News @ M-Media

Tag: MyanmarCoup2021

  • အာဏာသိမ်းစစ်တပ်နှင့်သက်ဆိုင်သည့် အကောင့်များကို Google ကဖယ်ရှား

    အာဏာသိမ်းစစ်တပ်နှင့်သက်ဆိုင်သည့် အကောင့်များကို Google ကဖယ်ရှား

    မတ် ၁၀၊ ၂၀၂၁
    M-Media

    -အာဏာသိမ်း မြန်မာစစ်တပ်နဲ့ သက်ဆိုင်တဲ့ အကောင့်တွေကို ဖယ်ရှားလိုက်ပြီး၊ စစ်တပ် ကျောထောက်နောက်ခံပြုထားတဲ့ ဆက်သွယ်ရေးလုပ်ငန်းရဲ့ ကြော်ငြာတွေကိုလည်း စီစစ်နေတယ်လို့ Google က ဒီနေ့ ထုတ်ပြန်ပါတယ်။

    ဖေဖော်ဝါရီ ၁ ရက်နေ့က ရွေးကောက်ခံ အစိုးရကို ဖြုတ်ချကာ အာဏာသိမ်းခဲ့ပြီး ဆန္ဒပြ ပြည်သူလုထုကို အကြမ်းဖက် သတ်ဖြတ်တာတွေ လုပ်ဆောင်နေတဲ့ မြန်မာစစ်တပ်ရဲ့ အကောင့်တွေကို ကန့်သတ်ဖို့ နိုင်ငံတကာ တက်ကြွလှုပ်ရှားသူတွေက Google ကုမ္ပဏီကို ပြီးခဲ့တဲ့ သီတင်းပတ်တွေမှာ တိုက်တွန်းထားတာပါ။

    “ကျွန်မတို့ပလက်ဖောင်းမှာ ရှိနေတဲ့ အကောင့်တွေအပေါ် အရေးယူတာတွေ လုပ်ခဲ့ပါတယ်။ Google က မြန်မာစစ်တပ်နဲ့သက်ဆိုင်တဲ့ အကောင့်တွေ၊ YouTube က ချန်နယ်တွေ၊ ဗီဒီယိုတွေကို ဖယ်ရှားပစ်တာမျိုးတွေလည်း ပါဝင်ပါတယ်။ မြန်မာပြည်သူတွေ သတင်းအချက်အလက်ရယူမှု၊ အချင်းချင်း ဆက်သွယ်မှုတွေကို အန္တရာယ်ကင်းစွာ ဆောင်ရွက်နိုင်ရေး ကူညီဖို့ဟာ ကျွန်မတို့ရဲ့ ဦးစားပေးကိစ္စပါ” လို့ Google ရဲ့ ပြောရေးဆိုခွင့်ရှိသူ အမျိုးသမီးက ရိုက်တာသတင်းဌာနကို ပြောကြားခဲ့ပါတယ်။

    ဖယ်ရှားလိုက်တဲ့အထဲမှာ စစ်တပ်ရဲ့ Gmail အကောင့်တွေ၊ ဘလောဂ့် ပလက်ဖောင်းက စာမျက်နှာတွေ၊ Play Store အကောင့်တွေ ပါဝင်တယ်လို့ ဂူးဂဲလ်က ထည့်သွင်း ပြောဆိုခဲ့ပါတယ်။

    အာဏာသိမ်းစစ်ကောင်စီဖက်ကတော့ ဒီကိစ္စနဲ့ပတ်သက်ပြီး ထုတ်ပြန်တာ မရှိသေးပါဘူး။

    စစ်ကောင်စီရဲ့ ဝါဒဖြန့်ယန္တရားဖြစ်တဲ့ MRTV နဲ့ စစ်တပ်ပိုင် မြ၀တီရုပ်သံ ချန်နယ်တွေကို ပြီးခဲ့တဲ့တစ်ပတ်မှာ YouTube က ဖယ်ရှားခဲ့ပါတယ်။

