မေ ၁၄၊ ၂၀၂၀
M-Media

မက်ဆီငယ်စဉ်က ပြိုင်ဘက်များ၏ အညှိုးထားမှုကို ခံစားခဲ့ရ

မက်ဆီငယ်စဉ်က ဘောလုံးကစားတဲ့အခါ ပြိုင်ဘက်တွေရဲ့ အညှိုးထား တိုက်ခိုက်မှုကို ကြုံတွေ့ခဲ့ရပြီး ဒီအခက်အခဲတွေကို ကျော်လွှားနိုင်ခဲ့တယ်လို့ ဝမ်းကွဲညီအစ်ကို မာဇီ ဘီယန်ကျူချီက ပြောကြားလိုက်ပါတယ်။ မက်ဆီဟာ လွန်ခဲ့တဲ့ ၁၅ နှစ်အတွင်း ဘောလုံးလောကရဲ့ ဂန္တဝင်တစ်ဆူဖြစ်ခဲ့ပြီး ကမ္ဘာ့အကောင်းဆုံး ဘောလုံးသမားဆုကို ၆ ကြိမ်ရတဲ့အထိ အောင်မြင်ခဲ့ပါတယ်။ ‘ငါတို့ ဒီကောင့်ကို သတ်မိလိမ့်မယ်’ ဆိုတဲ့ မကျေမနပ်ပြောဆိုမှုတွေ မက်ဆီငယ်ဘ၀မှာ ကြုံတွေ့ခဲ့ရပြီး၊ မနက်​စောစောထကာ ကစားပုံကို စောင့်ကြည့်ရတဲ့အထိ မက်ဆီက ကောင်းမွန်ခဲ့တယ်လို့လည်း မာဇီက ထည့်သွင်းပြောဆိုခဲ့ပါတယ်။

တိုက်စစ်မှူး ဒမ်ဘီလီကို မန်ယူက ယူရို သန်း ၇၀ ဖြင့် ခေါ်ယူမည်

လိုင်ယွန်တိုက်စစ်မှူး မူဆာ ဒမ်ဘီလီကို ယူရို သန်း ၇၀ နဲ့ ခေါ်ယူဖို့ မန်ချက်စတာယူနိုက်တက်က သဘောတူညီချက်ရသွားပြီလို့ သတင်းထွက်လာပါတယ်။ အသက် ၂၃ နှစ်အရွယ် ဒမ်ဘီလီဟာ ၂၀၁၆ ခုနှစ်ခုနှစ်မှာ ဖူလ်ဟမ်အသင်းကနေ ဆဲလ်တစ်ကို ပြောင်းရွှေ့သွားပြီး အဲဒီကမှတစ်ဆင့် လိုင်ယွန်ကိုရောက်ကာ ခြေစွမ်း​ပြနေတာကြောင့် ဥရောပ ထိပ်သီးကလပ်တော်တော်များများရဲ့ စိတ်ဝင်စားမှုကို ခံနေရသူပါ။ လက်ရှိ ၂၀၁၉-၂၀ ဘောလုံးရသီမှာ ဒမ်ဘီလီဟာ လိုင်ယွန်အတွက် ၂၂ ဂိုး သွင်းယူပေးထားပါတယ်။

စပါးကွင်းလယ်လူ၏ နေအိမ်တွင် ဓားပြတိုက်ခံရ

တော့တင်ဟမ် ​ဟော့စပါးအသင်းရဲ့ ကွင်းလယ်လူ ဒယ်လီ အလီရဲ့ နေအိမ်မှာ မေလ ၁၃ ရက်နေ့မနက် အစောပိုင်းက ဓားပြတိုက်မှုတစ်ခုဖြစ်ပွားခဲ့ပါတယ်။ ဓားပြနှစ်ဦးဟာ အလီကို ဓားနဲ့ထောက်ကာ ထိုးကြိတ်ခဲ့ပြီး အဖိုးတန်ရတနာတွေကို ယူဆောင်သွားတာပါ။ ဒီဖြစ်စဉ်အတွင်း မျက်နှာဒဏ်ရာရခဲ့တဲ့ အလီက ဆိုရှယ်မီဒီယာကနေတစ်ဆင့် အာပေးစကားပြောကြားခဲ့ကြတဲ့ ပရိသတ်တွေကို ကျေးဇူးတင်တယ်လို့ ပြောကြားခဲ့ပါယ်။ စပါးနောက်ခံလူတစ်ဦးဖြစ်တဲ့ ဂျန်ဗာတွန်ဟန်ရဲ့ လန်ဒန်မြောက်ပိုင်းက နေအိမ်မှာလည်း လွန်ခဲ့တဲ့ နှစ်လလောက်က ဓားပြတိုက်မှု ဖြစ်ခဲ့ပါတယ်။

