Tag: sweden

အောက်တိုဘာ ၂၃၊ ၂၀၁၅
M-Media

– ယမန်နေ့က ဆွီဒင်နိုင်ငံအနောက်ပိုင်း ထရိုလ်ဟတ္တန်မြို့ရှိ စာသင်ကျောင်းတစ်ခုတွင် ဖြစ်ပွားခဲ့သော ဓားရှည်ဖြင့် ခုတ်မှုမှာ လာယာစွန်းရောက် လူမျိုးရေးလှုံ့ဆောင်မှုကြောင့်ဖြစ်သည်ဟု ရဲတပ်ဖွဲ့က ပြောကြားလိုက်သည်။

အနက်ရောင်ဝတ်စုံနှင့် မျက်နှာဖုံးဝတ်ထားသည့် အသက် ၂၁ နှစ်အရွယ် အမျိုးသားတစ်ဦးမှာ ယမန်နေ့မနက်ပိုင်းတွင် ကျောင်းစာသင်ခန်း နှစ်ခန်းအတွင်းသို့ တံခါးခေါက် ၀င်ရောက်လာကာ ဆရာများနှင့် ကျောင်းသားများအား ဓားဖြင့်ခုတ်ခဲ့ခြင်းဖြစ်ပြီး ကျောင်းဆရာတစ်ဦးမှာ နေရာတွင် ပွဲချင်းပြီး သေဆုံးသွားကာ အသက် ၁၇ နှစ်အရွယ် ကျောင်းသားတစ်ဦးမှာ ဒဏ်ရာဖြင့် ဆေးရုံတွင် သေဆုံးခဲ့သည်။

အခြားကျာင်းသားများမှာလည်း ထိုဖြစ်အပျက်တွင် ဒဏ်ရာရရှိခဲ့သည်။ ၎င်းကျောင်းထဲသို့ ၀င်ရောက်လာချိန်တွင် ကျောင်းသားတစ်ချို့မှာ ၎င်းနှင့် အတူတွဲ၍ ဓာတ်ပုံရိုက်ခဲ့ကြသည်။

ရဲတပ်ဖွဲ့ပြောရေးဆိုခွင့်ရှိသူကမူ တိုက်ခိုက်သူ၏ ပြုမူဆောင်ရွက်ပုံ၊ ၎င်း၏ တိုက်ခန်းတွင် တွေ့ရှိခဲ့သည့် အရာများ၊ ဓားဖြင့်ခုတ်ရန် လူရွေးချယ်မှု၊ အ၀တ်အစား ၀တ်စားဆင်ယင်ပုံတို့ကို ကြည့်ရှု၍ ၎င်းမှာ လက်ယာစွန်းရောက် လူမျိုးရေးလှုံ့ဆောင်မှုကြောင့် ကျူးလွန်ခဲ့ခြင်းဖြစ်သည်ဟု ကောက်ချက်ချခဲ့ကြောင်း ပြောကြားခဲ့သည်။

ဆွီဒင်မီဒီယာများကမူ ကျူးလွန်သူမှာ အန်တန် လန်ဒင် ပတ်တာဆန်ဆိုသူ ဖြစ်သည်ဟု ဖော်ပြခဲ့ကြသည်။ ဆွီဒင် သတင်းစာတစ်စောင်ဖြစ်သည့် Aftonbladet ကမူ ပတ်တာဆန်မှာ အခင်းဖြစ်ပွားခဲ့သည့် အဆိုပါ ထရိုလ်ဟတ္တန်မြို့တွင်ပင် နေထိုင်သူဖြစ်ကြောင်း၊ ယခု ဓားဖြင့် ၀င်ရောက်ခုတ်သည့် ကျောင်းမှာ ၎င်း တက်ဖူးခဲ့သည့် ကျောင်းများထဲမှ တစ်ခုဖြစ်ကြောင်း ဖော်ပြခဲ့သည်။

၎င်း၏ အထက်တန်းကျောင်းနေဖက်တစ်ဦးကမူ ပတ်တာဆန်မှာ အမြဲတမ်း အနက်ရောင်ဝတ်ရုံရှည်ကို ၀တ်လေ့ရှိသည်ဟု ပြောကြားခဲ့သည်။ ပတ်တာဆန် ကျောင်းထွက်ပြီးနောက်တွင် ၎င်း၏ ဆံပင်ကို ညှပ်ပစ်လိုက်ပြီး ဟစ်တလာနှင့် နာဇီဝါဒတို့အား ၀ါဒဖြန့်သည့် ဆိုရှယ်မီဒီယာပေ့ခ်ျများကို Like လုပ်ကာ၊ ဆွီဒင်နိုင်ငံက ကမ္ဘာတစ်ဝှမ်းမှ ဒုက္ခသည်များ လက်ခံရေးအစီအစဉ်ကို ရပ်တန့်ရန် Facebook မှတစ်ဆင့် ပြုလုပ်သည့် တောင်းဆိုချက်တစ်ခုကိုလည်း လက်မှတ်ရေးထိုးခဲ့ဖူးကြာင်း Aftonbladet သတင်းစာက ထည့်သွင်းဖော်ပြခဲ့သည်။

