News @ M-Media

Tag: Rohingya Muslims

  • ရိုဟင်ဂျာများ ကျူးလွန်ခံရမှုကို လူမျိုးတုန်းသတ်ဖြတ်မှုအဖြစ် ကန်သတ်မှတ်

    ရိုဟင်ဂျာများ ကျူးလွန်ခံရမှုကို လူမျိုးတုန်းသတ်ဖြတ်မှုအဖြစ် ကန်သတ်မှတ်

    မတ် ၂၁၊ ၂၀၂၂

    M-Media 

    -မြန်မာစစ်တပ်က ရိုဟင်ဂျာလူမျိုးစုအပေါ် ကျူးလွန်မှုတွေဟာ လူမျိုးတုန်းသတ်ဖြတ်မှု (Genocide) မြောက်တယ်လို့ အမေရိကန်အစိုးရက တနင်္ဂနွေနေ့မှာ ဆုံးဖြတ်လိုက်ပါတယ်။ 

    ဒီဆုံးဖြတ်ချက်ကို တနင်္လာနေ့ ၀ါရှင်တန်က Holocaust Memorial Museum မှာလုပ်မယ့် အခမ်းအနားမှာ နိုင်ငံခြားရေး၀န်ကြီး အန်တိုနီ ဘလင်ကန်က ကြေငြာမှာပါ။ 

    ဒါဟာ အာဏာသိမ်းပြီး လက်ရှိ တိုင်းပြည်ကို အုပ်စိုးနေတဲ့ စစ်ခေါင်းဆောင်တွေကို အရေးယူနိုင်ရေး ကြိုးပမ်းမှုကို ပိုမိုအားကောင်းစေလိမ့်မယ်လို့ ကျွမ်းကျင်သူတွေက သုံးသပ်ပါတယ်။  

    ရိုဟင်ဂျာတွေဟာ ၁၉၈၀ ပြည့်နှစ်တွေကတည်းက မြန်မာစစ်တပ်ရဲ့ အစုလိုက်အပြုံလိုက် သတ်ဖြတ်မောင်းထုတ်ခြင်းကို ခံခဲ့ရတာ ဖြစ်ပါတယ်။ ၂၀၁၇ ခုနှစ် မြန်မာစစ်တပ်ရဲ့ ရိုဟင်ဂျာတွေအပေါ် ကျူးလွန်မှုတွေကို ကမ္ဘာကြီးက ပိုမိုအာရုံစိုက်လာပါတယ်။ 

    စစ်တပ်က နယ်မြေရှင်းလင်းရေးလို့ ခေါင်းစဥ်တပ်ထားတဲ့ အဲ့ဒီစစ်ဆင်ရေးအတွင်း ရိုဟင်ဂျာအများအပြား အစုလိုက်အပြုံလိုက် အသတ်ခံရတာ၊ အမျိုးသမီးတွေ အဓမ္မပြုကျင့်ခံရတာတွေ ရှိခဲ့ပြီး ၇ သိန်းကျော်လောက် ဘင်္ဂလားဒေ့ရှ်ဖက် ထွက်ပြေးခဲ့ရပါတယ်။ 

    အဲဒီအချိန်က အမေရိကန်အာဏာပိုင်တွေနဲ့ လွတ်လပ်တဲ့ ဥပဒေရေးရာအဖွဲ့တွေက ဒီရက်စက်ကြမ်းကြုတ်မှု အထောက်အထားတွေကို စုဆောင်း သုံးသပ်ခဲ့ပေမယ့် ဂျီနိုဆိုက်မြောက်တယ်လို့ ဆုံးဖြတ်ခဲ့တာမျိုး မရှိပါဘူး။

    ရိုင်ဂျာကိစ္စကို ပြန်လည်သုံးသပ်မယ်လို့ ကတိပြုခဲ့တဲ့ ဂျိုးဘိုင်ဒန်ဟာ အာဏာရပြီး ၁၄ လအကြာမှာ လူမျိုးတုန်းသတ်ဖြတ်မှုအဖြစ် သတ်မှတ်ခဲ့တာ ဖြစ်ပါတယ်။ 

