News @ M-Media

Tag: MyanmarCoup2021

  • မြန်မာနိုင်ငံမှ ချက်ခြင်းထွက်ခွာရန် နိုင်ငံသားများကို စင်ကာပူ တိုက်တွန်း

    မြန်မာနိုင်ငံမှ ချက်ခြင်းထွက်ခွာရန် နိုင်ငံသားများကို စင်ကာပူ တိုက်တွန်း

    ဇူလိုင် ၁၆၊ ၂၀၂၁
    M-Media

    -မြန်မာနိုင်ငံမှာ လက်တလော ဖြစ်ပေါ်နေတဲ့ စိုးရိမ်စရာ အခြေအနေတွေကြောင့် နိုင်ငံသားတွေအနေနဲ့ အမြန်ဆုံးထွက်ခွာဖို့ စင်ကာပူသံရုံးက ဒီကနေ့မှာ ကြေငြာချက် ထုတ်ပြန်ပါတယ်။

    မတည်မငြိမ်ဖြစ်နေတာတွေ၊ ကိုဗစ်ကူးစက်မှုတွေကြောင့် ကယ်ဆယ်ရေးလေယာဉ်တွေနဲ့ တတ်နိုင်သမျှမြန်မြန် မြန်မာနိုင်ငံကနေထွက်ခွာဖို့ စင်ကာပူနိုင်ငံသားတွေကို သံရုံးက တိုက်ထွန်းထားပါတယ်။

    “ကယ်ဆယ်ရေးလေယာဉ်တွေ ပုံမှန် ပျံသန်းနိုင်မလားဆိုတာနဲ့ ပြန်လိုသူတွေ သူတို့ပြန်ချင်တဲ့ရက်အတိုင်း အတိအကျ လွတ်လွတ်လပ်လပ် ပြန်နိုင်ပါ့မလားဆိုတာတွေကို သံရုံးက အာမခံချက် မပေးနိုင်ပါဘူး။ နောက်ပိုင်းရက်တွေမှာ ကယ်ဆယ်ရေးလေယာဉ်ကို ရက်သတ်မှတ်ချက် အတိအကျနဲ့ ပျံသန်းနိုင်ရေး စီစဉ်ပေးနိုင်မယ့်အခြေအနေလည်း သံရုံးမှာ မရှိပါဘူး”

    နိုင်ငံအရေးအခြေအနေ တည်ငြိမ်မှု မရှိတာကြောင့် တတ်နိုင်သမျှ နေအိမ်အတွင်းမှာပဲနေထိုင်ဖို့၊ ဆန္ဒပြသူတွေနဲ့ မှားနိုင်တဲ့နေရာမျိုးတွေမသွားဖို့၊ စစ်ကောင်စီကထုတ်ထာတဲ့ ကာဖျူးနဲ့ မာရှယ်လောအမိန့်တွေကို လိုက်နာဖို့၊ ပေါက်ကွဲမှုဖြစ်နိုင်တာကို သတိထားဖို့၊ စစ်ကောင်စီတပ်ဖွဲ့တွေက စစ်ဆေးမေးမြန်းတဲ့အခါ ပူးပေါင်းဆောင်ရွက်ဖို့၊ ဧည့်သည်လာရင် ဧည့်စာရင်းတိုင်ဖို့၊ အရေးပေါ်အခြေအနေအတွက် ကြိုတင်ပြင်ဆင်ထားဖို့ စင်ကာပူနိုင်ငံသားတွေကို သံရုံးက ထည့်သွင်းတိုက်တွန်းထားပါတယ်။

    သံရုံးရဲ့ သတိပေးချက်တွေထဲမှာ ကိုဗစ်ကပ်ရောဂါ မြင့်တက်မှုအကြောင်းလည်း ပါဝင်ပြီး မြန်မာနိုင်ငံမှာ ပုံပြောင်းဗိုင်းရပ်စ်ကြောင့် ကူးစက်သေဆုံးမှုတွေ မြင့်တက်နေကာ ကျန်းမာရေးစောင့်ရှောက်မှုစနစ်လည်း ယိုယွင်းလာတာကြောင့် နာတာရှည်ရောဂါ ရှိတဲ့သူတွေ တိုင်းပြည်နေ ချက်ခြင်းထွက်ခွာဖို့ တိုက်တွန်းထားပါတယ်။

    Ref: CNA

  • လော်ဘီခမရ၍ စစ်ကောင်စီအတွက် ဝါဒဖြန့်ပေးမှုကို ဂျူးလော်ဘီ ရပ်ဆိုင်း

    လော်ဘီခမရ၍ စစ်ကောင်စီအတွက် ဝါဒဖြန့်ပေးမှုကို ဂျူးလော်ဘီ ရပ်ဆိုင်း

    ဇူလိုင် ၁၅၊ ၂၀၂၁
    M-Media

    -စီးပွားရေးပိတ်ဆို့မှုကြောင့် လော်ဘီခမရတဲ့အတွက် စစ်ကောင်စီအတွက် ဝါဒဖြန့်ပေးမှုကို ရပ်ဆိုင်းထားတယ်လို့ အစ္စရေးလော်ဘီ အရီ ဘင် မနာရှေက မနေ့မှာ ထုတ်ပြောပါတယ်။

