News @ M-Media

Tag: Vietnam

  • တရုတ်ရန်ကို ကာကွယ်ရန် ဂျပန်နှင့် ဗီယက်နမ် စစ်ဖက်ပူးပေါင်းဆောင်ရွက်မှု တိုးမြှင့်

    တရုတ်ရန်ကို ကာကွယ်ရန် ဂျပန်နှင့် ဗီယက်နမ် စစ်ဖက်ပူးပေါင်းဆောင်ရွက်မှု တိုးမြှင့်

    စက်တင်ဘာ ၂၂၊ ၂၀၂၁
    M-Media

    ဗီယက်နမ်သမ္မတ Nguyen Xuan Phuc နှင့် ဂျပန်ကာကွယ်ရေးဝန်ကြီး ကီရှီ

    -ဒေသတွင်းမှာ အင်အားကြီးပြီး အန္တရာယ်ရှိလာတဲ့ တရုတ်ကို တန်ပြန်မယ့် ခြေလှမ်းအတွက် ဂျပန်ဟာ ဗီယက်နမ်နိုင်ငံနဲ့ ထူးခြားတဲ့ ကာကွယ်ရေးဆိုင်ရာ စာချုပ်တွေကို ချုပ်ဆိုလိုက်ပါတယ်။

    ဗီယက်နမ်မြို့တော် ဟနွိုင်းမှာ ပြီးခဲ့တဲ့တစ်ပတ် ဂျပန် ကာကွယ်ရေးဝန်ကြီး နိုဘူအို ကီရှီနဲ့ ဗီယက်နမ် ကာကွယ်ရေးဝန်ကြီး ဖန်ဗန်ဂန်တို့ နှစ်နိုင်ငံစစ်တပ်အကြား လက်နက်ရောင်းချဖို့၊ ကာကွယ်ရေးနည်းပညာ အပြန်အလှန်ဖလှယ်ဖို့အတွက် သဘောတူညီချက်တွေ လက်မှတ်ရေးထိုးခဲ့ကြတာပါ။

    သဘောတူညီချက်တွေထဲမှာ ပူးတွဲစစ်ရေးလေ့ကျင့်မှုလုပ်ဖို့၊ ဆိုက်ဘာလုံခြုံရေး ပူးပေါင်းဆောင်ရွက်ဖို့အပြင် နှစ်နိုင်ငံဆက်ဆံရေး အဆင့်တစ်ခုကို တက်လှမ်းဖို့ စတာတွေလည်း ပါဝင်ပါတယ်။ အထူးခြားဆုံးက သိပ်မကြာခင်ကာလမှာ ဗီယက်နမ်ဟာ ဂျပန်ထုတ် ရေတပ်သင်္ဘောတွေ ရရှိမယ့် လမ်းကြောင်းမျိုး ဖောက်လိုက်တာပါ။

    ၂၀၂၀ ခုနှစ် မတ်လကလည်း ဂျပန်နဲ့ ဗီယက်နမ်တို့ဟာ ရေတပ်သင်္ဘောတည်ဆောက်တဲ့ နည်းပညာမျှဝေရေး၊ နှစ်ဖက်ကြည်းတပ်တွေ ပူး​ပေါင်းဆောင်ရွက်ရေး၊ ဂျပန်က စစ်သင်္ဘောတွေ၊ စစ်လေယာဉ်တွေ ဗီယက်နမ်ကို သွားရောက်ရေး သဘောတူညီခဲ့ကြပြီး အခုတစ်ခေါက်က နှစ်နိုင်ငံဆက်ဆံရေးကို ပိုမိုနွေးထွေးစေမှာ ဖြစ်ပါတယ်။

    ဂျပန်ဟာ တရုတ်ရန်ကို သတိထားနေရတဲ့နိုင်ငံဖြစ်ပြီး ဗီယက်နမ်ကလည်း တောင်တရုတ်ပင်လယ်ကိစ္စမှာ တရုတ်နဲ့ ပိုင်နက်အငြင်းပွားမှု ရှိနေပါတယ်။