    နိုင်ငံခြားရေး၀န်ကြီး ဘလင်ကန် ဦးဆောင်တဲ့အဖွဲ့ဟာ အချက်အလက်ပိုင်းဆိုင်ရာ၊ ဥပဒေပိုင်းဆိုင်ရာ လေ့လာမှုတွေ လုပ်ဆောင်ခဲ့ပြီးတဲ့နောက် မြန်မာစစ်တပ်က ရိုဟင်ဂျာတွေအပေါ် လူမျိုးတုန်းလိုတဲ့ ရည်ရွယ်ချက်နဲ့ ကျူးလွန်မှုတွေ လုပ်ဆောင်တယ်ဆိုတာ ထင်ရှားတယ်လို့ သုံးသပ်ခဲ့တာ ဖြစ်ပါတယ်။

    ဒီလိုသတ်မှတ်လိုက်တာကြောင့် မြန်မာစစ်ခေါင်းဆောင်တွေကို အရေးယူနိုင်ငံရေး နိုင်ငံတကာက ပိုမို ဖိအားပေးလာနိုင်လိမ့်မယ်လို့ အမေရိကန်အစိုးရက ယုံကြည်နေပါတယ်။ 

    “ဒီလိုသတ်မှတ်လိုက်တာကြောင့် နောက်ထပ်ကျူးလွန်မှုတွေ လုပ်ဖို့ အဟန့်အတား ဖြစ်သွားပါလိမ့်မယ်” 

    ကုလသမဂ္ဂ အချက်အလက်ရှာဖွေရေးအဖွဲ့က မြန်မာစစ်တပ်ရဲ့ ရိုဟင်ဂျာတွေအပေါ် ကျူးလွန်မှုဟာ လူမျိုးတုန်းသတ်ဖြတ်မှုမြောက်ကြောင်း ၂၀၁၈ ခုနှစ်မှာ သတ်မှတ်ခဲ့ပါတယ်။ 

    Ref: Reuters 

  • ဒေသတွင်းအရေး အာဆီယံနိုင်ငံများက ကိုယ့်နည်းကိုယ့်ဟန်ဖြင့် တုန့်ပြန်တော့မည်

    ဒေသတွင်းအရေး အာဆီယံနိုင်ငံများက ကိုယ့်နည်းကိုယ့်ဟန်ဖြင့် တုန့်ပြန်တော့မည်

    နိုဝင်ဘာ ၃၊ ၂၀၂၁
    M-Media

    -အဖွဲ့၀င်နိုင်ငံတွေအတွင်း လူ့အခွင့်အရေး ချိုးဖောက်မှုတွေ၊ အာဏာလွန်ဆွဲပွဲတွေ ဖြစ်တဲ့အခါ ကိုယ့်နည်းလမ်းနဲ့ကိုယ် တုန့်ပြန်ဖို့ အာဆီယံနိုင်ငံတွေက စဥ်းစားလာကြပြီလို့ မလေးရှား ဒုတိယ နိုင်ငံခြားရေး၀န်ကြီး ကမာရွတ်ဒင် ဂျာဖာက ပြောပါတယ်။

    ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်နေတဲ့ မတည်ငြိမ်မှုတွေ၊ စစ်ကောင်စီရဲ့ အကြမ်းဖက်မှုတွေကို မဖြေရှင်းနိုင်တဲ့အတွက် အာဆီယံအဖွဲ့ဟာ ၀ေဖန်မှုတွေ ခံနေရတာ ဖြစ်ပါတယ်။

    အဖွဲ့၀င်နိုင်ငံတွေရဲ့ ပြည်တွင်းရေးကို ၀င်မစွက်ဖို့ဆိုတဲ့ စည်းမျဥ်း အာဆီယံမှာရှိပေမယ့် လက်ရှိ မြန်မာကိစ္စမှာတော့ မကြုံစဖူး စစ်ခေါင်းဆောင်ကို ထိပ်သီးအစည်းအ၀ေး တက်ခွင့်မပေးတာမျိုးတွေ ရှိလာပါတယ်။

    မလေးရှား ဒုတိယနိုင်ငံခြားရေး၀န်ကြီး ကမာရွတ်ဒင် ဂျာဖာက အဖွဲ့၀င်နိုင်ငံတွေရဲ့ ပြဿနာမှာ ကိုယ့်နည်းကိုယ့်ဟန်နဲ့ ဖြေရှင်းတာမျိုးကို ပိုတွေ့လာရပြီး အထူးသဖြင့် လတ်တလော မြန်မာကိစ္စမှာ ဖြစ်တယ်လို့ ဒီကနေ့ လွှတ်တော်အစည်းအ၀ေးမှာ ပြောကြားခဲ့ပါတယ်။

