ဇူလိုင် ၈၊ ၂၀၁၇
M-Media
– “ခင်ဗျားသမီး အသက်ရှင်တာကိုမြင်ချင်လား၊ ဒါမှမဟုတ် အလောင်းပဲ ပြန်ယူချင်လား”
ဒီစကားဟာ ဂျဟာနာရာတစ်ယောက် လွန်ခဲ့တဲ့ ၁၀ နှစ်တုန်းက ခင်ပွန်းရဲ့ အရိုက်အနှက်ခံရချိန် သူ့ခင်ပွန်းက သူ့အမေကို ပြောကြားခဲ့တဲ့စကားပါ။ အဲဒီညမှာပဲ နိုင့်ထက်စီးနင်းအိမ်ထောင်ရေးကို ဂျဟာနာရာက အဆုံးသတ်ခဲ့ပြီး ကလေး ၄ ယောက်ကိုထားကာ အိမ်ကနေ ထွက်လာခဲ့ပါတယ်။
ဂျိုင်ပူးရ်ဆိုတဲ့ တစ်မြို့တည်းမှာ အတူနေကြပေမယ့် အဲဒီအချိန်ကတည်းက သူမရဲ့ ခင်ပွန်းဖြစ်သူဟာ ကလေးတွေနဲ့ အတွေ့မခံတော့ပါဘူး။ စားရိတ်မပေးသလို၊ လက်ထပ်တုန်းက ‘မဟရ်’ အဖြစ် တင်တောင်းထားတဲ့ ရွှေ ၁၅ ဂရမ်ကိုလည်း ပေးဖို့ ခင်ပွန်းက ငြင်းဆန်ခဲ့ပါတယ်။ ခင်ပွန်သည်က တင်ရတဲ့ ‘မဟရ်’ ဟာ အစ္စလာမ့်တရားတော်အရ ဇနီးသည်ရဲ့ ပိုင်ဆိုင်မှုထဲမှာ အကျုံးဝင်ပြီး အိမ်ထောင်ရေးအဆုံးသတ်သွားတဲ့အခါ ဇနီးက လက်ဝယ်ရရှိရမှာ ဖြစ်ပါတယ်။ နေအိမ်နဲ့ပတ်သက်တဲ့ သူမရဲ့ပိုင်ဆိုင်ခွင့်ကိုလည်း ငြင်းပယ်ခံခဲ့ရပါတယ်။
အသက် ၄၅ နှစ်အရွယ် ဂျဟာနာရာဟာ တရားဥပဒေအရဖြစ်စေဖို့ ‘ကာဇီ’ လို့ခေါ်တဲ့ ဒေသဆိုင်ရာ အစ္စလာမ့်ရေးရာ တရားသူကြီးဆီကို သွားရောက်ခဲ့ပါတယ်။ ကာဇီတွေဟာ အိမ်ထောင်ရေး၊ မယားပြိုင်ထားမှု၊ ကွာရှင်းမှု၊ ‘သုံးသွလားက်’ ဆိုတဲ့ တစ်ထိုင်တည်းကွာရှင်းမှု၊ ကလေးအုပ်ထိန်းခွင့် စတဲ့ ကိစ္စတွေကို ကိုင်တွယ်ဖြေရှင်းရတာဖြစ်ပြီး များသောအားဖြင့် အမျိုးသားတွေသာဖြစ်တဲ့ သူတို့တွေဟာ ကုရ်အာန်ရဲ့ စည်းမျဉ်းတွေအရ တရားမျှတအောင် ဆောင်ရွက်ရတာ ဖြစ်ပါတယ်။ ဒီရာထူးကို အဖေကနေသား စသဖြင့် အဆင့်ဆင့် လွှဲပြောင်းတာဝန်ယူတာဟာ ထုံးစံလို ဖြစ်နေပါပြီ။
ဒါပေမယ့် အရင်က သူမလိုအဖြစ်မျိုးကြုံတွေ့ရတဲ့ အမျိုးသမီးတွေလိုပဲ ဂျဟာနာရာတစ်ယောက် စိတ်ပျက်ခဲ့ရပါတယ်။
“သူ (ကာဇီ) က ကျွန်မရဲ့ အခွင့်အရေးတွေ ပြန်ရအောင်လုပ်ပေးဖို့ ငြင်းခဲ့တယ်။ ကျွန်မရဲ့အခြေအနေဟာ တရားမျှတတယ်လို့ မထင်ပါဘူး။ ဂျိုင်ပူးရ်က အိုလမာ (အစ္စလာမ့်သာသနာ့ပညာရှင်) တွေဆီသွားပြီး ကျွန်မ ခံနေရတဲ့ တရားမမျှတမှုဟာ ကုရ်အာန်က ခွင့်ပြုထားတာမျိုးလား။ ကုရ်အာန်ကပြောတဲ့ အမျိုးသမီးတစ်ယောက်ရဲ့ အဆင့်အတန်းမျိုးလား။ ဒီအခြေအနေက ကုရ်အာန်ကပေးတဲ့ တရားမျှတမှုမျိုးလား – ဆိုပြီး မေးခဲ့ပါတယ်။ သူတို့အားလုံးက ‘ဟုတ်တယ်၊ ဒီလိုပဲ၊ ကြံ့ကြံ့ခံပါ’ လို့ ပြန်ဖြေခဲ့ကြပါတယ်” လို့ သူမက ဖွင့်ဟခဲ့ပါတယ်။