    မြန်မာစစ်တပ်က ရှယ်ယာပါဝင်ထားတဲ့ Mytel ဆက်သွယ်ရေးကုမ္ပဏီဟာ Google နဲ့ Viber တို့မှာ ကြော်ငြာနေတယ်လို့ Justice for Myanmar က ဒီကနေ့မှာပဲ ထုတ်ပြောထားပါတယ်။

    စစ်တပ်ရဲ့အကောင့်တွေကို ဖယ်ရှားတာကို ကြိုဆိုပေမယ့် Mytel ရဲ့ ကြော်ငြာတွေကနေ Google နဲ့ Viber တို့ အကျိုးအမြတ်ရခဲ့တယ်ဆိုရင် ဒါဟာ စက်ဆုပ်ဖွယ်ရာကောင်းတယ်လို့ Justice for Myanmar က ပြောကြားခဲ့ပါတယ်။

    ဗီယက်နမ် ကာကွယ်ရေးဝန်ကြီးဌာနက ပိုင်ဆိုင်တဲ့ ဆက်သွယ်ရေးလုပ်ငန်း Viettel ကလည်း Mytel မှာ ရှယ်ယာပါဝင်ပါတယ်။ အခုကိစ္စနဲ့ပတ်သက်ပြီး Viettel ကို ဆက်သွယ်ခဲ့ပေမယ့် မရခဲ့ဘူးလို့ ရိုက်တာသတင်းဌာနက ဆိုပါတယ်။

    Ref: Reuters

  • စစ်အာဏာသိမ်းမှုကြောင့် ကမ္ဘာ့စီးပွားရေးမှာ အပယ်ခံဖြစ်လာတော့မယ့် မြန်မာနိုင်ငံ

    စစ်အာဏာသိမ်းမှုကြောင့် ကမ္ဘာ့စီးပွားရေးမှာ အပယ်ခံဖြစ်လာတော့မယ့် မြန်မာနိုင်ငံ

    မတ် ၉၊ ၂၀၂၁
    M-Media

    -တစ်ချိန်က စီးပွားရေးနဲ့ ရင်းနှီးမြှုပ်နှံမှုတို့အတွက် ကတိပြုရာနယ်မြေဖြစ်ခဲ့တဲ့ မြန်မာနိုင်ငံဟာ စစ်အာဏာသိမ်းမှုကြောင့် နိုင်ငံတကာစီးပွားရေးသမားတွေ လှည့်မကြည့်ချင်တော့တဲ့ အပယ်ခံနိုင်ငံ ဖြစ်လာပြီလို့ ရိုက်တာသတင်းဌာနက သုံးသပ်ချက်ဆောင်းပါးတစ်ပုဒ်မှာ ရေးသားထားပါတယ်။

    ရွေးကောက်ခံထားရတဲ့ အစိုးရကို ဖမ်းဆီးပြီး ဖေဖော်ဝါရီ ၁ ရက်နေ့ အာဏာသိမ်းမှုအပြီး ကိုကိုကိုလာနဲ့ Facebook အပါအဝင် နိုင်ငံခြားကုမ္ပဏီ ၅၅ ခုလောက်က တိုင်းပြည်မှာ ဆက်ရှိမှာဖြစ်ပြီး ဝန်ထမ်းတွေကို အဖြစ်ပယ်ဘူးလို့ ကတိပြုခဲ့ကြတာပါ။

    ဒါပေမယ့် တိုင်းပြည်စီးပွားရေး ယိုယွင်းလာတာ၊ ဆန္ဒပြမှု ကြီးထွားလာပြီး စစ်တပ်ရဲ့ သတ်ဖြတ်အကြမ်းဖက်မှုတွေ မြင့်မားလာတာကြောင့် တစ်လအကြာမှာတော့ စီးပွားရေးလုပ်ငန်းတွေရဲ့ ဒီကတိကဝတ်ဟာ တစ်စတစ်စ အားနည်းလာပါတယ်။

