News @ M-Media

Tag: Palestine

  • ဂါဇာရှိဆေးရုံတစ်ခုကို အစ္စရေးက ဒုံးကျည်ဖြင့်တိုက်ခိုက်၍ လူ ၅၀၀ ကျော်သေဆုံး

    ဂါဇာရှိဆေးရုံတစ်ခုကို အစ္စရေးက ဒုံးကျည်ဖြင့်တိုက်ခိုက်၍ လူ ၅၀၀ ကျော်သေဆုံး

    အောက်တိုဘာ ၁၈၊ ၂၀၂၃

    M-Media 


    -ဂါဇာစီးတီးမှာရှိတဲ့ အလ်-အဟ်လီ အာရပ် ဆေးရုံကို အစ္စရေးက မနေ့ညပိုင်းမှာ ဒုံးကျည်နဲ့ တိုက်ခိုက်ခဲ့တာကြောင့် အနည်းဆုံး လူ ၅၀၀ လောက် သေဆုံးသွားခဲ့ပါတယ်။ 

    ဆေးရုံမှာ လူနာတွေအပြင် အစ္စရေးရဲ့ တိုက်ခိုက်မှုကြောင့် အိုးအိမ်စွန့်ခွာ ထွက်ပြေးရသူ ထောင်ချီ ခိုလှုံနေရတဲ့ နေရတာပါ။  ဒဏ်ရာသူတွေ၊ အပျက်အဆီးကြားမှာ ပိတ်မိနေသူတွေ ရာချီရှိတာကြောင့် သေဆုံးသူအရေအတွက် ပိုများလာနိုင်တယ်လို့ ပါလက်စတိုင်း ကျန်းမာရေးတာ၀န်ရှိသူတွေက ပြောပါတယ်။ 

    ဆေးရုံကို ခရစ်ယာန်အသင်းတော်တစ်ခုက စီမံခန့်ခွဲနေတာဖြစ်ပါတယ်။ 

    ငြင်းဆို 

    ——–

    အစ္စရေးက ဒီတိုက်ခိုက်မှုကို သူတို့လုပ်တာမဟုတ်ဘူးလို့ ငြင်းပြီး၊ 

    ပါလက်စတိုင်းလက်နက်ကိုင်အဖွဲ့ အစ္စလာမ့်မစ်ဂျီဟတ် PIJ က ပစ်ခတ်ခဲ့တာလို့ ဆိုပါတယ်။ 

    PIJ ကတော့ ဇိုင်ယွန် အစ္စရေးဟာ ဒီလိုအစုလိုက်အပြုံလိုက် သတ်ဖြတ်မှုကို တာ၀န်မခံချင်တဲ့အတွက် မိမိတို့အဖွဲ့ကို လက်ညှိုးထိုးအပြစ်တင်တာလို့ ထုတ်ပြန်ပါတယ်။ 

    အလ်-အဟ်လီ အာရပ်ဆေးရုံ တိုက်ခိုက်မခံရခင်ကတည်းက အစ္စရေးဟာ ဂါဇာမှာ ရှိနေတဲ့ အရပ်ဖက်ပစ်မှတ်တွေ၊ ဆေးရုံတွေ၊ ကျောင်းတွေ၊ ဒုက္ခသည်စခန်းတွေ၊ ဘေးလွတ်ရာကို ထွက်ပြေးတိမ်းရှောင်သူတွေကို ပစ်မှတ်ထား တိုက်ခိုက်နေတာ ဖြစ်ပါတယ်။ 

    အစ္စရေးစိတ်ထား 

    —————-

    အစ္စရေးခေါင်းဆောင်အဆက်ဆက်ဟာ ပါလက်စတိုင်းလူမျိုးစုကို အမြစ်ဖြုတ်လိုတဲ့ သူတို့ရဲ့ ဆန္ဒကို လူသိရှင်ကြား ပြောကြားထားဖူးပါတယ်။

    အောက်တိုဘာ ၇ ရက်နေ့က ဟားမက်စ်က အစ္စရေးထဲ ၀င်ရောက်တိုက်ခိုက်ပြီးနောက်ပိုင်းမှာလည်း အစ္စရေးခေါင်းဆောင်တွေထံက ပါလက်စတိုင်းတွေကို ရှင်းလင်းလိုတဲ့ စကားတွေကို ထပ်ကြားခဲ့ရပါတယ်။ 

    စစ်ပွဲအစပိုင်းကတည်းက အစ္စရေးကာကွယ်ရေး၀န်ကြီး ယိုအဗ် ဂါလန့်ဟာ ပါလက်စတိုင်းတွေကို လူ့တိရစ္ဆာန်တွေလို့ သုံးနှုန်းကာ အစာဖြတ်၊ ရေဖြတ်၊ မီးဖြတ်၊ လောင်စာဖြတ်ကာ ချေမှုန်းဖို့ အမိန့်ပေးထားကြောင်း ထုတ်ပြန်ပါတယ်။ 

