News @ M-Media

Tag: Nepal

  • အောက်တိုဘာ ၁၅ ရက် နိုင်ငံတကာသတင်းများ

    အောက်တိုဘာ ၁၅ ရက် နိုင်ငံတကာသတင်းများ

    M-Media

    (ဓာတ်ပုံ – တောင်တက်သမိုင်းတွင် စံချိန်သစ်ရခဲ့သည့် နီပေါနိုင်ငံသား ရှာပါရ်)

    တရုတ်၏ ထိုင်၀မ်ပေါ်လစီ မပြောင်းလဲသေး
    ———-
    ထိုင်၀မ်နဲ့ ငြိမ်းချမ်းစွာပေါင်းစည်းရေး လိုလားပေမယ့် လိုအပ်ရင် စစ်အင်အားသုံးသိမ်းပိုက်မယ့် မိမိတို့ရဲ့ မူ၀ါဒ ပြောင်းလဲမှု ရှိမှာမဟုတ်ဘူးလို့ ထိုင်၀မ်းကျွန်းကို ၀ိုင်းပတ်ပြီး ၄ ကြိမ်မြောက်ပြုလုပ်တဲ့ စစ်ရေးလေ့ကျင်မှုအပြီးမှာ တရုတ်နိုင်ငံက ထုတ်ပြန်ပါတယ်။ မေလမှာ အာဏာရလာတဲ့ ထိုင်၀မ်သမ္မတ လိုင်ချင်တေဟာ ထိုင်၀မ် လွတ်မြောက်ရေး ပိုမိုပြောဆိုလာပြီး တရုတ်ကတော့ ခွဲထွက်ရေးသမားအဖြစ် တံဆိပ်ကပ်ပါတယ်။

    တောင်တက်သမိုင်းမှာ စံချိန်တင်တဲ့ နီပေါနိုင်ငံသား
    —————
    နီပေါ နိုင်ငံသား အသက် ၁၈ နှစ်အရွယ် နီမာရင်ဂျီ ရှာရ်ပါဟာ နီပေါ၊ ပါကစ္စတန်၊ တိဘတ်နဲ့ အိန္ဒိယနိုင်ငံတို့က မီတာ ၈၀၀၀ မြင့်တဲ့ တောင်ပေါင်း ၁၄ ခုကို အောင်မြင်စွာ တက်ရောက်နိုင်တဲ့ ကမ္ဘာ့အသက်အငယ်ဆုံး လူသားအဖြစ် မှတ်တမ်း၀င်ခဲ့ပါတယ်။ တောင်တက်မိသားစုမျိုးက ဆင်းသက်လာတဲ့ ရှာရ်ပါဟာ လွန်ခဲ့တဲ့ ၂ နှစ်ကမှ တောင်တက်လောကထဲ ၀င်ရောက်လာခဲ့ပြီး အသက် ၁၆ နှစ်အရွယ်မှာကတည်းက အမြင့်ဆုံး တောင်တွေကို တက်နိုင်ခဲ့သူ ဖြစ်ပါတယ်။

    နိုင်ငံခြားသားမျှော်ပြီး အိမ်ယာစီမံကိန်းထပ်လုပ်မယ့် ဘန်ကောက်
    —————-
    ၂၀၂၅ နှစ်လယ်ပိုင်းကစပြီး ဘန်ကောက်မြို့လယ်ကောင်မှာ ဇိမ်ခံကွန်ဒိုစီမံကိန်း ၄ ခုထက်မနည်း ထိုင်းအစိုးရက ထပ်လုပ်ဖို့ ရှိနေပါတယ်။ ထိုင်းနိုင်ငံမှာ အိမ်ယာစျေးကွက် ကျဆင်းနေပေမယ့် နိုင်ငံခြားသားတွေရဲ့ ၀ယ်မှုနှုန်းက မြင့်တက်လာခဲ့ပြီး အထူးသဖြင့် ထိုင်၀မ်နဲ့ တရုတ်နိုင်ငံသားတွေ အဓိက ၀ယ်ယူတာဖြစ်ပါတယ်။ ၂၀၂၅ ခုနှစ်မှာ နိုင်ငံခြားသား၀ယ်ယူသူတွေကို အဓိကစွဲဆောင်နိုင်ဖို့ ထိုင်းအစိုးရက မျှော်လင့်နေပါတယ်။


  • ဗုဒ္ဓပွင့်ရာဒေသတွင် အောင်မြင်နေသည့် ခရစ်ယာန် သာသနာပြုအဖွဲ့များ

    ဗုဒ္ဓပွင့်ရာဒေသတွင် အောင်မြင်နေသည့် ခရစ်ယာန် သာသနာပြုအဖွဲ့များ

    ဇန်န၀ါရီ ၁၆၊ ၂၀၂၃

    M-Media 


    -လူတွေကို တစ်ခြားဘာသာပြောင်းစေတာဟာ နီပေါမှာ ဥဒေချိုးဖောက်တဲ့ လုပ်ရပ် ဖြစ်ပါတယ်။ ဒါပေမယ့် ခရစ်ယာန်သာသနာပြု အဖွဲ့တွေကတော့ ခရစ်တော်သာသနာပြန့်ပွားရေးအတွက် တရားစွဲဆိုခံရမယ့် အန္တရာယ်ကို ကျေကျေနပ်နပ်ကြီး ရင်ဆိုင်နေကြပါတယ်။ 

    “ခရစ်တော် အောင်မြင်ပါစေ” 

    ဟိမ၀န္တာတောင်ခြေက ဂျာလန်းဆိုတဲ့ ရွာလေးမှာ ဘုရားကျောင်းသစ် ဖွင့်ပွဲအတွင်း ကိုရီးယားလူမျိုး တရားဟောဆရာ ပန်ချန်အင်ရဲ့ ဟစ်အော်ချီးမွမ်းမှု ဖြစ်ပါတယ်။ 

