Tag: UShweMaung

ဦးရွှေမောင်အား အမတ်လောင်းအဖြစ် လက်မခံမှု အာဆီယံပါလီမန် အဖွဲ့(APHR) ဝေဖန်

သြဂုတ် ၂၅ ၊ ၂၀၁၅
M-Media

လတ်တစ်လောတွင် လက်ရှိလွှတ်တော် အမတ် ဦးရွှေမောင်အား မြန်မာအာဏာပိုင်များက လာမည့် နိုဝင်ဘာ ရွေးကောက်ပွဲဝင် ကိုယ်စားလှယ်လောင်း အဖြစ် ဟန့်တားသည့်ဆုံးဖြတ်ချက်ကို လူ့အခွင့်အရေးဆိုင်ရာ အာဆီယံပါလီမန်အဖွဲ့(APHR) မှ ဝေဖန်ပြောဆိုလိုက်သည်။

လူ့အခွင့်အရေးဆိုင်ရာ အာဆီယံ ပါလီမန်အဖွဲ့(APHR) က ယင်းလုပ်ရပ် ဆင်ခြင်တုံ တရားကင်းမဲ့ကြောင်း၊ ရိုဟင်ဂျာတို့အား မဲပေးခွင့် ရှေ့ဆက် ရုပ်သိမ်းနေခြင်းမှာ အန္တရာယ်ကြီးမားသည့် သာဓကဖြစ်ကြောင်း၊ လာမည့်ရွေးကောက်ပွဲ၏ ခိုင်မာမှုကို တိုက်ရိုက် အမြစ်လှန်ခြင်း ပင်ဖြစ်ကြောင်း ယမန်နေ့က ပြောဆိုကာ အဆိုပါဆုံးဖြတ်ချက်ကို ပြန်လည်ဖျက်သိမ်းပြောင်းလဲရန် တိုက်တွန်းလိုက်သည်။

အာဆီယံ ပါလီမန်အဖွဲ့(APHR) ၏ အဖွဲ့ဝင်တစ်ဦးလည်းဖြစ်သော ဦးရွှေမောင်သည် ရခိုင်ပြည်နယ် မောင်တောမြို့နယ် ရွေးကောက်ပွဲကော်ရှင်ထံမှ လာမည့်ရွေးကောက်ပွဲတွင် သူ့အား တစ်သီးပုဂ္ဂလ အောက်လွှတ်တော် အမတ်အဖြစ် ၀င်ရောက်အရွေးခံရန်လျှောက်ထားခြင်းကို ငြင်းပယ်သော အကြောင်းကြားချက် ရရှိခဲ့သည်။ လွှတ်တော် အမတ်လေးနှစ် သက်တမ်းနှင့် အထောက်အထားများ မှန်ကန်နေလင့်ကစား ဦးရွှေမောင်မှာ ယခု ရွေးကောက်ပွဲ ဝင်ရန် လျောက်ထားမှုကို ငြင်းပယ် ခံခဲ့ရခြင်းဖြစ်သည်။

