရေးဝန်ကြီး ဝမ်ယီ မြန်မာနိုင်ငံကိုလာရောက်ကာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တွေ့ဆုံခဲ့ပါတယ်။

    ဆွေးနွေးမှုအတွင်း မြန်မာနိုင်ငံရဲ့ ငြိမ်းချမ်းရေးနဲ့ အမျိုးသားရင်ကြားစေ့ရေးလုပ်ငန်းစဉ်၊ မြန်မာ တရုတ်နဲ့ ကုလသမဂ္ဂတို့ ပူးပေါင်းဆောင်ရွက်နေတဲ့ ရခိုင်ပြည်နယ်က နေရပ်စွန့်ခွာသူတွေ ပြန်လည်လက်ခံရေးလုပ်ငန်းစဉ်တွေမှာ တရုတ်နိုင်ငံက ဆက်လက်အကူအညီပေးသွားဖို့ ပါဝင်ပါတယ်။

    ‌တရုတ်ဟာ နိုင်ငံအနောက်ပိုင်း ရှင်ကျန်းပြည်နယ်က ဝီဂါမွတ်စလင်တွေအပေါ် ညှမ်းပမ်းမှု၊ လူ့အခွင့်အရေး ချိုးဖောက်မှုတွေအတွက် နိုင်ငံတကာအသိုင်းအ၀ိုင်းရဲ့ ဝေဖန်မှုကို ခံနေရပါတယ်။

    တိုကျိုအခြေစိုက် International Christian တက္ကသိုလ်က နိုင်ငံရေးနဲ့ နိုင်ငံတကာအရေး လေ့လာဆန်းစစ်သူ Stephen Nagy က လူ့အခွင့်အရေးချိုးဖောက်မှုတွေနဲ့ လူမျိုးစုတွေအပေါ် လူမျိုးတုန်းသတ်ဖြတ်မှုတွေ ရှိတယ်ဆိုတဲ့ စွပ်စွဲမှုတွေကို တစ်ချိန်တည်းရင်ဆိုင်နေရတာက မြန်မာနဲ့ တရုတ်တို့ကို ပိုမိုနီးကပ်စေခဲ့တယ်လို့ ပြောကြားခဲ့ပါတယ်။

    ICJ မှာ ကြားနာမှုအတွင်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ရခိုင်ပြည်နယ်မှာ စစ်တပ်ရဲ့ဆောင်ရွက်ချက်တွေဟာ အကြမ်းဖက်ဝါဒကို တုန့်ပြန်တာဖြစ်ကြောင်း၊ လက်ရှိ ပြည်နယ်အတွင်းမှာ ရင်ကြားစေ့ရေးလုပ်ဆောင်နေတဲ့အတွက် ဂမ်ဘီယာရဲ့ တောင်းဆိုမှုကို ပယ်ချသင့်ကြောင်း ပြောကြားခဲ့ပါတယ်။

    မယုံကြည်

    မြန်မာနိုင်ငံက အမေရိကန်သံရုံးရဲ့ အမြဲတမ်းအတွင်းဝန်ဟောင်း Priscilla Clapp က ‌ဗြိတိန်ရဲ့ ကိုလိုနီပြုမှုကို ခံခဲ့ရတဲ့ မြန်မာနိုင်ငံဟာ ဒီလိုအဖြစ်မျိုး ပြန်မရောက်ရေးအတွက် နိုင်ငံခြားရေးဝါကို မူသေမထားဖို့ ဆယ်စုနှစ်ချီကြိုးစားခဲ့တယ်လို့ ပြောကြားခဲ့ပါတယ်။

    လက်ရှိအစိုးရဟာ တရုတ်ကို မယုံကြည်သလို၊ အကြွေးထောင်ချောက်ထဲ သက်ဆင်းမှာကို စိုးရိမ်နေကြောင်း၊ တိုင်းပြည်အကျိုးအတွက် နိုင်ငံခြားရင်းနှီးမြှုပ်နှံမှုတွေကို မြန်မာနိုင်ငံက အလိုရှိပြီး၊ စီမံကိန်းတွေကိုလည်း နိုင်ငံတကာစံချိန်စံညွှန်းအတိုင်း မြန်မာနိုင်ငံက လုပ်ဆောင်လိုကြောင်း Clapp က ထောက်ပြပြောဆိုခဲ့ပါတယ်။

