Tag: Social Harmony

အောက်တိုဘာ ၁၊ ၂၀၁၅
M-Media

– USAIDS နှင့် ရန်ကုန်ရှိ အမေရိကန်သံရုံးတို့၏ ပူးပေါင်းပါဝင်မှုဖြင့် လူငယ်နှင့် လူမှုသဟဇာတဖြစ်မြောက်ရေးစင်တာမှာ We are Myanmar ဟု အမည်ပေးထားသည့် လှုပ်ရှားမှုတစ်ခုကို စတင်ခဲ့သည်ဟု သိရသည်။

အဆိုပါလှုပ်ရှားမှု၏ ဆောင်ပုဒ်မှာ “တစ်လှေထဲစီး တစ်ခရီးထဲသွား မြန်မာနိုင်ငံသား” ဖြစ်ပြီး စက်တင်ဘာ ၂၇ ရက်နေ့က ရန်ကုန်မြို့ ကန်တော်ကြီးတွင် တရားဝင်စတင်ခဲ့ခြင်းဖြစ်သည်။

လှုပ်ရှားမှုတွင် ပါဝင်သူများမှာ ဘာသာရေးနှင့် လူမျိုးရေး အတူယှဉ်တွဲနေထိုင်မှုနှင့် သဟဇာတဖြစ်ရေးတို့ကို အားပေးတိုက်တွန်းချက်များ ရေးသားထားသည့် လက်ကမ်းစာစောင်များအား ရန်ကုန်မြို့ရှိ လမ်းဆုံများတွင် ဝေငှခဲ့သည်။ ထို့ပြင် အမျိုးသားအမှတ်သညာ၊ ပဋိပက္ခများနှင့် နိုင်ငံရေးသဘောထားများကဲ့သို့ ကိစ္စရပ်များကို တစ်အိမ်တက်ဆင်း လိုက်လံ၍ ပြည်သူများနှင့် ဆွေးနွေးခဲ့ကြသည်။

“မြန်မာနိုင်ငံမှာရှိတဲ့ နိုင်ငံသားအားလုံး ဖွဲ့စည်းပုံအခြေခံဥပဒေအောက်မှာ တူညီတဲ့အခွင့်အရေး အပ်နှင်ထားခံရတယ်ဆိုတာကို အသိပညာပေးဖို့ We are Myanmar လှုပ်ရှားမှုကို ဆောင်ရွက်တာပါ။ ကျွန်တော်တို့ရဲ့ ရည်ရွယ်ချက်က နိုင်ငံသားတွေအကြားမှာ စည်းလုံးညီညွတ်မှုကို အခြေခံပြီး အောင်မြင်တဲ့ နိုင်ငံ ဖြစ်လာစေဖို့ပါပဲ” ဟု လူငယ်နှင့် လူမှုသဟဇာတဖြစ်မြောက်ရေးစင်တာမှ ကိုသက်ဆွေဝင်းက ပြောကြားခဲ့သည်။

ကန်တော်ကြီးတွင်ပြုလုပ်သော လှုပ်ရှားမှုစတင်သည့် အခမ်းအနား၌ အကအဖွဲ့များ ပါဝင်ဖျော်ဖြေခဲ့ကာ We are Myanmar စာတမ်းနှင့် အတူယှဉ်တွဲနေထိုင်ရေးကို အားပေးသည့် အခြားသော စာတမ်းများကို ရေးထိုးထားသော တီရှပ်အင်္ကျီများကိုလည်း တက်ရောက်လာသူများအား ဝေငှခဲ့သည်။

အခမ်းအနားစီစဉ်သူ ဇွဲနေအောင်က မိမိတို့မှာ မြန်မာနိုင်တစ်ဝှမ်းလုံးတွင် ခန္တီတရားတိုးပွားရေး ရည်ရွယ်သည်ဟု ဆိုသည်။

“ဘာသာတရားတွေ၊ လူမျိုးရေးနောက်ခံတွေ၊ အယူအဆတွေ ကွဲပြားခြားနားသော်လည်း ကျွန်တော်တို့အားလုံးဟာ တစ်ခုတည်းသောနိုင်ငံ၊ တစ်ခုတည်းသော ကြမ္မာကိုသာ မျှဝေကြတဲ့ မြန်မာနိုင်ငံသားတွေသာ ဖြစ်တယ်ဆိုတာကို ဒီလှုပ်ရှားမှုကနေတစ်ဆင့် ကျွန်တော်တို့ သတင်းစကားပေးချင်ပါတယ်” ဟု ၎င်းက ထည်သွင်းပြောကြားခဲ့သည်။

လူငယ်နှင့် လူမှုသဟဇာတဖြစ်မြောက်ရေးစင်တာမှ အဖွဲ့ဝင်တစ်ဦးဖြစ်သူ နေကြည်ထွန်းနိုင်ကလည်း လာမည့် ရွေးကောက်ပွဲအတွက် မဲဆွယ်ရာတွင် လူမျိုးရေးနှင့် ဘာသာရေးအား အသုံးချမှုကို ရှုတ်ချခဲ့သည်။

“လာမယ့်ရွေးကောက်ပွဲအတွက် မဲဆွယ်မှုတွေမှာ ဘာသာရေးပြဿနာကို အသုံးချတယ်ဆိုတဲ့ ကိစ္စတွေ ရှိနေပါတယ်။ နိုင်ငံရဲ့ အကျိုးကို တကယ်သယ်ပိုးထမ်းဆောင်ချင်တယ်ဆိုရင် (နိုင်ငံရေးပါတီတွေဟာ) ဘာသာရေးကို မထိပါးဘဲနဲ့ မဲဆွယ်လို့ရတယ်ဆိုတာ ပြောချင်ပါတယ်။ တိုင်းပြည်အတွက် အကျိုးရှိတဲ့ ချပြမှုတွေနဲ့သာ မဲဆွယ်ကြပါ”

Ref: DVB