“ရွေးကောက်ပွဲကော်မရှင်ရဲ့အဆိုများဟာ အတိုင်းထက်အလွန် အဓိပ္ပာယ်မဲ့ လှပါတယ်။ ဒီဆုံးဖြတ်ချက်က ဒီမိုကရက်တစ်နည်းစဉ်ကို အမြစ်လှန်ဖြို လှဲလိုက်ခြင်းပါပဲ။ ရွေးကောက်ပွဲ ၀င်ရောက် အရွေးခံပိုင်ခွင့်ဟာ မဲပေးခွင့်လိုပဲ အခြေခံအခွင့်အရေး တစ်ရပ်ဖြစ်တယ်။ ဒါတွေကို ကိုးကွယ်ရာဘာသာ၊ လူမျိုးကို အခြေခံပြီး ငြင်းပယ်ခွင့်မရှိပါဘူး။ ဦးရွှေမောင်ဟာ လက်ရှိ ရွေးချယ်ခံ ပြည်သူ့ကိုယ်စားလှယ်ဖြစ်နေခြင်း တစ်ချက်ထဲနဲ့ပင်လျှင် ဆက်လက်ယှဉ်ပြိုင်သွားဖို့ ခိုင်မာ တရားဝင်နေပါပြီ။ သူ့ရဲ့ယှဉ်ပြိုင်ခွင့်ကို ပယ်ချတာဟာ ရိုဟင်ဂျာတွေကို မဲပေးခွင့်ရုပ်သိမ်းရေး၊ (သူတို့ကို နိုင်ငံတွင်းကနေ အပြီးမောင်းထုတ်ဖို့ အစိုးရကျောထောက်နောက်ခံပြု ကမ်ပိန်းတစ်စိတ်တစ်ဒေသဖြစ်တဲ့) ညှင်းပန်းနှိပ်စက်ရေး ရှေ့ဆက်လုပ်ဆောင်သွားမယ့် အာဏာပိုင်တွေရဲ့နောက်ထပ်ခြေလှမ်းတစ်ရပ်မှအပ အခြားမဟုတ်ကြောင်း ရှင်းလင်းထင်ရှားစေပါတယ်။ ဒီလုပ်ဆောင်ချက်များက လာမည့်ရွေးကောက်ပွဲဟာ လွတ်လပ်ပြီး တရားမျှတမှုရှိမယ်ဆိုတဲ့ အမြင်ကို လုံးဝ ဖျက်ဆီးပစ်လိုက်တာပါပဲ။ လူတစ်သန်းလောက်ကို မဲပေးခွင့်ပိတ်ပင်တာ – လူမျိုးရေးအကြောင်းပြ ယှဉ်ပြိုင်ခွင်မပေးတာဖြစ်တဲ့အတွက် ခိုင်မာတရားဝင်တဲ့ရွေးကောက် ပွဲပါလို့ မြန်မာအစိုးရအနေနဲ့ ကြွေးကြော်လို့ မရတော့ပါဘူး။ ဒီကိစ္စအပေါ် ကျွန်တော်တို့ဒေသတွင်းရဲ့အသံ ထုတ်ကိုထုတ်ရပါမယ်။ ဒီလိုဆုံးဖြတ်ချက်နဲ့ လုပ်ရပ်မျိုးက လူနည်းစုဝင်တွေရဲ့ အခွင့်အရေး အတွက်ရော အနာဂတ်မြန်မာ့ ဒီမိုကရေစီအတွက်ပါ စိုးရိမ်စရာကောင်းတဲ့ ခြိမ်းခြောက်မှု ဖြစ်နေတာကြောင့် လုံးဝ ဖျက်သိမ်းပြောင်းလဲရပါမယ်” ဟု APHR သဘာပတိ Charles Santiago က ပြောကြားသည်။

ဦးရွှေမောင်ကမူ အဆိုပါဆုံးဖြတ်ချက်ကို အယူခံဝင်သွားရန် စီစဉ်နေသည်ဟု ဆိုသည်။

Ref : Asean MP Official Website

August 25, 2015
ကိုယ်စားလှယ်လောင်း အဖြစ် လက်ရှိ လွှတ်တော်အမတ် ပယ်ချခံရ

သြဂုတ် ၂၄ ၊ ၂၀၁၅
BBC(မြန်မာပိုင်း) မှ ကူးယူဖော်ပြသည်။
.
ရခိုင်ပြည်နယ် မောင်တော ခရိုင် ရွေးကောက်ပွဲ ကော်မရှင် က လက်ရှိ ပြည်သူ့လွှတ်တော် ကိုယ်စားလှယ် တစ်ဦး ကို အခု လာမယ့် ၂၀၁၅ ရွေးကောက်ပွဲ မှာ ထပ်မံ ယှဉ်ပြိုင်ဖို့ ကိုယ်စားလှယ်လောင်း အရည်ချင်းနဲ့ ကိုက်ညီမှု မရှိဘူး ဆိုပြီး ပယ်ချ လိုက်ပါတယ်။
လျှောက်ထားသူ မွေးဖွားစဉ် မိဘ ၂ ပါးစလုံး နိုင်ငံသား ဖြစ်ရမယ် ဆိုတဲ့ စည်းမျဉ်း နဲ့ မကိုက်ညီ တဲ့ အတွက် ပယ်ချရတာ ဖြစ်ကြောင်း ခရိုင် ကော်မရှင် က အကြောင်းပြချက် ပေးခဲ့တယ် လို့ ဘူးသီးတောင် ပြည်သူ့လွှတ်တော် အမတ် ဦးရွှေမောင် က ဘီဘီစီ ကို ပြောပါတယ်။
.
ဦးရွှေမောင်က တော့ ခရိုင် ကော်မရှင် ရဲ့ အကြောင်းပြချက် ကို ငြင်းပယ် လိုက် ပြီး သူ့ရဲ့ မိဘ ၂ ပါးစလုံးဟာ သူမွေးဖွားစဉ် မှာ နိုင်ငံသား တွေ ဖြစ်ကြတယ် ဆိုတဲ့ သက်သေ အထောက်အထား တွေ ခိုင်ခိုင် လုံလုံ တင်ပြ လျှောက်ထား ခဲ့ တာ ဖြစ်တယ် လို့ ဆိုပါတယ်။
ဒါ့ကြောင့်လည်း အလားတူ စည်းမျဉ်း သတ်မှတ် ထားတဲ့ ၂၀၁၀ ရွေးကောက်ပွဲ တုန်း ကလည်း အခုတခေါက် တင်ပြ ခဲ့တဲ့ သက်သေ အထောက်အထား တွေ ကို ပဲ အဆင့်ဆင့် သော ရွေးကောက်ပွဲ ကော်မရှင် တွေ က လက်ခံခဲ့လို့ ရွေးကောက်ပွဲ ဝင်နိုင် ခဲ့တာ ဖြစ်တယ် လို့ ဦးရွှေမောင် က ဆိုပါတယ်။
.
၂၀၁၀ တုန်း က လက်ရှိ အာဏာရ ပြည်ထောင်စု ကြံ့ခိုင်ရေး နဲ့ ဖွံ့ဖြိုးရေး ပါတီ ရဲ ကိုယ်စားလှယ် အနေ နဲ့ ရွေးကောက်ပွဲ မှာ အနိုင် ရခဲ့တဲ့ ဦး ရွှေမောင်ဟာ အခု ၂၀၁၅ မှာ တော့ တသီးပုဂ္ဂလ အမတ် အဖြစ် ဝင်ရောက် ဖို့ လျှောက်ထား ခဲ့တာ ဖြစ်ပါတယ်။
.
မောင်တော ခရိုင် ကော်မရှင် ရဲ့ အခု အဆုံးအဖြတ် ဟာ နိုင်ငံသား တစ်ယောက် ရဲ့ ရရှိပြီး အခွင့်အရေး ကို ပြန်လည် ရုတ်သိမ်း တာ မျိုး ဖြစ်နေတဲ့ အတွက် ဥပဒေ နဲ့ မညီညွတ်ဘူး လို့ ဦးရွှေမောင် က ဝေဖန် လိုက် ပြီး အယူခံ အဆင့်ဆင့် ဝင် သွားမယ် လို့လည်း ဆိုပါတယ်။
.