    “အာဆီယံရဲ့ ၀င်မစွက်ရေးစည်းမျဥ်းကို ရှုဒေါင့်အသစ်ကနေ ချဥ်းကပ်နေကြပြီလို့ ကျွန်တော် ထင်ပါတယ်။ အဖွဲ့၀င်နိုင်ငံတွေရဲ့ သဘောထားကို ဖော်ထုတ်တင်ပြတာ၊ ၀င်ရောက်ပါ၀င်တာ၊ အရေးယူတာတွေကို တားဆီးလို့မရတဲ့ ရှုထောင့်မျိုးပါ”

    မြန်မာနိုင်ငံက ရိုဟင်ဂျာတွေကိုလုပ်တဲ့ လူမျိုးတုန်းသတ်ဖြတ်မှုလို ကိစ္စမျိုး ဖြစ်လာတဲ့အခါ ၀င်မစွက်ရေးမူ၀ါကို သုံးသပ်ဖို့ မလေးရှားက အာဆီယံအဖွဲ့ကို တောင်းဆိုမလားလို့ လွတ်တော်အမတ်တစ်ဦးက မေးမြန်းရာမှာ ဂျာဖာက အာဆီယံမှာ ဒီစည်းမျဥ်း ဆက်ရှိနေမှာ ဖြစ်ပေမယ့် လူ့အခွင့်အရေးချိုးဖောက်မှုတွေ၊ အခြားပြဿနာတွေ ဖြစ်လာတဲ့အခါမှာ ကိုယ့်နည်းကိုယ့်ဟန်နဲ့ တုန့်ပြန်ဖို့အတွက် အဖွဲ့၀င်နိုင်ငံတွေက ပိုပြီး ဆန္ဒရှိလာကြတယ်လို့ ဖြေကြားခဲ့ပါတယ်။

    မြန်မာစစ်တပ်က ရိုဟင်ဂျာတွေကို ဖိနှိပ်၊ ညှင်းပမ်း၊ သတ်ဖြတ်ရာမှာ ဒီဒဏ်ကို အခံရဆုံးက မလေးရှားနိုင်ငံဖြစ်ပြီး အာဆီယံစည်းမျဥ်းကနေတစ်ဆင့် ဒီပြဿနာကိုဖြေရှင်းရေး နည်းလမ်းရှာဖို့ ကြိုးစားသွားမယ်လို့ ဂျာဖာက ထည့်သွင်းပြောဆိုခဲ့ပါတယ်။

    “ရခိုင်ပြည်နယ်က လူသားချင်း စာနာထောက်ထားမှုဆိုင်ရာ အကြပ်အတည်းကို ဖြေရှင်းရေး မလေးရှားက အာဆီယံအစည်းအ၀ေးမှာ ကြိမ်ဖန်များစွာ တင်ပြခဲ့ပါတယ်။ ရိုဟင်ဂျာဒုက္ခသည်တွေကို ထပ်ပြီး လက်မခံနိုင်တော့ဘဲ ရေရှည်အဆင်ပြေမယ့် အဖြေမျိုးရှာဖို့လည်း နိုင်ငံတကာ အသိုင်းအ၀ိုင်းကို အကြိမ်ကြိမ် တိုက်တွန်းခဲ့ပါတယ်”

    မလေးရှားမှာ ရိုဟင်ဂျာဒုက္ခသည် ၂ သိန်းလောက်ရှိပြီး ၁၉၅၁ ဒုက္ခသည်ဆိုင်ရာ နိုင်ငံတကာ သဘောတူညီချက်တွေအရ တတိယနိုင်ငံတွေကို ပို့နိုင်ခဲ့တဲ့အရေအတွက်ဟာ အလွန်နည်းပါးခဲ့ကြောင်း၊ ဒီပြဿနာကိုဖြေရှင်းရေး အဖွဲ့၀င်နိုင်ငံတွေနဲ့ ပူးပေါင်းလုပ်ဆောင်သွားမှာ ဖြစ်ကြောင်း ဂျာဖာက ထည့်သွင်းပြောဆိုခဲ့ပါတယ်။

