News @ M-Media

Tag: MyanmarRefugees

  • မြန်မာပြည် ပြန်ပို့မှာ ကြောက်ရွံ့နေကြတဲ့ ထိုင်းနယ်စပ်က လူနည်းစု ဒုက္ခသည်များ

    မြန်မာပြည် ပြန်ပို့မှာ ကြောက်ရွံ့နေကြတဲ့ ထိုင်းနယ်စပ်က လူနည်းစု ဒုက္ခသည်များ

    ဇွန် ၂၇ ၊ ၂၀၁၅
    M-Media
    44562cac978642e89bc0f67ca4650d4f_18
    – ထိုင်းနိုင်ငံ နယ်စပ်ရှိ ဒုက္ခသည်စခန်းများတွင် လက်ရှိနေထိုင်နေသော ဒုက္ခသည် ၁၃၀၀၀ ကျော်ကို မူရင်းနိုင်ငံသို့ အလျင်စလိုပြန်ပို့ရေးနှင့် ပတ်သက်၍ မြန်မာနိုင်ငံမှ လူနည်းစု ကရင် လူမျိုးများကို ကိုယ်စားပြုနေသည့် ကရင်အမျိုးသမီးအဖွဲ့ KWO က သတိပေးပြောကြားလိုက်သည်။

    ကမ္ဘာ့ဒုက္ခသည်များနေ့နှင့် တိုက်ဆိုင်စွာ စနေနေ့ (ဇွန်လ ၁၉ ရက်နေ့က) ထုတ်ပြန်သည့် ၎င်းတို့၏ကြေညာချက်တွင် မြန်မာနိုင်ငံ၌ လက်ရှိ ဆက်လက်ဖြစ်ပွားနေသော ပဋိပက္ခနှင့် မြန်မာအစိုးအပေါ် ဒုက္ခသည်များ၏ မယုံကြည်မှုတို့က နေရပ်ပြန့်ပို့ရန် စီစဉ်မှုကို ဆန့်ကျင်သည့် အကြောင်းအရင်းများအဖြစ် ထောက်ပြခဲ့သည်။

    “ကနီဦးအနေနဲ့ ဒုက္ခသည်တွေ နေရပ်စွန့်ခွာရတဲ့ အခြေအနေတွေကို မဖြေရှင်းရသေးပါဘူး။ အပစ်ရပ်ထားတဲ့ ဒေသတွေမှာလည်း  (မြန်မာ)စစ်တပ်က စစ်သားတွေ၊ စစ်လက်နက်တွေ တိုးမြှင့်ချထားလာတာဟာ ပဋိပက္ခကိုကြောက်ရွံ့မှု အောက်မှာ နေထိုင်နေ ရသူတွေရဲ့ ဘ၀တွေကို ခြိမ်းခြောက်နေပါတယ်” ဟု KWO ၏ အဆိုပါကြေညာချက်တွင် ထည့်သွင်းပြောထားသည်။

    မြန်မာနိုင်ငံမှာ ၂၀၁၁ ခုနှစ်က အမည်ခံ အရပ်သားအစိုးရအဖြစ် အသွင်ကူးပြောင်းပြီးနောက်ပိုင်း တိုင်းရင်းသားလက်နက်ကိုင်အများစုမှာ အပစ်ရပ်ရေး လတ်မှတ်ရေးထိုးခဲ့ကြသည်။

    သို့သော်လည်း အဆိုပါလက်နက်ကိုင်အုပ်စုများနှင့် မြန်မာစစ်တပ်တို့အကြား ဆိုးရွားသည့် ထိပ်တိုက်တွေ့ဆုံမှုများမှာ ဆက်လက်ဖြစ်ပွားနေပြီး ထိုင်းနယ်စပ်ရှိ ဒုက္ခသည်စခန်း ၉ ခုသို့ ဒုက္ခသည်များ ၀င်ရောက်လာမှုမှာလည်း ရပ်တန့်သွားခြင်း မရှိခဲ့ပေ။