    သိပ်မကြာခင်ကမှ ခရစ်ယာန်ဘာသာကို ကူးပြောင်းလာတဲ့ ၀တ်ပြုဆုတောင်းသူတွေက သူတို့ရဲ့လက်တွေကို လေထဲမှာ မြှောက်ထားကြပါတယ်။ တော်တော်များများက ‘တာမန်’ လူမျိုးစုပါ။ ရှေးဟောင်းအယူ၀ါဒတစ်ခုဖြစ်တဲ့ ‘လာမာ’ ဘာသာတရားကို အရင်က ယုံကြည်ကြသူတွေ ဖြစ်ပါတယ်။  

    ပန်ကတော့ တာမန်လူမျိုးတွေဟာ စီးပွားရေးရော၊ ယုံကြည်မှုပိုင်းဆိုင်ရာမှာပါ အားနည်းနောက်ကျနေတယ်လို့ ရှုမြင်ပါတယ်။ 

    “ဘုရားရဲ့တန်ခိုးတွေ ထင်ရှားလာပြီး တစ်ရွာလုံး ခရစ်ယာန်ဘာသာကို သက်၀င်လာကြပါတယ်” 

    ခရစ်ယာသာသနာပြုအဖွဲ့ တော်တော်များများဟာ ပန်လို တောင်ကိုရီယားနိုင်ငံသားတွေပါ။ ဗုဒ္ဓဘုရားရှင် ပွင့်ပေါ်ရာဒေသဖြစ်ပြီး ဟိန္ဒူဘုရင့်နိုင်ငံလည်းဖြစ်ခဲ့တဲ့ နီပေါဟာ ကမ္ဘာပေါ်မှာ ခရစ်ယာန်သာသနာ အမြန်ဆုံးထွန်းကားတဲ့ ဒေသတွေထဲက တစ်ခုဖြစ်ပြီး ဒီလိုဖြစ်လာအောင် ပန်တို့လို သာသနာပြုတွေက ကူညီဆောင်ရွက်ပေးနေကြတာ ဖြစ်ပါတယ်။ 

    နီပေါမှာ ခရစ်ယာန်ဘာသာကို ကူးပြောင်းကြသူအများစုက ‘ဒါလစ်’ လိုခေါ်တဲ့ ဟိန္ဒူဇာတ်နိမ့်တွေနဲ့ တိုင်းရင်းသားလူမျိုးစုတွေ ဖြစ်ပါတယ်။ 

    ပန်ပြောတဲ့ ဘုရားရဲ့တန်ခိုးကို သူတို့ ယုံကြည်တာ ဖြစ်ကောင်းဖြစ်နိုင်ပေမယ့် ဆင်းရဲမွဲတေမှု၊ ခွဲခြားဆက်ဆံခံရမှုကနေ လွတ်မြောက်ဖို့အတွက် ခရစ်ယာန်ဘာသာကို ကူးပြောင်းခြင်းက သူတို့အတွက် အခွင့်အလမ်းတစ်ခု ဖြစ်နေပါတယ်။ 

    နီပေါမှာ နှစ်ပေါင်း ၂၀ အတွင်း ဘုရားကျောင်းသစ် ၇၀ လောက် ပန်က တည်ဆောက်ဖွင့်လှစ်နိုင်ခဲ့ပြီး အများစုက ဒါဒင်းခရိုင်မှာ ဖြစ်ပါတယ်။ မြို့တော်ခတ္တာမန်ဒူကနေ အနောက်မြောက်ဖက်ကို ၂ နာရီလောက်သွားရပါတယ်။ လူမျိုးစုတွေက ဘုရားကျောင်းအတွက် မြေပေးပြီး ကိုရီးယား ခရစ်ယာန်အသင်းတော်တွေက ဆောက်လုပ်ရေးအတွက် အကုန်အကျခံတယ်လို့ ပန်က ပြောပါတယ်။

    “တောင်ပေါ်ဒေသတိုင်းမှာ ဘုရားကျောင်းတွေ ပေါ်ထွန်းလာနေပါပြီ”

    ပန်ရဲ့ပြောစကားဟာ နည်းနည်းပိုတာမျိုး ဖြစ်နိုင်ပေမယ့် ပြီးခဲ့တဲ့ နှစ်တွေအတွင်း နီပေါနိုင်ငံတစ်၀ှမ်း ခရစ်ယာန်ဘုရားကျောင်းတွေ သိသိသာသာ တိုးပွားလာတာကတော့ ငြင်းမရတဲ့အချက် ဖြစ်ပါတယ်။ ဟိန္ဒူဘာသာ၀င် အများစုရှိတဲ့ နီပေါမှာ ခရစ်ယာန်ဘုရားကျောင်းပေါင်း ၇၇၅၈ ကျောင်း ရှိလာတာကို နီပေါ ခရစ်ယာန်အသင်းက နောက်ဆုံးထုတ်ပြန်တဲ့ အချက်အလက်မှာ တွေ့ရပါတယ်။ 

    ဒီပြောင်းလဲမှုမှာ တောင်ကိုရီးယား သာသနာပြုအဖွဲ့တွေက အဓိက ကျပါတယ်။ ကမ္ဘာတစ်၀ှမ်း သာသနာပြုအများအပြား စေလွှတ်တဲ့ နိုင်ငံတွေထဲမှာ တောင်ကိုရီးယားလည်း ပါ၀င်ပါတယ်။ တောင်ကိုရီးယားဟာ လွန်ခဲ့တဲ့ နှစ်ပေါင်း ၂၀ လောက်ကမှ သာသနာပြုတွေ စတင်စေလွှတ်တာဖြစ်ပြီး စုစုပေါင်း ၂၂၀၀၀ ကျော် စေလွှတ်ပြီးပါပြီ။ 