    ဟနွိုင်းခရီးစဉ်မှာ ဂျပန်ကာကွယ်ရေးဝန်ကြီး ကီရှီက ဒေသတွင်း လက်ရှိအနေအထားကို အတင်းအကြပ်ပြောင်းလဲတဲ့ တစ်ဖက်သက် ဆောင်ရွက်ချက်မျိုး မိမိတို့ လက်ခံမှာမဟုတ်ဘူးလို့ ပြောကြားခဲ့ပြီး ဒါဟာ တရုတ်ကို ရည်ညွှန်းတယ်ဆိုတာ ထင်ရှားပါတယ်။

    ဗီယက်နမ်လို ဒေသတွင်း အင်အားရှိတဲ့ နိုင်ငံမျိုးတွေနဲ့ ပူးပေါင်းပြီး လုံခြုံရေးဆိုင်ရာ လွှမ်းမိုးမှုကို ချဲ့ထွင်ဖို့ ကီရှီက စိတ်ဆန္ဒရှိနေတာပါ။ အခုလို ဗီယက်နမ်နဲ့ ကာကွယ်ရေးဆိုင်ရာ သဘောတူညီချက်တွေ ရရှိတာဟာ ဂျပန်နိုင်ငံရဲ့ ကာကွယ်ရေးအခြေခံကို အားကောင်းစေဖို့နဲ့ နိုင်ငံလုံခြုံရေးကို တိုးမြှင့်ဖို့ဖြစ်တယ်လို့လည်း ကီရှီက ဆိုပါတယ်။

    ဂျပန်နဲ့ ဗီယက်နမ်တို့ဟာ စီးပွားရေးဆိုင်ရာ ပူးပေါင်းဆောင်ရွက်မှုတွေကိုလည်း တိုးမြှင့်လုပ်ဆောင်ထားပါတယ်။

    Ref: Asia Times

  • ကိုရိုနာဗိုင်းရပ်စ် ထိန်းချုပ်နိုင်ခဲ့သည့် အာရှနိုင်ငံတစ်ချို့တွင် ကူးစက်မှုများ ပြန်မြင်လာရ

    ကိုရိုနာဗိုင်းရပ်စ် ထိန်းချုပ်နိုင်ခဲ့သည့် အာရှနိုင်ငံတစ်ချို့တွင် ကူးစက်မှုများ ပြန်မြင်လာရ

    ဇူလိုင် ၃၀၊ ၂၀၂၀
    M-Media

    ဗီယက်နမ်လေဆိပ်တစ်ခု မြင်ကွင်း

    -အခုနှစ်အစောပိုင်းက Covid-19 ကို အောင်မြင်စွာ ထိန်းချုပ်နိုင်ခဲ့တဲ့ ဟောင်ကောင်နဲ့ ဗီယက်နမ်နိုင်ငံတို့မှာ ကူးစက်မှုတွေ ပြန်ဖြစ်လာတာကြောင့် အစိုးရတွေက သတိပေးရတဲ့ အနေအထားကို ရောက်လာပါတယ်။

    ကိုဗစ်ဗဟိုချက် တရုတ်နဲ့ ကပ်နေတဲ့ ဟောင်ကောင်ဟာ အစောပိုင်းက ကူးစက်မှုကို အောင်မြင်စွာ ထိန်းချုပ်ထားနိုင်ခဲ့တာပါ။ ဒါပေမယ့် တနင်္လာနေ့ကစပြီး ကူးစက်မှုဟာ တစ်နေ့ကို ၁၀၀ ကျော်လောက် ပြန်ဖြစ်လာပါတယ်။

    ကူးစက်မှုတွေ ထပ်ပြီးမြင့်တက်လာရင် ကျန်းမာရေးစနစ် ပြိုလဲသွားနိုင်တယ်လို့ အင်္ဂါနေ့ အစိုးရရဲ့ ထုတ်ပြန်ချက်မှာ သတိပေးထားပါတယ်။ လူ ၂ ဦးထက်ပိုမစုဖို့ အပြင်သွားရင် နှာခေါင်းစည်း မဖြစ်မနေ တပ်ဆင်ဖို့ လည်း အစိုးရက ညွှန်ကြားထားပါတယ်။