ဓါတ်ပုံ- ဦးရွှေမောင် FB
http://www.bbc.com/burmese/burma/2015/08/150823_mp_candidate_refusal_election_commission
.
ဆက်စပ်သတင်းများဖတ်ရန်။
—————————
အဖေ၊ အမေ၊ ကျနော် ၃ ယောက်စလုံး အမျိုးသား မှတ်ပုံတင်ကိုင်ဆောင်ခဲ့တာ- ဦးရွှေမောင်
http://www.m-mediagroup.com/news/44661

August 24, 2015
အဖေ၊ အမေ၊ ကျနော် ၃ ယောက်စလုံး အမျိုးသား မှတ်ပုံတင်ကိုင်ဆောင်ခဲ့တာ- ဦးရွှေမောင်

သြဂုတ် ၂၀ ၊ ၂၀၁၅

ရခိုင်ပြည်နယ်၊ ဘူးသီးတောင်မြို့နယ်ကနေ ပြည်သူ့လွှတ်တော် ကိုယ်စားလှယ်လောင်းအဖြစ် ရွေးကောက်ပွဲဝင်ဖို့ အမည်စာရင်း တင်သွင်းထားတဲ့ ဦးရွှေမောင်ကို ရွေးကောက်ပွဲ ဥပဒေပါ ပြဌာန်းချက်တွေနဲ့ ငြိစွန်းနေတယ်ဆိုပြီး ကန့်ကွက်သူတွေ ရှိနေပါတယ်။ အဲ့ဒီလိုကန့်ကွက်သူတွေရှိနေတာကြောင့် မောင်တောခရိုင် ရွေးကောက်ပွဲကော်မရှင်က စိစစ်နေတယ်လို့ သိရပါတယ်။ ဒါနဲ့ပတ်သက်ပြီး ဦးရွှေမောင်ကို RFA သတင်းထောက် မဝေမာထွန်း က ဆက်သွယ်မေးမြန်းထားပါတယ်။

ဦးရွှေမောင်ကို ရခိုင်ပြည်နယ်၊ ဘူးသီးတောင်မြို့နယ်ကနေ ပြည်သူ့လွှတ်တော် ကိုယ်စားလှယ်လောင်းအဖြစ် ရွေးကောက်ပွဲဝင်ဖို့ အမည်စာရင်းတင်သွင်း ကန့်ကွက်တာတွေ ရှိနေတယ်လို့ သိရပါတယ်။ ဘာကြောင့်များကန့်ကွက်တယ်လို့ အန်ကယ်သိထားတာများ ရှိပါလဲ