    ဘုရားသခင်ရဲ့ အမှုတော်ကို ထမ်းရွက်ရမယ်ဆိုတဲ့အချက်ကို ဦးထိပ်ထားတဲ့ ကိုရီးယားသာသနာပြုတွေဟာ စိတ်အားထက်သန်စွာ အားထုတ်လုပ်ဆောင်မှုအတွက် နာမည်ကျော်ပြီး တစ်ချို့နိုင်ငံတွေကနေ မောင်းထုတ်ခံရတာတွေလည်း ရှိပါတယ်။ 

    နီပေါဟာ ဘာသာရေးမစွက်တဲ့ နိုင်ငံတစ်ခုဖြစ်ပြီး ၂၀၁၅ ခုနှစ် အခြေခံဥပဒေအရ ဘာသာရေးလွတ်လပ်ခွင့် ပေးထားပါတယ်။ 

    ဒါပေမယ့် ၂၀၁၈ ခုနှစ်မှာ ဘာသာကူးပြောင်းမှု တားဆီးရေးဥပဒေတစ်ခုကို ပြဌာန်းခဲ့ကာ တစ်ဦးတစ်ယောက်ကို ဘာသာပြောင်းဖို့ တိုက်တွန်းဆော်သြမှု ထင်ရှားရင် ထောင်ဒဏ် ၅ နှစ်အထိ အပြစ်ပေးလို့ရပါတယ်။ 

    “ဘာသာကူးပြောင်းမှု တားဆီးရေးဥပဒေကြောင့် သာသနာပြုလုပ်ငန်း လုပ်ဆောင်တဲ့အခါမှာ အမြဲတမ်း စိတ်သောကရောက်ရပါတယ်။ ဒါပေမယ့် ဘုရားရဲ့ နှုတ်ကပတ်တော် ပြန့်ပွားရေးလုပ်ငန်းကို အကြောက်တရားကြောင့် ရပ်တန့်သွားမှာ မဟုတ်ပါဘူး။ ၀ိဥာဉ်ရေးရာ ကယ်တင်မှုလုပ်ငန်းကို ကျွန်မတို့ ဆက်လုပ်သွားမှာပါ” လို့ တရားဟောဆရာပန်ရဲ့ ဇနီး လီဂျွန်ဟီးက ပြောပါတယ်။

    ပန်တို့ ဇနီးမောင်နှံနှစ်ယောက်ဟာ အရင်က ဘဏ်လုပ်ငန်း လုပ်ကိုင်သူတွေပါ။ ဘုရားသခင်က သူ့ရဲ့ခင်ပွန်းကို အမှုတော်ထမ်းဖို့ ရွေးချယ်ပြီး နီပေါကိုလည်း ဘုရားကပဲ စေလွှတ်ခဲ့တာလို့ လီဂျွန်ဟီးက ပြောပါတယ်။ 

    ၂၀၀၃ ခုနှစ် နီပေါကို သူတို့ရောက်တဲ့အချိန်မှာ ဟိန္ဒူတော်၀င်မိသားစု ထီးနန်းစိုးစံနေတုန်း ဖြစ်ပါတယ်။ 

    “ရုပ်ပွားဆင်းတုတွေ အများအပြား ကိုယ်ကွယ်နေတာကိုတွေ့ပြီး ကျွန်တော် လန့်သွားပါတယ်။ နီပေါနိုင်ငံဟာ ဘုရားရဲ့ နှုတ်ကပတ်တော်ကို အရမ်းလိုအပ်နေပါလားဆိုပြီးလည်း ကျွန်တော် တွေးမိတယ်” လို့ ပန်ကပြောပါတယ်။ 

    နောက်ထပ် ၅ နှစ်အကြာမှာတော့ နှစ်ပေါင်း ၂၄၀ လောက် ကြာမြင့်တဲ့ ဘုရင်စနစ် နီပေါမှာ ပျက်သုဥ်းသွားပါတယ်။ ဒါဟာ ၁၀ စုနှစ်တစ်ခုအထိ ကြာမြင့်ခဲ့တဲ့ ပြည်တွင်းစစ်ရဲ့ နောက်ဆက်တွဲလည်း ဖြစ်ပါတယ်။ ၂၀၀၈ ခုနှစ်မှာ ညွန့်ပေါင်းအစိုးရ တက်လာပြီး နီပေါကို ဘာသာရေးမစွက်တဲ့ သမ္မတနိုင်ငံအဖြစ် ကြေငြာခဲ့ပါတယ်။ 

    “ဒါဟာ သာသနာပြုလုပ်ငန်းတွေရဲ့ ရွှေခေတ်အစပါပဲ” လို့ ပန်ကပြောပါတယ်။ 

    လက်ရှီနီပေါမှာ ပန်နဲ့ သူ့ရဲ့ဇနီးတို့ အပါအ၀င် ခရစ်ယာန်သာသနာပြုလုပ်ငန်း လုပ်ကိုင်သူ ကိုရီးယားလူမျိုး ၃၀၀ ၀န်းကျင် ရှိပါတယ်။ 

    မြို့တော် ခတ္တာမန်ဒူရဲ့ တောင်ဖက်ဆင်ခြေဖုံးဒေသတွေမှာ ကိုရီးယားလူအဖွဲ့အစည်း အခြေစိုက်ပါတယ်။ 

    သူတို့အားလုံးဟာ တရား၀င် သာသနာပြုဗီဇာနဲ့ လာရောက်တာမျိုးမဟုတ်ဘဲ စီးပွားရေးဗီဇာ၊ ကျောင်းဗီဇာနဲ့ လာရောက်ကြသူတွေပါ။ တစ်ချို့တွေက စားသောက်ဆိုင် ဖွင့်ထားကြပြီး၊ အကူအညီပေးရေးအဖွဲ့ ဖွဲ့ထားသူတွေလည်း ရှိပါတယ်။ 

    ခရစ်ယာန်သာသနာပြု လုပ်ငန်းအကြောင်းကို ပန်တို့ ဇနီးမောင်နှံလောက်သာ ပွင့်ပွင့်လင်းလင်း ထုတ်ပြောရဲကြပါတယ်။ 

