ဇန်နဝါရီ ၇ ၊ ၂၀၁၄
M-Media
စုစည်းတင်ဆက်သူ- daythanix

ATM စက်တွေမှ ဟက်ကာတွေ ငွေထုတ်ယူခဲ့

ATM ငွေထုတ်စက်တွေမှာ ဟက်ကာတွေဟာ USB drives များနဲ့ ချိတ်ဆက်ကာ malware ပရိုဂရမ်များ ထည့်သွင်းပြီး ငွေထုတ်ယူနိုင်ခဲ့ကြကြောင်းကို ဂျာမဏီ သုတေသီတွေက ဟမ်းဘက် မြို့မှာ ဒီဇင်ဘာ ၂၈ ရက်က ကျင်းပတဲ့ Chaos Computing Congress မှာ ဖေါ်ထုတ် တင်ပြခဲ့ကြခဲ့ပါတယ်။ ဒီပရိုဂရမ်ကို သုံးစွဲပြီး ငွေထုတ်ယူသူဟာ ပထမ ဂဏန်း၁၂လုံးပါ လျှို့ဝှက်နံပါတ်ကို ထည့်ကာ ထုတ်ယူမည့် ငွေပမာဏကို ရိုက်ပြီးနောက် ပရိုဂရမ်ရေးသူထံမှ နောက်ထပ် လျှို့ဝှက်နံပါတ်ကို ဖုန်းဆက် တောင်းယူရပြီးမှ ငွေထုတ်ယူရကြောင်း ရှင်းပြသွားပါတယ်။ မည့်သည့်နိုင်ငံမှ မည်သည့်ဘဏ်များကို ထိခိုက်စေခဲ့တယ်ဆိုတာတော့ ထုတ်ဖေါ်ပြောကြားခြင်းမရှိပါဘူး။

_________________________________
ထိုင်းနိုင်ငံမှ AIS ၏ မြန်မာနိုင်ငံတွင်း data-roaming ဝန်ဆောင်မှု

ထိုင်းနိုင်ငံမှ မိုဘိုင်လ်းဖုန်း ကုမ္ပဏီ Advanced Info Service Plc (AIS) ဟာ ၎င်းတို့ရဲ့ ဖုန်းသုံးစွဲသူတွေ မြန်မာနိုင်ငံတွင်းကို သွားရင် အင်တာနက်သုံးနိုင်ဖို့ data-roaming ဝန်ဆောင်မှုကို ဇန်နဝါရီ ၁၄ရက်ကစပြီး ပေးသွားမယ်လို့ သိရပါတယ်။ AIS ဟာ ဖုန်းခေါ်ဆိုမှုကို ၂၀၁၁ ခုနှစ်က လည်းကောင်း စာတိုပို့စံနစ်ကို အရင်လက လည်းကောင်း မြန်မာနိုင်ငံမှာ roaming ဝန်ဆောင်မှု ပေးနိုင်ခဲ့ပါတယ်။ အခု data-roaming အတွက် ၁ megabyte ကို ၆ဘတ် နှုန်း ပေးရမှာ ဖြစ်ပြီး တစ်ရက် ၅၀ megabyte ကန့်သတ်ထားပါတယ်။

_________________________________
ငလျင်လှုပ်ခါနီး လေထုထဲမှာ ရွေ့လျှားနေသော မီးလုံးများ

နောက်ဆုံးလေ့လာတွေ့ရှိချက်တွေအရ ငလျင်လှုပ်ခါနီးမှာ လေထုထဲမှာ မီးလုံးတွေ ပျံဝဲနေတတ်တာ မှန်ကန်တယ်လို့ ဆိုပါတယ်။ ငလျင် အားလုံးမှာ မဟုတ်ပေမယ့် ပြတ်ရွေ့ကြောင်းတစ်လျှောက်မှာ လျှပ်စစ်တွန်းအားစီးကြောင်း ဖြစ်ပေါ်ကာ ငလျင်လှုပ်ခဲ့ပါက ၎င်းပြတ်ရွေ့များ ကြားမှ ပွတ်အားများဟာ ပြင်းထန်လွန်းတဲ့အခါမှာ လျပ်စစ်ငြိမ် များဟာ လေထုထဲသို့ စီဆင်းကာ မီးအလင်းများ လင်းလက်သွားတတ်တယ်လို့ ဇန်နဝါရီ ၂ရက်ကထုတ်ဝေတဲ့ Seismological Research Letters ဂျာနယ်မှာ ဖေါ်ပြခဲ့ပါတယ်။