ဦးရွှေမောင်။   ။ ကျနော်တော့ တရားဝင်တော့ မသိရသေးပါဘူး။ အကြမ်းဖျဉ်းသိရတာတော့ မောင်တော ခရိုင် လဝက ဦးစီးမှူး ဦးစောနိုင်က ကန့်ကွက်တယ်လို့ ပြောပါတယ်။ နောက်တခါ ရခိုင်အမျိုးသားတယောက်လဲ ကန့်ကွက်တယ်လို့ ကျနော်လဲ ကြားပါတယ်။ အတိအကျတော့ တရားဝင် မသိရသေးပါဘူး။ ကျနော်ရဲ့ မိဘ နှစ်ပါးက နိုင်ငံသား အရည်အချင်း မမှီဘူးဆိုပြီး သဘောမျိုးဆောင်တဲ့ စကားတွေ ပြောပြီး ကန့်ကွက်တယ်လို့ ကြားပါတယ်။

RFA။   ။ ရွေးကောက်ပွဲ ကော်မရှင်ကို ဆက်သွယ်ပြိး မေးမြန်းကြည့်တဲ့အခါ အန်ကယ်ကို ကန့်ကွက်ထားတဲ့ အချက်က နိုင်ငံသား မိဘ နှစ်ပါးက မွေးဖွားတဲ့ လူမဟုတ်တာကြောင့် ကန့်ကွက်တယ်လို့လဲ သိထားပါတယ်။ ဒါကရောဟုတ်ပါသလား။ အန်ကယ် ဒါနဲ့ ပတ်သက်ပြီး ဘာများ ပြောချင်ပါသလဲ ရှင်။

ဦးရွှေမောင်။   ။ ကျနော်ရဲ့ မိဘ နှစ်ပါး နိုင်ငံသား မဟုတ်ဘူးဆိုရင် ကျနော်ပြောချင်တာက ကျနော်လက်ရှိတရားဝင် လွှတ်တော်ကိုယ်စားလှယ် ၊ ၂၀၁၀ ကျနော်ရွေးကောက်ပွဲ ဝင်တုံးက အဲဒိလိုပဲ အလားတူ ကန့်ကွက်မှုတွေ ရှိခဲ့တယ်။ အဲဒီတုံးက ခရိုင် လဝက လဲ ကျနော်တို့ကို Pass ပေးခဲ့တယ်။ ပြည်နယ် လဝက အနေနဲ့လည် Pass ပေးခဲ့တယ်။ ကျနော် လေ့လာ သိရှိရတာကတော့ နေပြည်တော်မှာ ရှိတဲ့ လဝက ရုံးချူပ်ကလည်း ကျနော်အပါအဝင် ကျနော့မိဘ နှစ်ပါးစလုံးက နိုင်ငံသားဖြစ်တယ်ဆိုပြီး Pass ဖြစ်တယ်။ အဲလို pass ဖြစ်လည်း ကျနော် ယနေ့ အထိ ပြည်သူ့ လွှတ်တော် ကိုယ်စားလှယ်တာဝန်ကို ထမ်းဆောင်နေတာပါ။ အခု ၅ နှစ်တောင် မပြည့်သေးဘူး ၂၀၁၅ ရွေးကောက်ပွဲတောင် မဝင်ရသေးဘူး လျောက်လွှာတင်ထားရုံပဲရှိသေးတယ်။ ကျနော်ရဲ့ မိဘ ၂ ပါးက နိုင်ငံသား မဟုတ်ဘူးလို့ ပြောတာသည် ရှေ့နောက်မညီတဲ့ ကိစ္စ ဖြစ်တယ်။

RFA။   ။ မိဘနှစ်ပါးဟာ နိုင်ငံသား ဖြစ်ကြောင်း အထောက်အထားတွေနဲ့ ပတ်သက်ပြိး ဘယ်လို အထောက်အထားတွေ ရှိပါသလဲ

ဦးရွှေမောင်။   ။ ကျနော်ရဲ့ အဖေဆိုရင် ၁၉၁၈ ခုနှစ်မှာ မွေးတာ၊ မြန်မာနိုင်ငံလွတ်လပ်ရေး ရကတည်းက ကျနော်အဖေက တိုင်းပြည် တာဝန်ကို ထမ်းဆောင်ခဲ့တယ်။ မြန်မာနိုင်ငံမှာ ပထမဆုံးပေးခဲ့တဲ့ အမျိုးသားမှတ်ပုံတင်၊ အဲဒိတုံးက မြန်မာ တပြည်လုံးမှာ ရှိတဲ့ တိုင်းရင်းသား၊ နိုင်ငံသား အားလုံးကို အမျိုးသားမှတ်ပုံတင် ၃ ခေါက်ချိုး နံပါတ် ၆ လုံးပါတဲ့ ကဒ်ကို ပေးခဲ့ပါတယ်။ ကျနော် အဖေ နံပါတ်ကတော့ AK-072352 အမေကတော့ AK-072353 ပြီးတော့ ကျနော် အဖေက မြန်မာနိုင်ငံရဲတပ်ဖွဲ့မှာ ပြန်တမ်းဝင် အရာရှိလဲ ဖြစ်တယ်။

