နို၀င်ဘာ ၂၆၊ ၂၀၂၂
M-Media
-ကာတာမှာပြုလုပ်နေတဲ့ ကမ္ဘာ့ဖလားပွဲကြောင့် အာရပ်ကမ္ဘာမှာ အရင်ကထက်ပိုပြီး စည်းလုံးညီညွတ်မှုကို မြင်လာရပါတယ်။
ပင်လယ်ကွေ့နိုင်ငံတစ်ခုဖြစ်တဲ့ ကာတာဟာ အာရပ်ကမ္ဘာမှာ နိုင်ငံရေး၊ စီးပွားရေးအရ အရေးပါတဲ့ အနေအထားတစ်ခုရှိပြီး အခြား အိမ်နီးချင်း အာရပ်နိုင်ငံတစ်ချို့က အားပြိုင်တာတွေလည်း ရှိပါတယ်။
၂၀၁၇ ခုနှစ်က ဆော်ဒီ၊ ယူအေအီး၊ ဘာရိန်းနဲ့ အီဂျစ်တို့ဟာ အကြမ်းဖက်အဖွဲ့အစည်းတွေကို ထောက်ပံ့တယ်ဆိုတဲ့ စွပ်စွဲချက်နဲ့ ကာတာကို သံတမန်ရေး အဆက်အသွယ် ဖြတ်ခဲ့ပါတယ်။
ဒီပြဿနာဟာ ၂၀၂၁ ခုနှစ်မှ အဆုံးသတ်တာပါ။
အခု ကာတာကမ္ဘာ့ဖလားပွဲမှာတော့ အာရပ်နိုင်ငံတွေအားလုံး တစ်စိတ်တစ်၀မ်းတည်း ပိုဖြစ်လာတာကို တွေ့ရပါတယ်။ ကာတာကို ဦးဆောင်ပိတ်ဆို့ခဲ့တဲ့ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်တစ်ယောက် ကမ္ဘာ့ဖလားဖွင့်ပွဲအခမ်းအနားကို တက်ရောက်ခဲ့ပြီး ကာတာခေါင်းဆောင် ရှိခ် သာမင် ဘင် အလ် သာနီက ဖက်လှဲတကင်း နှုတ်ဆက် ကြိုဆိုခဲ့ပါတယ်။
ကမ္ဘာ့ဖလားကြောင့် အာရပ်ပြည်သူတွေကြားထဲမှာလည်း စည်းလုံးညီညွတ်မှုကို ပိုမြင်လာရပါတယ်။
“ကာတာရှုံးလို့ ၀မ်းနည်းတာထက်။ ဆော်ဒီနိုင်လို့ ပိုပျော်ရတယ်” လို့ ကာတာကျောင်းသားတစ်ဦးဖြစ်တဲ့ ဘာဆန် မိုဟာမက်က ပြောပါတယ်။
ဘာဆန်တို့ သူငယ်ချင်းတွေဟာ ဆော်ဒီ-အာဂျင်တီးနားပွဲအပြီးမှာ ကာတာနဲ့ ဆော်ဒီအလံတွေကိုင်ပြီး လှည့်လည်အောင်ပွဲခံခဲ့ကြပါတယ်။
ကာတာမှာ ကျင်းပတဲ့အတွက် အာရပ်ပရိတ်သတ်တွေ သူတို့အသင်းကို အားပေးဖို့ ပိုမိုလွယ်ကူသွားပါတယ်။
“ကာတာမှာသာ မဟုတ်ဘူးဆိုရင်။ ဒီလို လွယ်လွယ်ကူကူ ကြည့်ရမှာမဟုတ်ပါဘူး။ ကျွန်တော့်အဖို့ သွားကြည့်နိုင်မှာလည်း မဟုတ်ပါဘူး” လို့ ဆော်ဒီပရိတ်သတ် မိုဟာမက် အလ်-ဒါဘဂ်က ပြောပါတယ်။