    အနောက်နိုင်ငံတွေမှာ ပုံရိပ်ကောင်းအောင်လုပ်ပေးဖို့ မနာရှေပိုင်ဆိုင်တဲ့ ကနေဒါအခြေစိုက် Dickens & Madson လော်ဘီကုမ္ပဏီကို စစ်ကောင်စီက ဒေါ်လာ ၂ သန်းနဲ့ မတ်လမှာ ငှားခဲ့တာပါ။

    အနောက်နိုင်ငံက အစိုးရတွေကြားထဲ ဘင် မနာရှေ ဝါဒဖြန့်ပေးရမယ့် ကိစ္စတွေမှာ ​ဖေဖော်ဝါရီ ၁ ရက်နေ့ အာဏာသိမ်းမှုဟာ မဲမသာမှုကြောင့် လုပ်ရတယ်၊ ကမ္ဘာက လူမျိုးတုန်းသတ်ဖြတ်မှုလို့ရှုမြင်တဲ့ ရိုဟင်ဂျာကိစ္စကို မိမိတို့လုပ်တာမဟုတ်ဘဲ ဒေါ်အောင်ဆန်းစုကြည်က လုပ်တာဖြစ်တယ် စတာတွေ ပါဝင်ပါတယ်။

    အာဏာသိမ်းပြီးနောက်ပိုင်း CNN သတင်းထောက်ချုပ် မြန်မာနိုင်ငံသွားနိုင်အောင်လည်း ဘင်မနာရှေက စီစဉ်ပေးခဲ့ပါတယ်။

    ဗုဒ္ဓဟူးနေ့က မီဒီယာနဲ့ အင်တာဗျူးမှာ မြန်မာစစ်ခေါင်းဆောင်တွေနဲ့ ကောင်းမွန်တဲ့ ဆက်ဆံရေးရှိနေပေမယ့် ပိတ်ဆို့မှုတွေကြောင့် လော်ဘီခမရတဲ့အတွက် ဝါဒဖြန့်ပေးမှုကို ခေတ္တရပ်ဆိုင်းထားတယ်လို့ ဘင်မနာရှေက ပြောပါတယ်။

    ဒီအကြောင်းကို စစ်ခေါင်းဆောင်တွေထံ ပြီးခဲ့တဲ့လကတည်းက အသိပေးထားပြီး ဖြစ်တယ်လို့လည်း သူက ဆိုပါတယ်။

    အနောက်နိုင်ငံတွေက ပိတ်ဆို့မှုတွေ ဖယ်ရှားပေးတာနဲ့ ဒေါ်လာ ၂ သန်းပေးဖို့ ဘင်မနာရှေနဲ့ အာဏာသိမ်းစစ်ကောင်စီတို့ သ​ဘောတူထားတာပါ။

    ရိုဟင်ဂျာတွေနဲ့ အခြားတိုင်းရင်းသားလူမျိုးစုတွေအပေါ် စစ်တပ်က အကြမ်းဖက်သတ်ဖြတ်မှု၊ လူ့အခွင့်အရေး ချိုးဖောက်မှုတွေအတွက် အမေရိကန်နဲ့ အနောက်နိုင်ငံတွေက စစ်ခေါင်းဆောင်တွေကို ပိတ်ဆို့အရေးယူမှုတွေ ယခင်ကတည်းက ပြုလုပ်ထားပြီး စစ်အာဏာသိမ်းပြီးနောက်ပိုင်း ပိုမိုပြင်းထန်တဲ့ ပိတ်ဆို့မှုတွေ ထပ်မံပြုလုပ်ခဲ့ပါတယ်။

    Ref: The Star

  • ကိုဗစ်မြင့်တက်နေသော်လည်း စစ်ကောင်စီက ကျန်းမာရေးဝန်ထမ်းများအား ပစ်မှတ်ထား ဖိနှိပ်နေဆဲ

    ကိုဗစ်မြင့်တက်နေသော်လည်း စစ်ကောင်စီက ကျန်းမာရေးဝန်ထမ်းများအား ပစ်မှတ်ထား ဖိနှိပ်နေဆဲ

    ဇူလိုင် ၁၄၊ ၂၀၂၁
    M-Media

    ကလေးမြို့မှ ကိုဗစ်ကြောင့် သေဆုံးမှုမြင်ကွင်း

    -ကိုဗစ်ကပ်ရောဂါ ကူးစက်မှု ဆိုးရွားနေတဲ့အချိန် စစ်ကောင်စီတပ်တွေရဲ့ အကြမ်းပတမ်း ဖမ်းဆီးနှိပ်စက်မှုကြောင့် မြန်မာနိုင်ငံက ကျန်းမာရေးဝန်ထမ်းတွေဟာ ဘေးလွတ်ရာကို ထွက်ပြေးပုန်းအောင်းနေရပါတယ်။

    မြန်မာပြည်သူတွေဟာ ပြီးခဲ့တဲ့ ၅ လလုံးလုံး ဒီမိုကရေစီ ပြန်လည်ရရှိရေးအတွက် အားထုတ်ကြိုးပမ်းခဲ့ကြတာပါ။

    အခုအချိန်မှာတော့ ကိုဗစ်​ကူးစက်မှု၊ သေဆုံးမှု မြင့်တက်လာသလို၊ ကာကွယ်ရေးအတွက် လိုအပ်တဲ့ အောက်စီဂျင်တွေ၊ နှာခေါင်းစီးတွေလည်း လုံလုံလောက်လောက် မရတော့ပါဘူး။