RFA။   ။ အန်ကယ် တဆက်ထဲပါဘဲ အခုကြားနေရတာ အန်ကယ် ဦးရွှေမောင် အနေနဲ့ ဝှိုက်ကဒ်ကိုင်ထားတဲ့ သူ တစ်ဦးဖြစ်တယ်။ ဒါကရော ဟုတ်ပါသလား ၊ဒိအခြေအနေတွေ ကြောင့် ရွေးကောက်ပွဲဝင်ဖို့ အခက်အခဲ ရှိနိုင်လာနိုင်မလား

ဦးရွှေမောင်။   ။ ဝှိုက်ကဒ်ကိုင်ထားတဲ့ လူက ၂၀၁၀ ကတည်းက ရွေးကောက်ပွဲ ဥပဒေအရ ကိုယ်စားလှယ်လောင်းပြိုင်ခွင့်လည်း မရှိဘူး၊ ပြိုင်လို့လဲ မရဘူး။ ကျနော်က ဝှိုက်ကဒ် ကိုင်ဆောင်တာ မဟုတ်ပါဘူး။ ကျနော် မိဘလည်း ဝှိုက်ကဒ် ကိုင်ဆောင်ထားခြင်းမရှိပါဘူး။ အမျိုးသားမှတ်ပုံတင်ကဒ်ပြား အဲဒါကျနော် အဖေရော၊ အမေရော၊ ကျနော်ရော၊ မြန်မာနိုင်ငံဥပဒေများနှင့် အညီ အမျိုးသားမှတ်ပုံတင်ပဲ ကိုင်ဆောင်ခဲ့တယ်။ ကျနော်အနေနဲပ ၂၀၁၀ ရွေးကောက်ပွဲကတည်းက နိုင်ငံသား စိစစ်ရေးကဒ်ပြားကို ကိုင်ဆောင်ပါတယ်။ ကျနော် ဝှိုက်ကဒ်ကိုင်ဆောင်တယ်ဆိုပြီးတော့ ဆိုရှယ်မီဒိယာတွေမှာ မလိုတဲ့လူတွေက တမင်ဖန်တီးပြီးတော့ေ၇းထားတာပါ။ အဲဒါတွေက မှန်ကန်မှုမရှိပါဘူးခင်ဗျာ။

RFA။   ။ အန်ကယ်အနေနဲ့ ပြည်ထောင်စုကြံခိုင်ရေးနဲ့ ဖွံ့ဖြိုးေ၇းပါတီကနေ နှုတ်ထွက်ပြီးတော့ တစ်သီးပုဂလပ် ဝင်ရောက်ယှဉ်ပြိုင်တာကြောင့် ဒိလို အခြေအနေမျိုးတွေ ကြုံတွေ့ရပါသလား? အန်ကယ်ဘယ်လိုမျိုးများ ထင်ပါသလဲရှင်၊

ဦးရွှေမောင်။   ။ အဲဒိလိုလဲ ကျနော် မပြောချင်ပါဘူး။ ဘာလို့လဲ ဆိုတော့ ကျနော် ယူဆတာကတော့ ၂၀၁၂ ခုနှစ် ဇွန်လနဲ့ အောက်တိုဘာလမှာ ဖြစ်ပေါ်ခဲ့တဲ့ ရခိုင်ပြည်နယ်က အကြမ်းဖက်မှု ပဋိပက္ခအလွန်မှာ ဖြစ်ပေါ်ခဲ့တဲ့ နိုင်ငံရေး ရာသီဥတုကြောင့်ပဲ ဒီလိုပြောတာဆိုတာတွေ ဖြစ်တယ်လို့ ကျနော် ယူဆပါတယ်။

RFA။   ။ အကယ်၍ များ ခ၇ိုင်ရွေးကောက်ပွဲ ကော်မရှင်က စိစစ်ပြီးတော့ ကိုယ်စားလှယ်လောင်းတင်သွင်းမှုကို ပယ်ချလိုက်ရင် ပြည်နယ် ကော်မရှင်ထံ အယူခံဝင်မှာလား၊ ဘာများဆက်လုပ်သွားဖို့ ရှိပါလဲ