    အလ်-အဟ်လီ အာရပ်ဆေးရုံကို မတိုက်ခိုက်ခင် တစ်ရက်အလို အောက်တိုဘာ ၁၆ ရက်နေ့မှာ အစ္စရေး၀န်ကြီးချုပ် နေတန်ယာဟုက အခုအဖြစ်အပျက်ဟာ အလင်းထဲက လူမျိုးတွေနဲ့ အမှောင်ထဲကလူမျိုးတွေ အားပြိုင်မှုဖြစ်ကြောင်း ဆိုရှယ်မီဒီယာမှာ ရေးသားခဲ့ပါတယ်။ နောက်ပိုင်းမှာ ဒါကို ပြန်ဖျက်သွားပါတယ်။ 

    အစ္စရေး ပြည်ထဲရေး၀န်ကြီး အီတာမာရ် ဘင်-ဂါဗီရ်က ဖမ်းထားတဲ့သူတွေကို ဟားမက်စ်က ပြန်မလွှတ်ပေးရင် ဂါဇာကို ဗုံး တန်ချိန်ပေါင်းများစွာ ချမှာဖြစ်ပြီး၊ အကူအညီတစ်အောင်စတောင် မရောက်စေရဘူးလို့ အခုတစ်ပတ်အစောပိုင်းမှာ ပြောကြားခဲ့ပါတယ်။ 

    Ref: Aljazeera 

  • လူအစုအလိုက်အပြုံလိုက် သတ်ဖြတ်ခဲ့သည့် အစ္စရေး၏ စစ်ရာဇ၀တ်မှုတစ်ခုကို အလ်ဂျာဇီးရား သတင်းဌာနက ဖော်ထုတ်နိုင်ခဲ့

    လူအစုအလိုက်အပြုံလိုက် သတ်ဖြတ်ခဲ့သည့် အစ္စရေး၏ စစ်ရာဇ၀တ်မှုတစ်ခုကို အလ်ဂျာဇီးရား သတင်းဌာနက ဖော်ထုတ်နိုင်ခဲ့

    အောက်တိုဘာ ၁၆၊ ၂၀၂၃ 

    M-Media 

    (ဗီဒီယိုတွင် စိတ်ထိခိုက်စရာ မြင်ကွင်းများ ပါ၀င်ပါသည်) 

    ဒုံးကျည်ဖြင့် ပစ်ခတ်ခံလိုက်ရသည့် ထရပ်ကား

    -ဂါဇာ မြောက်ပိုင်းကနေ တောင်ပိုင်းကို အိုးအိမ်စွန့်ခွာထွက်ပြေးတဲ့ အပြစ်မဲ့ပြည်သူတွေအပေါ် အစ္စရေးက ဒုံးကျည်နဲ့ ပစ်ခတ်တိုက်ခိုက်မှုကို အလ်ဂျာဇီးရားသတင်းဌာနက ဖော်ထုတ်နိုင်ခဲ့ပါတယ်။ 

    ဒီအဖြစ်အပျက်ဟာ အောက်တိုဘာ ၁၃ ရက်နေ့မှာ ဖြစ်ပွားတာပါ။ 

    ဂါဇာမြောက်ပိုင်းက လူ တစ်သန်းကျော်လောက် တောင်ပိုင်းကို ည ၈ နာရီမတိုင်ခင်ရွှေ့ပေးဖို့ အစ္စရေးက အဲဒီနေ့မှာ အမိန့်ထုတ်ပါတယ်။ 

    ပြောင်းရွှေ့တဲ့သူတွေဟာ လမ်းကြောင်းနှစ်ခုကို အသုံးပြုဖို့နဲ့ အဲဒီ လမ်းကြောင်းတွေကို တိုက်ခိုက်မှာမဟုတ်ဘူးလို့ အစ္စရေးစစ်တပ်က ဆိုရှယ်မီဒီယာကနေ အာရဘီဘာသာစကားနဲ့ တရား၀င် ကြေငြာပါတယ်။ 

    ဂါဇာမြောက်ပိုင်းမှာလည်း အာရဘီဘာသာစကားနဲ့ ရေးသားထားတဲ့ ကြေငြာချက်စာရွက်တွေကို အစ္စရေးက ကြဲချပါတယ်။ 

    အသက်အန္တရာယ် စိုးရိမ်ရတဲ့အတွက် ပါလက်စတိုင်းတွေဟာ အစ္စရေးရဲ့ ကြေငြာချက်အတိုင်း အိုးအိမ်စွန့်ခွာ ထွက်ပြေးခဲ့ကြပါတယ်။ 

