ဧပြီလ ၁၃ ၊ ၂၀၁၃
M-Media
သတင်း- နေလင်း
အမေရိကန်နိုင်ငံ၊ ယူတီကာမြို့ရောက် မြန်မာမွတ်စ်လင်မ်မိသားစုမှ ကြီးမှူး၍ တရားဟောပြောပွဲအစီအစဉ်တစ်ရပ်ကို Bosnian Islamic Association ခန်းမ၌ ၂၀၁၃ ခုနှစ်၊ ဧပြီလ ၇ ရက်နေ့တွင် ကျင်းပပြုလုပ်ခဲ့ကြောင်း သတင်းရရှိသည်။ ယင်းတရားပွဲ အခမ်းအနားကို မြန်မာမွတ်စ်လင်မ်မိသားစုမှ လူဦးရေ ၂၀၀ ခန့်တက်ရောက်ခဲ့ပြီး၊ အလ်ဟာဂ်ျ ခလီဖွာဟ်ဦးအေးလွင်မှ “ ကမ္ဘာကိုအလှဆင်သည့် အစ္စလာမ် ” ခေါင်းစဉ်ဖြင့် ဟောပြောသွားခဲ့သည်။
“ အသင်တို့ အကောင်းလို့ထင်တဲ့ အရာတွေဟာ အသင်တို့အတွက် အဆိုးတွေဖြစ်နိုင်တယ်။ အသင်တို့ဆိုးတယ်လို့ထင်တဲ့အရာတွေဟာ အသင်တို့အဖို့ကောင်းတဲ့ အရာတွေလည်း ဖြစ်နိုင်ပါတယ်လို့ ကုရ်အာန် ကျမ်းတော်မြတ်ထဲမှာ အတိအလင်း မိန့်ကြားထားပါတယ်။ ခင်ဗျားတို့ကြုံတွေ့ခဲ့ရတဲ့ ဒုက္ခတွေအတွက် အရှင့်ဖက်က ယခုလို အစားပေးတာကို မြင်တွေ့ရလို့ အရှင်မြတ်ရဲ့ဂုဏ်ကျေးဇူးကို ချီးကျူးမိပါတယ် ” ဟု အလ်ဟာဂ်ျ ခလီဖွာဟ် ဦးအေးလွင်က ဟောပြောမှု၌ ထည့်သွင်းပြောကြားသွားခဲ့သည်။
ယင်းဟောကြားချက်နှင့် စပ်လျဉ်း၍ တရားနာပရိသတ်တစ်ဦးက “ ဆရာဟောပြောတာကို ကြားပြီး ကျွန်တော်တို့ ၀မ်းနည်းဝမ်းသာခံစားရပါတယ်။ ၀မ်းသာမိတာကတော့ – ကျွန်တော်တို့ဟာ မွေးကတည်းက လက်နက်ကိုင် ပဋိပက္ခအတွင်းမှာ ကြီးပြင်းလာခဲ့ရတယ်။ ပြီးတော့ အကျဉ်းထောင်သာသာရှိတဲ့ ဒုက္ခသည်စခန်းမှာ နှစ်ပေါင်းများစွာ နေထိုင်ခဲ့ရတယ်။ ကျွန်တော်တို့ ဘယ်လိုမှ မမျှော်မှန်းနိုင် မမျှော်မှန်းရဲခဲတဲ့ အခြေအနေတစ်ခုကို ယခုအခါမှာ အလ္လာဟ် အရှင်မြတ်က ချီးမြှင့်တော်မူလိုက်ပြီ ဖြစ်လို့ပါဘဲ။ ၀မ်းနည်းမိတာက -ယခင်ကျွန်တော်တို့ခံစားခဲ့ရတဲ့အခြေအနေ နဲ့ ယခုကျွန်တော်တို့ညီနောင်တွေ ခံစားနေရမှုတွေအတွက်ပါ။ ကျွန်တော် တလောကမှ အမေရိကန်နိုင်ငံသား -citizenship ရရှိခဲ့ပါတယ်။ နိုင်ငံသားခံယူမှုအတွက် ကျမ်းကျိန်ပြီးတာနဲ့ တရားသူကြီးက ပြောတယ်။ အခု မင်း အမေရိကန် ဖြစ်သွားပြီတဲ့။ ငါရထားတဲ့အခွင့်အရေးနဲ့ မင်းရတဲ့အခွင့်အရေးဟာ အတူတူဘဲတဲ့။ ငါ တစ်နေ့ သမ္မတဖြစ်နိုင် သလို မင်းလည်း