ဦးရွှေမောင်။   ။ ပြည်နယ်ကော်မရှင်ကို ဥပဒေနဲ့အညီ ကျနော် အယူခံဝင်ဖို့ ရှိပါတယ်။ ပြည်နယ်ကော်မရှင်က ပယ်လည်း ကျနော် ပြည်ထောင်စုရွေးကောက်ပွဲကော်မရှင်ထိ အယူခံဝင်ဖို့ရှိပါတယ်။ ပြည်ထောင်စုရွေးကောက် ပွဲကော်မရှင်ကပယ်လည်း ပြည်ထောင်စုလွှတ်တော် မှာလည်း ဥပဒေနဲ့ အညီ လုပ်ဆောင်ဖို့ရှိပါတယ်။

RFA။   ။ အခုလိုဖြေကြားပေးတဲ့အတွက် အန်ကယ်ဦးရွှေမောင်ကို RFA မှကျေးဇူးတင်ပါတယ်။
ဦးရွှေမောင်။   ။   ဟုတ်ကဲ့ ကျနော်လည်း ကျေးဇူးတင်ပါတယ်။

August 20, 2015
Mizzima: ပြည်ခိုင်ဖြိုးအမတ် ဦးရွှေမောင်ကို မိခင်ပါတီနှင့် လွှတ်တော်တို့က စစ်ဆေး အရေးယူရန် အစီအစဉ် မရှိဟုဆို

ဖေဖော်ရီ ၆၊ ၂၀၁၄
မဇ္ဈိမ
စိုးသန်းလင်း

လူမှုကွန်ရက် စာမျက်နှာမှ တဆင့် ၄င်းအားစိတ်ပူနေသူများကို မိမိ အဆင်ပြေကြောင်း ပြောကြားခဲ့သိ ဦးရွှေမောင်၏ ရေးသားမှု

နိုင်ငံတော်နှင့် မြန်မာနိုင်ငံရဲတပ်ဖွဲ့အား ဂုဏ်သိက္ခာ ကျဆင်းစေသည်ဟူသည့် သမ္မတ သ၀ဏ်လွှာအရ ပြည်ခိုင်ဖြိုး အမတ် ဦးရွှေမောင်ကို ပြည်ထဲရေး ၀န်ကြီးဌာနက ဖေဖော်ဝါရီ ၄ ရက်တွင် ပြည်ခိုင်ဖြိုးပါတီ ဌာနချုပ်၌ စစ်ဆေးခဲ့သည်နှင့် ပတ်သက်ပြီး ၄င်းအား မိခင်ပါတီနှင့် လွှတ်တော်တို့က စစ်ဆေးအရေးယူ ရန် အစီအစဉ် ရှိနိုင်ပါသလားဟူသော မဇိ်္ဈမ၏ အမေးကို ပြည်သူ့လွှတ်တော်၊ ဥပဒေရေးရာနှင့် တရားစီ ရင်ရေး ကော်မတီဥက္ကဌ သူရဦးအောင်ကိုက အစီအစဉ် မရှိသေးကြောင်း ဖြေကြားခဲ့သည်။

“အခုအထိတော့ အစီအစဉ် မရှိသေးပါဘူး။ ရှိရင် ပြောပါ့မယ်” ဟု ၎င်းက ယနေ့ ပြည်ထောင်စု လွှတ် တော် ခေတ္တနားချိန်တွင် ဖြေကြားခဲ့ခြင်း ဖြစ်သည်။

ဘူးသီးတောင်မြို့နယ် ပြည်သူ့လွှတ်တော်ကိုယ်စားလှယ် ဦးရွှေမောင်သည် ပြည်ခိုင်ဖြိုးပါတီဝင် ဖြစ်သော ကြောင့် မိခင်ပါတီအနေဖြင့် ၎င်းအားစစ်ဆေး အရေးယူသွားဖို့ ရှိပါသလားဟု မေးခဲ့ရာ ပြည်ခိုင်ဖြိုး ပါတီ၏ ဒုတိယဥက္ကဌ တစ်ဦးဖြစ်သူ ဦးဌေးဦးက “ဒီကိစ္စကျွန်တော် မသိဘူးဗျ။ ရုံးမှာ တစ်နေ့လုံး ပြည်ထဲရေးက လာမေးတယ်လို့ ပြောပါတယ်။ ကျွန်တော်လည်း အဲ့ဒီနေ့က ရုံးမှာ ရှိနေပါတယ်။ ဒါပေမဲ့ ကျွန်တော်မသိ ဘူး။ မတွေ့ဘူး။ ပါတီအနေနဲ့ ဒီကိစ္စကို ဘာမှကို မသိသေးဘူး။ တကယ်ဟုတ်တယ်ဆိုရင် ကာယကံရှင် ကလည်း သတင်းပို့လို့ရတာပဲ။ ဌာနဆိုင်ရာကလည်း သတင်းပို့မှာပဲ။ အခုတော့ လောလောဆယ် ဘာမှ သတင်းပို့တာ မရှိသေးပါဘူး။ လွှတ်တော်ကိုလည်း သတင်းပို့ ရမှာပဲ။ အခုလွှတ်တော် ဘက်ကလည်း ဘာမှ သတင်းမကြားပါဘူး။ သိလာရင်တော့ သိတဲ့အပေါ်မူတည်ပြီး စဉ်းစားမှာပေါ့” ဟု ပြန်လည်ဖြေ ကြားသည်။