    ဖေဖော်ဝါရီ ၂၇ ရက်နေ့မှာပဲ ဩစတေးလျ ရေနံကုမ္ပဏီ Woodside Petroleum က မြန်မာနိုင်ငံမှာ အကြမ်းဖက်မှုတွေ မြင့်တက်လာတာကြောင့် ကမ်းလွန်ရှာဖွေရေးအဖွဲ့ကို ပြန်ခေါ်သွားမယ်လို့ ထုတ်ပြန်ပါတယ်။ ရှာဖွေမှုတွေ ဆက်လုပ်မယ်လို့ပြောပြီး တစ်ပတ်အကြာမှာ ဒီရုတ်သိမ်းမှု ပေါ်လာတာပါ။

    အခုတစ်ပတ်မှာတော့ ကမ္ဘာကျော်ဖက်ရှင်တံဆိပ် H&M က ထုတ်လုပ်မှုနဲ့ ပို့ဆောင်မှု အခက်အခဲတွေကြောင့် မြန်မာစက်ရုံတွေကနေ အထည်သစ်တွေ မမှာတော့ဘူးလို့ ထုတ်ပြန်ပါတယ်။ H&M ဟာ မြန်မာနိုင်ငံက စက်ရုံ ၄၅ ခုကနေ အထည်တွေ မှာနေတာပါ။ အနာဂတ်မှာ ဆက်မှာမှာလား၊ မမှာဘူးလားဆိုတာကို H&M က ထုတ်မပြောပါဘူး။

    Woodside Petroleum နဲ့ H&M နှစ်ခုစလုံးဟာ မြန်မာနိုင်ငံမှာ ဆက်ရှိနေမယ်လို့ အာဏာသိမ်းပြီးနောက်ပိုင်း ကြေငြာချက်ထုတ်တဲ့ လုပ်ငန်း ၅၅ ခုထဲမှာ ပါဝင်ပါတယ်။

    နောက်ထပ် ကမ္ဘာ့ထိပ်တန်းလုပ်ငန်းတစ်ခုဖြစ်တဲ့ ဂျပန် အဖျော်ယမကာကုမ္ပဏီ Kirin Holdings Co ကလည်း အာဏာသိမ်းပြီး သိပ်မကြာခင်မှာပဲ စစ်တပ်ပိုင်ကုမ္ပဏီနဲ့ ဆက်သွယ်ဆောင်ရွက်နေမှုကို ရပ်ဆိုင်းခဲ့ပါတယ်။

    ဒီမိုကရေစီစနစ် ပြန်လည်ဖော်ဆောင်ရေး၊ မတရားဖမ်းဆီးထားသူတွေကို ပြန်လွှတ်ပေးရေး ပြည်သူလူထုရဲ့ ဆန္ဒပြမှုတွေကို အာဏာသိမ်းစစ်ကောင်စီက ပြင်းပြင်းထန်ထန် နှိမ်နှင်းမှုကြောင့် သေဆုံးသူ ၅၀ ကျော်လာပြီး တိုင်းပြည်ရဲ့ ပုံရိပ်လည်း သိသိသာသာ ကျဆင်းလာပါတယ်။

    “ဒီလိုမျိုးတွေ လနဲ့ချီဆက်ဖြစ်နေရင် မြန်မာနိုင်ငံကနေ လုံး၀ထွက်မယ့် စီးပွားရေးလုပ်ငန်းတွေ ပေါ်လာအုံးမှာပါ” လို့ Center for Strategic and International Studies အဖွဲ့က အရှေ့တောင်အာရှဆိုင်ရာ ကျွမ်းကျင်သူ မာရေး ဟိုင်ဘာ့တ်က ပြောပါတယ်။

    စစ်အာဏာရှင်စနစ် အဆုံးသတ်ပြီး ၂၀၁၁ ခုနှစ် စစ်တပ်က ဒီမိုကရေစီအသွင်ပြောင်းမှု လုပ်ဆောင်ခဲ့ပြီးတဲ့နောက် မြန်မာနိုင်ငံကို နိုင်ငံခြားရင်းနှီးမြှုပ်နှံမှုတွေ အများအပြား ဝင်ရောက်လာခဲ့ကာ ၂၀၁၇ ခုနှစ်မှာ ကန်ဒေါ်လာ ၄.၇ ဘီလီယံအထိ ရောက်လာပါတယ်။

