မတ် ၂၁၊ ၂၀၂၃
M-Media
-ကမ္ဘာ့ပျော်စရာအကောင်းဆုံး နိုင်ငံများစာရင်းကို ကုလသမဂ္ဂက ထုတ်ပြန်ရာမှာ ဖင်လန်နိုင်ငံက နံပါတ် ၁ နေရာမှာ ရှိနေပါတယ်။
ကုလရဲ့ ရေရှည်ဖွံ့ဖြိုးတိုးတက်မှုဆိုင်ရာ ကွန်ယက်က နိုင်ငံတကာ ပျော်စရာနေ့အဖြစ် သတ်မှတ်ထားတဲ့ မတ်လ ၂၀ ရက်နေ့မှာ ဒီစာရင်းကို ထုတ်ပြန်တာပါ။
လူသက်တမ်းကို ကျန်းကျန်းမာမာနဲ့ ဖြတ်သန်းနိုင်မှု၊ တစ်ဦးချင်း GDP၊ လူမှုဖူလှုံရေးစနစ် ကောင်းမွန်မှု၊ ခြစားမှုကင်းစင်မှု၊ လူ့အဖွဲ့အစည်းအတွင်း ရက်ရောစောင့်ရှောက်မှု စတဲ့အချက်အလက်တွေကို တိုင်းတာကာ အမှတ်သတ်မှတ်တာပါ။
၂၀၂၀ ခုနှစ်ကနေ ၂၀၂၂ လေ့လာဆန်းစစ်မှုအတွင်း ဖင်လန်နိုင်ငံက ၇.၈ မှတ်နဲ့ ထိပ်ဆုံးမှာ ရှိနေတာ ဖြစ်ပါတယ်။ ဖင်လန်ဟာ ဒီစာရင်းမှာ ၆ နှစ်ဆက်တိုက် ထိပ်ဆုံးနေရာမှာ ရပ်တည်နိုင်ခဲ့တာပါ။
အိမ်နီးချင်းနိုင်ငံတွေဖြစ်တဲ့ ဒိန်းမတ်နဲ့ အိုက်စလန်တို့က အဆင့် ၂ နဲ့ ၃၊ အစ္စရေးက အဆင့် ၄၊ နယ်သာလန်က အဆင့် ၅ အသီးသီး ရှိနေပါတယ်။
ထိပ်ဆုံး အဆင့် ၂၀ အတွင်းမှာ သြစတေးလျ၊ ကနေဒါ၊ အမေရိကန်နဲ့ ယူကေတို့ ရှိနေကြပါတယ်။
စာရင်းရဲ့ အောက်ဆုံး အဆင့် ၁၃၇ နေရာမှာ အာဖဂန်နစ္စတန်က ၁.၉ မှတ်နဲ့ ရှိနေပြီး သူ့အထက်မှာ လက်ဘနွန်၊ အာဖရိကက ဆီယာရာ လီယိုနီနဲ့ ဇင်ဘာဘွေတို့က အသီးသီး ရှိနေပါတယ်။
စစ်အာဏာသိမ်းထားတာ ၂ နှစ်ကျော်ကြာပြီဖြစ်တဲ့ မြန်မာနိုင်ငံက ၄.၄ မှတ်နဲ့ အဆင့် ၁၁၇ နေရာမှာ ရှိပါတယ်။
Ref: CNN