ကွာရန်တင်းကာလတွင် ဘာလော့တယ်လီ ရူးမတတ်ဖြစ်ခဲ့

သီးခြားနေထိုင်မှုကာလ (Quarantine) အတွင်း မိမိအနေနဲ့ အထီကျန်ကာ ရူးမတတ်ဖြစ်ခဲ့ရတယ်လို့ စီးရီအေကလပ် ဘရက်စီယာအသင်း တိုက်စစ်မှူး မာရီယို ဘာလော့တယ်လီက ပြောကြားလိုက်ပါတယ်။ အီတလီမှာ ကိုရိုနာဗိုင်းရပ်စ် အကြီးအကျယ် ပြန့်နှံ့မှုကြောင့် စီးရီးအေပြိုင်ပွဲကို ရပ်ဆိုင်းခဲ့ပြီး တစ်ချို့အသင်းတွေမှာ ကစားသမားတွေ ကိုရိုနာသံသယနဲ့ သီးခြားနေထိုင်ခဲ့ရပါတယ်။ ဘာလိုတယ်လီက ပထမ ၃ ရက်မှာ ကတ္ထူစက္ကူတွေ၊ နံရံကသစ်သားတွေကို ကိုက်စားတဲ့အထိ ဖြစ်ခဲ့ပြီး နောက်ပိုင်းမှ နေသားကျသွားခဲ့တယ်လို့ ဖွင့်ဟခဲ့ပါတယ်။

Ref: Goal

ဧပြီ ၂၂၊ ၂၀၂၀
M-Media

ဆော်ဒီအိမ်ရှေ့မင်းသား ပရီးမီးယားလိဂ်သို့ ခြေလှမ်းမှု AI သတိပေး

ဆော်ဒီအိမ်ရှေ့မင်းသား မိုဟာမက် ဘင်ဆလ်မန်က နယူးကာဆယ်အသင်းကို ဝယ်ယူဖို့ ကြိုးစားမှုကို ခွင့်ပြုလိုက်ရင် ပရီးမီးယားလိဂ်ဟာ အစာသွပ်မုန့်လို ဖြစ်သွားလိမ့်မယ်လို့ နိုင်ငံတကာ လူ့အခွင့်အရေးအဖွဲ့ Amnesty International က သတိပေးလိုက်ပါတယ်။ မင်းသားနဲ့အဖွဲ့ဟာ နယူးကာဆယ်အသင်းရဲ့ ရှယ်ယာ ၈၀ ရာခိုင်နှုန်းကို ဝယ်ယူဖို့ နီးစပ်နေတာဖြစ်ပါတယ်။ ဒါပေမယ့် ဆော်ဒီရဲ့ လူ့အခွင့်အရေးချိုးဖောက်မှု မှတ်တမ်းတွေကြောင့် ဒီဝယ်ယူမှုအပေါ် နိုင်ငံတကာ လူ့အခွင့်အရေးအဖွဲ့တွေက ဝေဖန်ကန့်ကွက်နေကြပါတယ်။

အင်တာအသင်း၏ ကစားသမား ၂၃ ဦးတွင် ကိုရိုနာလက္ခဏာတွေ့ခဲ့ရဟု လူကာကူ ဖွင့်ဟ

အင်တာမီလန်အသင်းရဲ့ လူစာရင်း ၂၅ ယောက်မှာ ၂၃ ယောက်က ပြီးခဲ့တဲ့နှစ် ဒီဇင်ဘာလောက်ကတည်းက ကိုရိုနာဗိုင်းရပ်စ် ကူးစက်နေတဲ့ လက္ခဏာတွေကို တွေ့ခဲ့ရတယ်လို့ တိုက်စစ်မှူး လူကာကူက ပြောကြားလိုက်ပါတယ်။ အီတလီဟာ ဗိုင်းရပ်စ်ကူးစက်မှုဒဏ်ကို အဆိုးဝါးဆုံး ခံစားခဲ့ရပြီး စီးရီးအေက ကစားသမားတစ်ချို့မှာလည်း ကူးစက်မှုတွေ ရှိခဲ့ပါတယ်။ အင်တာမီလန်အသင်းမှာတော့ ကူးစက်တယ်လို့ သတင်းထွက်မလာသေးပါဘူး။ ဒါပေမယ့် ဒီဇင်ဘာနဲ့ ဇန်နဝါရီလမှာ ကစားသမားအချို့ ဖျားနာတာလာတာကြောင့် ပွဲကစားချိန်အတွင်း လူစားလဲခဲ့ရတာတွေ ရှိခဲ့ပါတယ်။

ဆေးရုံမှ သူနာပြုလစာ ၃ လစာကို တာဝန်ယူရဲ့ ဂျာမနီနောက်ခံလူ

ဂျာမန်ဘွန်ဒစ်လီဂါက စတုဂတ်အသင်းရဲ့ နောက်ခံလူ အန်တိုနီယို ရူဒီဂါဟာ သူမွေးဖွားခဲ့တဲ့ ဘာလင်က ဆေးရုံတစ်ခုမှာ သူနာပြုအားလုံးရဲ့ လခ ၃ လစာကို ပေးချေလှူဒါန်းသွားမယ်လို့ သိရပါတယ်။ ဂျာမနီဟာ ဥရောပမှာ ကိုရိုနာဗိုင်းရပ်စ်ဒဏ်ကို ဆိုးဆိုးဝါးဝါး ခံစားနေရတဲ့ နိုင်ငံတွေထဲကတစ်ခု​ ဖြစ်ပါတယ်။ ရူဒီဂါဟာ ၁၉၉၃ ခုနှစ်က​​ ဘာလင်မြို့မှာရှိတဲ့ Charité ဆေးရုံမှာ မွေးဖွားခဲ့တာဖြစ်ပါတယ်။ ကိုရိုနာဗိုင်းရပ်စ်တိုက်ဖျက်ရေးအတွက် ကမ္ဘာ့ထိပ်တန်း ဘောလုံးကစားသမားတွေဟာ စုပေါင်းလှူဒါန်းမှုတွေ ပြုလုပ်နေပါတယ်။