    အခြေခံအဆောက်အဦး မပြည့်စုံတာ၊ ဓာတ်အားအလုံအလောက်မပေးနိုင်တာ၊ ဥပဒေအရ အာမခံချက်မရှိတာ၊ စီးပွားရေးတော်တော်များများကို စစ်တပ်က ချုပ်ကိုင်ထားတာတွေကြောင့် အာဏာမသိမ်းခင်ကတည်းက နိုင်ငံခြားစီးပွားရေးလုပ်ငန်းတွေ ရုန်းကန်ခဲ့ရတာပါ။

    စစ်အာဏာသိမ်းပြီးနောက် ပိုမိုဖြစ်ပွားလာတဲ့ လူ့အခွင့်အရေးချိုးဖောက်မှုတွေကြောင့် အချိန်အတော်ကြာ တည်ငြိမ်ခဲ့တဲ့ စွမ်းအင်လုပ်ငန်းတွေအပေါ် ထိခိုက်လာဖို့ ရှိပါတယ်။

    မြန်မာနိုင်ငံရဲ့ လူ့အခွင့်အရေးဆိုင်ရာ ကုလအထူးကိုယ်စားလှယ် တွမ်အန်ဒရူးက စစ်တပ်က ထိန်းချုပ်ထားပြီး အကျိုးအမြတ်အများအပြားရနေတဲ့ စွမ်းအင်လုပ်ငန်း Myanmar Oil and Gas Enterprise ကို ပိတ်ဆို့မှုတွေလုပ်ဖို့ ပြီးခဲ့တဲ့တစ်ပတ်မှာ ပြောခဲ့ပါတယ်။

    ၁၉၉၂ ခုနှစ် ကတည်းက မြန်မာနိုင်ငံမှာ ရင်းနှီးမြှုပ်နှံမှုလုပ်ခဲ့တဲ့ ပြင်သစ်စွမ်းအင်လုပ်ငန်း Total က ဒီကိစ္စအတွက် မှတ်ချက်မပေးပါဘူး။ MOGE နဲ့ ကမ်းလွန်ဓာတ်ငွေ့ထုတ်လုပ်ရေး တွဲလုပ်နေတဲ့ အမေရိကန်ကုမ္ပဏီ Chevron ပြောရေးဆိုခွင့်ရှိသူကတော့ ပိတ်ဆို့မှုတွေဖြစ်လာရင် အဲဒီစည်းကမ်းအတိုင်းသာ ဆောင်ရွက်သွားမယ်လို့ဆိုပါတယ်။

    အာဏာသိမ်းစစ်ကောင်စီ လက်ထက်မှာ နိုင်ငံတကာ ဆက်သွယ်ရေးကုမ္ပဏီတွေလည်း အကြပ်ရိုက်လာပါတယ်။ အင်တာနက် ဝန်ဆောင်မှုတွေ ဖြတ်တောက်ခိုင်းတာတွေ ရှိလာသလို လူ့အခွင့်အရေးကို ခြိမ်းခြောက်တဲ့ ဆိုက်ဘာဥပ​ဒေ ပြဌာန်းဖို့လည်း လုပ်ဆောင်လာပါတယ်။

    နော်ဝေ ဆက်သွယ်ရေးကုမ္ပဏီ Telenor က ဆိုက်ဘာဥပဒေတွေဟာ နိုင်ငံသားတွေရဲ့ လွတ်လပ်ခွင့်ကို လျော့ချကာ စစ်တပ်အာဏာကို ချဲ့ထွင်တာမျိုးဖြစ်တယ်လို့ ဆိုပြီး ခိုင်မာတဲ့ ဥပဒေမူဘောင်တစ်ရပ် ပြန်လည်အသုံးပြုဖို့ တိုက်တွန်းခဲ့ပါတယ်။

    ကုလရဲ့ ၂၀၁၉ အချက်အလက်ရှာဖွေရေးအဖွဲ့မှာ ပါဝင်တဲ့ ပညာရှင် ခရစ် ဆီဒိုတီက စစ်တပ်ဟာ အစိုးရနေရာအားလုံးကို သိမ်းပိုက်ထားတာကြောင့် နိုင်ငံခြား ရင်းနှီးမြှုပ်နှံသူတွေအနေနဲ့ မြန်မာနိုင်ငံက စီးပွားရေးလုပင်န်းအားလုံးကို ရပ်ဆိုင်းသင့်တယ်လို့ ပြောကြားခဲ့ပါတယ်။

