သြဂုတ် ၁၄၊ ၂၀၁၇
M-Media
– ပါကစ္စတန်နိုင်ငံဟာ သြဂုတ်လ ၁၄ ရက်နေ့မှာ သူတို့ရဲ့ နှစ် ၇၀ မြောက် လွတ်လပ်ရေးနေ့အခမ်းအနားကို ကျင်းပမှာဖြစ်ပြီး သူတို့ရဲ့ ကျောင်းတော်ကပြိုင်ဘက် အိန္ဒိယဟာ နောက်တစ်ရက်မှာ လွတ်လပ်ရေးနေ့ ကျရောက်မှာ ဖြစ်ပါတယ်။
ဗြိတိသျှထံကနေ လွတ်လပ်ရေးရပြီးနောက်ပိုင်း သူတို့ နှစ်နိုင်ငံဟာ တင်းမာမှုတွေရှိခဲ့ပြီး အထူးသဖြင့် ပိုင်နက်အငြင်းပွားမှုဖြစ်နေတဲ့ ကက်ရ်ှမီးယားဒေသအတွက် ၃ ကြိမ်တိုင်တိုင် စစ်ဖြစ်ခဲ့ပါတယ်။
ဒီရန်လိုမှုတွေကို ပြေငြိမ်းပြီး နှစ်နိုင်ငံစည်းလုံးနိုင်ရေး သီချင်းတစ်ပုဒ်ဟာ လွတ်လပ်ရေးနေ့အမီ အွန်လိုင်းမှာ ပေါ်ထွက်လာခဲ့ပါတယ်။
‘ငြိမ်းချမ်းရေး နိုင်ငံတော်သီချင်း’ လို့ အမည်ပေးထားတဲ့ အဲဒီဗီဒီယိုမှာ အိန္ဒိယနဲ့ ပါကစ္စတန်တို့ရဲ့ နှစ်နိုင်ငံ နိုင်ငံတော်သီချင်းတွေကို ထည့်သွင်းထားတာပါ။
ငြိမ်းချမ်းရေးလိုလားတဲ့ Facebook အဖွဲ့ Voice of Ram က အဲဒီသီချင်းကို သူတို့ရဲ့ စာမျက်နှာမှာ လွှင့်တင်ခဲ့တာဖြစ်ပြီး နှစ်နိုင်ငံစလုံးက ပြည်သူတွေက သီချင်းစာသား၊ နောက်ကွယ်က ရည်ရွယ်ချက်တွေနဲ့ပတ်သက်ပြီး ချီးကျူးခဲ့ကြပါတယ်။
အဲဒီဗီဒီယိုကို “ငါတို့ရဲ့ နယ်ခြားတွေကို အနုပညာအတွက် ဖွင့်လိုက်မယ်ဆိုရင် ငြိမ်းချမ်းရေးပါ တွဲပါလာမှာပါ” ဆိုတဲ့ စာသားနဲ့ အစပြုထားပါတယ်။
အဲဒီနောက် အိန္ဒိယနဲ့ ပါကစ္စတန်က အနုပညာရှင်တွေဟာ အိန္ဒိယ နိုင်ငံတော်သီချင်းဖြစ်တဲ့ Jana Gana Mana နဲ့ ပါကစ္စတန်နိုင်ငံတော်သီချင်း Pāk Sarzamīn တို့ကို တစ်ပိုဒ်စီ ပေါင်းစပ်သီဆိုခဲ့ကြပါတယ်။
ဗီဒီယိုအပိတ်မှာတော့ ‘ငြိမ်းချမ်းရေးအတွက် အတူတကွ ရပ်တည်ကြပါစို့’ ဆိုတဲ့ စာသားနဲ့ အဆုံးသတ်ထားပါတယ်။
Voice of Ram ရဲ့ စာမျက်နှာမှာ သြဂုတ်လ ၁၁ ရက်နေ့က ဒီဗီဒီယိုကို လွှင့်တင်ခဲ့တာပါ။ သီချင်းမှာ ပါဝင်သီဆိုပေးခဲ့တဲ့ Voxchord အဖွဲ့က အခု သီချင်းဟာ ‘ယုံကြည်ချက်၊ ဂုဏ်သိက္ခာ၊ ခမ်းနားမှု၊ စွမ်းအား၊ တိုးတက်မှု၊ ပြည့်စုံကောင်းမွန်မှု’ တွေကို တိုက်တွန်းတာဖြစ်တယ်လို့ ဆိုပါတယ်။
ပါကစ္စတန်က Dawn သတင်းစာကတော့ သီဗီဒီယိုဟာ အံ့သြစရာ လုပ်ဆောင်ချက်မျိုးဖြစ်ပြီး၊ နားဆင်ဖို့ ထိုက်တန်တဲ့ သီချင်းတစ်ပုဒ်လို့ မှတ်ချက်ပေးခဲ့ပါတယ်။
ဆိုရှယ်မီဒီယာမှာတော့ နှစ်နိုင်ငံက ပြည်သူတွေဟာာ ဒီသီချင်းကို ချီးကျူးနေကြပါတယ်။
Voice of Ram ရဲ့ အကြီးအကဲဖြစ်သူ ရမ် ဆူဘရာမာနီယမ်က လူတော်တော်များများဟာ ငြိမ်းချမ်းရေးအကြောင်းပြောဖို့ ကြောက်ရွံ့နေပြီး ဒါဟာ ယုတ္တိဗေဒမကျတဲ့ ကြောက်ရွံ့မှုမျိုးဖြစ်တာကြောင့် ဒီဗီဒီယိုကို ဖန်တီးရခြင်းဖြစ်တယ်လို့ အိန္ဒိယ သတင်းဝဘ်ဆိုက် Catch News ကို ပြောကြားခဲ့ပါတယ်။
Ref: BBC