ပြည်ခိုင်ဖြိုးပါတီသည် အာဏာရပါတီလည်းဖြစ်ပေရာ ၎င်းပါတီဥက္ကဋ္ဌ နိုင်ငံတော် သမ္မတက ပါတီဥက္ကဌ တာဝန်ကို ထမ်းဆောင်လျက်ရှိ၍ ဒုတိယဥက္ကဋ္ဌလည်းဖြစ်၊ ပြည်ထောင်စုလွှတ်တော် နာယကလည်းဖြစ် သည့် သူရဦးရွှေမန်းထံသို့ ပြည်ခိုင်ဖြိုးအမတ် ဦးရွှေမောင်အား စစ်ဆေးခွင့်တောင်းသည့် သ၀ဏ်လွှာကို ပို့ပြီးမှ ပြည်ထောင်စု လွှတ်တော် ခွင့်ပြုချက်ဖြင့် ပြည်ထဲရေးဝန်ကြီးဌာနက ယမန်နေ့က စစ်ဆေးခဲ့ခြင်းကို ပြည်ခိုင်ဖြိုး ပါတီ ဒု-ဥက္ကဌတစ်ဦးဖြစ်သော ဦးဌေးဦးက လုံးဝမသိကြောင်း ငြင်းဆိုလိုက်ခြင်း ဖြစ်သည်။

ပြည်ထဲရေးက ၎င်းအား စုံစမ်းမေးမြန်းစဉ် အဆင်ပြေမှု ရှိ၊မရှိ မဇ္ဈိမက မေးသည်ကို ဦးရွှေမောင်က “အဆင်ပြေပါတယ်။ သူတို့ သိချင်တာတွေကို မေးတာပါ။ ကျွန်တော်ကလည်း ပြန်ရှင်းပြတယ်။ အဓိက ကျွန်တော်ရှင်းပြတာကတော့ ဒီလိုစွပ်စွဲတာသည် ဒီဗွီဘီရဲ့ သတင်းခေါင်းစဉ်ကြောင့်သာ ဖြစ်ရတာပါ။ စာသားထဲမှာလည်း မပါဘူး။ ကျွန်တော်ကိုယ်တိုင် တိုက်ရိုက်ဖြေတာမျိုးလည်း မရှိဘူး။ ကျွန်တော်က ပြည် သူ့ကိုယ်စားလှယ်တစ်ဦးဖြစ်လို့ ရွာသားတွေက တင်ပြလာတာကို ပြန်ပြောရတဲ့ သဘောဖြစ်တယ် ဆို တာ ရှင်းပြပါတယ်။ သတင်းဌာနကလွှင့်တဲ့ Edited Version ကို မကြည့်ဘဲ Full Version ကို ကြည့်ဖို့ လိုပါတယ်” ဟု ဖြေခဲ့သည်။

ထို့ပြင် ပြည်ထဲရေးက ၎င်းနှင့် နောက်ထပ်တွေ့ဆုံမေးမြန်း ချိန်းဆိုခဲ့ခြင်း မရှိကြောင်းလည်း ဖြည့်စွက်ပြော ကြားခဲ့သည်။ မည်သို့ဆိုစေ လောလောဆယ်၌ လွှတ်တော်ကရော၊ ပြည်ခိုင်ဖြိုးပါတီကပါ ပြည်ခိုင်ဖြိုး အမတ် ဦးရွှေမောင်အပေါ် စစ်ဆေးအရေးယူမှု မရှိသေးပေ။

Link =>https://www.facebook.com/permalink.php?story_fbid=715090488525859&id=216265185075061&stream_ref=10

February 6, 2014
ဒုချီရာတန်း မီးလောင်မှု DVB သို့ဖြေကြားချက်ကြောင့် ဦးရွှေမောင်အား သမ္မတ ညွှန်ကြားချက်ဖြင့် ပြည်ထဲရေးမှ စစ်ဆေး