    ယူကေအခြေစိုက် မြန်မာလူ့အခွင့်အရေးအဖွဲ့ Burma Campaign ကလည်း ဘယ်သူတွေနဲ့ အလုပ်လုပ်နေရလဲဆိုတာ ဆန်းစစ်ဖို့ အနောက်နိုင်ငံက နာမည်ကြီးကုမ္ပဏီတွေကို သတိပေးခဲ့ပြီး မြန်မာအလုပ်သမားတွေကိုတော့ မျက်ကွယ်မပြုဖို့ တိုက်တွန်းခဲ့ပါတယ်။

    နိုင်ငံခြား တံဆိပ်တွေဖြစ်တွေဖြစ်တဲ့ H&M၊ Adidas၊ Gap နဲ့ Zara တို့က အထည်မှာတဲ့မြန်မာနိုင်ငံက အထည်ချုပ်စက်ရုံတွေမှာ အလုပ်သမား ၅ သိန်းလောက် ရှိပါတယ်။

    စီးပွားရေးအကြံပေးအဖွဲ့ Control Risks က ဒါရိုက်တာ ဂျွန် ဘရေးက မြန်မာနိုင်ငံမှာ ဖိအားတွေများနေတဲ့ လုပ်ငန်းတွေအနေနဲ့ စစ်တပ်နဲ့ ကြံရာပါဖြစ်နေလားဆိုတာကို သုံးသပ်ဖို့လိုပြီလို့ ပြောကြားခဲ့ပါတယ်။

    “မြန်မာပြည်သူတွေထံက ငွေကြေးကိုယူပြီး ပြည်သူတွေကို ဝန်ဆောင်မှုပေးနေတဲ့၊ မြန်မာ့စီးပွားရေး တိုးတက်အောင် ကူညီပံ့ပိုးပေးနေတဲ့ လုပ်ငန်းဆိုရင်တော့ လမ်းပေါ်မှာဖြစ်နေတဲ့ သတ်တာဖြတ်တာတွေမှာ ကြံရာပါနေတယ်လို့ ကျွန်တော်မထင်ပါဘူး”

    Ref: Reuters

  • စစ်ခေါင်းဆောင်များ၏ စီးပွားရေးလုပ်ငန်းကို ဥရောပက ပိတ်ဆို့ အရေးယူမည်

    စစ်ခေါင်းဆောင်များ၏ စီးပွားရေးလုပ်ငန်းကို ဥရောပက ပိတ်ဆို့ အရေးယူမည်

    မတ် ၈၊ ၂၀၂၁
    M-Media

    -ဖေဖော်ဝါရီ ၁ ရက်နေ့ အာဏာသိမ်းမှုအတွက် မြန်မာစစ်တပ်နဲ့ စစ်ခေါင်းဆောင်တွေရဲ့ စီးပွားရေးလုပ်ငန်းတွေအပေါ် ပိတ်ဆို့အရေးယူမှုတွေ ဥရောပသမဂ္ဂက လုပ်ဆောင်သွားမယ်လို့ သိရပါတယ်။

    မတ်လ ၂၂ ရက်နေ့ ဥရောပသမဂ္ဂ နိုင်ငံခြားရေးဝန်ကြီးများအစည်းအဝေးမှာ အတည်ပြုမယ့် ဆုံးဖြတ်ချက်မူကြမ်းမှာ အာဏာသိမ်းစစ်တပ်က အကျိုးအမြတ်ရနေတဲ့ စီးပွားရေးလုပ်ငန်းတွေ၊ ဘဏ္ဍာရေးထောက်ပံ့မှုပေးနေတဲ့ ကုမ္ပဏီတွေကို ပစ်မှတ်ထားပြီး ပိတ်ဆို့အရေးယူမယ်လို့ ဖော်ပြထားပါတယ်။