    ကိုဗစ်ကူးစက်မှု မြင့်တက်လာပြီး တိုင်းပြည်က ပိုမိုမှောင်မိုက်လာတဲ့အချိန် အောင်ဆီဂျင်တွေ၊ နှာခေါင်းစည်းတွေရဖို့ တိုးကြိတ်ပြီး တန်းစီစောင့်ဆိုင်းနေရသူတွေရဲ့ ပုံရိပ်တွေကို စိတ်မချမ်းသာဖွယ်ရာ တွေ့မြင်လာရပါတယ်။

    တရားဝင်စာရင်းဇယားတွေအရ တနင်္လာနေ့တစ်ရက်တည်းမှာပဲ ကိုဗစ်ကူးစက်သူ ၅ ထောင်ကျော်ရှိခဲ့ပြီး သေဆုံးသူ ၈၀ လောက် ရှိခဲ့ပါတယ်။ စစ်ဆေးသူရဲ့ ၃ ပုံ ၁ ပုံကျော်လောက်မှာ ပိုးတွေ့ခဲ့တာပါ။

    ကိုဗစ်ကပ်ရောဂါ စတင်ကတည်းက မြန်မာနိုင်ငံမှာ ကူးစက်သူ ၂ သိန်းကျော်လာပြီး သေဆုံးသူက ၄၀၀၀ ကျော် ရှိလာပြီဖြစ်ပါယ်။

    CDM လို့ခေါ်တဲ့ စစ်အာဏာသိမ်းမှုဆန့်ကျင်ရေး လှုပ်ရှားမှာ စောစောပိုင်းကတည်းက ပါဝင်ခဲ့တဲ့ ကျန်းမာရေးဝန်ထမ်းတွေဟာ စစ်ကောင်စီရဲ့ ပစ်မှတ်ထား ဖမ်းဆီးနှိပ်စက်မှုကို ခံရတာကြောင့် ထွက်ပြေးပုန်းရှောင်နေရပါတယ်။

    မြို့ပြလမ်းတွေပေါ်မှာ ပစ်ခတ်တာ၊ ရိုက်နှက်၊ ဖမ်းဆီးနှိပ်စက်တာတွေလို ရဲတွေ၊ စစ်သားတွေက ကျန်းမာရေးဝန်ထမ်းတွေအပေါ် တိုက်ခိုက်မှုတွေကို စနစ်တကျ မှတ်တမ်းတင်ထားတာတွေလည်း ရှိနေပါတယ်။

    မြန်မာနိုင်ငံရဲ့ အကြီးဆုံးဆေးရုံတစ်ခုမှာ အရေးပေါ်ဆရာဝန်အဖြစ် အလုပ်လုပ်ခဲ့တဲ့ ဒေါက်တာ အဲလက်စ်က သူမဟာ အသက်ဘေးလွတ်အောင် မတ်လကတည်းက ထွက်​ပြေးခဲ့ရပြီး လုပ်ဖော်ကိုင်ဖက်တွေကို စစ်ကောင်စီတပ်တွေက ဖမ်းဆီးနှိပ်စက်တဲ့သတင်းတွေ ကြားနေရတာကြောင့် အကြောက်တရားနဲ့ နေထိုင်နေရတယ်လို့ ပြောကြားခဲ့ပါတယ်။

    တိုင်းပြည်က ကျန်းမာရေးဝန်ထမ်းတွေ အလွန်လိုအပ်နေတဲ့အချိန် ဒါဇင်နဲ့ချီတဲ့ အခြားဆရာဝန်တွေနည်းတူ သူမလည်း ထွက်ပြေးပုန်းအောင်းနေရပါတယ်။

    “စစ်အာဏာသိမ်းပြီးကတည်းက ကျွန်မတို့ရဲ့ဘ၀တွေ၊ ပျော်ရွှင်မှုတွေ၊ အလုပ်အကိုင်တွေအားလုံး ဖျက်ဆီးခံခဲ့ရပါတယ်။ ပုန်းနေမှသာ အဆင်ပြေပြီး ပြန်ထွက်လာတာနဲ့ စစ်တပ်ရဲ့ ဖမ်းဆီးမှုကို ခံရမယ့်အန္တရာယ် ကြီးကြီးမားမား ရှိနေပါတယ်” လို့ သူမက ပြောပါတယ်။

    နိုင်ငံရေးအကျဉ်းသားများ ကူညီရေးအဖွဲ့က အာဏာသိမ်းပြီးနောက်ပိုင်း စစ်ကောင်စီတပ်တွေရဲ့လက်ချက်ကြောင့် နိုင်ငံတစ်ဝှမ်း သေဆုံးသူအရေအတွက်ဟာ ၉၀၆ ဦးရှိလာပြီး ဖမ်းဆီးခံရသူက ၆၆၇၆ ဦး ရှိတယ်လို့ ထုတ်ပြန်ထားပါတယ်။

    ဒေါက်တာ အဲလက်စ်က ဖမ်းဆီး သတ်ဖြတ်ခံရသူတွေထဲမှာ သူမရဲ့ သူငယ်ချင်းတွေ လုပ်ဖော်ကိုင်ဖက်တွေလည်း ပါဝင်တယ်လို့ ပြောပါတယ်။

