ဒီဇင်ဘာ ၁၄၊ ၂၀၁၇
M-Media
– ၁၉၉၄ ခုနှစ်က ဖြစ်ပွားခဲ့တဲ့ ရ၀မ်ဒါ လူမျိုးတုန်းသတ်ဖြတ်မှုမှာ ပြင်သစ်စစ်ဖက်တာဝန်ရှိသူတွေဟာ ကျူးလွန်သူတွေကို လက်နက်တွေပေးတာ၊ အရေးယူဆောင်ရွက်မှုတွေကို နှောက်ယှက်ဟန့်တားတာတွေ လုပ်ခဲ့တယ်လို့ ဒီကိစ္စနဲ့ပတ်သက်တဲ့ အစီရင်ခံစာသစ်တစ်ခုမှာ တွေ့ရပါတယ်။
လူပေါင်း ၈ သိန်းကျော်လောက် သေဆုံးခဲ့တဲ့ ဒီသတ်ဖြတ်မှုကြီးမှာ ပြင်သစ်အာဏာပိုင်တွေ ဘယ်လိုအခန်းကဏ္ဍကနေ ပါဝင်ခဲ့လဲဆိုတာကို ရ၀မ်ဒါအစိုးရရဲ့ တာဝန်ပေးမှုနဲ့ စုံစမ်းမှုတွေ ပြုလုပ်နေတဲ့ အမေရိကန် ဥပဒေလုပ်ငန်း Cunningham Levy Muse က အင်္ဂါနေ့မှာ ထုတ်ပြန်တဲ့ The Muse အစီရင်ခံစာမှာ ဒီလို ဖ်ာပြထားတာပါ။
မျက်မြင်သက်သေတွေကို တွေ့ဆုံမေးမြန်းမှုတွေအရ ပြင်သစ်အာဏာပိုင်တွေဟာ လူမျိုးတုန်းသတ်ဖြတ်မှုအတွက် သံသယရှိသူတွေကို ကာကွယ်ပေးတာ၊ မြို့တော် ကီဂါလီက ပြင်သစ်သံရုံးမှာ သတ်ဖြတ်မှုဖြစ်ပွားစဉ် အုပ်စိုးခဲ့တဲ့ အစိုးရကို ဖွဲ့စည်းပေးတာတွေ လုပ်ခဲ့တယ်လို့ ဆိုပါတယ်။
ရ၀ပ်ဒါ နိုင်ငံခြားရေးဝန်ကြီး လူစီ မူရှီကီဝါဘိုက ‘၁၉၉၀ ပြည့်နှစ်တွေနဲ့ အဲဒီနောက်ပိုင်း ရ၀မ်ဒါမှာ ပြင်သစ်အာဏာပိုင်တွေ လုပ်ခဲ့တဲ့ ဆိုးဆိုးဝါးဝါး ကိစ္စတွေကို’ ဒီအစီရင်ခံစာက ဖော်ပြလိုက်တာဖြစ်တယ်လို့ ပြောကြားခဲ့ပါတယ်။
“အများစုကို ပြင်သစ်ကနေရခဲ့တဲ့ အချက်အလက်တွေထဲမှာ ပြင်သစ်အစိုးရနဲ့ ပြင်သစ်အာဏာပိုင်တွေဟာ လူမျိုးတုန်းကျူးလွန်တဲ့ ရ၀မ်ဒါအစုိးရကို သတ်ဖြတ်မှု မဖြစ်ခင်၊ ဖြစ်နေစဉ်နဲ့ ဖြစ်ပြီးနောက်ပိုင်းမှာ ဘယ်လို ပံ့ပိုးကူညီခဲ့လဲဆိုတာကို ပြသနေပါတယ်” လို့ ရ၀မ်ဒါနိုင်ငံခြားရေးဝန်ကြီးဌာနက တာဝန်ရှိသူ အိုလီဗီယာ နူဟန်ဂီရီဟီက ပြောကြားခဲ့ပါတယ်။
ဒီအစီရင်ခံစာကို ပြင်သစ်အစိုးရဆီ ပေးပို့သွားမှာဖြစ်ပြီး လူမျိုးတုန်းသတ်ဖြတ်မှုနဲ့ ဆက်စပ်တဲ့ လျှို့ဝှက်မှတ်တမ်းအားလုံးကို တောင်းဆိုသွားဖို့ ရှိနေပါတယ်။
Ref: Aljazeera