    အဲဒီအချိန်မှာ ကလေးတွေနဲ့ အမျိုးသမီးတွေကို တင်ဆောင်လာတဲ့ အမိုးဖွင့်ထရပ်ကားတစ်စီးကို အစ္စရေးက လေကြောင်းကနေ တိုက်ခိုက်ခဲ့ပြီး အနည်းဆုံး လူ ၇၀ လောက် သေဆုံးခဲ့ပါတယ်။ 

    တိုက်ခိုက်မှုမဖြစ်ခင် ထရပ်ကားရဲ့ ဗီဒီယိုနဲ့ တိုက်ခိုက်မှုဖြစ်ပြီး ရိုက်ကူးထားတဲ့ ဗီဒီယိုတို့ကို မြေပြင်အနေအထား၊ ဂြိုဟ်တုပုံရိပ်တွေနဲ့ တိုက်ဆိုင်စစ်ဆေးရမှာ ဒီအဖြစ်အပျက်ဟာ အစ္စရေးက သူတို့ တိုက်ခိုက်မှုမလုပ်ဘူးလို့ ကြေငြာထားတဲ့ လမ်းကြောင်းမှာ ဖြစ်ပွားခဲ့တာကို အလ်ဂျာဇီးရားသတင်းဌာနက ဖော်ထုတ်နိုင်ခဲ့ပါတယ်။ 

    တိုက်ခိုက်မှုဖြစ်ပွားတဲ့အချိန်ကို ဆန်းစစ်ရာမှာ အောက်တိုဘာ ၁၃ ရက်နေ့ ညနေ ၄ နာရီခွဲကနေ ၅ နာရီ ၁၅ မိနစ်အတွင်းမှာ ဖြစ်ပွားတာကို ဖော်ထုတ်နိုင်ခဲ့ပါတယ်။ အစ္စရေးက ရာဇသံပေးထားတဲ့ နောက်ဆုံးသတ်မှတ်ချိန် ည ၈ နာရီမတိုင်ခင် ဖြစ်ပွားခဲ့တာပါ။ 

    ပါလက်စတိုင်း ကျန်းမာရေး၀န်ကြီးဌာနရဲ့ ထုတ်ပြန်ချက်မှာ ဒီတိုက်ခိုက်မှုကြောင့် အနည်းဆုံး လူ ၇၀ သေဆုံးခဲ့တယ်လို့ ဆိုပါတယ်။ 

    ဟားမက်စ်ရဲ့တိုက်ခိုက်မှုကို လက်တုန့်ပြန်ရာမှာ အစ္စရေးဟာ ပါလက်စတိုင်းပြည်သူတွေအပေါ် စစ်ရာဇ၀တ်မှုများစွာ ကျူးလွန်နေတာ ဖြစ်ပါတယ်။

     (ဗီဒီယို – အလ်ဂျာဇီးရားသတင်းဌာန၏ ဖော်ထုတ်မှု) 

    Ref: Aljazeera 

  • အစ္စရေး-ဟားမားစ်စစ်ပွဲနဲ့ မီဒီယာထောင်ချောက်

    အစ္စရေး-ဟားမားစ်စစ်ပွဲနဲ့ မီဒီယာထောင်ချောက်

    အောက်တိုဘာ ၁၃၊ ၂၀၂၃
    M-Media  

    ရေးသားသူ – Denial Shane 

    -အစ္စရေး-ဟားမားစ် စစ်ပွဲ အောက်တိုဘာ ၇ကစတင်ခဲ့ပါတယ်။ ဒီနေ့ဆိုရင် ၇ မြောက် ရှိပါပြီ။ ကမ္ဘာတခွင် အခြားအခြားသောအရေးတွေ မှေးမှိန်ပြီး မြန်မာဆိုရှယ်မီဒီယာပေါ်မှာတောင် ဂျူးအသားပေး သမိုင်းကြောင်းရေးသားသူတွေ အလျှိုလျှိုပေါ်ပေါက်လာနေပါတယ်။

    သက်ကြီးရွယ်အို၊ ဥမမယ်ကလေးငယ်မဆိုထားဘိ အပြစ်မဲ့ပြည်သူကို သတ်ဖြတ်ခဲ့မယ်ဆိုရင်တောင် ဒါဟာအကြမ်းဖက်မှု‌မြောက်တာ ယုံမှားသံသယဖြစ်ဖွယ်မရှိပါ။ 