    “ဘုရားက နီပေါမှာ ဘာတွေလုပ်နေလဲဆိုတာကို မျှ၀ေဖို့ ကျွန်တော် ၀န်မလေးပါဘူး” 

    သူတို့ရဲ့ သာသနာပြုလုပ်ငန်းက ဥပဒေချိုးဖောက်မှုလို့ ပန်က မထင်ပါဘူး။ နှစ်ခြင်းခံတာမျိုးလုပ်ဖို့ သူတို့မတိုက်တွန်းဘူးလို့ ဆိုပါတယ်။ 

    “သာသနာပြုလုပ်ငန်းဆိုတာ ကျွန်တော်တို့ကြောင့် ဖြစ်တာမဟုတ်ပါဘူး။ ဘုရားကလုပ်တဲ့ အလုပ်ပါ။ ကျွန်တော်တို့ကို အကြောင်းခံပြီး နီပေါမှာ ဘုရားရဲ့ တန်းခိုးတွေ ဘယ်လောက်ပြန့်နှံ့နေပြီလဲဆိုတာ ကျွန်တော်တို့ ပြသချင်ပါတယ်” 

    နီပေါမှာ ၈၀ ရာခိုင်နှုန်းက ဟိန္ဒူဘာသာ၀င်တွေဖြစ်ပြီး၊ ဗုဒ္ဓဘာသာက ၉ ရာခိုင်နှုန်း၊ ခရစ်ယာန်က ၂ ရာခိုင်နှုန်းလောက်သာ ရှိပါတယ်။ သန်းခေါင်စာရင်းကောက်ယူမှုအရ ခရစ်ယာန်ဘာသာ၀င်အရေအတွက် တိုးလာတာကို တွေ့ရပါတယ်။

    ၁၉၅၁ ခုနှစ်က နီပေါမှာ ခရစ်ယာန်ဘာသာ၀င် လုံး၀မရှိပါဘူး။ ၁၉၆၁ ခုနှစ်မှာ ၄၅၈ ဦးရှိပြီး ၂၀၁၁ ခုနှစ်မှာတော့ ၃၇၆၀၀၀ နီးပါး ရှိလာပါတယ်။ နောက်ဆုံး သန်းခေါင်စာရင်းမှာတော့ ၅၄၅၀၀၀ အထိရှိနေတာကို တွေ့ရပါတယ်။ 

    “တောမီးလို ပြန့်တာဗျ။ ယဥ်ကျေးမှုအမှတ်သညာတွေ၊ အမျိုးသားညီညွတ်ရေးတွေက စိုးရိမ်ရမယ့်အနေအထား ရောက်နေပြီ” လို့ ၀န်ကြီးချုပ်ဟောင်းဖြစ်တဲ့ ကမာလ် သာပါက ပြောပါတယ်။ 

    ကိုရီးယားသာသနာပြုတွေရဲ့ လုပ်ငန်းတွေဟာ တိုင်းပြည်ရဲ့ ယဥ်ကျေးမှုအမှတ်သညာကို အကွက်ချ စီစဥ်တိုက်ခိုက်မှုလို့ ကမာလ်က ရှုမြင်ပါတယ်။ 

    “သာသနာပြုအဖွဲ့တွေဟာ ကန့်လန့်ကာနောက်ကွယ်ကနေ လှုပ်ရှားနေကြပါတယ်။ ဆင်းရဲပြီး ပညာရည်နိမ့်ပါးမှုကို အမြတ်ထုတ်ကာ လူတွေကို ခရစ်ယာန်ဘာသာပြောင်းဖို့ တိုက်တွန်း နေကြတယ်” 

    “ဘာသာရေးလွတ်လပ်ခွင့်ဆိုတာ ဒါမဟုတ်ဘူးဗျ။ ဒါက ဘာသာရေးခေါင်းစဥ်တပ်ပြီး အမြတ်ထုတ်တဲ့ကိစ္စပါ”

    ကမာလ်ဟာ နီပေါကို ဟိန္ဒူနိုင်ငံပြန်ဖြစ်ရေး ကြိုးပမ်းဖို့ ဆော်သြနေပါတယ်။ ဘာသာပြောင်းမှု တားဆီးရေးဥပဒေကို ကမာလ်က ထောက်ခံခဲ့သလို၊ ဥပဒေ အမှန်တကယ် ကျင့်သုံးတာကိုလည်း သူက မြင်ချင်နေပါတယ်။ 

    ခရစ်ယာန်တွေသာ ဒီဥပဒေနဲ့ တရားစွဲဆိုခံခဲ့ရပြီး၊ ပြစ်ဒဏ်ချမှတ်ခံရတာမျိုးတော့ မရှိသေးပါဘူး။ သက်သေမရှိလို့ အမှုပိတ်သိမ်းတာ၊ စွပ်စွဲခံရသူတွေကို တရားသေလွှတ်ပေးတာမျိုးတွေပဲ ရှိပါတယ်။ 

    နီပေါခရစ်ယာန်အသင်းက လတ်တလော တရားစွဲဆိုခံရတဲ့အမှု ၅ မှုရှိတယ်လို့ ပြောပါတယ်။ သီလရှင်နှစ်ပါး အပါအ၀င် ကိုရီးယားလူမျိုး ၄ ဦး တရားစွဲခံရတာဖြစ်ပြီး ဒီဇင်ဘာလက အမှုပိတ်သိမ်းလိုက်ပါတယ်။ 

    နီပေါခရစ်ယာန်အသင်းကို ဦးဆောင်နေတဲ့ တရားဟောဆရာ ဒီလီရမ် ပေါ်ဒဲလ်ဟာ ဘာသာပြောင်းမှုတားဆီးရေးဥပဒေကို ပထမဆုံး ၀ေဖန်သူတွေထဲက တစ်ဦးပါ။