    “စစ်အာဏာသိမ်းပြီးကတည်း ကျွန်မတို့ အလုပ်အကိုင်တွေ ဆုံးရှုံးတ​ယ်။ မိတစ်ကွဲ ဖတစ်ကွဲ၊ အိမ်နဲ့ဝေးရာ၊ အလုပ်နဲ့ဝေးရာမှာ ပုန်းရှောင်နေရတယ်။ အိမ်မပြန်နိုင်ဘူး၊ အလုပ်မသွားနိုင်ဘူး။ ပုံမှန်ဘ၀ကို ကျွန်မတို့ ပြန်မရတော့ပါဘူး”

    ဘေးလွတ်ရာကို ထွက်ပြေးနေရတဲ့ အဝေးရောက် ကျန်းမာရေးဝန်ကြီး ဒေါက်တာဇော်ဝေစိုးက စစ်ကောင်စီဟာ အမှန်တကယ်ကူးစက်မှုအရေအတွက်ကို အလွန်အမင်းလျှော့ချ ဖော်ပြနေတယ်လို့ ပြောပါတယ်။

    “ကျန်းမာရေးစနစ် ဆိုးဆိုးရွားရွားကို ပြိုလဲနေပါပြီ”

    ဖေဖော်ဝါရီလ အာဏာသိမ်းပြီးကတည်းက စစ်ကောင်စီဟာ အနည်းဆုံး ဆေးကျောင်းသား ၁၇ ဦးကို ပစ်သတ်ခဲ့ပြီး၊ ဖမ်းဆီးနှိပ်စက်ခံရတဲ့သူတွေ အများအပြားရှိတယ်လို့လည်း သူက ပြောပါတယ်။

    မြန်မာနိုင်ငံက ဆရာဝန်တွေနဲ့ ကျန်းမာရေးဝန်ထမ်း တော်တော်များများဟာ ဘေးလွတ်ရာကို ထွက်ပြေးတိမ်းရှောင်နေရပြီး မိသားစု၊ မိတ်ဆွေသူငယ်ချင်းတွေနဲ့ လူ့အခွင့်အရေးအဖွဲ့တွေထံကနေ အသက်ဆက်ဖို့ အကူအညီတွေ ရယူနေရပါတယ်။

    “စစ်တပ်ဟာ ပြည်သူတွေနဲ့ ကျန်းမာရေးဝန်ထမ်းတွေကို သေနတ်ထောက်ခြိမ်းခြောက်နေတဲ့အတွက် ကျန်းမာရေးဝန်ထမ်းတွေ ဒီအခြေအနေအောက်မှာ အလုပ်လုပ်လို့ မရပါဘူး။ ဒါ့ကြောင့် ကျန်းမာရေးစောင့်ရှောက်မှုစနစ်ဟာ လုံး၀ကို ပြိုလဲသွားပါပြီ” လို့ ဒေါက်တာဇော်ဝေစိုးက ပြောပါတယ်။

    ဩစတေးလျအစိုးရအနေနဲ့ စစ်ကောင်စီအပေါ် ပြင်းထန်တဲ့ ပိတ်ဆို့အရေးယူမှုတွေ လုပ်ဆောင်ဖို့လည်း ဒေါက်တာဇော်ဝေစိုးက တိုက်တွန်းခဲ့ပါတယ်။ ဩစတေးလျက ဒီလိုလုပ်ဖို့ ငြင်းဆန်ထားဆဲပါ။

    “မြန်မာနိုင်ငံဟာ ကျရှုံးနိုင်ငံ ဖြစ်တော့မှာပါ။ မြန်မာနိုင်ငံကို ကယ်တင်ဖို့လိုတယ်။ ဒါမှမဟုတ်ရင် ကျရှုံးနိုင်ငံ ဖြစ်လာမယ်။ လူထောင်ချီသေလိမ့်မယ်။ ဩစတေးလျအစိုးရတင်မဟုတ်ဘဲ အခြားနိုင်ငံတွေကလည်း ချက်ခြင်း အရေးယူဆောင်ရွက်ဖို့ လိုအပ်ပါတယ်”

    ဩစတေးလျ နိုင်ငံခြားရေးဝန်ကြီး မာရီစ် ပေနီက စစ်ကောင်စီအပေါ် ပြင်းထန်တဲ့ ပိတ်ဆို့အရေးယူမှုတွေ လုပ်ဆောင်သွားမှာမဟုတ်ဘူးလို့ ပြောကြားခဲ့ပါတယ်။

    Ref: SBS

    (ဆရာဝန်အမည်မှာ အမည်လွှဲဖြစ်ပါသည်)

  • အမေရိကန်အစိုးရကထုတ်သည့် လူမျိုးတုန်းသတ်ဖြတ်မှုစာရင်းတွင် တရုတ်နှင့် မြန်မာတို့ ပါဝင်

    အမေရိကန်အစိုးရကထုတ်သည့် လူမျိုးတုန်းသတ်ဖြတ်မှုစာရင်းတွင် တရုတ်နှင့် မြန်မာတို့ ပါဝင်

    ဇူလိုင် ၁၃၊ ၂၀၂၁
    M-Media

    -လူနည်းစုတွေကို လူမျိုးတုန်းအောင်လုပ်နေတယ်၊ ဒီလိုလုပ်ဆောင်နေတဲ့ အလားအလာရှိတယ်ဆိုတဲ့ နိုင်ငံတွေစာရင်းကို အမေရိကန်အစိုးရက တနင်္လာနေ့မှာ ထုတ်ပြန်ရာမှာ တရုတ်နဲ့ မြန်မာတို့ ပါဝင်လာပါတယ်။

