ဒီဇင်ဘာ ၁၇၊ ၂၀၂၀
M-Media
ပြင်သစ်သမ္မတ မာခရွန် ကိုဗစ်ကူးစက်ခံရ
သမ္မတ အီမန်နျူယဲလ်မာခရွန်ဟာ ကိုဗစ်ကူးစက်ခံထားရပြီး တစ်ပတ်တာ ကွာရန်တင်းဝင်သွားမယ်လို့ ပြင်သစ်သမ္မတရုံးက ဒီကနေ့မှာ ထုတ်ပြန်ပါတယ်။
အသက် ၄၂ နှစ်အရွယ် မာခရွန်ဟာ ရောဂါလက္ခဏာတွေ ပြတာကြောင့် ကိုဗစ်စစ်ခဲ့တာပါ။ အသက် ၆၇ နှစ်အရွယ် သမ္မတကတော်နဲ့ ဝန်ကြီးချုပ် ဂျီင် ကက်စ်တက်စ်တို့လည်း ကွာရန်တင်း ဝင်နေပါတယ်။
ပြီးခဲ့တဲ့ရက်ပိုင်းအတွင်း မာခရွန်နဲ့တွေ့ဆုံခဲ့တဲ့ ဥရောပထိပ်ပိုင်းခေါင်းဆောင်တွေထဲက တော်တော်များများက သူတို့လည်း ကွာရန်တင်းဝင်သွားမယ်လို့ ထုတ်ပြန်ခဲ့ပါတယ်။
မာခရွန်ဟာ ကွာရန်တင်းဝင်နေပေမယ့် လုပ်ငန်းတာဝန်တွေကို ဆက်လက်လုပ်ဆောင်မှာ ဖြစ်ပါတယ်။
WHO အဖွဲ့ ဝူဟန်သွားပြီး ကိုဗစ်အကြောင်း စုံစမ်းမည်
ကိုဗစ်ရောဂါပိုးရဲ့ ရင်းမြစ်ကို လေ့လာစုံစမ်း ဖော်ထုတ်ဖို့အတွက် ပညာရှင် ၁၀ ဦးပါတဲ့အဖွဲ့ဟာ လာမယ့်လမှာ တရုတ်နိုင်ငံ ဝူဟန်မြို့ကို သွားရောက်မယ်လို့ WHO က ထုတ်ပြန်ပါတယ်။
ကိုဗစ်ဟာ ဝူဟန်မြို့ အသားငါးရောင်းတဲ့စျေးက ကူးစက်တာလို့ သတင်းထွက်တာပါ။ ဒီကိစ္စအတွက် နိုင်ငံတကာ ပညာရှင်တွေ လာရောက်စူးစမ်းဖို့ တရုတ်ဟာ အရင်တုန်းက ခါးခါးသီးသီး ငြင်းခဲ့ပါတယ်။
WHO အဖွဲ့ထဲမှာ ပါဝင်မယ့် ပညာရှင် ရောဘတ်ခို့က အခုခရီးစဉ်ဟာ ဘယ်သူ့ကိုမှ အပြစ်တင်ဖို့မဟုတ်ဘဲ ဝူဟန်မှာ ဘာတွေဖြစ်ခဲ့သလဲဆိုတာ စုံစမ်းဖို့၊ ရရှိတဲ့ အချက်အလက်တွေကို အခြေခံပြီး အနာဂတ်မှာဖြစ်လာမယ့် အန္တရာယ်ကို တားဆီးဖို့ ဖြစ်တယ်လို့ ပြောကြားခဲ့ပါတယ်။
ကိုဗစ်ဟာ တရုတ်အစိုးရက ဖန်တီးပြီး ဖြန့်တာလို့ အမေရိကန်သမ္မတ ဒေါ်နယ်ထရမ့်က စွပ်စွဲခဲ့ပြီး ဒီအတွက် တရုတ်အစိုးရနဲ့ တင်းမာမှုတွေ မြင့်တက်ခဲ့ပါတယ်။
ယူကေတွင် တစ်ပတ်အတွင်း လူ ၁ သိန်းကျော် ကိုဗစ်ကာကွယ်ဆေးထိုး
ယူကေမှာ ပြီးခဲ့တဲ့တစ်ပတ်အတွင်း လူပေါင်း ၁၃၇၈၉၇ ဦး ကိုဗစ်ကာကွယ်ဆေး ထိုးခွင့်ရခဲ့ပါတယ်။
ယူကေဟာ Pfizer / BioNTech ကိုဗစ်ကာကွယ်ဆေးကို ပထမဆုံး အသုံးပြုတဲ့နိုင်ငံပါ။ လက်ရှိမှာ ကာကွယ်ဆေးစင်တာ ၂၀၀ လောက်ရှိနေပြီး နောက်တစ်ပတ်အတွင်း တစ်ထောင်လောက်အထိ တိုးချဲ့ဖို့ ရှိနေပါတယ်။
ယူကေအစိုးရဟာ ရှေ့တန်းက ကျန်းမာရေးဝန်ထမ်းတွေနဲ့ အသက် ၇၀ ကျော်အရွယ်တွေကို ဦးစားပေး ထိုးပေးနေတာ ဖြစ်ပါတယ်။
ယူကေမှာ ကိုဗစ်ကာကွယ်ဆေးစထိုးတဲ့ တစ်ပတ်အတွင်း ဓာတ်မတည့်သူ ၂ ဦးသာ တွေ့ခဲ့ရပါတယ်။ ဆေးရဲ့ အန္တရာယ်ကင်းမှုကို စိတ်ချရပေမယ့် ဆေးသယ်ယူရေးမှာ အခက်အခဲတစ်ချို့ရှိတယ်လို့ ယူကေအစိုးရက ပြောကြားထားပါတယ်။
Ref: BBC, CNN