    ဒါပေမယ့် အခုလအစောပိုင်းက တရုတ်နိုင်င့ခြားရေးဝန်ကြီးနဲ့ တွေ့ဆုံမှုမှာတော့ နိုင်ငံတော်အတိုင်ပင်ခံဟာ တရုတ်ရဲ့ Belt and Road Initiative စီမံကိန်းအောက်မှာ နှစ်နိုင်ငံ ပူးပေါင်းဆောင်ရွက်ရေး တိုးမြှင့်ဖို့ ဆွေးနွေးခဲ့ကြတယ်လို့ မြန်မာအစိုးရရဲ့ ထုတ်ပြန်ချက်မှာ ဖော်ပြထားပါတယ်။

    Clapp ကတော့ စစ်အစိုးရလက်ထက် ကုလသမဂ္ဂမှာ ကာကွယ်ပေးတဲ့ အနေအထားမျိုးကို တရုတ်က သက်တောင့်သက်တာပဲ ပြန်ရသွားတယ်လို့ သုံးသပ်ခဲ့ပါတယ်။

    “စစ်အစိုးရလက်ထက်တစ်လျှောက်လုံး ကုလမှာ နိုင်ငံရေးအရ ကာကွယ်မှုရဖို့ မြန်မာနိုင်ငံဟာ တရုတ်နိုင်ငံကို အမြဲတမ်းမှီခိုခဲ့ရပါတယ်။ လုံခြုံရေးကောင်စီမှာ နိုင်ငံတကာရဲ့ ပိတ်ဆို့မှုတွေကနေ တရုတ်နဲ့ ရုရှားတို့က ကာကွယ်ပေးခဲ့တယ်။ ဒီကနေ့မှာလည်း မြန်မာနိုင်ငံရဲ့ အရပ်သားအစိုးရကို သူတို့က ကာကွယ်ပေးနေတုန်းပါ။ ဒီတစ်ခေါက်မှာတော့ အခြားအကြောင်းအရင်းတွေကြောင့် ဖြစ်ပါတယ်”

    Chulalongkorn တက္ကသိုလ်က ပရောဖက်ဆာ Thitinan Pongsudhirak က မြန်မာနိုင်ငံနဲ့ တရုတ်တို့ ပိုမိုနီးကပ်သွားတာကို အိန္ဒိယနဲ့ အာဆီယံနိုင်ငံတွေက ကြိုက်နှစ်သက်မှာမဟုတ်ဘူးလို့ ဆိုပါတယ်။

    အိန္ဒိယဟာ ဇူလိုင်လက မြန်မာနိုင်ငံနဲ့ ကာကွယ်ရေးပူးပေါင်းဆောင်ရွက်မှုသဘောတူညီချက်ကို လက်မှတ်ရေးထိုးခဲ့ပြီး တရုတ်ရဲ့ဩဇာကို လျှော့ချဖို့ကြိုးစားနေတာပါ။

    Ref: VOA

  • စစ်တပ်က ရိုဟင်ဂျာများအပေါ် ကျူးလွန်မှုရှိသော်လည်း လူမျိုးတုန်းသတ်ဖြတ်မှုမဟုတ်ဟု အတိုင်ပင်ခံပြော

    စစ်တပ်က ရိုဟင်ဂျာများအပေါ် ကျူးလွန်မှုရှိသော်လည်း လူမျိုးတုန်းသတ်ဖြတ်မှုမဟုတ်ဟု အတိုင်ပင်ခံပြော