    ဟောင်ကောင်မှာ ထပ်မံကူးစက်သူအရေအတွက်ဟာ ၃၀၀၀ ကျော်ရှိလာပြီး၊ သေဆုံးသူက ၂၄ ဦး ရှိလာပါတယ်။ ကိုဗစ် ကူးစက်နိုင်ချေရှိတဲ့ လူ ၂ သိန်းလောက်ကို သီးခြားခွဲထား စောင့်ကြည့်မှုတွေ မလုပ်ခဲ့တာ၊ ဟောင်ကောင်ထဲဝင်လာသူတွေအတွက် ကျန်းမာရေး စောင့်ကြည့်မှု ကန့်သတ်ချက်လျော့ပေးခဲ့တာတွေကြောင့် အခုလို ဖြစ်လာတာလို့ ဝေဖန်မှု​တွေလည်း ရှိနေပါတယ်။

    ပြီးခဲ့တဲ့ ၃ လအတွင်း ကူးစက်မှု လုံး၀မရှိခဲ့တဲ့ ဗီယက်နမ်နိုင်ငံမှာ ပြီးခဲ့တဲ့သီတင်းပတ်က စတင်ပြီး နိုင်ငံအလယ်ပိုင်း ကမ်းရိုးတမ်းမြို့ ဒါနန်းမှာ ကူးစက်မှုတွေ မြင်လာရပါတယ်။

    ဒါနန်းမြို့ကနေ ဆက်စပ်ပြီး မြို့တော်ဟနွိုင်းအထိ ကူးစက်သူတွေ တွေ့လာရသလို တစ်နိုင်ငံလုံး ပြန့်နှံ့သွားနိုင်တယ်လို့လည်း ဗီယက်နမ်ဝန်ကြီးချုပ်က သတိပေးထားပါတယ်။ ဗိုင်းရပ်စ်ကူးစက်မှု အတည်မပြုခင် ဒါနန်းကို ပြည်တွင်းခရီးသွား ၈ သောင်းလောက် လာရောက်ခဲ့ကြတာပါ။

    အခု ပြန်လည်ကူးစက်လာတဲ့ ကိုဗစ်ဗိုင်းရပ်စ်ဟာ အခုနှစ်အစောပိုင်းတုန်းက ပြန့်နှံ့ခဲ့တဲ့ ဗိုင်းရပ်စ်အမျိုးအစားနဲ့ မတူဘူးလို့လည်း ဗီယက်နမ်ကျန်းမာရေးဝန်ကြီးဌာနက ထုတ်ပြန်ထားပါတယ်။ ကူးစက်မှုအသစ်ကို ထိန်းချုပ်နိုင်ရေး တင်းကြပ်တဲ့မူဝါဒတွေ ချမှတ်ဖို့လည်း စီစဉ်နေပါတယ်။

    ဗီယက်နမ်ဟာ နိုင်ငံအတွင်း ကိုရိုနာဗိုင်းရပ်စ် မတွေ့ခင် အခုနှစ်အစောပိုင်းမှာကတည်းက ဗိုင်းရပ်စ်ကာကွယ်ရေး လုပ်ငန်းတွေ လုပ်ဆောင်ခဲ့ပြီး မတ်လမှာတော့ ကူးစက်မှုကင်းစင်ကြောင်း ကြေငြာနိုင်ခဲ့ပါတယ်။