    ဥရောပသမဂ္ဂဟာ ၂၀၁၈ ခုနှစ်ကတည်းက မြန်မာစစ်တပ်ကို လက်နက်ရောင်းချမှု ပိတ်ပင်တာ၊ စစ်ခေါင်းဆောင်အချို့ကို ပိတ်ဆို့အရေးယူမှုတွေ လုပ်ထားပြီး၊ အခု ပိတ်ဆို့မှုဟာ အာဏာသိမ်းပြီးနောက်ပိုင်း ကြီးကြီးမားမား အရေးယူမှုလည်း ဖြစ်ပါတယ်။

    စစ်တပ်ကပိုင်တဲ့ ဦးပိုင်လုပ်ငန်း (MEHL)၊ မြန်မာ့စီးပွားရေး ကော်ပိုရေးရှင်း (MEC) တို့ကို အဓိကထား အရေးယူမယ်လို့ ဥရောပသံတမန်တွေက ရိုက်တာသတင်းဌာနကို ပြောကြားခဲ့ပါတယ်။ ဥရောပ ရင်းနှီးမြှုပ်နှံသူတွေ၊ ဘဏ်လုပ်ငန်းတွေကို စစ်တပ်ရဲ့ ဒီစီးပွားရေးလုပ်ငန်းတွေနဲ့ မပတ်သက်ဖို့ ပိတ်ပင်တားဆီးမှာ ဖြစ်ပါတယ်။

    စစ်အာဏာသိမ်းမှုကို ဆန့်ကျင်တဲ့အ​နေနဲ့ မြန်မာအစိုးရကိုပေးနေတဲ့ အကူအညီပေးရေး ရန်ပုံငွေတွေကို ဥရောပသမဂ္ဂက ပြီးခဲ့တဲ့တစ်ပတ်မှာ ရပ်ဆိုင်းခဲ့ပါတယ်။

    ဥရောပသမဂ္ဂဟာ အာဏာသိမ်းပြီးနောက် စစ်တပ်နဲ့ ရဲတို့က ပြည်သူတွေအပေါ် အကြမ်းဖက် သတ်ဖြတ်မှုတွေအတွက် တာဝန်ရှိတဲ့ စစ်ခေါင်းဆောင်တွေ၊ နယ်ခြားစောင့်တပ်ဖွဲ့ တာဝန်ရှိသူတွေအပေါ် သီးသန့် ပစ်မှတ်ထားအရေးယူဖို့လည်း စီစဉ်နေပါတယ်။ မည်သူမည်ဝါဆိုတဲ့ အမည်အတိအကျတော့ ထွက်မလာသေးပါဘူး။

    Ref: Reuters

  • မည်သူအုပ်ချုပ်သည်ဖြစ်စေ အဆင်ပြေအောင်ဆက်ဆံမည်ဟု တရုတ်ပြော

    မည်သူအုပ်ချုပ်သည်ဖြစ်စေ အဆင်ပြေအောင်ဆက်ဆံမည်ဟု တရုတ်ပြော

    မတ် ၈၊ ၂၀၂၁
    M-Media

    -လက်ရှိ မြန်မာနိုင်ငံအရေးမှာ ဘယ်သူ့ဖက်မှမပါဘဲ သက်ဆိုင်သူတွေအကြား ကြားဝင်ညှိနှိုင်းပေးဖို့ တရုတ်နိုင်ငံက ဆန္ဒရှိတယ်လို့ နိုင်ငံခြားရေးဝန်ကြီး ၀မ်ယီက မနေ့မှာ ပြောကြားလိုက်ပါတယ်။

    ရွေးကောက်ခံအစိုးရကို ဖြုတ်ချပြီး ဖေဖော်ဝါရီ ၁ ရက်နေ့ စစ်တပ်က အာဏာသိမ်းမှုမှာ တရုတ်အစိုးရက နောက်ကွယ်ကနေ ထဲထဲဝင်ဝင် ပါဝင်ပတ်သက်နေတယ်လို့ စွပ်စွဲခံထားရတာပါ။ တရုတ်ကတော့ ဒါကို ငြင်းထားပြီး မြန်မာနိုင်ငံမှာ ဖြစ်ပျက်နေ​တာတွေဟာ တရုတ်နိုင်ငံက မြင်ချင်တာမျိုး မဟုတ်ဘူးလို့ ဆိုပါတယ်။