_________________________________
အင်္ဂါဂြိုဟ်သို့ အခြေချနေထိုင်မည့်သူ (၁၀၅၈) ဦးရှိ

လျှောက်ထားသူ ၂၀၀၀ ကျော်အနက်ကနေ ၁၀၅၈ဦးကို အင်္ဂါဂြိုဟ်ကို ၂၀၂၄ခုနှစ် မှာ သွားရောက် အခြေချ နေထိုင်ဖို့ Mars One အဖွဲ့အစည်းက ရွေးချယ်ခဲ့ပါတယ်။ ၁၀၅၈ဦး အနက် ၂၉၇ဦးဟာ အမေရိကန်နိုင်ငံသား၊ ကနေဒါမှ ၇၅ဦး၊ အန္ဒိယမှ ၆၂ဦး ရုရှမှ ၅၂ဦး ပါဝင်ပါတယ်။ Mars One အဖွဲ့အစည်းဟာ Lockheed Martin Space Systems နဲ့ Surrey Satellite Technology Ltd, တို့ရဲ့ အကူအညီနဲ့ ၂၀၁၈မှာ အင်္ဂါဂြိုဟ် ကို လူမဲ့အာကာသယာဉ် ပို့လွှတ်သွားမှာဖြစ်ပါတယ်။

_________________________________
အသံလွန်လှိုင်းဖြင့် အရာဝထ္ထုလေးတွေ လေထဲမှာ ရပ်တန့်စေနိုင်

ဂျပန်နိုင်ငံက သုတေသီ Yoichi Ochiai ။ Takayuki Hoshi နဲ့ Jun Rekimoto တို့ဟာ အသံလွန်လှိုင်းကို အသုံးပြုပြီး သေးငယ်တဲ့ အရာဝထ္ထုလေးတွေကို လေထဲမှာ ရပ်တန့်နိုင်အောင် နောက်ပြီး ရွေ့လျားနိုင်အောင် ပြုလုပ်ပြသခဲ့ပါတယ်။ စပီကာအသေးလေးတွေ အများကြီး စီပြီးတပ်ထားတဲ့ မျက်နှာပြင် လေးချပ်ကို ကို အောက်ခြေ ၊ အပေါ်နဲ့ ဘေးနှစ်ဘက်မှာ တပ်ဆင်ပြီး အသံလွန်ုလှိုင်းကို ချိန်ညှိပေးတဲ့အခါမှာ လှိုင်းရဲ့ အဆစ် နေရာလေးတွေမှာ အရာဝထ္ထုလေးတွေ တည်ငြိမ်ပျံဝဲနေတာ ဖြစ်ပါတယ်။ ဗွီဒီယိုကို https://www.youtube.com/watch?v=odJxJRAxdFUမှာ ကြည့်နိုင်ပါတယ်။

———————————————————–

** M-Media ၏ မူပိုင် သတင်း/ဆောင်းပါးများကို အွန်လိုင်းမီဒီယာများတွင် မည်သူမဆို လွတ်လပ်စွာကူးယူဖော်ပြနိုင်ပါသည်။ ကူးယူဖော်ပြသူများအနေဖြင့် M-Media မူရင်းလင့်ခ်ကို ထည့်ပေးဖို့ မေတ္တာရပ်ခံအပ်ပါသည်။
စီးပွားဖြစ် ထုတ်ဝေသော Print Media များတွင် M-Media ခွင့်ပြုချက်မရှိဘဲ အသုံးပြုခွင့်မပြုပါ။
ဆက်သွယ်ရန် [email protected]