    ဒီဇင်ဘာ ၁၁၊ ၂၀၁၉
    M-Media

    -ရိုဟင်ဂျာတွေအပေါ် လူမျိုးတုန်း သတ်ဖြတ်နေတယ်ဆိုတဲ့ စွပ်စွဲချက်တွေဟာ ‘ပြည်စုံ၊ မှန်ကန်မှု မရှိဘူး’ လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည့်က ဒီကနေ့ သည်ဟေ့ဂ်မြို့မှာရှိတဲ့ ‘နိုင်ငံတကာ ခုံသမာဓိရုံး’ (ICJ) မှာ ပြောကြားလိုက်ပါတယ်။

    မြန်မာနိုင်ငံဟာ ၁၉၄၈ ခုနှစ် လူမျိုးတုန်းသတ်ဖြတ်မှု သဘောတူညီချက်ကို ချိုးဖောက်တယ်လို့ဆိုကာ ဂမ်ဘီယာနိုင်ငံက ICJ မှာ တရားစွဲဆိုထားတာဖြစ်ပါတယ်။ ၃ ရက်တာကြာမြင့်မယ့် ပထမဆုံး ‌ကြားနာမှုကို မနေ့က စတင်ပြုလုပ်ခဲ့ပြီး ဂမ်ဘီယာနိုင်ငံက လျှောက်လှဲခဲ့ပါတယ်။ ဒီကနေ့မှာ မြန်မာနိုင်ငံက ပြန်လည်ချေပရတာ ဖြစ်ပါတယ်။

    မိနစ် ၃၀ ကြာမြင့်တဲ့ ဒေါ်အောင်ဆန်းစုကြည်ရဲ့ ပြောကြားချက်မှာ ၂၀၁၇ ခုနှစ် ဩဂုတ်လ ရခိုင်ပြည်နယ်မြောက်ပိုင်းမှာ ပြုလုပ်တဲ့ စစ်တပ်ရဲ့ နယ်မြေရှင်းလင်းမှုဟာ ရဲစခန်းတွေကို တိုက်ခိုက်တဲ့ ရိုဟင်ဂျာလက်နက်ကိုင်တွေကို တုန်ပြန်တဲ့ အကြမ်းဖက်တိုက်ဖျက်မှုဖြစ်တယ်လို့ ဆိုပါတယ်။

    “မြန်မာနိုင်ငံ ရခိုင်ပြည်နယ်က တကယ့်အခြေအနေမှန်ကို ဂမ်ဘီယာက မပြည့်မစုံ၊ မမှန်မကန် ဖော်ပြခဲ့တာသာ ဖြစ်ပါတယ်”

    စစ်ဆင်ရေးကြောင့် ရိုဟင်ဂျာ ၇ သိန်းကျော်လောက် ဘင်္ဂလားဒေ့ရှက်ဖက်ကို ထွက်ပြေးခဲ့ရပြီး ကုလ စုံစမ်းစစ်ဆေးသူတွေက ဒီကိစ္စမှာ လူတစ်သောင်းလောက် အသတ်ခံခဲ့ရနိုင်တယ်လို့ ပြောကြားခဲ့ပါတယ်။

    လူမျိုးတုန်းသတ်ဖြတ်မှုမဟုတ်

    စစ်တပ်ဟာ အလွန်အကျွံလုပ်ဆောင်တာတွေ၊ အရပ်သားတွေကို သတ်ဖြတ်တာတွေ ရှိကောင်းရှိနိုင်ပေမယ့် ဒီလုပ်ရပ်တွေဟာ လူမျိုးတုန်းသတ်ဖြတ်မှုတော့ မမြောက်ဘူးလို့ ဒေါ်အောင်ဆန်းစုကြည်က ထည့်သွင်းပြောဆိုခဲ့ပါတယ်။ ကျူးလွန်မှုတွေအတွက် တာဝန်ရှိတဲ့ စစ်သားတွအပေါ် အရေးယူခဲ့တာကိုလည်း ဒေါ်အောင်ဆန်းစုကြည်က ထောက်ပြခဲ့ပါတယ်။