    Ref: Malay Mail

  • တစ်ပတ်အတွင်း ကျန်းမာရေးသတင်းများ

    တစ်ပတ်အတွင်း ကျန်းမာရေးသတင်းများ

    ဇူလိုင် ၂၃၊ ၂၀၂၀
    M-Media

    ကိုဗစ်ကာကွယ်ဆေး လာမည့်နှစ်အတွင်းရရန် ဗီယက်နမ်ပစ်မှတ်ထား

    ဗီယက်နမ်နိုင်ငံဟာ ပြည်တွင်းမှာ ကိုဗစ်ကာကွယ်ဆေး ထုတ်လုပ်နိုင်အောင် ကြိုးစားနေပြီး တိုးတက်မှုတွေလည်း ရရှိနေတာကြောင့် ၂၀၂၁ ခုနှစ်မှာ စီးပွားဖြစ် ထုတ်လုပ်သုံးစွဲနိုင်ဖို့ စီစဉ်ထားပါတယ်။ ကာကွယ်ဆေးစမ်းသပ်ထုတ်လုပ်မှုဟာ ပုံမှန်အားဖြင့် ၅ နှစ်လောက်ကြာနိုင်ပေမယ့် ၂၀၂၁ ခုမှာ အဆင်သင့်ဖြစ်နိုင်ဖို့ ဗီယက်နမ်က အထူးစီမံကိန်းချ ဆောင်ရွက်နေတာပါ။ ကိုဗစ်ကာကွယ်ရေးလုပ်ငန်းမှာ ဗီယက်နမ်နိုင်ငံဟာ အောင်မြင်မှုရရှိထားပြီး ကူးစက်မှုလုံး၀မရှိတာ ၃ လကျော်လာခဲ့ပြီ ဖြစ်ပါတယ်။

    ဖုန်းနှင့် တီဗီကြည့်ချိန် တစ်နေ့ကို ၂ နာရီသာ ထားသင့်

    တစ်နေ့တာ တီဗီနဲ့ ဖုန်းကြည့်ချိန်ကို ၂ နာရီအောက် လျှော့ချပေးခြင်းအားဖြင့် ကင်ဆာနဲ့ နှလုံးသွေကြောကျဉ်း ရောဂါတွေလို ရောဂါမျိုး ဖြစ်ပွားမှု၊ အရွယ်မတိုင်ခင် သေဆုံးမှုကို လျှော့ချနိုင်တယ်ဆိုတာ လေ့လာမှုမှာ တွေ့ရတယ်လို့ စကော့တလန်နိုင်ငံ ဂလက်စဂိုမြို့က သုတေသနပညာရှင်တွေက ပြောကြားလိုက်ပါတယ်။ လူပေါင်း ၅ သိန်းလောက်ကို ၂ နှစ်ကြာ လေ့ခဲ့တာပါ။ အထိုင်များရင် ကျန်းမာရေးကို ထိခိုက်နိုင်ပြီး တီဗီနဲ့ ဖုန်းကြည့်ချိန်ကိုလျှော့ကာ ကျန်းမာရေး လေ့ကျင့်ခန်းတွေ ပုံမှန်လုပ်ပေးသင့်တယ်လို့လည်း သုတေသနမှာပါဝင်တဲ့ ပညာရှင်တွေက ပြောကြားခဲ့ပါတယ်။

    အောက်စဖို့ဒ်က ကိုဗစ်ကာကွယ်ဆေး အလုပ်ဖြစ်

    အင်္ဂလန်နိုင်ငံ အောက်စဖို့ဒ်တက္ကသိုလ်က ထုတ်လုပ်တဲ့ ကိုရိုနာဗိုင်းရပ်စ် ကာကွယ်ဆေးဟာ အန္တရာယ်ကင်းပြီး ကိုဗစ်တိုက်ဖျက်နိုင်တဲ့ ကိုယ်ခံအားကို ထုတ်ပေးတယ်ဆိုတာ တွေခဲ့ရပါတယ်။ လူပေါင်း တစ်ထောင်ကျော်မှာ စမ်းသပ်ပြီးတဲ့နောက် ဒီရလဒ် ထွက်လာတာပါ။ ရောဂါကို အမှန်တကယ် ကာကွယ်နိုင်မလားဆိုတာ သေချာဖို့အတွက် နောက်ထပ် ကျယ်ကျယ်ပြန့်ပြန့် စမ်းသပ်မှုတွေ လိုအပ်နေပါသေးတယ်။ ယူကေအစိုးရကတော့ ဒီကာကွယ်ဆေး သန်း ၁၀၀ ကို မှာယူထားပါတယ်။ ကိုဗစ်ဟာ ယူကေမှာ ခရစ္စမတ်အထိ ဆက်ရှိနေအုံးမယ်လို့လည်း ကျွမ်းကျင်သူတွေက သုံးသပ်ထားပါတယ်။

