မတ် ၉၊ ၂၀၂၀
M-Media

မန်ယူနည်းပြရာထူးက အခွင့်ထူးဖြစ်သည်ဟု ဆိုးလ်ရှားခံစားနေရ

မန်ယူကစားသမားတွေကို နည်းပြခွင့်ရတာဟာ အခွင့်ထူးတစ်ခုဖြစ်တယ်လို့ မန်ယူနည်းပြ အိုလီ ဂူနာ ဆိုးလ်ရှားက ပြောကြားလိုက်ပါတယ်။ မနေ့က မန်ယူဟာ အိမ်ကွင်းမှာ မန်စီးတီးကို ၂ ဂိုးပြတ်နိုင်ခဲ့ပြီး အဲဒီပွဲဟာ ၁၀ စုနှစ်တစ်ခုအတွင်း မြို့ခံပြိုင်ဘက်ကို ပထမဆုံးအကြိမ် အနိုင်ရရှိမှုလည်း ဖြစ်ပါတယ်။ ဆိုးလ်ရှားက အသင်းသားတွေကို ချီးကျူးခဲ့ပြီး အသင်းလိုက်ကစားပုံ တိုးတက်လာကြောင်း၊ ချန်ပီယံလိဂ်ဝင်ခွင့်နေရာ ရရှိဖို့အတွက် အမှတ်လိုအပ်တာကြောင့် အခုကစားပုံအတိုင်း ဆက်သွားရမှာဖြစ်ကြောင်း ထည့်သွင်းပြောဆိုခဲ့ပါတယ်။

စီးရီးအေတာဝန်ရှိသူများ တာဝန်မဲ့သည်ဟု အီတလီအားကစားဝန်ကြီး ဝေဖန်

ရာသီကုန်အထိ ဘောလုံးပြိုင်ပွဲတွေ ဆက်ကစားဖို့ စီးရီးအေတာဝန်ရှိသူတွေရဲ့ ဆုံးဖြတ်ချက်ဟာ တာဝန်မဲ့တဲ့လုပ်ရပ်တစ်ခု ဖြစ်တယ်လို့ အီတလီ အားကစားရေးရာဝန်ကြီး ဗင်ဆန်ဇို ဆပါဒါဖိုရာက ဝေဖန်ပြောကြားလိုက်ပါတယ်။ အီတလီနိုင်ငံ အထူးသဖြင့် မြောက်ပိုင်းဒေသမှာ ကိုရိုနာဗိုင်းရပ်စ်ပိုး အကြီးအကျယ်ပြန့်နှံ့နေပြီး ပြည်နယ်ပေါင်း ၁၅ ခုလောက်ကိုလည်း အစိုးရ တံခါးပိတ်ထားပါတယ်။ အားကစားပြိုင်ပွဲတော်တော်များများကို ရပ်ဆိုင်းထားပေမယ့် စီးရီးအေ တာဝန်ရှိသူတွေက ပရိတ်သတ်မပါဘဲ ပွဲတွေကိုဆက်ကစားဖို့ ဆုံးဖြတ်ခဲ့ပါတယ်။ ဆပါဒါဖိုရာက ပြည်သူတွေကို အိမ်ထဲမှာသာနေဖို့ အကြံပြုထားချိန် ကမ္ဘာ့ဘောလုံးလောကဟာ သူတို့ကိုယ်သူတို့ သိပ်ကို ကိုယ်ခံအားကောင်းတယ်လို့ ထင်နေကြ​ကြောင်း ထည့်သွင်းပြောဆိုခဲ့ပါတယ်။