    “ဒီ လက်ရှိအခြေအနေတွေအောက်မှာ အလောတကြီး နေရပ်ပြန်ပို့တာဟာ မြန်မာ(Burma)စစ်တပ်ရဲ့ ညှင်းပန်းနှိပ်စက်မှု၊ လူ့အခွင့်အရေး ချိုးဖောက်မှုကို ခံစားခဲ့ကြရတဲ့ ဒုက္ခသည်တွေအတွက် ထိခိုက်ခံစားရမှုဆီကို ဦးတည်သွားပါလိမ့်မယ်” ဟု ယခင်က အသုံးပြုခဲ့သည့် မြန်မာနိုင်ငံ၏ အမည်ကို ရည်ညွှန်း၍ KWO ၏ ကြေညာချက်တွင် ဖော်ပြထားသည်။

    နေရပ်ပြန်ပို့ရေး ကြောက်ရွံ့မှု

    ယခုနှစ်အစောပိုင်းက ထိုင်းနယ်စပ်ရှိ ဒုက္ခသည်စခန်းတွင် UNHCR မှ ဒုက္ခသည် စီစစ်အတည်ပြုရေး လုပ်ငန်စဉ်တစ်ခုကို လုပ်ကိုင်ခဲ့သည်။ စခန်းများတွင် ရှိနေကြသူများ၏ အရေအတွက်ကို သိရှိစေရန် နေထိုင်သူအားလုံး၏ လက်ဗွေရာများ၊ ဓာတ်ပုံများကို စစ်တမ်းကောက်ယူခဲ့ပြီး နေထိုင်သူများက နေရပ်ပြန်ပို့ရေး ဖြစ်လာတော့မည်လားဆိုသည့် စိုးရိမ်စိတ်များလည်း မြင့်တက်လာခဲ့သည်။

    ပြီးခဲ့သည့်နှစ်မေလ ထိုင်းစစ်တပ်မှ အာဏာသိမ်းပြီးကတည်းက ထိုင်းစစ်အစိုးရမှာ ဒုက္ခသည်စခန်းများအပေါ် ထိန်းချုပ်မှုများ တင်းကျပ်လာခဲ့ပြီး ဒုက္ခသည်များ၏ လှုပ်ရှားသွားလာမှုကို ကန့်သတ်မှုများ ရှိလာခဲ့သည်။

    ထိုင်းစစ်တပ် တာဝန်ရှိသူများကမူ ဒုက္ခသည်စခန်း ၉ ခုစလုံးအား ပိတ်ပစ်မည်ဟု ထပ်ခါတလဲလဲ ပြောကြားလာကြသည်။ ထိုစခန်းများထဲမှ အချို့မှာ နှစ်ပေါင်း ၃၀ ခန့် ကြာမြင့်နေပြီဖြစ်သည်။

    ထိုင်းစစ်တပ်မှ ပြောရေးဆိုခွင့်ရှိသူ ဗိုလ်မှူးကြီး Weerachon Sukondhadpatipak က ၎င်းအနေဖြင့် ဒုက္ခသည်များ နေပြန်ရေးအတွက် အချိန်သတ်မှတ်ရန် ဂရုမထားသော်လည်း အစိုးရအနေဖြင့် ဒုက္ခသည်စခန်းများအား ပိတ်ပစ်ရန် စိတ်အားထက်သန်နေသည်ဟု ဆိုသည်။