    မနေ့ကပြုလုပ်တဲ့ သတင်းစာရှင်းလင်းပွဲမှာ တရုတ်နိုင်ငံခြားရေးဝန်ကြီး ဝမ်ယီက ဒီစကားကို ထပ်ပြောခဲ့ပြီး အခြေခံဥပဒေနဲ့ တည်ဆဲဥပဒေဘောင်ထဲက ကြားဝင်ညှိနှိုင်းပေးလိုတယ်လို့ ဆိုပါတယ်။

    “မြန်မာနိုင်ငံရဲ့ အချုပ်အခြာအာဏာနဲ့ ပြည်သူ့ဆန္ဒကို အလေးထားပြီး တင်းမာမှုတွေလျှော့ချရေး အပြုသဘောဆောင်တဲ့ အခန်းကဏ္ဍကနေ ပါဝင်ကာ သက်ဆိုင်သူတွေနဲ့ ဆက်သွယ်ညှိနှိုင်းပေးဖို့ တရုတ်က ဆန္ဒရှိပါတယ်”

    လက်ရှိ အရေးအကြီးဆုံးက သွေးထွက်သံယို ဖြစ်နေမှုကို ချက်ခြင်းရပ်တန်ဖို့ ဖြစ်တယ်လို့လည်း သူက ဆိုပါတယ်။

    မြန်မာနိုင်ငံအရေးနဲ့ပတ်သက်ပြီး နိုင်ငံခြားရေးဝန်ကြီး ဝမ်ယီက အဆိုပြုချက် ၃ ခု ချပြခဲ့တာပါ။

    ဒုတိယတစ်ချက်က တစ်ခြားနိုင်ငံတွေရဲ့ပြည်တွင်းရေးကို ဝင်ရောက်မစွက်ဖက်ရဆိုတဲ့ မူဘောင်ထဲကနေ အာဆီယံအဖွဲ့က ဝင်ရောက်အဖြေရှာတာကို တရုတ်က ထောက်ခံအားပေးမယ်လို့ ဝမ်ယီက ပြောပါတယ်။

    နောက်ဆုံးတစ်ချက်ကတော့ တရုတ်-မြန်မာဆက်ဆံမှု ပိုမိုကောင်းမွန်ရေးကို မမှိန်မသုန် ဆက်လက်စွဲကိုင်သွားမှာဖြစ်ပြီး၊ ဘယ်လိုအခြေအနေမျိုးမှာပဲဖြစ်ဖြစ် မိတ်ဖက်ဖြစ်မှု၊ ပူးပေါင်းဆောင်ရွက်မှုတွေကို တိုးမြှင့်လုပ်ဆောင်သွားမယ်လို့ နိုင်ငံခြားရေးဝန်ကြီးက ထည့်သွင်း ပြောဆိုခဲ့ပါတယ်။

    Ref: The Star

  • မြန်မာစစ်တပ်နှင့် ပူးပေါင်းဆောင်ရွက်မှုအားလုံးကို ဩစတေးလျ ရပ်ဆိုင်း

    မြန်မာစစ်တပ်နှင့် ပူးပေါင်းဆောင်ရွက်မှုအားလုံးကို ဩစတေးလျ ရပ်ဆိုင်း

    မတ် ၈၊ ၂၀၂၁
    M-Media

    -ဆန္ဒပြ ပြည်သူလူထုအပေါ် အာဏာသိမ်းစစ်တပ်က အကြမ်းဖက်မှုတွေ တိုးမြှင့်လုပ်ဆောင်လာတဲ့အပေါ် စိုးရိမ်မိပြီး၊ ကာကွယ်ရေးဆိုင်ရာ ပူးပေါင်းဆောင်ရွက်မှု အားလုံးကို ရပ်ဆိုင်းလိုက်တယ်လို့ ဩစတေးလျနိုင်ငံက ပြောကြားလိုက်ပါတယ်။