    Ref: BBC, The Star

  • Apple က AirPods အလုံးရေ သန်းချီ ဗီယက်နမ်တွင် ထုတ်လုပ်မည်

    Apple က AirPods အလုံးရေ သန်းချီ ဗီယက်နမ်တွင် ထုတ်လုပ်မည်

    မေ ၉၊ ၂၀၂၀
    M-Media

    -Apple ကုမ္ပဏီဟာ သူတို့ရဲ့ နာမည်ကျော် AirPods နားကြပ်တွေကို ဗီယက်နမ်နိုင်ငံမှာ ထုတ်လုပ်သွားတော့မယ်လို့ သိရပါတယ်။

    ကိုရိုနာကပ်ရောဂါ ကူးစက်ပြန့်နှံ့မှုတွေ ဖြစ်နေတဲ့အချိန် ထုတ်ကုန်တွေကို တရုတ်နိုင်ငံပြင်ပ ရွှေ့ပြောင်းဖို့အတွက် Apple ရဲ့ ကြိုးပမ်းမှုတစ်ခုပါ။

    AirPods တွေကို မတ်လ အစောပိုင်းလောက်ကတည်းက ဗီယက်နမ်နိုင်ငံမှာပြောင်းရွှေ့ထုတ်လုပ်နေတာဖြစ်ပြီး ၂၀၂၀ ခုနှစ် ဒုတိယ ၃ လပတ် ထုတ်လုပ်မှုပမာဏရဲ့ စုစုပေါင်း ၃၀ ရာခိုင်နှုန်း (၃ သန်းကနေ ၄ သန်း​ကြား) လောက်အထိ ထုတ်လုပ်သွားဖို့ ရှိနေပါတယ်။

    ဗီယက်အနမ်အစိုးရဟာ Apple ကုမ္ပဏီနဲ့ သက်ဆိုင်တဲ့ ပညာရှင်တွေကို အထူးပါမစ်တွေ ထုတ်ပေးခဲ့ပြီး ရင်းနှီးမြှုပ်နှံမှု ချောမွေ့အောင် ဆောင်ရွက်ပေးခဲ့ပါတယ်။

    AirPods ပမာဏာ အများစုနဲ့ AirPods Pro တို့ကိုတော့ တရုတ်နိုင်ငံမှာပဲ ဆက်လက်ထုတ်လုပ်သွားမှာပါ။

    ပြီးခဲ့တဲ့နှစ်အတွင်း AirPods အလုံးရေ ၆၅ သန်းလောက် ရောင်းခဲ့ရပေမယ့် အခုနှစ်မှာတော့ ကိုရိုနာဗိုင်းရပ်စ် ပြန့်နှံ့မှုကြောင့် ရောင်းအား ကျဆင်းမယ်လို့ ခန့်မှန်းထားပါတယ်။

    Ref: Nikkei Asian

  • COVID-19 နဲ့ အရှေ့တောင်အာရှ နောက်ဆုံးအခြေအနေ

    COVID-19 နဲ့ အရှေ့တောင်အာရှ နောက်ဆုံးအခြေအနေ

    မတ် ၂၅၊ ၂၀၂၀
    M-Media

    ဓာတ်ပုံ- ထိုင်းဝန်ကြီးချုပ် ပရာယွတ်ချန်အိုချာ အရေးပေါ်အခြေအနကြေငြာနေစဉ်

    ထိုင်းနိုင်ငံက အရေးပေါ်အခြေအနေကြေငြာ

    – ပြီးခဲ့တဲ့ ၂၄ နာရီအတွင်း လူ ၁၀၇ ဦး ကူးစက်ခဲ့တဲ့ ထိုင်းနိုင်ငံကတော့ ဒီကနေ့မှာ အရေးပေါ်အခြေအနေ ကြေငြာလိုက်ပါတယ်။ ဒီနေ့ည သန်းခေါင်ယံအချိန်မှာ စတင်သက်ရောက်မှာဖြစ်ပြီး ဧပြီလ ၃၀ ရက်နေ့အထိ ကြာမြင့်မှာပါ။