    Ref : The Star

  • ဘာဆန်ချာကျွန်းမှ ရိုဟင်ဂျာဒုက္ခသည်များကို ထောက်ပံ့ကူညီရန် ကုလနှင့် ဘင်္ဂလားဒေ့ရှ်တို့ လက်မှတ်ရေးထိုး

    ဘာဆန်ချာကျွန်းမှ ရိုဟင်ဂျာဒုက္ခသည်များကို ထောက်ပံ့ကူညီရန် ကုလနှင့် ဘင်္ဂလားဒေ့ရှ်တို့ လက်မှတ်ရေးထိုး

    အောက်တိုဘာ ၁၀၊ ၂၀၂၁၂
    M-Media

    ဘာဆန်ချာကျွန်းမှ လူနေလိုင်းခန်းများ

    -ဘင်္ဂလားပင်လယ်အော်အတွင်းက ဘာဆန်ချာကျွန်းကို ရွှေ့ပြောင်းခဲ့တဲ့ ထောင်နဲ့ချီတဲ့ ရိုဟင်ဂျာ ဒုက္ခသည်တွေကို ကူညီထောက်ပံ့နိုင်ရေး ကုလသမဂ္ဂနဲ့ ဘင်္ဂလားဒေ့ရှ်နိုင်ငံအကြား သဘောတူညီချက်တစ်ခုကို မနေ့က လက်မှတ်ရေးထိုးလိုက်ပါတယ်။

    မြန်မာနိုင်ငံမှာ ဖိနှိပ်ညှင်းပန်း သတ်ဖြတ်မှုတွေကြောင့် ဘင်္ဂလားဒေ့ရှ်ဖက်ကို ထွက်ပြေးသွားရတဲ့ ရိုဟင်ဂျာ ဒုက္ခသည်အရေအတွက်ဟာ ၁ သန်းကျော်လောက်ရှိပြီး အဲဒီအထဲက ၁၉၀၀၀ လောက်ကို ဘာဆန်ချာကျွန်းမှာ ဘင်္ဂလားဒေ့ရှ်ဖက်က ပြောင်းရွှေ့ နေရာချပေးထားတာပါ။

    ဘာဆန်ချာကျွန်းမှာ ရိုဟင်ဂျာဒုက္ခသည်စုစုပေါင်းရဲ့ ၁၀ ရာခိုင်နှုန်းလောက်ကို နေရာချထားပေးဖို့ ဘင်္ဂလားဒေ့ရှ်အစိုးရက စီစဉ်ထားပေမယ့် မုန်တိုင်းဒဏ်ခံရပြီး မကြာခဏရေကြီးလေ့ရှိတဲ့အတွက် ဒုက္ခသည်တွေကို ဒီနေရာပို့တာဟာ မသင့်တော်ဘူးဆိုတဲ့ ဝေဖန်မှုတွေလည်း ရှိနေပါတယ်။ ဘင်္ဂလားဒေ့ရှ်အစိုးရကတော့ သဘာ၀ဘေးအန္တရာယ်ကို ကာကွယ်နိုင်ဖို့အတွက် လိုအပ်တာတွေအားလုံး လုပ်ဆောင်ပေးထားတယ်လို့ တုန့်ပြန်ပါတယ်။

    ဘာဆန်ချာကျွန်းကို ပြောင်းရွှေ့သွားကြတဲ့ ရိုဟင်ဂျာဒုက္ခသည်တွေရဲ့ လူမှုဘ၀ကို ပိုမို ထောက်ပံ့ကူညီနိုင်ရေး ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) နဲ့ ဘင်္ဂလာဒေ့ရှ်အစိုးရတို့ သဘောတူညီချက်တစ်ခုကို လက်မှတ်ရေးထိုးနိုင်ခဲ့ပါတယ်။

    “အဲဒီ သဘောတူညီချက်တွေထဲမှာ အကာအကွယ်ပေးရေး၊ ပညာရေး၊ အသက်မွေးဝမ်းကြောင်း အတတ်ပညာ သင်ကြားပေးရေး၊ ကျန်းမာရေးစောင့်ရှောက်မှု ပေးနိုင်ရေး စတာတွေ ပါဝင်ပြီး၊ ဒုက္ခသည်တွေ ကျွန်းပေါ်မှာ ကောင်းမွန်တည်ငြိမ်စွာ နေထိုင်ရပ်တည်နိုင်ရေး အထောက်အပံ့ဖြစ်စေသလို၊ အနာဂတ်မှာ နေရပ်မြန်မာနိုင်ငံကို ပြန်နိုင်ရေး ပြင်ဆင်ပေးတာမျိုးလည်း ဖြစ်ပါတယ်” လို့ UNHCR က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