တူနီးရှားပရိတ်သတ် အေမင်က အာရပ်ပြည်သူတွေအကြား အခုလို ညီညွတ်မှုကို တွေ့မြင်ရတာဟာ အထူးအဆန်းမဟုတ်ဘူးလို့ ဆိုပါတယ်။
“နိုင်ငံရေးက သပ်သပ်၊ လူထုက သပ်သပ်ပဲ။ ခေါင်းဆောင်တွေ မတည့်ကြရင်တောင် ပြည်သူတွေကတော့ စည်းလုံးကြတယ်”
မော်ရိုကို၊ တူနီရှား၊ ကာတာနဲ့ ဆော်ဒီအာရေဗျစတဲ့ အာရပ်နဲ့ အာရပ်အနွယ်၀င်နိုင်ငံက ပရိတ်သတ်တွေ စုစည်းတဲ့ ပါတီ Souq Waqif မှာ ပုံမှန်ပါ၀င်လေ့ရှိတယ်လို့လည်း အေမင်က ပြောပါတယ်။
“အီဂျစ်တွေ၊ အလ်ဂျီးရီးယားတွေ၊ လက်ဘနွန်နဲ့ အိုမန်ပရိတ်သတ်တွေတောင် ဒီမှာလာစုကြတယ်။ သူတို့အသင်း ခြေစစ်ပွဲမအောင်ပေမယ့် လာအားပေးကြတာပေါ့”
အိမ်ရှင်ကာတာအသင်း အုပ်စုကနေ အစောဆုံး လှည့်ပြန်ခဲ့ရပေမယ့် ဆော်ဒီနဲ့ ဒေသတွင်းက အခြားအသင်းတွေကို ကာတာပြည်သူတွေက ဆက်လက်အားပေးသွားဖို့ ရှိနေပါတယ်။
“အာရပ်အသင်းအားလုံးအတွက် ဂုဏ်ယူပါတယ်။ ပြိုင်ပွဲမှာ သူတို့ ရှိနေသမျှ ကျွန်မတို့ အားပေးသွားမှာပါ” လို့ ကာတာပြည်သူတစ်ဦးဖြစ်တဲ့ အတ်စမာက ပြောပါတယ်။
ပါလက်စတိုင်းအရေး
အာရပ်ကမ္ဘာမှာ ပထမဆုံးကျင်းပတဲ့ ကမ္ဘာ့ဖလားမှာ အစ္စရေးရဲ့ ကျူးကျော်သိမ်းပိုက် ဖိနှိပ်မှုကို ခံစားနေရတဲ့ ပါလက်စတိုင်းပြည်သူတွေအပေါ် စာနာတဲ့ သတင်းစကားတွေကိုလည်း အများအပြား တွေ့ရပါတယ်။
“ကာတာမှာ ဘယ်ကိုပဲသွားသွား ပါလက်စတိုင်းအလံကို မြင်ရတယ်။ ပါလက်စတိုင်းတွေနောက်မှာ ကျွန်တော်တို့ရှိတယ်ဆိုတာ ကမ္ဘာကို ပြချင်တာပါ” လို့ အေမင်က ပြောပါတယ်။
ကာတာနဲ့ အီကွေဒေါပွဲကို သွားကြည့်ခဲ့တဲ့ အတ်စမာကလည်း သူတို့မိသားစုအားလုံး ကွင်းထဲကို ပါလက်စတိုင်းအလံတွေ ယူဆောင်သွားကြတယ်လို့ ပြောပါတယ်။
“ပါလက်စတိုင်းကိစ္စကို လူတွေပိုသိဖို့ ကျွန်မ မျှော်လင့်ပါတယ်။ ကာတာနိုင်ငံကိုသာမကဘဲ အာရပ်ကမ္ဘာနဲ့ပတ်သက်တဲ့ အနောက်ကမ္ဘာကအမြင်တွေကို ဒီကမ္ဘာ့ဖလားက ပြောင်းလဲပေးနိုင်လိမ့်မယ်လို့ ကျွန်မယုံကြည်ပါတယ်”
Ref: Aljazeera