    ကုန်းလမ်း၊ ရေလမ်း၊ လေကြောင်းလမ်းတွေအားလုံးကို ပိတ်ပစ်လိုက်ပြီး၊ ကုန်ပစ္စည်းပို့တာ၊ သံတမန်ကိစ္စနဲ့လာတာ၊ ပါမစ်နဲ့ အလုပ်လာလုပ်တဲ့ နိုင်ငံခြားသားတွေကလွဲလို ကျန်တဲ့လူတွေ ဝင်ခွင့်မပြု တော့ပါဘူး။ ဘန်ကောက်အပါအဝင် ရောဂါပြန့်နှံ့နိုင်ခြေရှိတဲ့ ဒေသတစ်ချို့မှာ ဖျော်ဖြေရေးနေရာတွေ ပိတ်ရတော့မှာ ဖြစ်ပါတယ်။

    အစားအသောက်တွေ၊ ဆေးဝါးတွေ အများအပြား သိုလှောင်ထားသူတွကို အရေးယယူသွားမယ်လို့ ဝန်ကြီးချုပ် ပရာယွတ်ချန်အိုချာက ရုပ်သံမိန့်ခွန်းမှာ ထည့်သွင်းပြောကြားခဲ့ပါတယ်။

    ခရီးဝေးတွေမသွားဖို့ ပြည်သူတွေကို တိုက်တွန်းခဲ့ပြီး၊ သွားမယ်ဆိုရင် သက်ဆိုင်ရာမှာ ကျန်းမာရေးစစ်ဆေးကာ အချက်အလက်အသေးစိတ် တင်ပြရမှာဖြစ်ပါတယ်။

    ထိုင်းနိုင်ငံမှာ ကူးစက်သူအရေအတွက် ၉၃၄ ဦးရှိပြီး၊ သေဆုံးသူ ၄ ဦး ရှိပါတယ်။ ပြန်ကောင်းသူ အရေအတွက်ကတော့ ၇၀ ရှိနေပါတယ်။

    မလေးရှားက နိုင်ငံတံခါးပိတ်မှုကာလကို နောက်ထပ် ၂ ပတ် သက်တမ်းတိုး

    – ရောဂါကူးစက်မှုတွေ ဆက်လက်ရှိနေတာကြောင့် မလေးရှားနိုင်ငံက တစ်နိုင်ငံလုံး တံခါးပိတ်ထားမှု ရက်ကို ဧပြီလ ၁၄ ရက်နေ့အထိ ထပ်မံသက်တမ်းတိုးလိုက်ပါတယ်။

    လက်ရှိ တံခါးပိတ်ထားမှုဟာ မတ်လ ၃၁ ရက်နေ့ဆို ကုန်ဆုံးမှာပါ။ ဝန်ကြီးချုပ် မုဟ်ယစ်ဒင်ယာစင်က အခြေအနေတွေ ဆိုးနေတာကြောင့် ပြည်သူတွေ လှုပ်ရှားသွားလာမှုကို ကန့်သတ်ပြီး နိုင်ငံကို တံခါးပိတ်ထားတာကသာ ထိန်းသိမ်းနိုင်မယ့် တစ်ခုတည်းသောနည်းလမ်းဖြစ်ကြောင်း၊ ပြည်သူလူထု စိုးရိမ်ပူပန်မှုမဖြစ်အောင် သက်တမ်းတိုးမယ့်ကိစ္စကို ကြိုတင်ကြေငြာတာဖြစ်ကြောင်း ပြောကြားခဲ့ပါတယ်။

    ကျန်းမာရေးဝန်ကြီးဌာန၊ နိုင်ငံတော်လုံခြုံရေးကောင်စီနဲ့ ဝန်​ကြီးချုပ်တို့ အစည်းအဝေးလုပ်ပြီးနောက်ပိုင်း ဒီဆုံးဖြတ်ချက် ထွက်လာတာ ဖြစ်ပါတယ်။