    “တကယ်လို့ စီစစ်ရေးလုပ်ငန်းစဉ်နဲ့ နေရပ်ပြန်ပို့ရေးကို တတ်နိုင်သလောက် မြန်မြန်လုပ်နိုင်လေ ထိုင်းနိုင်ငံအတွက် ပိုကောင်းလေပါပဲ။ တစ်ချိန်တည်းမှာပဲ အကန့်အသတ်ရှိတာတွေကို ကျွန်တော်တို့ နားလည်ပါတယ်။ ပြီးတော့ မြန်မာအာဏာပိုင်တွေကိုလည်း ကျွန်တော့် အလေးထားပါတယ်။ (ဒုက္ခသည်တွေရဲ့) လူ့အခွင့်အရေးကို ကျွန်တော်တို့ ဂရုစိုက်ပါတယ်။ ပြီးတော့ အဲဒီအပေါ်မှာ ကောင်းမွန် မျှတအောင် ဆောင်ရွက်သွားမှာပါ” ဟု Weerachon က ပြောကြားခဲ့သည်။

    မြန်မာအစိုးရနှင့် တိုင်းရင်းသားအုပ်စုများအကြား ငြိမ်းချမ်းရေးဆွေးနွေးပွဲများ ဆောင်ရွက်နေသည့်အချိန်တွင် မြန်မာစစ်တပ်က ကျူးလွန်သော လူ့အခွင့်အရေးချိုးဖောက်မှု လုပ်ရပ်အသစ်များကို ပြီးခဲ့သည့်နှစ်များတွင် မြင်လာရသည်။

    KWO ၏ အဆိုအရ ဒေသတွင်း အရပ်ဖက်အဖွဲ့အစည်းများမှာ အုပ်စုဖွဲ့ မုဒိမ်းကျင့်မှုအပါအ၀င် မြန်မာစစ်တပ်က ကျူးလွန်သော  လိင်ပိုင်းဆိုင်ရာ အကြမ်းဖက်မှု အကြိမ် ၁၀၀ ကျော်ကို မှတ်တမ်းတင်ခဲ့သည်ဟု သိရသည်။ ထိုကျူးလွန်သူများထဲတွင် မည်သူမှ တရားဥပဒေရှေ့မှောက်သို့ ရောက်မလာခဲ့။

    ထိုကိစ္စနှင့်ပတ်သက်၍ ပြန်ကြားရေးဝန်ကြီး ဦးရဲထွဋ်အား ဆက်သွယ်ရာ ဆက်သွယ်၍ မရခဲ့ချေ။

    သွားစရာမြေမရှိ

    လူပေါင်း ၄ သောင်းကျော် နေထိုင်နေသည့် ထိုင်းနိုင်ငံရှိ အကြီးဆုံး ဒုက္ခသည်စခန်း မဲလာတွင် ကျောင်းသား ၂၀၀၀ခန့်မှာ ကမ္ဘာ့ဒုက္ခသည်များနေ့ကို ဆင်နွှဲရန် ပြီးခဲ့သည့် သောကြာနေ့က စုရုံးခဲ့ကြသည်။ အနီးအနားတွင် တိုင်းရင်းသားအဖွဲ့များက စခန်းအတွင်း နေထိုင်ကြသည့် တိုင်းရင်းသားလူမျိုး ၁၃ မျိုး၏ အစားအသောက်များကို ကျွေးမွေးဧည့်ခံနေကြသည်။

    ထိုအခမ်းအနားများတွင် ၁၀ စုနှစ်တစ်ခုကျော်ကြာ စခန်းတွင် နေထိုင်ခဲ့သည့် အသက် ၇၁ နှစ်အရွယ် ဘရိုင်ယန် တာဝမ်လည်း ပါဝည်သည်။ တာဝမ်က သူနှင့် သူ၏ မိသားစုမှာ ကချင်ပြည်နယ်တွင် မြန်မာစစ်တပ်နှင့် အခြားတိုင်းရင်းသားလက်နက်ကိုင် ၄ ခု တို့အကြား ဖြစ်ပွားသော တိုက်ခိုက်မှုကြောင့် အိုးအိမ်စွန့်ခွာ ထွက်ပြေးလာခြင်းဖြစ်ပြီး မြန်မာနိုင်ငံသို့မပြန်ချင်ဟု ပြောကြားခဲ့သည်။