    ဘင်္ဂလားဒေ့ရှ် သဘာ၀ဘေးအန္တရာယ် စီမံခန့်ခွဲရေးနဲ့ ကယ်ဆယ်ရေး ဝန်ကြီးဌာန အကြီးတန်းတာဝန်ရှိသူ မိုဟာမက် မိုဆင်က ဘာဆန်ချာကျွန်းပေါ်မှာ ရိုဟင်ဂျာ ဒုက္ခသည် ၈၁၀၀၀ လောက် ရောချထားပေးဖို့ စီစဉ်ထားတယ်လို့ ပြောပါတယ်။

    ကျွန်းပေါ်မှာ သွားလာခွင့် ကန့်သတ်ခံရတာ၊ အသက်မွေးဝမ်းကြောင်းလုပ်ငန်း လုပ်ကိုင်ခွင့်မရတာ၊ ကျန်းမာရေး စောင့်ရှောက်မှုနဲ့ ပညာရေး လုံလုံလောက်လောက်မရတာ စတဲ့ အခက်အခဲတွေ ရှိနေတယ်လို့ ရိုဟင်ဂျာ ဒုက္ခသည်တွေက ပြောပါတယ်။

    ဩဂုတ်လအတွင်းက ဘာဆန်ချာကျွန်းကနေ လှေနဲ့ ထွက်ပြေးသွားရာမှာ လှေမှောက်တဲ့အတွက် အနည်းဆုံး ရိုဟင်ဂျာ ဒုက္ခသည် ၁၂ ဦး သေဆုံးခဲ့ပါတယ်။

    Ref: Reuters

  • ရိုဟင်ဂျာခေါင်းဆောင် အသတ်ခံရမှုကို ထိထိရောက်ရောက် စုံစမ်းအရေးယူမည်ဟု ဘင်္ဂလားဒေ့ရှ်ပြော

    ရိုဟင်ဂျာခေါင်းဆောင် အသတ်ခံရမှုကို ထိထိရောက်ရောက် စုံစမ်းအရေးယူမည်ဟု ဘင်္ဂလားဒေ့ရှ်ပြော

    အောက်တိုဘာ ၃၊ ၂၀၂၁
    M-Media

    -ကော့ဆက်ဘဇားက ရိုဟင်ဂျာဒုက္ခသည်စခန်းမှာ ပြီးခဲ့တဲ့တစ်ပတ်က ရိုဟင်ဂျာခေါင်းဆောင်တစ်ဦး အသတ်ခံရမှု ကိစ္စကို ထိထိရောက်ရောက် စုံစမ်းအရေးယူသွားမယ်လို့ ဘင်္ဂလားဒေ့ရှ်နိုင်ငံခြားရေးဝန်ကြီးက မနေ့မှာ ပြောကြားလိုက်ပါတယ်။

    အသက် ၄၀ ကျော်အရွယ် မိုဟီဘူလာဟာ ဗုဒ္ဓဟူးနေ့ညနေပိုင်းက သေနတ်သမားတစ်ဦးရဲ့ သတ်ဖြတ်ခြင်းကို ခံလိုက်ရတာပါ။ သတ်ဖြတ်သူတွေကို ဖော်ထုတ်အရေးယူဖို့ နိုင်ငံတကာ လူ့အခွင့်အရေးအဖွဲ့တွေက ဘင်္ဂလားဒေ့ရှ်ကို တောင်းဆိုတာတွေလည်း ရှိနေပါတယ်။

    “သတ်ဖြတ်မှုမှာ ပါဝင်တဲ့သူတွေကို ထိထိရောက်ရောက် ဖော်ထုတ်အရေးယူသွားမှာပါ။ ဘယ်သူကိုမှ ချမ်းသာမပေးပါဘူး” လို့ ဘင်္ဂလားဒေ့ရှ် နိုင်ငံခြားရေးဝန်ကြီး အေကေ အဘ်ဒူလ် မိုမင်က ပြောပါတယ်။