    ကမ္ဘာတစ်ဝှမ်း လူမျိုးတုန်းသတ်ဖြတ်မှု၊ ရက်စက်ကြမ်းကြုတ်မှုတွေကို တားဆီးရေးအတွက် အမေရိကန်အစိုးရက တစ်နှစ်ကိုတစ်ကြိမ် လွှတ်တော်ကို အစီရင်ခံစာ တင်သွင်းရတာပါ။

    “ကျွန်တော်တို့အစိုးရဟာ ကမ္ဘာတစ်ဝှမ်း လူ့အခွင့်အရေးကို ကာကွယ်ပေးသွားမှာဖြစ်ပြီး၊ ဒီလို ရက်စက်ကြမ်းကြုတ်မှုတွေကို ကာကွယ်တားဆီးရေးဟာ အဓိက အမျိုးသားအကျိုးစီးပွား၊ ကိုယ်ကျင့်သိက္ခာပိုင်းဆိုင်ရာ အဓိက၀တ္တရားအဖြစ် ခံယူပါတယ်” လို့ အခုနှစ် အစီရင်ခံစာမှာ ဖော်ပြထားပါတယ်။

    တရုတ်နိုင်ငံအနောက်ပိုင်း ရှင်ကျန်းပြည်နယ်မှာ ဝီဂါနဲ့ အခြား အစ္စလာမ်ဘာသာဝင် လူမျိုးစုတွေအပေါ် တရုတ်အစိုးရရဲ့ ဖိနှိပ်ညှင်းပမ်းမှုတွေဟာ ‘လူမျိုးတုန်းသတ်ဖြတ်မှု’ မြောက်နေပြီလို့ အမေရိကန်က ယုံကြည်ကြောင်း အစီရင်ခံစာက ဆိုပါတယ်။

    သမ္မတဟောင်း ဒေါ်နယ်ထရမ့် လက်ထက်ကတည်းက ရှင်ကျန်းကိစ္စကို လူမျိုးတုန်းသတ်ဖြတ်မှုမြောက်တယ်လို့ သတ်မှတ်ခဲ့တာပါ။ ရခိုင်ပြည်နယ်မြောက်ပိုင်းက ရိုဟင်ဂျာတွေကိုလည်း မြန်မာစစ်တပ်က ‘လူမျိုးစုလိုက် ရှင်းလင်းသုတ်သင်မှု’ လုပ်နေတယ်လို့ ထရမ့်အစိုးရက ဆုံးဖြတ်ခဲ့ပါတယ်။

    ‘အစ္စလာမ်ဘာသာဝင်အများစုဖြစ်တဲ့ ဝီဂါတွေနဲ့ ရှင်ကျန်းပြည်နယ်က အခြား လူမျိုးစုတွေ၊ ဘာသာရေးလူနည်းစုတွေအပေါ် တရုတ်အစိုးရက လူမျိုးတုန်းသတ်ဖြတ်မှု၊ လူသားထုအပေါ် ကျူးလွန်တဲ့ ရာဇဝတ်မှု လုပ်ဆောင်နေတယ်’ ဆိုတဲ့ အရင်အစိုးရရဲ့ ပြောကြားမှုကို လက်ရှိ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်က ထောက်ခံကြောင်း အကြိမ်ကြိမ်ပြောကြားထားမှုကိုလည်း အစီရင်ခံစာမှာ ထည့်သွင်းဖော်ပြထားပါတယ်။

    ဒီလိုကျူးလွန်မှုတွေမှာ လူသန်းချီ အကျဉ်းချတာ၊ ညှမ်းပမ်းနှိပ်စက်တာ၊ အဓမ္မ သားကြောဖြတ်တာတွေ ပါဝင်ပြီး ဒီရက်စက်ကြမ်းကြုတ်မှုတွေအတွက် ထရမ့်အစိုးရက လုပ်ဆောင်ခဲ့တဲ့ ပိတ်ဆို့အရေးယူမှုတွေကို ဂျိုးဘိုင်ဒန်အစိုးရက ထပ်တိုးဆောင်ရွက်သွားမယ်လို့ ​အစီရင်ခံစာက ဆိုပါတယ်။

    မြန်မာနိုင်ငံမှာ လူမျိုးတုန်းသတ်ဖြတ်မှု ဖြစ်နိုင်တဲ့အန္တရာယ် ရှိနေပြီး စစ်အာဏာသိမ်းမှု ဆန့်ကျင်သူတွေအပါအဝင် ပြည်သူလူထုအပေါ် ဖိနှိပ်ချုပ်ခြယ်နေတာတွေ၊ ရိုဟင်ဂျာတွေအပေါ် အကြမ်းဖက်နေတာတွေ ရပ်တန့်ရေး မဟာမိတ်တွေ၊ မိတ်ဖက်နိုင်ငံတွေနဲ့ပေါင်းပြီး စစ်အစိုးရကို ဖိအားပေးသွားမယ်လို့ အမေရိကန်အစိုးရက အစီရင်ခံစာထဲမှာ ရေးသားဖော်ပြခဲ့ပါတယ်။