    သို့ရှိလင့်ကစား၊ ယခုစစ်ပွဲဟာ ကမ္ဘာ့မီဒီယာစာမျက်နှာထက်မှာ တမဟုတ်ချင်း အသွင်ထူးခြားစွာ ဖော်ပြခံရလျက်ရှိပါတယ်။ ဒါဟာ မသင်္ကာစရာဖြစ်သလို၊ လေ့လာဆန်းစစ်ထိုက်တဲ့ အကြောင်းအရာတစ်ခု ဖြစ်ပါတယ်။ 

    တကယ်ပဲ မသိခဲ့လေရော့သလား

    ဟားမက်စ်က တိုက်ခိုက်နိုင်ချေရှိကြောင်း အီဂျစ်က

    အောက်တိုဘာ ၇ ရက်နေ့ လင်းအားကြီး ၆ နာရီ၊ အစ္စရေးနိုင်ငံအလယ်နဲ့ တောင်ပိုင်းတွေမှာ ဟားမားစ်ဒုံးကြောင့် သတိပေးဥသြသံတွေ ထွက်ပေါ်လာပါတယ်။ ကမ္ဘာ့အကောင်းဆုံးထောက်လှမ်းရေးအဖွဲ့ မော့ဆက်နဲ့ အမေရိကန်ထောက်လှန်းရေးဗျူရိုကတော့ ဟားမားစ်တိုက်ခိုက်မယ့်အကြောင်း သတင်းမရခဲ့ဖူးလို့ ထပ်ကာတလဲလဲ ဆိုပါတယ်။ ဒါကို ကမ္ဘာ့မီဒီယာကြီးများက ဇောင်းပေးဖော်ပြခဲ့ပါတယ်။ 

    အောက်တိုဘာ ၉ နဲ့ ၁၀ ရက်တွေမှာ၊ တူရကီသတင်းထောက် Ragip Soylu က “အီဂျစ်က အစ္စရေးထံ ဟားမားစ်တိုက်ခိုက်လာဖို့ ရှိတဲ့အကြောင်း ၁၀ ရက်ကြိုတင် အသိပေးခဲ့တယ်လို့ ” အီဂျစ်သတင်းဌာနကို ကိုးကားတင်ပြခဲ့ပါတယ်။ တူရကီသတင်းထောက်ရဲ့ ထောက်ပြမှုကို ကမ္ဘာ့မီဒီယာကြီးတွေက အလေးမထားခဲ့ပါ။ 

    သို့သော်ယနေ့ အောက်တိုဘာ ၁၂မှာတော့ တိုင်းမ်စ်အော့ဖ်အစ္စရေးမီဒီယာမှာတင် အီဂျစ်တို့ ကြိုတင်သတိပေးခဲ့တယ်ဆိုတဲ့အကြောင်းကို အမေရိကန် ထိပ်သီးဥပဒေပြုအမတ်တစ်ဦးက ဆိုထားကြောင်း သတင်းတင်ဆက်ထားပါတယ်။ 

    အမြတ်ထွက်သူ ဘယ်သူတုန်း

    အစ္စရေး-ဟားမက်စ်စစ်ပွဲဖြစ်ပြီးနောက် ရှယ်ယာစျေးထိုးတက်သည့် အမေရိကန်လက်နက်ကုမ္ပဏီ

    အပြန်အလှန်တိုက်ခိုက်ကြလို့ ကလေးသူငယ်များပါမကျန် သေကြေရလင့်ကစား အမေရိကန်နိုင်ငံအခြေဆိုက် ကာကွယ်ရေးလက်နက်ကုမ္ပဏီကြီးတစ်ခုရဲ့ စတော့ရှယ်ယာစျေးကတော့ အောက်တိုဘာ ၅ ထိ တစိုက်မတ်မတ်ကျလျက်ရှိရာကနေ အခုလို (ပုံမှာပြထားတဲ့အတိုင်း) ထောင်တက်သွားပါပြီ။

    ကလေးတွေကို ခေါင်းဖြတ်တယ်ဆိုတဲ့ ၀ါဒဖြန့်မှု

    ဟားမက်စ်က မွေးကင်းစကလေးများအား ခေါင်းဖြတ်သည်ဆိုသည့် သတင်းအား အစ္စရေးအစိုးရပင် အတည်မပြုနိုင်

    ကမ္ဘာ့မီဒီယာလောကကြီးတစ်ခုလုံး ပြဲပြဲစင်အောင် ဖော်ပြခဲ့တဲ့ အစ္စရေးရဲ့ အထိမ်းအကွပ်မဲ့၊ အထောက်အထားကင်းစွာ မီးလောင်ရာလေပင့်ပြောဆိုချက်တစ်ခုကတော့ ဟားမားစ်တို့ ဂျူးကလေးငယ်လေးတွေကို ခေါင်းဖြတ်သတ်ပစ်လိုက်တယ်ဆိုတဲ့ အချက်ပါ။ 