    မိုဟီဘူလာဟာ ရိုဟင်ဂျာ ဒုက္ခသည်တွေကို မြန်မာနိုင်ငံ ပြန်စေချင်သူဖြစ်ပြီး ဒီကိစ္စကြောင့် အကျိုးစီးပွား ထိခိုက်နိုင်တဲ့သူတွေက မိုဟီဘူလာကို သတ်ဖြတ်တာမျိုး ဖြစ်တယ်လို့လည်း မိုမင်က ဆိုပါတယ်။

    “မိုဟီဘူလာကို သတ်ဖြတ်သူတွေဟာ တရားဥပဒေရှေ့မှောက်ကို မုချ ရောက်လာရမှာ ဖြစ်ပါတယ်”

    ကော့ဆက်ဘဇားရဲတပ်ဖွဲ့က ဒီသတ်ဖြတ်မှုအတွက် ဒုက္ခသည်စခန်းက လူ ၃ ဦးကို ဖမ်းဆီးထားတယ်လို့ ထုတ်ပြန်ပါတယ်။

    မိုဟီဘူလာဟာ ‘ငြိမ်းချမ်းရေးနဲ့ လူ့အခွင့်အရေးဆိုင်ရာ အာရကန်ရိုဟင်ဂျာအဖွဲ့အစည်း’ (ARPSH) ကို ဖွဲ့စည်းတည်ထောင်ကာ ၂၀၁၇ ခုနှစ် မြန်မာစစ်တပ်ရဲ့ ရိုဟင်ဂျာတွေအပေါ် ကျူးလွန်တဲ့ ရာဇဝတ်မှုတွေကို စနစ်တကျ မှတ်တမ်းတင် ဖော်ထုတ်နေသူတစ်ဦး ဖြစ်ပါတယ်။

    သူဟာ ရိုဟင်ဂျာတွေ နေရပ်မြန်မာနိုင်ငံကိုပြန်ရေး လိုလားသူတစ်ဦးလည်းဖြစ်ပြီး၊ သဘောထားတင်းမာသူတွေရဲ့ ခြိမ်းခြောက်မှုကို အရင်ကတည်းက ခံခဲ့ရသူလည်း ဖြစ်ပါတယ်။

    ဆိုရှယ်မီဒီယာမှာ ပြန့်နှံ့နေတဲ့ ဗီဒီယိုတစ်ခုမှာ မိုဟီဘူလာရဲ့ညီ ဟာဘီဘူလာက သူ့အစ်ကို အသတ်ခံရတာကို သူကိုယ်တိုင် မျက်မြင်တွေ့ခဲ့ရကြောင်း၊ ဒါဟာ အာဆာ(ARSA) အဖွဲ့ရဲ့လက်ချက်ဖြစ်ကြောင်း ပြောကြားထားပါတယ်။ အာဆာဟာ ရိုဟင်ဂျာလက်နက်ကိုင်အဖွဲ့တစ်ခု ဖြစ်ပါတယ်။

    Ref: Reuters

  • ထင်ရှားသည့် ရိုဟင်ဂျာခေါင်းဆောင်တစ်ဦး အသတ်ခံရ

    ထင်ရှားသည့် ရိုဟင်ဂျာခေါင်းဆောင်တစ်ဦး အသတ်ခံရ

    စက်တင်ဘာ ၃၀၊ ၂၀၂၁
    M-Media

    -ဘင်္ဂလားဒေ့ရှ်တောင်ပိုင်း ဒုက္ခသည်စခန်းက ရိုဟင်ဂျာခေါင်းဆောင်တစ်ဦး မနေ့က သေနတ်နဲ့ ပစ်ခတ်သတ်ဖြတ်ခြင်း ခံခဲ့ရပါတယ်။

    အသက် ၄၀ ကျော်အရွယ် မိုဟီဘူလာဆိုသူဖြစ်ပြီး ညနေပိုင်း ဘုရားရှစ်ခိုးပြီးတဲ့နောက် သူ့ရဲ့ရုံးခန်းအပြင်မှာ အခြားရိုဟင်ဂျာ ခေါင်းဆောင်တွေနဲ့ စကားပြောနေစဉ်အတွင်း သေနတ်နဲ့ ၃ ချက်ဆက် ပစ်သတ်ခံလိုက်ရတာ ဖြစ်ပါတယ်။