    ဩစတေးလျဟာ မြန်မာစစ်တပ်နဲ့ ပူးပေါင်းဆောင်ရွက်မှုကို ကန့်သတ်လုပ်ဆောင်နေတာဖြစ်ပြီး စစ်သားတွေကို အင်္ဂလိပ်စာသင်ကြားပေးမှုလို စစ်ရေးမဟုတ်တဲ့ နယ်ပယ်တွေမှာ အကူအညီ ပေးနေတာဖြစ်ပါတယ်။

    ၂၀၁၇ ခုနှစ် ရိုဟင်ဂျာတွေ အများအပြား သတ်ဖြတ်ခံရပြီး သိန်းနဲ့ချီ ​ဘင်္ဂလားဒေ့ရှ်ဖက် ထွက်ပြေးရတဲ့ကိစ္စ နောက်ပိုင်းမှာလည်း ဒီလိုကူညီမှုတွေ ဆက်လုပ်နေတာပါ။

    ဒါပေမယ့် ဒီပူးပေါင်းဆောင်ရွက်မှုအားလုံးကို ရပ်ဆိုင်းလိုက်ပြီလို့ နိုင်ငံခြားရေးဝန်ကြီး မာရီစ် ပေနီက ပြောပါတယ်။

    “အရပ်သားတွေအပေါ် အကြမ်းဖက်တာကို ရှောင်ကျဉ်ကြဖို့ မြန်မာလုံခြုံရေးတပ်ဖွဲ့ကို ကျွန်မတို့ အခိုင်အမာ တောင်းဆိုလိုက်ပါတယ်”

    လန်ဒန်အခြေစိုက် ဘာမားကမ်ပိန်းအဖွဲ့ရဲ့ အမှုဆောင်ဒါရိုက်တာ အန်နာရောဘတ်က ဩစတေးလျရဲ့ ဒီပူးပေါင်းဆောင်ရွက်မှုဟာ အစကတည်းက မရှိသင့်ဘူးလို့ ပြောပါတယ်။

    “မြန်မာစစ်တပ်နဲ့ ပူးပေါင်းဆောင်ရွက်နေတဲ့၊ လေ့ကျင့်ပေးနေတဲ့ နိုင်ငံ ၁၂ နိုင်ငံ ရှိပါသေးတယ်။ မြန်မာစစ်တပ်ကို လေ့ကျင့်သင်ကြားပေးနေတာဟာ ငြိမ်းချမ်းစွာ ဆန္ဒပြသူတွေကို ပစ်သတ်နေတဲ့ သူတို့နဲ့ အလိုတူအလိုပါ ဖြစ်​နေတာပါ။ တစ်ဖက်ကို ကူညီပေးနေပြီးတော့မှ ငါ့တို့ ကြားမဝင်ပါဘူးဆိုတာမျိုး ပြောလို့မရပါဘူး။ မြန်မာစစ်တပ်ဟာ ပြည်သူတွေကိုသတ်တဲ့ စစ်တပ်ပါ”

    အဲဒီနိုင်ငံ ၁၂ နိုင်ငံထဲမှာ တရုတ်၊ အိန္ဒိယ၊ ပါကစ္စတန်နဲ့ ယူကရိန်းတို့လည်း ပါဝင်ပါတယ်။ တက်ကြွလှုပ်ရှားသူတွေကတော့ မြန်မာစစ်တပ်အပေါ် လက်နက်ရောင်းချမှု အပြီးပိတ်ဖို့ တောင်းဆိုနေကြပါတယ်။

    ဩစတေးလျဟာ တိုင်းရင်းသားတွေအပါအဝင် မြန်မာနိုင်ငံက ချို့တဲ့တဲ့သူတွေအပေါ် ကူညီနေမှုကိုလည်း အာဏာသိမ်းစစ်ကောင်စီကတစ်ဆင့် မဟုတ်ဘဲ တိုက်ရိုက်ပြုလုပ်သွားမယ်လို့ ပြောကြားခဲ့ပါတယ်။ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ရဲ့ စီးပွားရေးအကြံပေး ရှောင်တာနယ်ကို အမြန်ဆုံး ပြန်လွှတ်ပေးဖို့လည်း ပေနီက ထည့်သွင်းတောင်းဆိုခဲ့ပါတယ်။

    Ref: Reuters