    ဒီအချက်ကို အစ္စရေး၀န်ကြီးချုပ် နတန်ယာဟုရဲ့ ပြောရေးဆိုခွင့်ရှိသူ တယ်လ်ဟိုင်ရိချ်ကိုယ်တိုင် ပြောခဲ့တာပါ။ 

    ယနေ့မှာတော့ ဒီသတင်းဟာ လိမ်လည်မုသားတစ်ခုဖြစ်တယ်ဆိုတာ ပေါ်လွင်လာပါတယ်။ စီအင်အင်သတင်းဌာနကပဲ အစ္စရေးအစိုးရအနေနဲ့ ကလေးတွေခေါင်းဖြတ်သတ်ခံရတယ်ဆိုတဲ့ အထောက်အထားအတိအကျကို မထုတ်ပြန်နိုင်ပါဆိုပြီး သတင်းတင်ဆက်ထားတာပါ။

    ငှက်ပျောသီးတောင်းစားတဲ့ စစ်သွေးကြွ

    ဒီလိုရှိနေလင့်ကစား အစ္စရေးမိခင်တစ်ဦးက အစ္စရေးမီဒီယာ ချယ်နယ် ၁၂ မှာသူ့ရဲ့ ကိုယ်တွေ့အဖြစ်အပျက်ကို အခုလို ပြောပြလာပါတယ်။

    “(ပါလစ္စတိုင်းဖိုက်တာ)တွေ၀င်လာကြတယ်၊ ကျမသူတို့ကို ပြောတယ်၊ ငါ့မှာ ကလေးနှစ်‌ယောက်ရှိတယ် ဆိုပီး ပထမဆုံး ဟီဘရူးလို ပြောလိုက်တယ်၊ အင်္ဂလိပ်လို မဟုတ်ဘူး၊ သူတို့က ပတ်ပတ်လည်လိုက်ကြည့်တယ်၊ သူတို့ထဲက တစ်ယောက်က “စိတ်မပူပါနဲ့၊ ငါမွတ်စလင်မ်တစ်ယောက်ပါ၊ ငါတို့ မင်းတို့ကို အနာတရဖြစ်အောင် မလုပ်ပါဘူး” လို့ အင်္ဂလိပ်လို ပြန်ပြောတယ်၊ (အံ့သြ အမူအရာ) သူအဲလိုပြောတော့ အံ့သြမိတယ်၊ တပြိုင်နက်တည်း အပူလုံးကြီးလည်း ကျသွားတယ်၊ ကျမ ကလေးတွေနဲ့ အတူထိုင်လိုက်တယ်၊ ပါလစ္စတိုင်းဖိုက်တာက ထမင်းစားခန်းထဲက ခုံယူလာပေးတယ်၊ လက်နက်ကိုင်ထားတဲ့ ပါလစ္စတိုင်းဖိုက်တာ တွေ တချိန်လုံး ကျမတို့နဲ့အိမ်ထဲမှာအတူရှိနေခဲ့တယ်၊ အခြားဖိုက်တာတွေက အိမ်ထဲကို လှည့်ပြီး လမ်းလျောက်နေခဲ့တယ်၊ ပါလစ္စတိုင်းဖိုက်တာတစ်ယောက်က ထောင့်တစ်ထောင့်မှာ ငှက်ပျောသီးတွေ့တော့ စားလို့ရမလားလို့ လှမ်းမေးတယ်၊ ကျမက စားပါလို့ ပြန်ဖြေတယ် (ရယ်မောလျက်)၊ (အင်တာဗျူးသူ – ကလေးတွေက ဘာပြောလဲ) အကြီးလေးကတော့ ပိုပြီး စိတ်ဖိစီးနေပုံရတယ်၊ အငယ်လေးကတော့ ဘာမှ သိပုံတောင်မပေါ်ဘူး သူ့တက်ဘလက်နဲ့ အလုပ်ရှုပ်နေတယ်၊ သူတို့တတွေ သေနတ်တွေကိုတော့ နဲနဲကြောက်နေကြတယ်၊ အခန်းထဲမှာ ပါလစ္စတိုင်းဖိုက်တာတွေက အာရေဗျဘာသာစကားနဲ့ အပြန်အလှန်ပြောနေတော့ ကျမသားလေးက ကျမကို သူတို့တွေ ကျွန်တော်တို့ကို တောင်းပန်ဖို့ ဆွေးနွေးနေတာလားလို့မေးပါတယ်၊ ကျမက သားကို မဟုတ်လောက်ဘူးလို့ ပြန်ဖြေပါတယ်၊ ပါလစ္စတိုင်းဖိုက်တာတွေ ၂ နာရီလောက်နေသွားပါတယ်၊ သူတို့ထွက်သွားတော့ တစ်ယောက်က တံခါးမကြီးကို ပိတ်ပေးခဲ့ပါတယ်”