အမေရိကန် သမ္မတဖြစ်နိုင်တဲ့ အခွင့်အရေးရှိတယ်တဲ့။ အမေရိကန် နိုင်ငံသားဖြစ်လာတာ မိနစ်ပိုင်းလေးသာရှိသေးတဲ့ ကျွန်တော့်ကို ဒီမှာ ဒီလိုဆက်ဆံခဲ့ပါတယ်။ ကျွန်တော်တို့ရဲ့ ဘိုးဘေးဘီဘင်လက်ထက် ကတည်းက နေထိုင်ခဲ့တဲ့ မြန်မာနိုင်ငံမှာ ခုထက်ထိ ဧည့်သည်တွေအဖြစ် ဆက်ဆံခံခဲ့ရတာ/ ဆက်ဆံခံနေရတာကို တွေးမိတိုင်း အရမ်းဝမ်းနည်းရပါတယ် ” ဟု မိမိ၏ခံစားချက်ကို M-Media သို့ ရင်ဖွင့်ပြောကြားလာပါသည်။
“ ဒီ Bosnian Islamic Association မှာ ကျွန်တော်တို့မြန်မာမွတ်စ်လင်မ်တွေ မင်ဘာဝင်ထားကြတယ်။ ဒီပွဲပြုလုပ်ဖို့ဂေါပကကို သွားပြောတော သူတို့က မင်းတို့လည်း မင်ဘာတွေဘဲ။ ကြိုက်သလိုအသုံးပြုလို့ရပါတယ်လို့ဆိုပြီး သော့ကိုပေးလိုက်တယ်။ ကြိုက်သလိုစီစဉ် ကြိုက်သလိုလုပ်လို့ပြောပြီး လာတောင်မကြည့်ပါဘူး။ ဒီအခမ်းအနား ပြုလုပ်တဲ့ဗလီဟာ အရင်တုန်းက Church ကျောင်းတစ်ခုပါ။ ဘော့စ်နီးယား၊ ဆိုမားလိယား၊ နီပေါ၊ မြန်မာ အစုံရှိပါတယ်။
ဘော့စနီးယားတွေ စရောက်တော့ သူတို့အတွက် ဗလီလေးတစ်ခု စီစဉ်သေးတယ်။ နောက်လူဦးရေများပြားလာတဲ့အခါ ဗလီလေးထဲ လူမဆန့်တော့ဘူး။ ဒါနဲ့ မြို့ အုပ်ချုပ်ရေး နဲ့ ဒီ Church အုပ်ချုပ်ရေးတို့ တိုင်ပင်ပြီး အသုံးမပြုသလောက်ဖြစ်နေတဲ့ ဒီ church ကို ဗလီလုပ်ဖို့ပေးလိုက်တာပါ ” ဟု တရားပွဲစီစဉ် သူတစ်ဦးမှ လက်ရှိတရားပွဲပြုလုပ်သည့်ဗလီ အကြောင်း ရှင်းလင်းပြောပြခဲ့သည်။ ဤသည်နှင့် စပ်လျဉ်း၍ အလ်ဟာဂ်ျခလီဖွာဟ် ဦးအေးလွင်မှ “ ဒီလို တစ်ဦးနဲ့တစ်ဦး ချစ်ကြည်နားလည် သဘောထားကြီးတဲ့ အစဉ်အလာကောင်းများကို မြတ်နိုး တန်ဖိုးထားကြဖို့ အရေးကြီးပါတယ် ” ဟုလည်း ထည့်သွင်းပြောဆိုခဲ့ကြောင်း သိရသည်။
နယူးယောက်ပြည်နယ်၊ ယူတီကာမြို့တွင် ၂၀၁၁ ခုနှစ်စာရင်းအရ လူဦးရေ ခြောက်သောင်းခန့်ရှိသည်။ ယခုအခါ မြန်မာမွတ်စ်လင်မ်မိသားစု ၁၀၀ ခန့်အပါအ၀င် မွတ်စ်လင်မ်ဦးရေ တစ်သောင်းကျော် နေထိုင်လျက်ရှိသည်။ Central Methodist Church မှ Bosnian Islamic Association ထံလွှဲပြောင်းပေးသော (ယခုတရားပွဲပြုလုပ်သည့်) ဗလီအပါအ၀င် ဗလီဝတ်ကျောင်းတော် ၄ လုံးရှိပါသည်။
ဓါတ်ပုံများ ကြည့်ရှုရန်။