Ref: Goal

မတ် ၂၁၊ ၂၀၂၀
M-Media

ဥရောပဘောလုံးပြိုင်ပွဲများကို မေလလယ်တွင် ပြန်စရန် စီစဉ်

ကိုရိုနာဗိုင်းရပ်စ် ပြန့်နှံ့မှုကြောင့် လက်ရှိရပ်ဆိုင်းထားတဲ့ ဥရောပ ဘောလုံးပြိုင်ပွဲတွေအားလုံးကို လာမယ့် မေလအလယ်ပိုင်းလောက် ပြန်စနိုင်ဖို့ မျှော်မှန်းထားတယ်လို့ စပိန်လာလီဂါ ကျင်းပရေးအဖွဲ့ ဥက္ကဌ ဂျာဗီယာတီဗက်စ်က ပြောကြားလိုက်ပါတယ်။ ယူရို ၂၀၂၀ ကို နောက်နှစ် ရွှေ့လိုက်တာကြောင့် ဥရောပနိုင်ငံတွေက ဘောလုံးပြိုင်ပွဲတွေ ဆက်လက်ကျင်းပဖို့ အချိန်ရသွားတာ ဖြစ်ပါတယ်။ တီဘက်စ်က ရပ်ဆိုင်းထားရတဲ့ အမှတ်ပေးပြိုင်ပွဲတွေ၊ ရှုံးထွက်ဖလားပြိုင်ပွဲတွေဟာ ၃၀ လောက်ရှိပြီး ပြန်လည်ကျင်းပနိုင်ရေးအတွက် ပူးပေါင်းဆောင်ရွက်သွားမယ်လို့ ဆိုပါတယ်။

ဆွစ်ကလပ်တစ်ခုက ကစားသမားကို ၉ ဦးကို တစ်ပြိုင်တည်းထုတ်ပယ်

• ဆွစ်ဇာလန် ဆူပါလိဂ်ကလပ် FC Sion အသင်းဟာ ကစားသမား ၉ ဦးကို မနေ့က တစ်ပြိုင်တည်း ထုတ်ပယ်လိုက်ပါတယ်။ ကိုရိုနာဗိုင်းရပ်စ် ကာလအတွင်း လခလျော့ယူဖို့ ညှိနှိုင်းမှုကို လက်မခံတဲ့အတွက် ဒီလို ထုတ်ပယ်လိုက်တာပါ။ ထုတ်ပယ်ခံရသူတွေထဲမှာ အာဆင်နယ်ကစားသမားဟောင်း အဲလက်ဆောင်းနဲ့ ဂျိုဟန် ဂျိုရူး၊ ဖူလ်ဟမ် ကွင်းလယ်ကစားသမားဟောင်း ပက်ဂျ်တင် ကာဆာမီတို့ ပါဝင်ပါတယ်။ ဆွစ်ဇာလန်အစိုးရက လူ ၁၀၀၀ ထက် ပိုမစုရဘူးလို့ အမိန့်ထုတ်ပြန်ထားတာကြောင့် ဆူပါလိဂ်ကို မတ်လ ၁ ရက်နေ့ကတည်းက ရပ်ဆိုင်းထားပါတယ်။

ကိုရိုနာဗိုင်းရပ်စ်တိုက်ဖျက်ရေး ရိုးမားအသင်းက စက်ပစ္စည်းနှင့် ငွေများ လှူဒါန်း

စီးရီးအေကလပ် ရိုးမားအသင်းဟာ ရောမမြို့က ဆေးရုံတစ်ခုကို အသင်းမှာရှိနေတဲ့ အရေးပေါ် အသက်ရှူစက် ၃ ခုနဲ့ ကုတင် ၈ ခုကို လှူဒါန်းခဲ့ပါတယ်။ ဒါ့အပြင် ပထမအသင်း ကစားသမားတွေနဲ့ နည်းပြတွေရဲ့ တစ်ရက်စာ လုပ်အားခ စုစုပေါင်း ယူရို ၄၆၀၀၀၀ ကိုလည်း ကိုရိုနာဗိုင်းရပ်စတိုက်ဖျက်ရေးအတွက် လှူဒါန်းခဲ့ပါတယ်။ အီတလီဟာ ဥရောပမှာ ကိုရိုနာဗိုင်းရပ်စ်ဒဏ်ကို အဆိုးဝါးဆုံး ရင်ဆိုင်နေရတဲ့ နိုင်ငံ ဖြစ်လာပါတယ်။

Ref: BBC

#mmFootballNews