    “အခုအချိန်မှာ အခြားနိုင်ငံကလူတွေ ကျွန်တော်တို့အကြောင်းပြောကြတဲ့အခါ၊ နေရပ်ပြန်ပို့မယ်ဆိုတာနဲ့ ပတ်သက်ပြီး တစ်ခုခုကြားရတဲ့အခါ ပြည်သူအားလုံးက ဒါဟာ ကြောက်ရွံ့မှုလို့ ခံစားရပါတယ်” ဟု တာဝမ်က ဆိုသည်။ အမေရိကန်ပြည်ထောင်စု ဆော့တ်လိတ်မြို့တွင် နေရာချထားပေးခြင်း ခံရသည့် မြေးဖြစ်သူများနှင့် နောက်ဆုံးတွင် သွားရောက်နေထိုင်နိုင်ရန် သူက မျှော်လင့်နေသည်။

    အသက် ၅၈ နှစ်အရွယ် ပီယောကမူ စိုးရိမ်မှု ကြီးကြီးမားမားရှိနေပြီး မြန်မာစစ်တပ်ကိုလည်း ကြောက်ရွံ့နေသည်။ လွန်ခဲ့သည့် ၅ နှစ်ခန့်က သူမ ညဘက်ဖားရိုက်သွားနေစဉ် ခင်ပွန်းဖြစ်သူမှာ မြန်မာစစ်တပ်၏ ပစ်သတ်ခြင်းကို ခံခဲ့ရပြီးနောက် ကလေးများနှင့်အတူ ကရင်ပြည်နယ်မှ ထွက်ပြေးလာခြင်းဖြစ်သည်။

    “ကျွန်မ ဘယ်တော့မှ ပြန်မသွားတော့ပါဘူး။ သေတဲ့အထိ ဒုက္ခသည်စခန်းမှာပဲ ကျွန်မ နေသွားမှာပါ။ တကယ်လို့ ကျွန်မပြန်ရင် ကျွန်မမှာ အိမ်မရှိဘူး။ မိသားစုမရှိဘူး။ ပြီးတော့ ကျွန်မ ဘာမှ မတတ်နိုင်ပါဘူး” ဟု ပီယောက ပြောကြားခဲ့သည်။

    သို့သော်လည်း အသက် ၃၄ နှစ်အရွယ်ရှိ ဟေဆိုသာကို က တည်ငြိမ်အေးချမ်းမှုနှင့် လုံခြုံရေးအတွက် စိုးရိမ်မှုများ ရှိသော်လည်း မြန်မာနိုင်ငံသို့ ပြန်ချင်နေသည်။

    “နောက်မျိုးဆက်ဟာ ဒုက္ခသည်စခန်းမှာ ကြီးပြင်းတာ မကောင်းပါဘူး။ ကျွန်တော် အိမ်ပြန်ချင်ပါတယ်။ ကျွန်တော့်ကလေးတွေ ဒီမှာကြီးပြင်းတာကို ကျွန်တော် မမြင်ချင်ပါဘူး” ဟု ထိုင်း-မြန်မာ နယ်စပ်တစ်လျှောက်ရှိ ဒုက္ခသည်စခန်းတွင် မွေးဖွားခဲ့သော သာကိုက ပြောကြားခဲ့သည်။

    ref: Aljazeera
    မိုးဝေ ဘာသာပြန်သည်။

  • ဒုက္ခသည်အဖြစ် ကြာမြင့်စွာ နေထိုင်နေသူများ နိုင်ငံသားအဖြစ် လက်ခံမည်ဟု ဆော်ဒီပြော