    အီသီယိုးပီးယားအနောက်ပိုင်း တီဂရေးဒေသမှာ ဆန့်ကျင်ပုန်ကုန်သူတွေကို အီသီယိုးပီးယားနဲ့ အီရစ်ထရီယာတပ်တွေက ကြမ်းကြမ်းတမ်းတမ်း တုန့်ပြန်ကိုင်တွယ်နေတာ၊ တောင်ဆူဒန်မှာ အစိုးရတပ်တွေက အရပ်သားတွေကို သတ်ဖြတ်တာ၊ လိင်ပိုင်းဆိုငရာ အကြမ်းဖက်တာ၊ စားနပ်ရိက္ခာကို လက်နက်သဖွယ် အသုံးပြုနေတာတွေ ကိုင်တွယ်ဆောင်ရွက်သွားမယ်လို့လည်း ဘိုင်ဒန်အစိုးရက ထည့်သွင်းတင်ပြခဲ့ပါတယ်။

    အီရတ်နဲ့ ဆီးရီးယားမှာ IS အကြမ်းဖက်အဖွဲ့က ဘာသာရေးလူနည်းစုတွေအပေါ် ကျူးလွန်တဲ့ ရက်စက်ကြမ်းကြုတ်မှုကို အရေးယူနိုင်ရေး မိမိတို့အဖွဲ့က ဆက်လက်လုပ်ဆောင်သွားမှာဖြစ်သလို၊ ဆီးရီးယားကအာဏာရှင် ဘာရှာ အလ်အာဆတ်ရဲ့ ကျူးလွန်မှုတွေကိုလည်း အရေးယူသွားမယ်လို့ အစီရင်ခံစာမှာ ထည့်သွင်းဖော်ပြခဲ့ပါတယ်။

    Ref: AP

  • စစ်အာဏာရှင်ကပ်နှင့် ကိုဗစ်ကပ်ကို နှစ်ထပ်ကွမ်းရင်ဆိုင်နေရတဲ့ မြန်မာပြည်သူများ

    စစ်အာဏာရှင်ကပ်နှင့် ကိုဗစ်ကပ်ကို နှစ်ထပ်ကွမ်းရင်ဆိုင်နေရတဲ့ မြန်မာပြည်သူများ

    ဇူလိုင် ၁၁၊ ၂၀၂၁
    M-Media

    -ကိုစိုးဝင်းတစ်ယောက် ကိုဗစ်လက္ခဏာ ခံစားနေရတဲ့ အဖွားဖြစ်သူအတွက် အောက်ဆီဂျင်ရဖို့ အောက်ဆီဂျင်စက်ရုံမှာ တန်းစီနေရပါတယ်။

    “မနက် ၅ နာရီကနေ တန်းစီစောင့်လာတာ အခု နေ့လည် ၁၂ နာရီ ရှိပါပြီ။ အခုအချိန်အထိ လိုင်းစီနေရတုန်းပါ။ အောက်ဆီဂျင်ဟာ ပိုက်ဆံထက်တောင် ပိုရှားနေပါပြီ” လို့ နိုင်ငံရဲ့ အကြီးဆုံးမြို့ ရန်ကုန်မှာနေထိုင်တဲ့ သူက ပြောပါတယ်။

    ဖေဖော်ဝါရီလ စစ်တပ်က အာဏာသိမ်းပြီးနောက်ပိုင်း ခါးသီးကြမ်းတမ်းတဲ့ နိုင်ငံရေးအခြေအနေကို ကြုံတွေ့နေရတဲ့ မြန်မာနိုင်ငံဟာ မေလ အလယ်ပိုင်းကစပြီး ကိုဗစ်ပြန်လည်မြင့်တက်လာမှုကို မတွန်းလှန်နိုင်သေးပါဘူး။ ဒါ့ကြောင့် စစ်ဆေးရုံမှာ တက်မရသူတွေ၊ ပြည်သူမုန်းတဲ့ စစ်အစိုးရအပေါ် အယုံအကြည်မရှိတဲ့အတွက် သူတို့ပေးတဲ့ ကျန်းမာရေးစောင့်ရှောက်မှုကို မလိုလားသူတွေ တော်တော်များများကတော့ ကိုစိုးဝင်းရဲ့ အဖွားလို နေအိမ်တွေမှာပဲ ကပ်ရောဂါကို ကြံ့ကြံ့ခံ ကျော်ဖြတ်နေရပါတယ်။

    စစ်တပ်က ဖြုတ်ချလိုက်တဲ့ အရပ်သားခေါင်းဆောင် ဒေါ်အောင်ဆန်းစုကြည်လက်ထက် ပြီးခဲ့တဲ့နှစ် ဩဂုတ်လမှာ ကိုရိုနာဗိုင်းရပ်စ် ဒုတိယလှိုင်းကို ကြုံရတဲ့အချိန် ခရီးသွားလာမှု တင်းတင်းကြပ်ကြပ် ကန့်သတ်တာ၊ ရန်ကုန်မြို့ကို ပိတ်ပစ်တာ၊ ကူးစက်မှုများလို့ လော့ဒေါင်းချထားတဲ့ ဒေသတွေမှာ ရွေးကောက်ပွဲ မဲဆွယ်မှု ကန့်သတ်တာတွေ လုပ်ဆောင်ပြီး အောင်မြင်စွာ ကျော်လွှားနိုင်ခဲ့ပါတယ်။