    ငွေပေးဘာသာပြောင်းခိုင်းတယ်လို့ ဒီလီရမ် စွပ်စွဲခံရပြီး ၂၀၁၈ ခုနှစ် ဧပြီလမှာ တရားစွဲခံရပါတယ်။ သူကတော့ ဒီစွပ်စွဲချက်ကို ငြင်းဆိုခဲ့ပြီး အမှုလည်းနောက်ပိုင်းမှာ ပိတ်သိမ်းသွားခဲ့ပါတယ်။ 

    “လူတွေကို ဘာသာပြောင်းခိုင်းတယ်လို့ ကျွန်တော်တို့ စွပ်စွဲခံရတယ်။ ဒီလိုစွမ်းအားမျိုးက ကျွန်တော်တို့လက်ထဲမှာ မရှိပါဘူး။ အဲလိုသာ ရှိရင် ကျွန်တော့်အမေ ဘာသာပြောင်းသွားတာ ကြာပြီ။ အမေက အသက် ၉၂ နှစ်ရှိပြီး။ ကျွန်တော့်အမေ့ကို ငွေထောက်ပံ့နိုင်တယ်။ ဆုလည်း ဆုတောင်းပေးတယ်။ ဒါပေမယ့် ဘာသာပြောင်းမှုက ခရစ်တော်ထံကနေ လာတာဖြစ်တဲ့အတွက် ကျွန်တော် အမေ့ကို ဘာသာမပြောင်းစေနိုင်ပါဘူး”

    ဒီလီရမ်ဟာ ဘာသာရေးကိုင်းရှိုင်းတဲ့ ဟိန္ဒူမိသားစုမှာ မွေးဖွားကြီးပြင်းလာတာဖြစ်ပြီး သူ့အရင် မျိုးဆက် ၂၁ ဆက်ကအတိုင်း အသက် ၂၁ နှစ်မှာ ဘုန်းကြီး၀တ်ခဲ့ပါတယ်။ အသက် ၂၀ ကျော်အရွယ် တောင်ကိုရီးယားကိုသွားပြီး ပညာသင်ကြားတဲ့အချိန်မှာ ခရစ်ယာန်ဘာသာကို စတင်ထိတွေ့ခဲ့တာပါ။ 

    “မိတ်ဆွေအပေါင်းအသင်းမရှိဘဲ ကျွန်တော် အထီးကျန်နေခဲ့တယ်။ လူတစ်ချို့က ကိုရီယားသမ္မာကျမ်းစာ နီပေါဘာသာပြန်ကို ပေးဖတ်တယ်။ နီပေါဘာသာပြန်ကို သူတို့ ရအောင်ရှာလာကြတာပါ”

    သမ္မာကျမ်းစာဖတ်ပြီး တစ်ညမှာ ဘုရားသခင်ကို တွေ့ရှိသွားတယ်လို့ ဒီလီရမ်က ပြောပါတယ်။ 

    “ရယ်စရာ၊ မယုံကြည်နိုင်စရာ ဖြစ်ကောင်းဖြစ်လိမ့်မယ်။ ကျွန်တော်က ဒီလို တစ်ကယ်ဖြစ်ခဲ့တာပါ”

    နီပေါကိုပြန်ရောက်တဲ့အချိန်မှာ ဒီလီရမ်ဟာ မိသားစုရဲ့ ဖယ်ကျဥ်မှုကို ခံခဲ့ရပါတယ်။ 

    “ခရစ်ယာန်ဘာသာဆိုတာ နိုင်ငံခြားက အယူ၀ါဒဖြစ်တယ်လို့ သူတို့ ပြောကြတယ်။ တစ်ချို့တွေက ကျွန်တော် ရူးသွားပြီ၊ အတိတ်မေ့သွားပြီပေါ့”

    မိသားစုနဲ့ လူ့အဖွဲ့အစည်းက ပြန်လည်လက်ခံလာအောင် ဒီလီရမ်တစ်ယောက် အချိန်အတော်ကြာ ကြိုးစားခဲ့ရပါတယ်။ 

    တောင်ကိုရီးယားကို ပညာသွားသင်တဲ့ နီပေါကျောင်းသားအရေအတွက်ဟာ တစ်နှစ်ကို ၂ ထောင်လောက်ရှိပါတယ်။ ဒီကျောင်းသားတွေကို ထိတွေ့ဖို့ ကိုရီးယားနိုင်ငံအတွင်းက ဘုရားကျောင်းတွေနဲ့ ဆက်သွယ်ဆောင်ရွက်တယ်လို့ အမည်မဖော်လိုတဲ့ ကိုရီးယားလူမျိုး သာသနာပြုတစ်ယောက်က ပြောပါတယ်။

    “နီပေါမှာ ဘုရားအလုပ်ကိုလုပ်ရတာ စိန်ခေါ်မှုရှိပါတယ်။ ဒါ့ကြောင့် တစ်ခြားနည်းလမ်းတွေ ကျွန်တော်တို့ သုံးရတယ်။ ကျွန်တော်တို့ရဲ့ ရည်ရွယ်ချက်က ဘာသာပြောင်းသွားဖို့ပါ။ တရားဟောဆရာ ဒီလီ ရမ် ပေါ်ဒဲလ်ဟာ ငယ်ငယ်က ဟိန္ဒူဘုန်းကြီး ဖြစ်ပါတယ်။ ဘယ်လိုလူမျိုးမဆို ကျွန်တော်တို့ ဘာသာပြောင်းနိုင်ပါတယ်။ ဒါ့ကြောင့် လျှို့၀ှက်လှုပ်ရှားဖို့ လိုအပ်ပါတယ်”

    တရားဟောဆရာ ပန်နဲ့ ဇနီးဖြစ်သူတို့ဟာ မြို့တော် ခတ္တာမန်ဒူမှာ ဘာသာရေးကျောင်းတစ်ခု ဖွင့်ထားပြီး လက်ရှိ တက်ရောက်တဲ့ကျောင်းသား ၅၀ လောက်ရှိပါတယ်။ ကိုရီးယား ခရစ်ယာန်ဘုရားကျောင်းတွေက ပညာရေးနဲ့ ဘော်ဒါဆောင် ကုန်ကျစားရိတ်အများစုကို ကျခံပါတယ်။ 