အဲဗာတန်ကိုနိုင်သည့်ပွဲက အပြည့်စုံဆုံးပွဲဟု လမ်းပတ်ပြော

မနေ့က အဲဗာတန်အသင်းကို ၄ ဂိုးပြတ်နဲ့ အနိုင်ရခဲ့တဲ့ပွဲဟာ ရာသီတစ်လျှောက်လုံမှာ အပြည့်စုံဆုံး အိမ်ကွင်းနိုင်ပွဲဖြစ်တယ်လို့ ချယ်ဆီးနည်းပြ ဖရန့်လမ်းပတ်က ပြောကြားလိုက်ပါတယ်။ ချယ်ဆီးဟာ ပြီးခဲ့တဲ့ ၆ ပွဲမှာ တစ်ပွဲသာအနိုင်ရခဲ့တာကြောင့် အဆင့် ၄ နေရာအတွက် မန်ယူအသင်းရဲ့ ဖိအားပေးမှုကို ခံလာရပြီး ပရိတ်သတ်​တွေရဲ့ လမ်းပတ်အပေါ် ယုံကြည်မှုလည်း လျော့နည်းလာခဲ့တာပါ။ ဒါပေမယ့် မနေ့ကပွဲမှာတော့ လမ်းပတ်ဟာ ပရိတ်သတ်တွေရဲ့ ချီးကျူးမှုကို ရရှိခဲ့ပါတယ်။ ဒီကစားပုံကို လာမယ့်ပွဲတွေမှာ ဆက်လက်သယ်ဆောင်သွားပြီး ရာသီကုန်ရင် ခိုင်မာတဲ့အဆင့်တစ်ခုမှာ ရပ်တည်နိုင်အောင် ကြိုးစားသွားမယ်လို့ လမ်းပတ်က ထည့်သွင်း ပြောဆိုခဲ့ပါတယ်။

Ref: BBC

mmFootballNews

နိုဝင်ဘာ ၈၊ ၂၀၁၉
M-Media

အသက် ၃၈ နှစ်အရွယ် တိုက်စစ်မှူး ဇလာတန် အီဘရာဟီမိုဗစ် အေစီမီလန်သို့ ပြောင်းမည်

အသင်းရဲ့ ဆွီဒင်တိုက်စစ်မှူး ဇလာတန် အီဘရာဟီမိုဗစ်ဟာ အခုရာသီကုန်ရင် စီးရီးအေကလပ် အေစီမီလန်အသင်းကို ပြောင်းရွှေ့တော့မယ်လို့ မေဂျာလိဂ်ကလပ် LA Glaxy အသင်းက အတည်ပြု ပြောကြားလိုက်ပါတယ်။ အသက် ၃၈ နှစ်အရွယ် ရှိပြီဖြစ်တဲ့ မိုဗစ်ဟာ ၂၀၁၈ ခုနှစ် မတ်လကမှ မေဂျာလိဂ်ကို ပြောင်းရွှေ့လာတာပါ။ ၂၀၁၀ ကနေ ၂၀၁၂ ခုနှစ်အထိ အေစီမီလန်မှာကစားစဉ် ၆၁ ပွဲပါဝင်ခဲ့ပြီး ၄၂ ဂိုး သွင်းယူနိုင်ခဲ့ပါတယ်။ လက်ရှိ မေဂျာလိဂ်မှာ ၅၃ ဂိုး သွင်းထားပြီး ၂၀၁၈-၂၀၁၉ ဘောလုံးရာသီ မေဂျာလိဂ် အကောင်းဆုံး ၁၁ ယောက်စာရင်းမှာလည်း ပါဝင်နေပါတယ်။

ဘာ‌လော့တယ်လီကို ဘာရက်စီယာအသင်း အားပေးသူများအဖွဲ့က ဝေဖန်

ပြီးခဲ့တဲ့တစ်ပတ် ဗီရိုနာအသင်းကို ၂ ဂိုး ၁ ဂိုးနဲ့ အနိုင်ရခဲ့တဲ့ပွဲ အပြုအမူအတွက် တိုက်စစ်မှူး ဘာလော့တယ်လီကို ဘရက်စီယာအသင်း အားပေးသူများအဖွဲ့က ‘အသိဉာဏ်မဲ့သူ’ လို့ ပြင်းပြင်းထန်ထန် ဝေဖန်လိုက်ပါတယ်။ အဲဒီပွဲမှာ တစ်ဖက်အသင်းပရိတ်သတ်ရဲ့ လူမျိုးရေးခွဲခြားမှုကို ခံခဲ့ရပြီးတဲ့နောက် ဘာလော့တယ်လီဟာ ဘောလုံးကို ပရိတ်သတ်တွေထဲ ကန်ထည့်ပြီး ပွဲဆက်မကစားတော့ဘူးလို့ ခြိမ်းခြောက်ခဲ့တာပါ။ လူမျိုးရေးခွဲခြားမှုအတွက် ဗီရိုနာအသင်းကွင်းကို စီးရီးအေ အာဏာပိုင်တွေက တစ်ပွဲ ပိတ်ပင်ခဲ့ပါတယ်။ ဘရက်စီယာအသင်း အားပေးသူများအဖွဲ့က ဗီရိုနာ ပရိတ်သတ်အားလုံးဟာ လူမျိုးရေးခွဲခြားသူတွေ မဟုတ်ကြောင်း၊ ဘာလော့တယ်လီအနေနဲ့ ဘယ်တော့မှ အီတလီနိုင်ငံသား စစ်စစ် ဖြစ်မလာနိုင်ကြောင်း ကြေငြာချက်မှာ ဖော်ပြထားပါတယ်။