    “ချိုးဖောက်မှုတွေ လုပ်တယ်လို့ စွပ်စွဲခံရတဲ့ စစ်သားတွ၊ အရာရှိတွေကို စုံစမ်းစစ်ဆေး၊ တရားစွဲဆို၊ အပြစ်ပေးမှုတွေ တက်တက်ကြွကြွလုပ်ဆောင်နေတဲ့တိုင်းပြည်ဟာ လူမျိုးတုန်းသတ်ဖြတ်လိုတဲ့ ရည်ရွယ်ချက်မျိုး ရှိနိုင်ပါ့မလား”

    ၂၀၁၇ ခုနှစ် အင်းဒင်ကျေးရွာမှာ ရိုဟင်ဂျာ အမျိုးသား ၁၀ ဦးကို အစုလိုက်အပြုံလိုက် သတ်ဖြတ်မှုနဲ့ပတ်သက်ပြီး စစ်သား ၇ ဦးကို အလုပ်ကြမ်းနဲ့ ထောင်ဒဏ် ၁၀ နှစ် ချမှတ်ခဲ့တယ်လို့ မြန်မာစစ်တပ်က ပြီးခဲ့တဲ့နှစ်မှာ ထုတ်ပြန်ခဲ့ပါတယ်။ ဒါပေမယ့် ၁ နှစ်မပြည့်ခင်မှာပဲ ပြန်လွှတ်ပေးခဲ့ပါတယ်။

    နောက်ထပ်ကျေးရွာတစ်ခုဖြစ်တဲ့ ဂူဒါပြင်ရွာမှာ ရိုဟင်ဂျာ ၁၀ ဦး အသတ်ခံရမှုနဲ့ပတ်သက်ပြီး စစ်သားတစ်ချို့ကို စစ်ခုံရုံးဖွဲ့ စုံစမ်းစစ်ဆေးနေတယ်လို့ ပြီးခဲ့တဲ့လမှာ စစ်တပ်က ထုတ်ပြန်ခဲ့ပါတယ်။

    မြန်မာဖက်က ရှေ့နေဖြစ်တဲ့ ဝီလီယံရှာဘက်စ်က ရိုဟင်ဂျာကိစ္စမှာ ICJ က ညွှန်ကြားဆုံးဖြတ်ပေးရေး ဂမ်ဘီယာရဲ့တောင်းဆိုမှုကို ပယ်ချဖို့ ပြောဆိုခဲ့သလို၊ ICJ ဟာ ဒီကိစ္စအတွက် တရားစီရင်ပိုင်ခွင့် မရှိဘူးလို့လည်း ထောက်ပြပြောဆိုခဲ့ပါတယ်။

    ရိုဟင်ဂျာ ၁ သောင်းလောက် အသတ်ခံရတယ်ဆိုတာဟာ ‘လူမျိုးတုန်းသတ်ဖြတ်မှု’ မှာ သတ်မှတ်ထားတဲ့ ပမာဏနဲ့ ကိုက်ညီမှုမရှိဘူးလို့လည်း ဝီလီယံရှာဘတ်စ်က ပြောကြားခဲ့ပါတယ်။

    ဝေဖန်

    လူ့အခွင့်အရေးအဖွဲ့တွေကတော့ ဒေါ်အောင်ဆန်းစုကြည်ရဲ့ ပြောကြားချက်ဟာ မြေပြင်ကအခြေအနေတွေ၊ မျက်မြင်သက်သေနေတွေရဲ့ ပြောကြားမှုတွေနဲ့ ဆန့်ကျင်နေတယ်လို့ထောက်ပြခဲ့ပါတယ်။

    Save The Children က ဒါရိုက်တာ ဂျော့ဂျ် ဂရေဟမ်က ဒေါ်အောင်ဆန်းစုကြည်ရဲ့ ပြောကြားမှုတွေဟာ ကုလက စုဆောင်းထားတဲ့ အထောက်အထားတွေ၊ ထွက်ပြေးလွတ်မြောက်လာသူတွေနဲ့ တွေ့ဆုံကာ သူတို့အဖွဲ့တွေရဲ့ မေးမြန်းထားမှုတွေနဲ့ ကိုက်ညီမှုမရှိဘူးလို့ ဝေဖန်ပြောကြားခဲ့ပါတယ်။

    Ref: Reuters