ဆွီဒင်နိုင်ငံတွင် ထိုကဲ့သို့ကျူးလွန်မှုမှာ အလွန်အင်မတန်ဖြစ်ခဲပြီး ယခုအဖြစ်အပျက်က တစ်နိုင်ငံလုံးကို တုန်လှုပ်စေခဲ့သည်။

Ref: Foxnews, CNN

အောက်တိုဘာ ၂၂၊ ၂၀၁၅
M-Media

– ဆွီဒင်နိုင်ငံ အနောက်ပိုင်း ထရိုလ်ဟတ္တန်မြို့ရှိ စာသင်ကျောင်းတစ်ခုတွင် ယနေ့မနက်ပိုင်းက မျက်နှာဖုံးစွပ်ထားသည့် လူတစ်ဦး ဓားရှည်ဖြင့် ၀င်ရောက် ခုတ်ခဲ့ခြင်းကြောင့် ကျောင်းဆရာတစ်ဦး သေဆုံးခဲ့ပြီး ကျောင်းသားများ ဒဏ်ရာရရှိခဲ့ဟု သိရသည်။

ဓားဖြင့်ခုတ်သူမှာ အသက် ၂၀ အရွယ်ရှိ အမျိုးသားတစ်ဦးဖြစ်ပြီး ရဲတပ်ဖွဲ့၏ ပစ်ခတ်မှုကြောင့် ဒဏ်ရာရရှိခဲ့ကာ ဆေးရုံ၌ ဆေးကုသမှု ခံယူနေရသည်။ ကျောင်းသားနှစ်ဦးနှင့် အခြားဆရာတစ်ဦးမှာလည်း ဒဏ်ရာများကြောင့် ဆေးကုသမှု ခံယူနေရသည်။

ကျောင်းသားများကမူ မျက်နှာဖုံးစွပ်အမျိုးသား ၀င်ရောက်လာသည့်အခါ ဟာသလုပ်သည်ထင်၍ ၎င်းနှင့်အတူ ဓာတ်ပုံတွဲရိုက်ခဲ့ပြီး ဓားကိုလည်း ကိုင်ကြည့်ခဲ့ကြောင်း ပြောကြားခဲ့သည်။ ဆွီဒင်ဝန်ကြီျးုပ် စတီဖင် လော့ဖ်ဗန်ကမူ ယနေ့မှာ ဆွီဒင်နိုင်ငံအတွက် ကံဆိုးမိုးမှောင်ကျသည့်နေ့ ဖြစ်သည်ဟု ပြောကြားခဲ့သည်။

Ref: Aljazeera

သြဂုတ် ၁၁၊ ၂၀၁၅
M-Media

– ဆွီဒင်နိုင်ငံ ဗက်စ်တီးရက်စ်မြို့ရှိ စတိုးဆိုင်တစ်ခုတွင် ယမန်နေ့က ဓားထိုးမှု ဖြစ်ပွားခဲ့သောကြောင့် လူ ၂ ဦးသေဆုံးခဲ့ပြီး အခြားတစ်ဦးမှာ ပြင်းထန်စွာ ဒဏ်ရာရရှိခဲ့သည်ဟု ရဲတပ်ဖွဲ့က သတင်းထုတ်ပြန်ခဲ့သည်။

Ikea စတိုးတွင် ဖြစ်ပွားခဲ့ခြင်းဖြစ်ပြီး သေဆုံးခဲ့သူများမှာ အမျိုးသားတစ်ဦးနှင့် အမျိုးသမီးတို့ ဖြစ်ကြပြီး အမျိုးသားနှစ်ဦးကို လူသတ်မှုသံသယဖြင့် ဖမ်းဆီးထားသည်။ ဒဏ်ရာရသူမှာ အသက်အန္တရာယ် စိုးရိမ်ရသည့် အနေအထား ရှိနေပြီး ဆေးရုံ၌ ဆေးကုသမှု ခံနေရသည်။