ပရီးမီးယားလိဂ် တစ်လတာ နည်းပြဆုကို ချယ်ဆီးနည်းပြ လမ်းပတ် ရရှိ

အောက်တိုဘာလအတွက် ပရီးမီးယားလိဂ် အကောင်းဆုံးနည်းပြဆုကို ချယ်ဆီးနည်းပြ ဖရန့်လမ်းပတ်က ရရှိသွားပါတယ်။ ချယ်ဆီးဟာ အောက်တိုဘာလအတွင်း ဆောက်သက်တမ်၊ နယူးကာဆယ်နဲ့ အက်စတွန်ဗီလာတို့ကို အနိုင်ကစားနိုင်ခဲ့ပြီး အသင်းကလည်း အမှတ်ပေးဇယား အဆင့် ၄ မှာ ရပ်တည်နေပါတယ်။ ပရီးမီးယားလိဂ်အဖွင့်ပွဲမှာ မန်ယူကို ၄ ဂိုးပြတ်နဲ့ ရှုံးနိမ့်ခဲ့ပြီးတဲ့နောက် လမ်းပတ်ဟာ ချယ်ဆီးကို အကောင်းဆုံးအနေအထားတစ်ခု ပြန်ရအောင် စွမ်းဆောင်နိုင်ခဲ့ပါတယ်။ နိုဝင်ဘာလ အကောင်းဆုံး နည်းပြဆုကို လီဗာပူးလ်နည်းပြ ယာဂန်ကလော့၊ ဘရိုက်တန်နည်းပြ ဂရေဟန် ပေါ်တာ၊ လက်စတာနည်းပြ ဘရန်ဒန် ရော်ဂျာနဲ့ အက်စတွန်ဗီလာနည်းပြ ဒီယန် စမတ်တို့ကို ကျော်ဖြတ်ပြီး လမ်းပတ်က ရရှိခဲ့တာပါ။

Ref: BBC

အောက်တိုဘာ ၁၅၊ ၂၀၁၉
M-Media

လူမျိုးရေးပြဿနာကြောင့် ဘူလ်ဂေးရီးယား ဘောလုံးအဖွဲ့ချုပ်ဥက္ကဌ နှုတ်ထွက်

မနေ့က အင်္ဂလန်အသင်းနဲ့ပွဲစဉ်မှာ လူမျိုးရေးခွဲခြားမှု‌တွေ ဖြစ်ပေါ်ခဲ့ပြီးတဲ့နောက် ဘူလ်ဂေးရီးယား‌ ဘောလုံးအဖွဲ့ချုပ် ဥက္ကဌ ဘိုရီဆလဗ် မီဟေလော့ဗ်ဟာ ရာထူးကနေ နှုတ်ထွက်သွားခဲ့ပါတယ်။ ယူရို ၂၀၂၀ ခြေစစ်ပွဲဖြစ်တဲ့ အဲဒီပွဲမှာ အိမ်ရှင် ဘူလ်ဂေးရီးယားက ၆ ဂိုးပြတ်နဲ့ ရှုံးနိမ့်ခဲ့တာပါ။ ပရိတ်သတ်တွေက လူမျိုးရေးခွဲခြားစော်ကားမှုတွေ ပြုလုပ်ခဲ့တဲ့အတွက် ပွဲကို ၂ ကြိမ်တိုင်တိုင် ခေတ္တရပ်ဆိုင်းခဲ့ရပါတယ်။ ပွဲစဉ်အပြီးမှာ မီဟေလော့ဗ် နှုတ်ထွက်ဖို့ ဘူလ်ဂေးရီးယားဝန်ကြီးချုပ်က ဆော်ဩခဲ့သလို၊ ဘောလုံးအဖွဲ့ချုပ်ရဲ့ ထုတ်ပြန်ချက်မှာလည်း လတ်တလောဖြစ်ပွားတဲ့ တင်းမာမှုတွေကြောင့် ဖြစ်တယ်လို့ ဖော်ပြထားပါတယ်။