    မတ်လ ၁၀ ၊ ၂၀၁၃
    M-Media
    Ref: ARAB NEWS

    Hope-for-refugees-Prince-Khaled-

    ဂျစ်ဒါ ။                ။ မင်းသား ခါလစ် အလ် ဖိုင်ဆယ်လ်က ဆော်ဒီအာရေဗျဘုရင့် နယ်မြေအတွင်း နှစ်ပေါင်းများစွာ အစိုးရ၏ ကူညီထောက်ပံ့မှုဖြင့် နေထိုင်နေသော ဒုက္ခသည်များကို ၄င်းတို့၏အခြေချမှု အနေအထားအရ နိုင်ငံသားပြုခွင့်ပေးတော့မည် ဟု ပြောကြားလိုက်သည်။

    ဤစီမံချက်သည် မက္ကာဟ်ဝန်းကျင်ဒေသမှ ဖရိုဖရဲဖြစ်နေသည့် လူနေအခြေချခရိုင်များ၌ အဓိကနေထိုင်နေသောပြည်ပဒုက္ခသည်များ၊ အထူးသဖြင့် မြန်မာဒုက္ခသည်များအတွက် ရည်ရွယ်ကြောင်း ကို ထိုဒေသများဖွံဖြိုးတိုးတက်လာစေရေး ဆွေးနွေးသည့် ဖိုရမ်တစ်ခုတွင် မင်းသားခါလစ်က ပြောကြားခဲ့သည်။

    “ သူတို့အတွက် အလုပ်အကိုင် ဖန်တီးပေးဖို့ အလုပ်သမားဝန်ကြီးဌာနနဲ့ ကျွန်တော်တို့ သဘောတူညီချက် ရထားပါပြီ။ ဒီဒေသမှာ နေထိုင်သူတွေက တစ်နေ့ကျရင် နိုင်ငံသားကောင်းတွေ ဖြစ်လာကြမယ်။ သူတို့ကို ထည့်သွင်းအသုံးပြုကြဖို့ဆိုပြီး ဒီဒေသတွင်းစီမံချက်အကောင်အထည်ဖော်မယ့် ကုမ္ပဏီကြီးတွေဆီလည်း ကျွန်တော်တို့ ပြောဆိုခဲ့ပါတယ် ” ဟု မြို့တော်ဝန်မှ ပြောကြားသည်။

    “ ဒီစီမံကိန်းဟာ ထူးမြတ်တဲ့ ၀တ်ကျောင်းတော်ကြီးနှစ်ခုကို ထိန်းသိမ်းရေးအတွက် ဖြစ်တယ်။ ပြီးတော့ ဒီလူတွေရဲ့အခြေအနေတွေကို ကောင်းမွန်စေလိုတဲ့ ဘုရင်မင်းမြတ်ရဲ့ အစီအစဉ်လည်း ဖြစ်ပါတယ်။  ဒါဟာ ဒီနိုင်ငံရဲ့ တာဝန်ယူမှုတစ်ခုပါ။ သူတို့ကို ဒီနိုင်ငံက သူတို့ရဲ့အခွင့်အရေးတစ်ခု အနေနဲ့ ထိန်းသိမ်းစောင့်ရှောက်ပေးသွားမှာ ဖြစ်ပါတယ် ” ဟုလည်း ရှင်းလင်းခဲ့သည်။

    နိုင်ငံခြားသားတစ်ဦး၏ နေရာတွင် ဒေသတွင်း၌ အဆင့်သင့်ရှိနေသော ဒုက္ခသည်များ အနက် မြန်မာ၊ တာကစ္စတန် နှင့် ပါလက်စတိုင်းမှ မှ လေးဦးစီကို အလုပ်အကိုင် အမြန်ခန့်အပ်ရန် ပုဂ္ဂလိက ကုမ္ပဏီများအား တိုက်တွန်းလိုက်သည်ဟု အလုပ်သမားဝန်ကြီးဌာနမှ ကြေငြာထားသည်။