    မလေးရှားမှာ မတ်လ ၂၅ ရက်နေ့အထိ သေဆုံးသူ ၁၉ ဦး၊ ကူးစက်သူ ၁၇၉၆ ဦး ရှိနေပါတယ်။ အဲဒီအထဲမှာ ၁၉၉ ဦးက ပြန်ကောင်းသွားပြီဖြစ်ပါတယ်။

    အင်ဒိုနီးရှားတွင် အမှန်တကယ်ကူးစက်သူပမာဏ ပိုမိုများပြားနိုင်

    – အင်ဒိုနီးရှားမှာ မနေ့က ကူးစက်သူအရေအတွက် ၁၀၅ ဦး၊ သေဆုံးသူ ၃ ဦး ရှိခဲ့ပါတယ်။ ဒါ့ကြောင့် စုစုပေါင်း ကူးစက်သူအရေအတွက် ၇၉၀ နဲ့ သေဆုံးသူ ၅၈ ဦး ရှိလာတာပါ။

    ပြန်ကောင်းသွားသူက ၃၁ ဦး ရှိပါတယ်။ ကျန်းမာရေးဆိုင်ရာ ကျွမ်းကျင်သူတွေကတော့ အင်ဒိုနီးရှားမှာ စမ်းသပ်မှုပမာဏ နည်းတာကြောင့် အမှန်တကယ်ကူးစက်သူအရေအတွက် များပြားလိမ့်မယ်လို့ သုံးသပ်ကြပါတယ်။

    လန်ဒန်အခြေစိုက် ကူးစက်ရောဂါ လေ့လာမှုအဖွဲ့ Centre for Mathematical Modelling of Infectious Diseases က ကူးစက်မှုရဲ့ ၂ ရာခိုင်နှုန်းလောက်ကိုသာ အစိုးရက သိရှိရတာဖြစ်တယ်လို့ တနင်္လာနေ့မှာ ပြောကြားခဲ့ပါတယ်။ ဒီတွက်ချက်မှုသာ မှန်ကန်ရင် အင်ဒိုနီးရှားမှာ ကူးစက်သူ အရေအတွက် ၃၅၀၀၀ လောက် ရှိနေမှာ ဖြစ်ပါတယ်။

    အစိုးရကတော့ ဗိုင်းရပ်စ်အန္တရာယ်ဟာ ထင်သလောက် မဆိုးရွားဘူးလို့ ပြောကြားထားပါတယ်။

    ဗီယက်နမ်တွင် လူစုလူဝေးမလုပ်ရန် တားမြစ်

    ဗီယက်နမ်ကတော့ မြို့တော်ဟနွိုင်းမှာ ဖျော်ဖြေရေးနေရာတွေအားလုံး ယာယီပိတ်ထားဖို့နဲ့ ဘာသာရေးနေရာတွေမှာ လူစုလူဝေးမလုပ်ဖို့ ဒီကနေ့မှာ တားမြစ်လိုက်ပါတယ်။

    ဒုတိယမြို့တော် ဟိုချီမင်းမှာလည်း လူ ၃၀ ထက်ကျော်ပြီး ထိုင်လို့ရတဲ့ စားသောက်ဆိုင်တွေအားလုံးကို ပိတ်ဖို့ အင်္ဂါနေ့မှာ အမိန့်ထုတ်ခဲ့ပါတယ်။

    ဗီယက်နမ်မှာ ကူးစက်သူအရေအတွက် ၁၀၀ ကျော်ရှိပြီး အများစုက နိုင်ငံခြားကနေ ကူးစက်လာကြသူတွေဖြစ်ပါတယ်။ ဝန်ကြီးချုပ် Nguyen Xuan Phuc က နောက်ထပ် ၂ ပတ်လောက်ဟာ ကိုရိုနာဗိုင်းရပ်စ်တိုက်ဖျက်ရေးအတွက် အဆုံးအဖြတ်ပေးမယ့်ကာလ ဖြစ်တယ်လို့ ပြောကြားထားပါတယ်။

    Ref: CNA, The Star

    #mmInternationalNews