ဥရောပ ဘောလုံးအဖွဲ့ချုပ် ယူအီးအက်ဖ်အေဥက္ကဌ အလက်ဇန်ဒါ စီဖီရင်ကလည်း ဘောလုံးအသိုင်းအ၀ိုင်း၊ အစိုးရတွေအနေနဲ့ လူမျိုးရေး ခွဲခြားစော်ကားမှုကို တိုက်ဖျက်ပစ်ဖို့ လိုပြီလို့ ပွဲအပြီးမှာ ဘူလ်ဂေးရီးယား-အင်္ဂလန် ပွဲအပြီးမှာ ပြောကြားခဲ့ပါတယ်။

စံချိန်ချိုးဖို့ ဘောလုံးကစားခြင်းမဟုတ်ဟု ရော်နယ်ဒိုပြော

စံချိန်တွေချိုးဖို့ ရည်ရွယ်ချက်နဲ့ ဘောလုံးကစားတာ မဟုတ်ဘဲ စံချိန်တွေကသာ သူ့ဆီရောက်လာတာလို့ ပေါ်တူဂီတိုက်စစ်မှူး ခရစ္စတီယာနို ရော်နယ်ဒိုက ပြောကြားလိုက်ပါတယ်။ မနေ့က ယူကရိန်းကို ၂ ဂိုး ၁ ဂိုးနဲ့ ရှုံးနိမ့်တဲ့ပွဲမှာ ပင်နယ်တီကနေ ချေပဂိုး ၁ ဂိုး သွင်းယူနိုင်ခဲ့တဲ့ ရော်နယ်ဒိုဟာ ကလပ်အသင်းနဲ့ နိုင်ငံအသင်းတို့အတွက် စုစုပေါင်း ဂိုး ၇၀၀ ပြည့်ကာ ဘောလုံးလောကမှာ ဂိုးအများဆုံးသွင်းယူနိုင်တဲ့ ၆ ဦးမြောက်ကစားသမားအဖြစ် ရပ်တည်နိုင်ခဲ့ပါတယ်။ ဒါပေမယ့် ၁၉၃၁ ခုနှစ်ကနေ ၁၉၅၀ ပြည့်နှစ်အထိ ဘောလုံးကစားပြီး ဂိုးပေါင်း ၈၀၀ တိတိ သွင်းယူထားတဲ့ ချက်ကစားသမား ဂျိုဆက်ဖ်ဘီကန်ရဲ့စံချိန်ကို မီဖို့တော့ အလှမ်းဝေးနေပါသေးတယ်။ ရော်နယ်ဒိုက ဒီလိုစံချိန်တွေရရှိအောင် ကူညီပေးခဲ့ကြတဲ့ အသင်းဖော်တွေ၊ နည်းပြတွေကို ကျေးဇူးတင်တယ်လို့ ထည့်သွင်း ပြောဆိုခဲ့ပါတယ်။

ဂျူဗင်တပ်စ်ဂိုးသမား ဘူဖွန် အသက် ၄၄ နှစ်အထိ ကစားဖွယ်ရှိ

အသက် ၄၁ နှစ်အရွယ် ရှိပြီဖြစ်တဲ့ ဂိုးသမား ဘူဖွန်ဟာ ဂျူဗင်တပ်စ်အသင်းအတွက် နောက်ထပ် ၂ ရာသီလောက် ဆက်ကစားပေးနိုင်သေးတယ်လို့ အေးဂျင့်ဖြစ်သူက ပြောကြားလိုက်ပါတယ်။ ပီအက်စ်ဂျီကို ပြောင်းသွားတဲ့ ဘူဖွန်ဟာ အခုနှစ်မှာ တစ်နှစ်စာချုပ်နဲ့ ဂျူဗင်တပ်စ်ကို ပြန်ရောက်လာပေမယ့် ရှက်ဇက်နီရဲ့နောက် ဒုတိယဦးစားပေးအဖြစ်သာ ရှိနေပါသေးတယ်။ သူ့ရဲ့အေးဂျင့် ဆီလ်ဗာနို မာတီနာက ဘူဖွန်ဟာ သန်မာကာ ယှဉ်ပြိုင်နိုင်စွမ်း ရှိနေသေးပြီး အနားယူရင် နည်းပြတစ်ယောက်အဖြစ် ဆက်လက်လျှောက်လှမ်းဖို့ ရှိနေတယ်လို့ ဆိုပါတယ်။

Ref: BBC, Daily Mail