    အဲဒီကျောင်းမှာ တက်ရောက်နေသူတစ်ဦးက အသက် ၂၂ နှစ်အရွယ် ဆာပါနာပါ။ ၀ေးလံခေါင်ဖျားတဲ့ စင်ဂန်မြို့ တမန်ရွာသူတစ်ဦး ဖြစ်ပါတယ်။ 

    “ဘုရားကျောင်းသွားတဲ့သူတွေကို အဖေက မကြိုက်ဘူး။ ကျွန်မတို့ရိုးရာကို မမေ့သင့်ဘူးလို့ အဖေက ယုံကြည်ထားပါတယ်”

    သူမ ကျန်းမာရေး အရမ်းဆိုးရွားနေတဲ့အချိန်မှာ ဦးလေးဖြစ်သူက ခရစ်ယာန်ဘာသာအကြောင်း မိတ်ဆက်ပေးလာပါတယ်။ ဘာသာပြောင်းပြီးတဲ့နောက် ကျန်းမာရေး ကောင်းမွန်လာတယ်လို့  ဆာပါနာက ပြောပါတယ်။ 

    “ခရစ်တော်အတွက် ကျွန်မ အသက်ရှင်ချင်တာကြောင့် ခရစ်တော်ကလည်း ကျွန်မကို ချစ်လာပါတယ်”

    သူမနေထိုင်တဲ့ ၀ေးလံခေါင်ဖျားရွာတွေဟာ ပန်ချန်အင်တို့လို သာသနာပြုတွေအတွက် ပစ်မှတ်အသစ်တွေ ဖြစ်ပါတယ်။ 

    “မြို့ကြီးတွေမှာဆိုရင် ဘာသာပြောင်းမှု တားဆီးရေးဥပဒေကို ပိုပြီးကျင့်သုံးလာနိုင်တယ်။ တောရွာတွေမှာတော့ သိပ်ပြီး သတိမထားမိကြပါဘူး” လို့ ပန်ကပြောပါတယ်။ 

    ဆာပါနာဟာ ပြီးခဲ့တဲ့နှစ်က သူတက်နေတဲ့ ခရစ်ယာန်ဘာသာရေးကျောင်းကနေ ဘွဲ့ရခဲ့ပါတယ်။ အခုသူမဟာ ရွာပြန်ပြီး လူငယ်တွေကို အသင်းတော်ရဲ့ အစိတ်အပိုင်းဖြစ်လာအောင်လုပ်ဖို့ စီစဥ်နေပါပြီ။ 

    “ခရစ်တော်ရဲ့ သတင်းစကား မရောက်သေးတဲ့ နေရာသစ်တွေကို သွားပြီး သာသနာပြုသွားမှာပါ” 

    ဘုရားနှုတ်ကပတ်တော်တွေကို ဖြန့်ဖြူးမှုကြောင့် ရှိပြီးသား ဘာသာရေး၊ ယဥ်ကျေးမှုအမှတ်သညာတွေနဲ့ ထိပ်တိုက်တွေ့လာနိုင်တာကို ပန်ချန်အင်က လက်ခံပါတယ်။

    ဒါပေမယ့် ယဥ်ကျေးမှုထိပ်တိုက်တွေ့ခြင်းဆိုတာ ရှောင်လို့မရတဲ့ ကိစ္စမျိုးလို့ သူက မှတ်ယူကာ ဆက်လက် သာသနာပြုနေမှာ ဖြစ်ပါတယ်။ 

    Ref : CNA 

  • နီပေါနိုင်ငံတွင် လေယာဥ်ပျက်ကျမှု လူ ၇၀ နီးပါး သေဆုံး

    နီပေါနိုင်ငံတွင် လေယာဥ်ပျက်ကျမှု လူ ၇၀ နီးပါး သေဆုံး

    ဇန်န၀ါရီ ၁၅၊ ၂၀၂၃

    M-Media 


    – နီပေါနိုင်ငံ အလယ်ပိုင်းမှာ ခရီးသည်တင်လေယာဥ်တစ်စင်း ဒီကနေ့ မနက်ပိုင်းက ပျက်ကျခဲ့ပြီး အနည်းဆုံး ၆၈ ဦး သေဆုံးတယ်လို့ သိရပါတယ်။ 

    Yeti လေကြောင်းလိုင်းက ခရီးသည် ၇၂ ဦး လိုက်ပါသွားတဲ့ လေယာဥ်ဟာ မြို့တော် ခတ္တာမန်ဒူကနေ ခရီးသွားမြို့ဖြစ်တဲ့ နိုင်ငံအလယ်ပိုင်းက ပိုခါရာမြို့ကို ပျံသန်းတာပါ။

    ပိုခါရာမြို့က လေယာဥ်ကွင်းကို ဆင်းကာနီးမှာ မီးလောင်ပြီး ပျက်ကျသွားခဲ့တာပါ။ နီပေါအာဏာပိုင်တွေက သေဆုံးသူ ၆၈ ဦးအထိရှိလာပြီး၊ အသက်ရှင်ကျန်ရစ်သူတွေကလည်း ပြင်းပြင်းထန်ထန် ဒဏ်ရာရထားတယ်လို့ ပြောပါတယ်။ 

    လိုက်ပါသွားသူတွေထဲမှာ နိုင်ငံခြားသား အနည်းဆုံး ၁၅ ဦး ပါ၀င်ပါတယ်။ 

    နီပေါနိုင်ငံမှာ လေယာဥ်ပျက်ကျမှု မကြာခဏ ဖြစ်ပွားလေ့ရှိပြီး အထူးသဖြင့် ရာသီဥတု ရုတ်တရက် ဆိုးရွားမှု၊ လေယာဥ်ပြေးလမ်း ပြဿနာတွေကြောင့် ဖြစ်ပါတယ်။ 