    “ ဒေသတွင်း ဖရိုဖရဲဖြစ်မှုတွေဟာ မက္ကဟ် သို့မဟုတ် ဆော်ဒီအာရေဗျ တစ်ခုထဲကြုံရတာ မဟုတ်ပါဘူး၊ နိုင်ငံတကာနဲ့ဆိုင်တဲ့ ပြဿနာတစ်ခုပါ။ ကမ္ဘာ့မြို့ကြီးပြကြီးတွေမှာလဲ တွေ့မြင်နိုင်ပါတယ် ” ဟု မက္ကဟ်မြို့၊ အွန်းမု ကုရာ့ တက္ကသိုလ်၌ ကျင်းပသော ထိုဖိုရမ်၏ အဖွင့်၌ မင်းသားမှ ပြောခဲ့သည်။

    ယင်းသို့ဖြစ်ရခြင်းမှာ – တစ်ချိန်က ဟဂ်ျ နှင့် အွမ္မရဟ်ပြုရန် လာရောက်ကြသူများအနက် ထောင်နှင့်ချီသော ဘုရားဖူးဧည့်သည်တို့သည် ဗီဇာသက်တမ်း ကုန်ဆုံးသော်လည်း ချန်ရစ်နေထိုင်ခဲ့သောကြောင့်ဖြစ်သည်။ ၄င်းတို့အတွင်း ဘာသာရေးနှိပ်ကွပ်ညှင်းပန်းမှုများကြောင့် မိမိတို့နိုင်ငံမှ အလွတ်ရုန်း ထွက်ပြေးလာကြသူများလည်း ပါဝင်ကြသည်။

    မက္ကဟ် နှင့် ဒေသတွင်းအခြားမြို့များတွင် အကွဲကွဲအပြားပြား နေထိုင်နေကြသည့် ဒုက္ခသည်များကို မိမိတို့၏အနေအထားအသစ်မှပြန် စတင်ရန်အတွက် နှိုးဆော်မှုပေးရန် လိုအပ်ကြောင်း၊ ၄င်းတို့အား အလုပ်အကိုင်များ ဆောင်ရွက်ပေးရန် လိုအပ်ကြောင်း အလေးထားပြောကြားခဲ့သည်။ “ ဒီဒေသတွင်းပြန်လည် တည်ဆောက်မှုအစီအစဉ် မဆောင်ရွက်ခင်မှာ ကျွန်တော်တို့က သူတို့ကို ပညာသင်ကြား ပေးဖို့ နဲ့ လုပ်ငန်းခွင်ဆိုင်ရာသင်တန်းပေးဖို့လည်း လိုအပ်ပါတယ် ” ဟုလည်း ဖြည့်စွက်ပြောဆိုသည်။ မင်းသားခါလစ် က ဤဒေသတွင်းရှိ အဆောက်အဦဟောင်းများကို ဖယ်ရန်နှင့်လမ်းသစ်များ ဖောက်လုပ်ရန်ဆိုသည်ထက် ဤဒေသတွင်း နေထိုင်နေသူများ၏ လူနေမှုဘ၀ အခြေအနေ တိုးတက်မြင့်မားလာရန်ကိုသာ အစိုးရမှ အဓိကဦးတည်ခြင်းဖြစ်၏ ဟု ဆိုသည်။

    ဤဒေသတွင်း နေထိုင်ကြသူ တစ်ဦးချင်းသော်လည်းကောင်း၊ မိသားစုများသော်လည်းကောင်း ၄င်းတို့၏အိုမင်းဟောင်းနွမ်းသည် အိမ်ရာများ မဖြိုဖျက်မှီ ၄င်းတို့အား အလှည့်ကျစီ နေရာထိုင်ခင်း စီစဉ်ပေးသွားမည် ဖြစ်သည်။ ဤနှစ်ရက်ကြာဖိုရမ်ကို မက္ကဟ်မြို့၊ အဗီဒီယဟ် ရှိ တက္ကသိုလ်ပရ၀ုဏ်အတွင်း ကျင်းပခဲ့သည်။