    ဒေါ်အောင်ဆန်းစုကြည်ကလည်း အခြေအနေကို ဘယ်လို ထိန်းချုပ် ကိုင်တွယ်ရမလဲဆိုတာနဲ့ပတ်သက်ပြီး နိုင်ငံပိုင်ရုပ်သံကနေ မကြာခဏ ပြည်သူတွေကို ဆော်ဩတိုက်တွန်း၊ မေတ္တာရပ်ခံတာတွေ လုပ်ဆောင်ပါတယ်။ အိန္ဒိယနဲ့ တရုတ်နိုင်ငံတို့ကနေလည်း ကိုဗစ်ကာကွယ်ဆေးတွေ မှာယူနိုင်ခဲ့ပါတယ်။ ကျန်းမာရေးဝန်ထမ်းတွေကို ပထမအကြိမ် ကာကွယ်ဆေးထိုးပေးပြီး တစ်ပတ်အကြာမှာ သူမ ဖြုတ်ချခံလိုက်ရတာပါ။

    စစ်တပ်က ဒေါ်အောင်ဆန်းစုကြည်ကို ဖြုတ်ချလိုက်မှုကြောင့် နိုင်ငံတစ်ဝှမ်း ဆန္ဒပြမှုတွေ ကျယ်ကျယ်ပြန့်ပြန့် ဖြစ်ပေါ်ခဲ့ပြီး၊ စစ်အစိုးရနဲ့ ပူးပေါင်းဆောင်ရွက်ခြင်းမပြုဖို့ ၀န်ထမ်းတွေကို တိုက်တွန်းတဲ့ နာမည်ကျော် CDM လှုပ်ရှားမှုကို ကျန်းမာရေးဝန်ထမ်းတွေက ဦးဆောင်ပြုလုပ်ခဲ့ပါတယ်။

    စစ်ဆေးရုံတွေ ဆက်လက်လည်ပတ်နေပေမယ့် လူတော်တော်များများက ရှောင်ကြပြီး၊ စစ်အစိုးရကိုဆန့်ကျင်တဲ့ ဆရာဝန်တွေ၊ သူနာပြုတွေ ယာယီဆေးခန်း ဖွင့်လှစ်ကုသပေးပေမယ့် စစ်ကောင်စီရဲ့ ဖမ်းဆီးမှုကို ခံခဲ့ပါတယ်။ ကာကွယ်ဆေးထိုးပေးမှုလုပ်ငန်းကလည်း ရပ်တန့်လုနီးပါး ဖြစ်သွားပြီး ကူးစက်မှုက ပေါက်ကွဲထွက်လာပါတယ်။

    “စိတ်စေတနာဖြူစင်တဲ့ ဘယ်ပညာရှင်ကမှ စစ်ကောင်စီလက်အောက်မှာအလုပ်မလုပ်ချင်ပါဘူး။ ဒေါ်အောင်ဆန်းစုကြည်လက်ထက်တုန်းက ရောဂါထိန်းချုပ်ရေးအတွက် အစိုးရရော စေတနာ့ဝန်ထမ်းတွေပါ ပူးပေါင်းဆောင်ရွက်ခဲ့ကြပါတယ်။ စစ်အာဏာရှင်အုပ်ချုပ်မှုအောက်မှာ အနာဂတ် ဘယ်လိုဖြစ်လာမလဲဆိုတာ ခန့်မှန်းရခက်ပါတယ်” လို့ အရပ်ဖက်အဖွဲ့အစည်းဖြစ်တဲ့ Clean Yangon ကို တည်ထောင်သူ ကို ဇေယျာထွန်းက ပြောပါတယ်။

    နိုင်ငံအနောက်မြောက်ပိုင်း စစ်ကိုင်းတိုင်းဒေသကြီး ကလေးမြို့မှာ အောက်ဆီဂျင်ရဖို့ လူတွေ တန်းစီစောင့်နေကြတဲ့ ပုံတွေက ကမ္ဘာ့အနိမ့်ဆုံးတွေထဲမှာ ပါဝင်တဲ့ မြန်မာနိုင်ငံရဲ့ ကျန်းမာရေးစောင့်ရှောက်မှု ပြိုလဲတော့မလားဆိုတဲ့ စိုးရိမ်မှု ပြည်သူတွေကြားထဲမှာ ဖြစ်ပေါ်လာစေပါတယ်။

    “မြေပြင်မှာ ကိုဗစ်ကူးစက်မှုအရေအတွက် လျင်လျင်မြန်မြန်မြင့်တက်လာမယ့်အန္တရာယ် ရှိနေတယ်လို့ မြန်မာနိုင်ငံမှာရှိနေတဲ့ ကုလဝန်ထမ်းတွေက ပြောပါတယ်။ ကိုဗစ်ကြီးကြီးမားမား ဖြစ်လာရင် ပြည်သူတွေရဲ့ ကျန်းမာရေးကိုသာမက၊ စီးပွားရေးကိုပါ ဆိုးဆိုးရွားရွား ထိခိုက်လိမ့်မယ်ဆိုတာ ကုလသမဂ္ဂက သတိပေးထားပါတယ်။ အရေးကြီးတဲ့ ကျန်းမာရေးစောင့်ရှောက်မှုတွေ ပြန်ရအောင်လုပ်ပေးဖို့၊ ဗိုင်းရပ်စ်ပြန့်နှံ့မှုတားဆီးရေး လုပ်ငန်းတွေကို အကောင်အထည်ဖော်ဖို့၊ ကာကွယ်ဆေးထိုးနှံမှုကို အရှိန်မြှင့်ဖို့ ကုလတာဝန်ရှိသူတွေက အလေးထား ပြောကြားခဲ့ပါတယ်” လို့ ကုလပြောရေးဆိုခွင့်ရှိသူ စတီဖင် ဒူဂျာရစ်က ပြောပါတယ်။