    Ref: BBC

  • လာအို၊ နီပေါနှင့် ဘင်္ဂလားဒေ့ရှ်တို့ ဖွံ့ဖြိုးမှုအနည်းဆုံး နိုင်ငံများစာရင်းမှ လွတ်မြောက်

    လာအို၊ နီပေါနှင့် ဘင်္ဂလားဒေ့ရှ်တို့ ဖွံ့ဖြိုးမှုအနည်းဆုံး နိုင်ငံများစာရင်းမှ လွတ်မြောက်

    နိုဝင်ဘာ ၂၆၊ ၂၀၂၁
    M-Media

    ဘင်္ဂလားဒေ့ရှ်နိုင်ငံမှ မြင်ကွင်းတစ်နေရာ

    -လာအို၊ နီပေါနဲ့ ဘင်္ဂလားဒေ့ရှ်နိုင်ငံတို့ ဖွံ့ဖြိုးမှုအနည်းဆုံး နိုင်ငံများစာရင်း (LDC) ကနေ လွတ်မြောက်ကြောင်း အသိအမှတ်ပြုတဲ့ ဆုံးဖြတ်ချက်တစ်ခုကို ကုလသမဂ္ဂ အထွေထွေညီလာခံက ကြာသာပတေးနေ့မှာ အတည်ပြု ထုတ်ပြန်လိုက်ပါတယ်။

    LDC စာရင်းကနေ လွတ်မြောက်ပြီး ဖွံ့ဖြိုးဆဲနိုင်ငံအဆင့် တက်လှမ်းနိုင်ဖို့အတွက် ပြင်ဆင်ချိန်ကာလကို ကုလက ၅ နှစ် သတ်မှတ်ပေးလိုက်ပါတယ်။ ဒါ့ကြောင့် ၂၀၂၆ ခုနှစ်အရောက်မှာ လာအို၊ နီပေါနဲ့ ဘင်္ဂလားဒေ့ရှ်နိုင်ငံတို့ဟာ ဖွံ့ဖြိုးဆဲနိုင်ငံအဆင့်ကို ရောက်ရှိမှာ ဖြစ်ပါတယ်။ ပြင်ဆင်ချိန်ကာလဟာ ပုံမှန်အားဖြင့် ၃ နှစ်ဖြစ်ပေမယ့် ကိုဗစ်နောက်ဆက်တွဲ စီးပွားရေး ပြဿနာတွေကြောင့် ကုလက နောက်ထပ် ၂ နှစ် တိုးပေးခဲ့ပါတယ်။

    ဖွံဖြိုးဆဲနိုင်ငံအဖြစ်ရောက်ဖို့ ပြင်ဆင်ချိန်ကာလမှာ လက်ရှိ လုပ်ဆောင်နေတဲ့ ဖွံဖြိုးရေးစီမံကိန်းတွေ ရပ်ဆိုင်းသွားတာ၊ နောက်ပြန်ဆုတ်သွားတာတွေ ဖြစ်လို့မရပါဘူး။ ပြင်ဆင်ချိန်ကာလအတွင်း LDC နိုင်ငံတွေကိုပေးတဲ့ နိုင်ငံတကာရဲ့အထောက်အပံ့တွေ ဆက်လက်ရရှိမှာဖြစ်ပါတယ်။

    ကုလသမဂ္ဂရဲ့ ဖွံဖြိုးရေးမူဝါဒရေးရာ ကော်မတီဟာ LDC စာရင်းမှာ ထည့်သွင်းတာ၊ ထုတ်ပယ်တာတွေကို နိုင်ငံတစ်ခုရဲ့ တစ်ဦးချင်းပျမ်းမျှဝင်ငွေ (GNI)၊ လူသားအရင်းအမြစ်၊ စီးပွားရေးခံနိုင်ရည်ရှိမှု စတဲ့ အချက်သုံးချက်အပေါ် အခြေခံစဉ်းစားတာဖြစ်ပါတယ်။ အချက် ၃ ချက်မှာ ၂ ချက် စံသတ်မှတ်ချက်ပြည့်မှီရင် စာရင်းကနေ လွတ်မြောက်မှာဖြစ်ပါတယ်။

    ကုလဟာ LDC စာရင်းအတွက် ၃ နှစ်တစ်ကြိမ် လေ့လာသုံးသပ်မှု ပြုလုပ်ပြီး လာအို၊ နီပေါနဲ့ ဘင်္ဂလားဒေ့ရှ်တို့ဟာ နောက်ဆုံး ၃ ကြိမ်ဆက်တိုက် သတ်မှတ်စံနှုန်းတွေကို ပြည့်မှီတဲ့အတွက် အခုလို LDC စာရင်းကနေ လွတ်မြောက်တာ ဖြစ်ပါတယ်။

    LDC စာရင်းမှာ လာအိုဟာနဲ့ နီပေါက ၁၉၇၁ ခုနှစ်၊ ဘင်္ဂလားဒေ့ရှ်က ၁၉၇၅ ခုနှစ်တွေမှာ ပါဝင်ခဲ့တာပါ။

    အဲဒီတုန်းက ဘင်္ဂလားဒေ့ရှ်ရဲ့ ဆင်းရဲမွဲတေမှုနှုန်းဟာ ၈၃ ရာခိုင်နှုန်း ရှိခဲ့ပြီး နောက်ပိုင်းမှာ အလုပ်အကိုင်ဖန်တီးနိုင်မှု မြင့်တက်လာတာကြောင့် ဆင်းရဲမွဲတေမှုရာခိုင်နှုန်း တစ်ဖြည်းဖြည်း ကျဆင်းခဲ့ကာ ကိုဗစ်ကပ်ရောဂါမဖြစ်ခင် ဘင်္ဂလားဒေ့ရှ်ရဲ့ ဆင်းရဲမှုနှုန်းဟာ ၂၀.၅ ရာခိုင်နှုန်းသာ ရှိပါတော့တယ်။