ဒေသစံတော်ချိန် ယမန်နေ့ နေ့လည် ၁ နာရီက အဆိုပါစတိုးရှိ မီးဖိုဆောင်သုံး ပစ္စည်းများ အရောင်းပြခန်းတွင် ဓားဒဏ်ရာဖြင့် လူ ၃ ဦးကို တွေ့ရှိရသည်ဟု ဖုန်းခေါ်ဆိုမှု ရရှိခဲ့ကြောင်း ရဲတပ်ဖွဲ့ ပြောရေးဆိုခွင့်ရှိသူ ပါစထရောင်းမ်ဘက်က အခင်းဖြစ်ပွားရာနေရာတွင် သတင်းထောက်များအား ပြောကြားခဲ့သည်။

“သံသယရှိသူက လူ ၃ ဦးကို ဓားနဲ့ထိုးခဲ့ပြီး သူတို့ထဲက နှစ်ယောက်ကတော့ နေရာမှာတင် သေဆုံးသွားပါတယ်။ တစ်ယောက်က ပြင်းပြင်းထန်ထန် ဒဏ်ရာရနေပြီး ကုသမှုတွေ လုပ်ဆောင်နေပါတယ်။ ဒီတိုက်ခိုက်မှုရဲ့ နောက်ကွယ်က အခြေအနေကို အခု ကျွန်တော်တို့ မသိရှိရသေးပါဘူး” ဟု ၎င်းက ထည့်သွင်းပြောကြားခဲ့သည်။

သေဆုံးသွားသူနှင့် ထိခိုက်ဒဏ်ရာရသူများမှာ သာမန်ဈေးဝယ်သူများ ဖြစ်ပြီး တစ်ဦးနှင့်တစ်ဦး မသိရှိကြဟု စတိုးဆိုင်မန်နေဂျာဖြစ်သူ မက်တီယက်စ်ဂျွန်ဆင်က ပြောကြားခဲ့သည်။

Ref: BBC

မတ် ၁၉၊ ၂၀၁၅
M-Media

– ဆွီဒင်နိုင်ငံ ဂိုသန်ဘာ့ဂ်မြို့ရှိ ဘားတစ်ခုတွင် ယမန်နေ့က သေနတ်ဖြင့်ပစ်ခတ်မှုတစ်ခု ဖြစ်ပွားခဲ့ပြီး လူအများအပြားသေဆုံးခဲ့ကာ ရဲတပ်ဖွဲ့ကမူ အဆိုပါပစ်ခတ်မှုမှာ လူဆိုးဂိုဏ်းများနှင့် ဆက်နွယ်သည့် ပစ်ခတ်မှု ဖြစ်နိုင်ဖွယ်ရှိသည်ဟု ပြောကြားလိုက်သည်။

Var Krog Och ဟု အမည်ရသည့် ဘားတွင် စားသုံးသူများက ဘောလုံးပွဲကြည့်ရှုနေစဉ် ကာလာရှင်ကောဗ့် ရိုင်ဖယ်ကိုင် သေနတ်သမားနှစ်ဦး ၀င်ရောက်လာကာ မြင်မြင်သမျှကို သေနတ်ဖြင့် ပစ်ခတ်ခဲ့သောကြောင့် ၂ ဦးသေဆုံးခဲ့ပြီး ၈ ဦး ဒဏ်ရာရရှိခဲ့သည်။

“အော်တိုမက်တစ်လက်နက်ကို အသုံးပြုခဲ့တာပါ။ လူဆိုးဂိုဏ်းနဲ့ ဆက်စပ်နေတယ်ဆိုတာကို ကျွန်မတို့ မငြင်းနိုင်ပါဘူး။ ဒီဒေသမှာ တစ်ခါတစ်လေ လူဆိုးဂိုဏ်းပြဿနာတွေ ရှိပါတယ်” ဟု ရဲတပ်ဖွဲ့မှ ပြောရေးဆိုခွင့်ရှိသူ အမျိုးသမီး အူလာ ဘရီဟမ်က ပြောကြားခဲ့သည်။

သို့သော်လည်း ထိုပစ်ခတ်မှုမှာ အကြမ်းဖက်မှုနှင့် ဆက်နွယ်မှုမရှိဟု ဆိုသည်။

“အကြမ်းဖက်ဝါဒနဲ့ ပတ်သက်နေတဲ့ဆိုတဲ့ အရိပ်အငွေ့ကို လုံးဝ မတွေ့ရပါဘူး” ဟု ဘရီဟမ်ကဆိုပြီး သေဆုံးသူ အရေအတွက်မှာလည်း မြင့်တက်လာနိုင်သည်ဟု ထည့်သွင်းပြောကြားခဲ့သည်။ အခင်းဖြစ်ပွားရာ ဟီဆင်ဂန်ကျွန်းမှာ လူဆိုးဂိုဏ်းနှင့် ဆက်နွယ်သည့် အကြမ်းဖက်တိုက်ခိုက်မှုများ အများအပြားဖြစ်ပွားခဲ့ရာ ဒေသလည်းဖြစ်သည်။

Ref: Alarabiya