    မိုဟီဘူလာဟာ ‘ငြိမ်းချမ်းရေးနဲ့ လူ့အခွင့်အရေးဆိုင်ရာ အာရကန်ရိုဟင်ဂျာအဖွဲ့အစည်း’ (ARPSH) ကို တည်ထောင်ကာ ရိုဟင်ဂျာအရေးကို ဆောင်ရွက်နေသူဖြစ်ပါတယ်။ အမေရိကန်သမ္မတ ဒေါ်နယ်ထရမ့်လက်ထက် နိုင်ငံတကာက အဖိနှိပ်ခံလူမျိုးစု ကိုယ်စားလှယ်တွေကို အိမ်ဖြူတော်မှာ ခေါ်ယူတွေ့ဆုံစဉ်အတွင်း မိုဟီဘူလာတစ်ယောက် ရိုဟင်ဂျာတွေကို ကိုယ်စားပြုပြီး တက်ရောက်ခွင့်ရခဲ့ပါတယ်။

    ၂၀၁၇ ခုနှစ် မြန်မာစစ်တပ်က ရိုဟင်ဂျာတွေကို သတ်ဖြတ်မောင်းထုတ်မှုအပြီး ဖွဲ့စည်းခဲ့တဲ့ ARPSH ဟာ ရိုဟင်ဂျာတွေ ဖိနှိပ်ညှင်းပမ်းခံရမှု၊ စစ်တပ်ရဲ့ သတ်ဖြတ်မှု၊ အဓမ္မကျင့်မှုတွေအကြောင်း မိသားစုတစ်ခုချင်းစီကနေ စနစ်တကျ မှတ်တမ်းယူတာမျိုး လုပ်ဆောင်ခဲ့တဲ့ အဖွဲ့အစည်းလည်း ဖြစ်ပါတယ်။

    ဒုက္ခသည်စခန်းတည်ရှိရာ ကော့ဆက်ဘဇား ရဲတပ်ဖွဲ့ကတော့ မိုဟီဘူလာ အသတ်ခံရမှုကို အတည်ပြုခဲ့ပြီး အသေးစိတ်ကို ပြောကြားခဲ့ခြင်းမရှိပါဘူး။ ဒုက္ခသည်စခန်းက ရိုဟင်ဂျာခေါင်းဆောင်တွေဟာ ဒီအဖြစ်အပျက် ဖြစ်ပွားပြီးနောက်ပိုင်း ဘေးလွတ်ရာကို တိမ်းရှောင်နေကြပါတယ်။

    ကုလသမဂ္ဂ ဒုက္ခသည်ကူညီရေးအဖွဲ့ UNHCR ရဲ့ပြောရေးဆိုခွင့်ရှိသူက မိုဟီဘူလာ အသတ်ခံရတဲ့သတင်းအတွက် အလွန်အမင်း စိတ်မကောင်းဖြစ်ရတယ်လို့ ပြောကြားခဲ့ပါတယ်။

    ရိုဟင်ဂျာတွေထဲက သဘောထားတင်းမာသူတွေဟာ မိုဟီဘူလာကို အသက်အန္တရာယ်ခြိမ်းခြောက်တာမျိုး အရင်က ရှိခဲ့ဖူးပါတယ်။ ၂၀၁၉ ခုနှစ် ရိုက်တာသတင်းဌာနနဲ့ အင်တာဗျူးမှာ မိုဟီဘူလာက သူ့ရဲ့အသက်ကို စတေးဖို့ အဆင်သင့်ပဲလို့ ဖြေကြားခဲ့ပါတယ်။

    လူ့အခွင့်အရေးစောင့်ကြည့်အဖွဲ့ (HRW) ရဲ့ တောင်အာရှရေးရာအကြီးအကဲ မီနာရှီ ဂန်ဂူလီက မိုဟီဘူလာဟာ ရိုဟင်ဂျာလူ့အဖွဲ့အစည်းအတွက် အရေးပါသူတစ်ဦးဖြစ်တယ်လို့ ပြောကြားခဲ့ပါတယ်။

    “သူသတ်ဖြတ်ခံရမှုဟာ ဒုက္ခသည်စခန်းက လွတ်လပ်မြောက်ရေး၊ အကြမ်းဖက်မှုဆန့်ကျင်ရေး အသံထုတ်နေတဲ့လူတွေ ရင်ဆိုင်နေရတဲ့ အန္တရာယ်ကို ထင်ထင်ရှားရှား မီးမောင်းထိုးပြလိုက်တာ ဖြစ်ပါတယ်”

    Ref: Aljazeera