    သက်ရှည်၀န်ကြီးချုပ် နတန်ယာဟုရဲ့ ဂုဏ်ဆာမှုနောက်ကွယ်က လက်မဲကြီး

    အစ္စရေးကတော့ သားကောင်ဖြစ်နေရတာပါလို့ တတွင်တွင်ဆိုနေလင့်ကစား ဂါဇာကို တားမြစ်လက်နက်အပါအ၀င် အင်အားပြင်းလက်နက် အမျိုးအစားအားလုံးသုံးပြီးတိုက်ခိုက်လျက်ရှိပါတယ်။ ကလေးငယ်မြောက်မြားစွာ သေကြေနေရပါတယ်။ ဂါဇာမှာ ရေမီးဂတ်စ် အစရှိတဲ့ အသက်ရှင်နေထိုင်ရေး အတွက် လိုအပ်တဲ့ အဓိကအရင်းအမြစ်တွေ ဖြတ်တောက်ပိတ်ဆို့ခြင်းခံထားရပါတယ်။

    နတန်ယာဟုကတော့ ပေါ်ပြူလာဖြစ်‌ရေးအတွက် ဟားမားစ်ကို အသုံးချပြီး ၀န်ကြီးချုပ်နေရာတည်မြဲအောင်လုပ်နေကြောင်း အစ္စရေးမီဒီယာအချို့က ‌ဖော်ပြခဲ့ဖူးပါတယ်။ ဟားမားစ်တည်မြဲပြီး ကမ္ဘာကို ဓားစာခံဖြစ်နေရခြင်း (victim card) အပြကောင်းဖို့အတွက်သော်လည်းကောင်း၊ ပါလစ္စတိုင်းနိုင်ငံဖြစ်‌ပေါ်လာရေးကြိုးပမ်းချက်ကို ကဖျက်ယဖျက်လုပ်ဖို့အတွက်သော်လည်းကောင်း ဟားမားစ်ကို ငွေကြေးထောက်ပံ့ရန် နတန်ယာဟုက စီစဥ်ခဲ့ကြောင်း အစ္စရေးမီဒီယာ Haaretz က အခုလို ဆိုထားပါတယ်။ 

    ဟားမက်စ်ကို ငွေကြေးထောက်ပံ့ဖို့ ပါတီ၀င်များကို နေတန်ယာဟုပြော

    “ဘယ်သူမဆို ပါလစ္စတိုင်းနိုင်ငံဖြစ်လာဖို့ ကြိုးပမ်းတာတွေကို ကဖျက်ယဖျက်လုပ်ချင်ရင် ဟားမားစ်ကို ထောက်ခံအားပေးရမယ်၊ ဟားမားစ်ကို ငွေကြေးထောက်ပံ့ရမယ်၊ ဒါဟာ ငါတို့ရဲ့ ဗျူဟာပဲ” လို့ လီကွတ်ပါတီ ထိပ်သီး ခေါင်းဆောင်တွေကို နတန်ယာဟုက မတ်လ ၂၀၁၉မှာ ပြောခဲ့တယ်လို့ဆိုထားပါတယ်။

    Haaretz ကပဲ အာဏာသိမ်းပြီးနောက်ပိုင်း မြန်မာကို အစ္စရေးက လက်နက်တွေ ဆက်ရောင်းနေတယ်လို့ စက်တင်ဘာ ၅ ၊ ၂၀၂၃ ကပဲ သတင်းတင်ဆက်ထားပါသေးတယ်။ 

    လူကြီးမင်းများ ချင့်ချိန်တော်မူနိုင်ကြပါစေ။

    Ref: Haaretz, CNN, Time of Israel

    (အစ္စရေးမီဒီယာ ချယ်နယ် ၁၂ တွင် အစ္စရေးအမျိုးသမီးတစ်ဦးက ဟားမက်စ်အကြောင်းပြောထားသည့် ဗီဒီယိုကို ကွန့်မန့်တွင် ကြည့်ရှုနိုင်ပါသည်)

  • ဂျူးအခြေချသူများ၏ အကြမ်းဖက်တိုက်ခိုက်မှုကြောင့် ပါလက်စတိုင်း လူငယ်တစ်ဦး သေဆုံး

    ဂျူးအခြေချသူများ၏ အကြမ်းဖက်တိုက်ခိုက်မှုကြောင့် ပါလက်စတိုင်း လူငယ်တစ်ဦး သေဆုံး

    အောက်တိုဘာ ၇၊ ၂၀၂၃

    M-Media 


    ဒူမိုင်ဒီ၏ စျာပနကို အစ္စရေးတပ်ဖွဲ့များ၏ နှောက်ယှက်မှု မြင်ကွင်း

    -ပါလက်စတိုင်းနိုင်ငံ အနောက်ဖက်ကမ်းက ဟူ၀ါရာမြို့မှာ တရားမ၀င် ဂျူးအခြေချနေထိုင်သူတွေ အုပ်စုဖွဲ့ အကြမ်းဖက်တိုက်ခိုက်မှုကြောင့် ပါလက်စတိုင်းလူငယ်တစ်ဦး သေဆုံးသွားခဲ့ပါတယ်။ 