    ပြီးခဲ့တဲ့တစ်ပတ် နှောင်းပိုင်းမှာ မြန်မာနိုင်ငံက အကြီးဆုံးမြို့တွေဖြစ်တဲ့ ရန်ကုန်နဲ့ မန္တလေးတို့မှာ အောက်ဆီဂျင်ပြတ်လပ်မှုကို ကြုံတွေ့လာရပါတယ်။

    စစ်အာဏာရှင် ဗိုလ်ချုပ်မှူးကြီးမင်းအောင်လှိုင်က အောက်ဆီဂျင်စက်ရုံတွေ အပြည့်အ၀လည်ပတ်ဖို့၊ စက်ရုံသုံးအောက်ဆီဂျင်တွေကို လူနာတွေသုံးလို့ရအောင် ပြောင်းလဲပေးဖို့ သောကြာနေ့က ကိုဗစ်နဲ့ပတ်သက်တဲ့ အစည်းအဝေးမှာ အမိန့်ပေးခဲ့ပါတယ်။

    ရင်းနှီးမြှုပ်နှံမှုနဲ့ နိုင်ငံခြားကုန်သွယ်ရေးဝန်ကြီး ဦးအောင်နိုင်ဦးက ​အောက်ဆီဂျင်ထုတ်လုပ်တဲ့ ကိရိယာ oxygen concentrator တင်သွင်းခွင့်အတွက် လိုင်စင်လိုအပ်ချက်တွေ၊ အခွန်တွေအားလုံးကို ဖြုတ်ပေးလိုက်တယ်လို့ စနေနေ့က ထုတ်ပြန်ပါတယ်။

    ကျန်းမာရေးဝန်ကြီးဌာနရဲ့ စာရင်းအရ စနေနေ့မှာ ကိုဗစ်ကူးစက်သူ ၄၃၇၇ ဦး၊ သေဆုံးသူ ၇၁ ဦး ရှိပြီး ဒါဟာ စုစုပေါင်း ကူးစက်သူ ၁၈၈၇၅၂ ဦး၊ သေဆုံးသူ ၃၇၅၆ ဦး ရှိလာတာပါ။ စစ်ဆေးသူအကြား တွေ့ရှိမှုနှုန်းဟာ ၂၅ ရာခိုင်နှုန်းလောက်ရှိနေပြီး ဘာ့ကြောင့် ဒီလောက်မြင့်တက်လာလဲဆိုတဲ့ စိုးရိမ်မှုလည်း ပေါ်လာပါတယ်။

    ကာကွယ်​ဆေးထိုးထားတဲ့ အချက်အလက်တွေကို တိတိကျကျမသိရပါဘူး။ ပြီးခဲ့တဲ့လနှောင်းပိုင်း စာရင်းတွေအရ ကာကွယ်ဆေးအလုံးရေ ၃.၅ သန်း ထိုးပေးထားတယ်လို့ဆိုပြီး ဒါဟာ ၅၅ သန်းရှိတဲ့ မြန်မာနိုင်ငံလူဦးရေရဲ့ ၃.၂ ရာနှုန်းလောက်သာ ကာကွယ်ဆေးနှစ်ကြိမ် ထိုးထားပြီးဖြစ်တယ်ဆိုတဲ့ အဓိပ္ပါယ်ပါ။

    Johns Hopkins တက္ကသိုလ်ရဲ့ လေ့လာမှုတွေအရ ဇွန်လ ၂၅ ရက်နေ့အထိ လူ တစ်သိန်းမှာ ပျမ်းမှာ ၁.၁၈ ဦး ကိုဗစ်ကူးစက်ရာကနေ၊ ဇူလိုင်လ ၉ ရက်နေ့မှာတော့ ၆.၀၈ ဦးအထိ ကူးစက်လာပြီး ဒီကာလအတွင်း သေဆုံးမှုနှုန်းကလည်း ၀.၀၁ ရာခိုင်နှုန်းကနေ ၀.၀၈ ရာခိုင်နှုန်းအထိ တက်လာတာကို တွေ့ရပါတယ်။

    ဒီအရေအတွက်ဟာ မြေပြင်ကပမာဏနဲ့ တော်တော်လေး လျော့နေနိုင်ပါသေးတယ်။

    အကူအညီပေးရေးအဖွဲ့ Relief International ရဲ့ အဆိုအရ မြန်မာနိုင်ငံရဲ့ အဓိကစိန်ခေါ်မှုက စစ်ဆေးနိုင်စွမ်းနဲ့ စစ်ဆေးမှု၊ ကာကွယ်ဆေးရရှိမှု မလုံလောက်တာတွေဖြစ်တယ်လို့ ပြောပါတယ်။

    စာသင်ကျောင်းတွေ ၂ ပတ်ပိတ်မယ်လို့ စစ်ကောင်စီ ကျန်းမာရေးဝန်ကြီးဌာနက ကြာသာပတေးနေ့မှာ ထုတ်ပြန်ပါတယ်။ ရန်ကုန်အပါအဝင် မြို့တော်တော်များများက ကူးစက်မှု ဆိုးဆိုးရွားရွားကြုံနေရတဲ့ ဒေသတွေမှာ အိမ်အပြင်မထွက်ဖို့ အမိန့်ထုတ်ထားသလို၊ အရေးပေါ် ဆေးရုံတွေလည်း ဆောက်လုပ်နေပါတယ်။

    Ref: AP