ဖေဖော်ဝါရီ ၄၊ ၂၀၁၄
M-Media

ရခိုင်ပြည်နယ် မောင်တောမြို့နယ်၊ ဒုချီရာတန်း ကျေးရွာ မီးလောင်မှု ကိစ္စ တွင် ရဲတပ်ဖွဲ့ဝင်များ ကိုယ်တိုင် ရိုဟင်ဂျာများ၏ အိမ်များကို မီးရှို့ခဲ့ကြောင်း ဒေသခံများ၏ သတင်းပို့ချက်အား DVB သတင်းဌာနသို့ ပြည်သူ့လွှတ်တော် အမတ် ဦးရွှေမောင် ပြောကြားချက်နှင့် ပတ်သက်၍ သမ္မတ ညွှန်ကြားချက်ဖြင့် ပြည်ထဲရေးမှ တွေ့ဆုံ စစ်ဆေးမည့် အကြောင်း ဦးရွှေမောင်မှ ၄င်း၏ FB စာမျက်နှာတွင် အောက်ပါ အတိုင်းရေးသား ဖော်ပြခဲ့ပါသည်။

၂၀၁၄ ခုနှစ် ဖေဖေါ်ဝါရီလ ၃ ရက်နေ့က ကျွန်တော်သည် ပြည့်သူလွှတ်တော် ဥက္ကဌ ဦးရွှေမန်းနှင့် နှစ်ကြိမ်တိုင် တွေ့ဆုံခဲ့ ပါသည်။ တွေ့ဆုံရခြင်း အကြောင်းမှာ သမ္မတမှ ပြည့်သူ လွှတ်တော် ဥက္ကဌသို့ မိမိအား ခေါ်ယူတွေ့ဆုံရန်၊ စစ်ဆေး မေးမြန်းရန် နှင့် ဥပဒေ အတိုင်း ဆောင်ရွက်ရန် မေတ္တာရပ်ခံတောင်းဆိုသော သဝဏ်လွှာနှင့် ပတ်သက်၍ ဖြစ်ပါသည်။ သမ္မတ၏ စာတွင် ကျွန်တော့် ဒီဗွီဘီ အင်တာဗျူးသည် နိုင်ငံတော်နှင့် မြန်မာ့ ရဲတပ်ဖွဲ့ကို အသရေ ပျက်စေသည်ဟု ဖော်ပြပါရှိပါသည်။ စာထဲတွင် ကျွန်တော်သည် ပဋိပက္ခများကို ဖြစ်စေသည်ဟုလည်း ဖော်ပြထားပြန်သည်။ သို့ဖြစ်၍ ဥက္ကဌက ကျွန်တော့်အား လိုအပ်သည်များကို လမ်းညွှန်ခဲ့ပါသည်။ ပြည်ထဲရေး ဝန်ကြီးဌာနသည် ယနေ့ညနေ ၄နာရီတွင် စစ်ဆေးမေးမြန်းခြင်းကို ကျွန်တော်တို့၏ ညှိုနှိုင်းစေ့စပ်မှုအရ ကြံ့ခိုင်ရေးပါတီ ဌာနချုပ်တွင် စတင်ပါမည်။

ကျွန်တော်သည် နိုင်ငံတော်နှင့် မြန်မာ့ရဲတပ်ဖွဲ့ အသရေပျက်အောင် မည်သည့် အခါမျှ မလုပ်ပါ။ ပြည့်သူလွှတ်တော် ဥပဒေနှင့် အခြေခံ ဥပဒေနှင့် အညီ နိုင်ငံနှင့် ပြည်သူတို့ ကောင်းကျိုး အတွက် ဆောင်ရွက်သည်သာဖြစ်သည်။ ကျွန်တော်သည် တည်ငြိမ်ရေး၊ ချစ်ကြည်စွာ နေထိုင်ရေး၊ ဖွံ့ဖြိုးတိုးတက်ရေး၊ တရားဥပဒေ စိုးမိုးရေး၊ တရားမျှတရေးနှင့် သာတူညီမျှ အခွင့်အရေးတို့ကို အစဉ်အမြဲ အလေးအနက်ထားပါသည်။ ကျွန်တော်သည် လွှတ်တော်၊ သက်ဆိုင်သော ပြည်ထောင်စု ဝန်ကြီးများနှင့် လိုအပ်ပါက ဒေသံသရ အာဏာပိုင်များနှင့်ပါ ပူးပေါင်းဆောင်ရွက်လျက်ရှိပါသည်။

ရွှေမောင်
ပြည်သူ့လွှတ်တော် ကိုယ်စားလှယ်
ဘူးသီးတောင် ကိုယ်စားပြု
ရခိုင်ပြည်နယ်၊ မြန်မာ
ညနေ ၃ နာရီခွဲ၊ ဖေဖေါ်ဝါရီလ ၄ ရက်နေ့၊ ၂၀၁၄ ခုနှစ်

February 4, 2014