    မနေ့က ဖြစ်ပွားခဲ့တဲ့ ဒီအဖြစ်အပျက်မှာ အသက် ၁၉ နှစ်အရွယ် လာဘစ် ဒူမိုင်ဒီဟာ ရင်ဘတ်ကို သေနတ်နဲ့ ပစ်ခံလိုက်ရတာပါ။ 

    ဂျူးလူအုပ်က အကြမ်းဖက်တိုက်ခိုက်နေမှုကို ရှောင်ရှားဖို့အတွက် နေအိမ်အမိုးပေါ် ရှောင်နေစဥ်မှာ ဒီလို သတ်ဖြတ်ခံလိုက်ရတာ ဖြစ်ပါတယ်။ ဒူမိုင်ဒီဟာ တက္ကသိုလ်ကျောင်းသားတစ်ဦးလည်း ဖြစ်ပါတယ်။ 

    ကြာသာပတေးနေ့က သန်းခေါင်ကျော်အချိန်မှာ လူ ၂၀၀ ကျော်လောက်ပါ၀င်တဲ့ ဂျူးလူအုပ်ဟာ ဟူ၀ါရာမြို့မှာ စု၀ေးတိုက်ခိုက်မှုတွေ လုပ်ခဲ့ကြပါတယ်။ 

    ပါလက်စတိုင်းတွေရဲ့ နေအိမ်တွေ၊ ဆိုင်တွေကို ဖျက်ဆီးခဲ့ကြပြီး အစ္စရေးစစ်သားတွေက ဒီအကြမ်းဖက်မှုကို ရပ်ကြည့်နေခဲ့ကြတယ်လို့ မျက်မြင်သက်သေတွေက ပြောပါတယ်။ 

    အနောက်ဖက်ကမ်းကို အစ္စရေးက ပိတ်ဆို့ထိန်းချုပ်ထားတာ ဆယ်စုနှစ်ချီ ရှိနေပါပြီ။ ပါလက်စတိုင်းပိုင်နက်အတွင်း တရားမ၀င် အခြေချအိမ်ယာတွေကို ဆောက်လုပ်ကာ ဂျူးတွေကို ထားရှိပါတယ်။ 

    ပြီးခဲ့တဲ့နှစ်အတွေအတွင်း အဲဒီအခြေချအိမ်ယာမှာ နေထိုင်တဲ့ ဂျူးတွေက ပါလက်စတိုင်းတွေကို အုပ်စုဖွဲ့ အကြမ်းဖက်တိုက်ခိုက်တာမျိုး မကြာခဏ ဖြစ်လာပါတယ်။ 

    ဟူ၀ါရာမှာ ဒီလိုတိုက်ခိုက်မှုဖြစ်တာ အနည်းဆုံး ၃ ကြိမ်ရှိပါပြီ။ 

    ဒူမိုင်ဒီရဲ့ စျာပနမှာ လိုက်ပို့တဲ့လူတွေကို အစ္စရေးစစ်သားတွေက ရာဘာကျည်တွေ၊ ကျည်အစစ်တွေ၊ မျက်ရည်ယိုဗုံးတွေနဲ့ ပစ်ခတ်လို့ အနည်းဆုံး ပါလက်စတိုင်း ၅၁ ဦး ဒဏ်ရာရခဲ့ပါတယ်။ 

    ၂၀၂၃ ခုနှစ် ပထမ ၈ လအတွင်း ပါလက်စတိုင်းပိုင်နက်တွေမှာ တရားမ၀င် ဂျူးအခြေချနေထိုင်သူတွေရဲ့ တိုက်ခိုက်မှုဟာ ပျမ်းမျှ တစ်ရက်ကို ၃ ခုလောက် ဖြစ်တယ်လို့ ကုလရဲ့ အချက်အလက်တွေအရ သိရပါတယ်။ 