    ဘင်္ဂလားဒေ့ရှ် ဘဏ္ဍာရေးဝန်ကြီး မူစတာဖာ ကမားလ်က LDC စာရင်းကနေ လွတ်မြောက်သွားတာဟာ တိုင်းပြည် ဖွံ့ဖြိုးတိုးတက်မှုမှာ ကြီးမားတဲ့ သမိုင်းမှတ်တိုင်တစ်ခု ဖြစ်တယ်လို့ ပြောကြားခဲ့ပါတယ်။

    လက်ရှိ LDC စာရင်းမှာ ၄၆ နိုင်ငံရှိပြီး မြန်မာနိုင်ငံလည်း ပါဝင်ပါတယ်။ မြန်မာနိုင်ငံရဲ့ စီးပွားရေးနဲ့ ဖွံ့ဖြိုးတိုးတက်မှုဟာ ၁၉၆၂ ခုနှစ် စစ်အာဏာသိမ်းပြီးတဲ့နောက် တစ်ဖြည်းဖြည်းကျဆင်းလာခဲ့ပြီး ၁၉၈၇ ခုနှစ်မှာ ဖွံ့ဖြိုးမှုအနည်းဆုံးနိုင်ငံများစာရင်း (LDC) ထဲ ရောက်ရှိခဲ့တာဖြစ်ပါတယ်။

    Ref: New Straits Times

  • ရာဇဝတ်မှုသံသယဖြင့် တရုတ်နိုင်ငံသား ၁၀၀ ကျော်ကို နီပေါဖမ်းဆီး

    ရာဇဝတ်မှုသံသယဖြင့် တရုတ်နိုင်ငံသား ၁၀၀ ကျော်ကို နီပေါဖမ်းဆီး

    ဒီဇင်ဘာ ၂၅၊ ၂၀၁၉
    M-Media

    -နိုင်ငံအတွင်း ခရီးသွားဗီဇာနဲ့ ဝင်ရောက်ကာ ရာဇဝတ်မှုမကင်းတဲ့ လုပ်ရပ်တွေကို လုပ်ဆောင်နေတဲ့ တရုတ်နိုင်ငံသား ၁၂၂ ဦးကို ထိန်းသိမ်းလိုက်တယ်လို့ နီပေါနိုင်ငံက မနေ့မှာ ထုတ်ပြန်ခဲ့ပါတယ်။

    တရုတ်နိုင်ငံသားတွေဟာ သံသယဖြစ်ဖွယ် လုပ်ရပ်တွေကို လုပ်ဆောင်နေတယ်လို့ သတင်းအချက်အလက် ရရှိခဲ့ပြီးတဲ့နောက် နီပေါရဲတပ်ဖွဲ့က တနင်္လာနေ့မှာ စီးနင်းဖမ်းဆီးမှုတွေ ပြုလုပ်ခဲ့တာပါ။

    ရဲတပ်ဖွဲ့အကြီးအကဲ အူသမ် ဆူဘီဒီက ဖမ်းဆီးရမိသူတွေထဲမှာ အမျိုးသားတွေအပြင် အမျိုးသမီးတွေလည်း ပါဝင်ပြီး ဆိုက်ဘာရာဇဝတ်မှု၊ ငွေသားထုတ်စက်တွေကို ဟက်မှုတွေ လုပ်ဆောင်ခဲ့တယ်လို့ သံသယရှိခံထားရကြောင်း သူတို့ရဲ့ နိုင်ငံကူးလက်မှတ်တွေ၊ လက်တော့ကွန်ပျူတာတွေကို သိမ်းဆည်းထားကြောင်း မနေ့မှာ ပြောကြားခဲ့ပါတယ်။

    “ရာဇဝတ်မှုတွေလုပ်ဆောင်တယ်ဆိုတဲ့ သံသယနဲ့ နိုင်ငံခြားသားတွေကို ဖမ်းဆီးတာ ဒါပထမဆုံးပါ”

    ဒီကိစ္စနဲ့ပတ်သက်ပြီး တရုတ်သံရုံး တာဝန်ရှိသူတွေက ထုတ်ပြန်ခြင်းမပြုခဲ့ပေမယ့် နီပေါရဲတပ်ဖွဲ့ရဲ့ အခြားအကြီးတန်းအရာရှိ ဟိုဘင်ဒရာ ဘိုဂါတီက ဖမ်းဆီးမှုကို တရုတ်သံရုံးက သိရှိပြီး ထောက်ခံခဲ့တယ်လို့ ပြောကြားခဲ့ပါတယ်။

    ရာဇဝတ်မှု‌တွေ လုပ်ဆောင်နေတယ်ဆိုတဲ့ သံသယနဲ့ အာရှနိုင်ငံတွေမှာ တရုတ်နိုင်ငံသားတွေ ဖမ်းဆီးခံရမှုဟာ အခုနောက်ပိုင်းမှာ ပုံမှန်လို ဖြစ်လာပါတယ်။ ပြီးခဲ့တဲ့တစ်ပတ်က ဖိလစ်ပိုင်ဟာ တရားမဝင် လောင်းကစားလုပ်ငန်း လုပ်ဆောင်တဲ့ တရုတ်နိုင်ငံသား ၃၄၂ ဦးကို ဖမ်းဆီးခဲ့ပါတယ်။

    ပြီးခဲ့တဲ့လကလည်း မလေးရှားဟာ နိုင်ငံရဲ့ အကြီးဆုံး အွန်လိုင်းလူလိမ်ဂိုဏ်းကို ဝင်ရောက်စီးနင်းခဲ့ပြီး တရုတ်နိုင်ငံသား ၇၀၀ ကျော်လောက်ကို ဖမ်းဆီးခဲ့ပါတယ်။

    Ref: Aljazeera