    Ref: Aljazeera 

  • ပါလက်စတိုင်းမှာ စစ်ရာဇ၀တ်မှုတွေ ထပ်ကျူးလိုက်ပြန်တဲ့ အစ္စရေး

    ပါလက်စတိုင်းမှာ စစ်ရာဇ၀တ်မှုတွေ ထပ်ကျူးလိုက်ပြန်တဲ့ အစ္စရေး

    ဇူလိုင် ၃၊ ၂၀၂၃

    M-Media 

    -ပါလက်စတိုင်းနိုင်ငံ အနောက်ဖက်ကမ်းမှာ ရှိတဲ့ ပါလက်စတိုင်း ဒုက္ခသည်စခန်းတစ်ခုကို အစ္စရေးစစ်တပ်က ဒီကနေ့မနက်မှာ လက်နက်ကြီး လက်နက်ငယ်တွေနဲ့ ပစ်ခတ်တိုက်ခိုက်ခဲ့ပါတယ်။ 

    ဂျီနင်ဒုက္ခသည်စခန်းဖြစ်ပြီး ရာနဲ့ချီတဲ့ မြေပြင်တပ်တွေနဲ့ ၀င်ရောက်စီးနင်းခဲ့သလို၊ ရဟတ်ယာဥ်တွေနဲ့လည်း ပစ်ခတ်မှုတွေ ပြုလုပ်ခဲ့ပါတယ်။ ဒီအဖြစ်အပျက်အတွင်း ကလေးငယ် ၃ ဦး အပါအ၀င် အနည်းဆုံး ပါလက်စတိုင်း ၉ ဦး သေဆုံးခဲ့ပါတယ်။ 

    အစ္စရေးဟာ ပြီးခဲ့တဲ့ ၂ နှစ်အတွင်း ဂျီနင်ဒုက္ခသည်စခန်းကို အကြိမ်ကြိမ် ၀င်ရောက်စီးနင်း တိုက်ခိုက်ခဲ့ပါတယ်။ လူငယ် ပါလက်စတိုင်း တော်လှန်ရေးသမားတွေကို ပစ်မှတ်ထား ချေမှုန်းဖို့ဆိုတဲ့ ရည်ရွယ်ချက်နဲ့ပါ။  

    ရှုတ်ချ 

    ———

    ကုလသမဂ္ဂနဲ့ ပတ်၀န်းကျင် အာရပ်နိုင်ငံတွေကတော့ အစ္စရေးရဲ့ ဒီလုပ်ရပ်ကို ရှုတ်ချကြောင်း ကြေငြာချက် အသီးသီး ထုတ်ပြန်ခဲ့ပါတယ်။ 

    အီရန်နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ နဆာရ် ကာနာနီက အစ္စရေးဟာ ရာဇ၀တ်မှု ကျူးလွန်နေတာဖြစ်ပြီး အကြမ်းဖက်နိုင်ငံဆိုတာ ထင်ရှားတယ်လို့ ၀ေဖန်ခဲ့ပါတယ်။ 

    “ဆက်ဆံရေးတည်ဆောက်လိုက်ရုံနဲ့ ဇိုင်ယွန်အဖွဲ့အစည်းရဲ့ လူသတ်၀ါဒကို မတားဆီး၊ မဟန့်တားနိုင်သလို၊ ဘာသက်ရောက်မှုမှ ရှိမှာမဟုတ်ဘဲ ဇိုင်ယွန်အဖွဲ့ဟာ ရာဇ၀တ်မှုတွေ ဆက်လက် ကျူးလွန်နေမယ်ဆိုတာ အခုလုပ်ရပ်က သက်သေပါပဲ”

    အီဂျစ်ကတော့ အစ္စရေးရဲ့ တိုက်ခိုက်မှုကို ရှုတ်ချကြောင်း ပြောဆိုခဲ့ပြီး နိုင်ငံတကာ အသိုင်းအ၀ိုင်းက ကြား၀င် ဟန့်တားပေးဖို့ တောင်းဆိုခဲ့ပါတယ်။ 

    ဂျော်ဒန်နိုင်ငံခြားရေး၀န်ကြီးဌာနက ထုတ်ပြန်တဲ့ ကြေငြာချက်မှာ အစ္စရေးရဲ့ တိုက်ခိုက်မှုဟာ လူသားချင်း စာနာထောက်ထားမှုဆိုင်ရာ ဥပဒေတွေ၊ တာ၀န်၀တ္တရားတွေကို ချိုးဖောက်မှုဖြစ်တယ်လို့ ဖော်ပြထားပါတယ်။ 

    အာရပ်လိဂ် အထွေထွေအတွင်းရေးမှူး အဟ်မဒ် အဘူလ် ဂီအစ်က အစ္စရေးရဲ့ ကြမ်းကြုတ်တဲ့ စစ်ဆင်ရေးကို ရှုတ်ချကြောင်း ပြောကြားခဲ့ပြီး အခြေအနေကို ပိုမိုတင်းမာစေလိမ့်မယ်လို့ သတိပေးခဲ့ပါတယ်။ 

    Ref: Aljazeera