ဒါပေမယ့် ဂျဟာနာရာဟာတစ်ယောက် ဒီအခြေအနေကို ပြန်လည်တွန်းလှန်ဖို့ ဆုံးဖြတ်ခဲ့ပြီး ဒီနေ့မှာတော့ သူမဟာ အိန္ဒိယက အမျိုးသမီးကာဇီတစ်ဦး ဖြစ်လာပါပြီ။
မွမ်ဘိုင်းက မော်လ၀ီကျောင်းတစ်ခုဖြစ်တဲ့ ‘ဒါရွလ်အိုလူမ် နစ္စ၀မ်’ ဟာ ၂၀၁၅ ခုနှစ်ကတည်းကစပြီး အမျိုးသမီးတွေအတွက် ၂ နှစ်တာကြာမြင့်တဲ့ ကာဇီသင်တန်းကို ဖွင့်လှစ်ပေးခဲ့ပါတယ်။ ရည်ရွယ်ချက်ကတော့ အမျိုးသမီးတွေကို အကျိုးနည်းစေတဲ့ ဓလေ့ထုံးတမ်းတွေကို ကုရ်အာန်အသိပညာ ပြည့်ဝနေတဲ့ အမျိုးသမီးကာဇီတွေက တွန်းလှန်တိုက်ဖျက်ဖို့ ဖြစ်ပါတယ်။
အခုနှစ်နွေရာသီမှာ အမျိုးသမီး ၁၅ ယောက်တစ်သုတ်ဟာ သင်တန်းပြီးဆုံးခဲ့ပြီး တာဝန်ထမ်းဆောင်ဖို့ အသင့်ဖြစ်နေပါပြီ။
သင်တန်းဆင်း နောက်တစ်ယောက်ကတော့ အသက် ၄၃ နှစ်အရွယ် အဖ်ရွဇ် ဘေဂွန်ဖြစ်ပြီး ဂျဟာနာရာနဲ့ မတူတာက ဘေဂွမ်ဟာ သူ့ရဲ့အလုပ်အကိုင်ကို ပံ့ပိုးပေးတဲ့ အမျိုးသားနဲ့ ပျော်ရွှင်တဲ့အိမ်ထောင်ရေးကို ဖြတ်သန်းနေရတာ ဖြစ်ပါတယ်။
“ကုရ်အာန်က ကျွန်မတို့ကို တူညီတဲ့အခွင့်အရေး ပေးထားပါတယ်။ အသက်ရှင်သန်ခွင့်၊ ပညာသင်ခွင့်၊ ပစ္စည်းဥစ္စာပိုင်ဆိုင်ခွင့်၊ လွတ်လပ်စွာရွေးချယ်ခွင့် ပေးထားတယ်။ မွတ်စလင်အမျိုးသမီးတွေ ဒါကို နားလည်လာတာနဲ့ သူတို့ရဲ့ဘ၀တွေ ပြောင်းလဲသွားမှာပါ” လို့ ဘေဂွမ်က ပြောကြားခဲ့ပါတယ်။
အစ္စလာမ်သာသနာမှာ ထိမ်းမြားလက်ထပ်ခြင်းဟာ နှလုံးသားရေးရာကတိက၀တ်ဖြစ်ပြီး ထိမ်းမြားမှုနဲ့ပတ်သက်တဲ့ စည်းမျဉ်းစည်းကမ်းတွေ၊ ဆောင်ရန်ရှောင်ရန်တွေကို ကာဇီနဲ့ မေးမြန်းဆွေးနွေးရပါတယ်။ အဲဒီလိုအခါမျိုးမှာ ကာဇီတွေက အမျိုးသားတွေကို ပစားပေးလေ့ ရှိပါတယ်။
ပူလောင်အိုက်စပ်တဲ့ နေ့တစ်နေ့မှာ ဂျဟာနာရာနဲ့ ဘေဂွမ်တို့ဟာ ဂျိုင်ပူးရ် မွတ်စလင်ရပ်ကွက်က စည်းကားနေတဲ့ ပျံကျဈေးနား သူတို့ရဲ့ ရုံးခန်းမှာ ရုံးထိုင်နေပါတယ်။ သူတို့ဟာ အင်မရန်းခန်းနဲ့ သူ့ရဲ့ ဇနီး ဟူမာတို့အကြား ကတောက်ကဆဖြစ်မှုကို နှစ်သိမ့်အားပေးဖို့ ကြိုးစားနေကြတာပါ။ ၁ နှစ်သာရှိသေးတဲ့ သူတို့ရဲ့ အိမ်ထောင်ရေးဟာ ဂြိုဟ်ဆိုးဝင်ခဲ့ပြီး တစ်ယောက်နဲ့တစ်ယောက် စွပ်စွဲပြောကြားမှုတွေကြောင့် နှစ်ဖက်မိဘတွေက ပြေရာပြေကြောင်း ဖြန်ဖြေပေးရတဲ့အထိ ဖြစ်ခဲ့ပါတယ်။
လင်မယားနှစ်ယောက်စလုံးရဲ့ ခံစားချက်တွေကို ဂျဟာနာရာနဲ့ ဘေဂွမ်တို့က နားထောင်ကြပါတယ်။ သူတို့ဟာ ကွာရှင်းဖို့ မိဘတွေကို ပြောထားကြပြီး၊ ပိုပြီးသည်းခံကြဖို့ ဒီလင်မယားနှစ်ယောက်ကို ဆွေးနွေးနှစ်သိမ့်နေရပါတယ်။
“အမျိုးသားကာဇီက အိမ်ပြန်ပြီး ယောက်ျားအမိန့်အတိုင်းနေထိုင်ဖို့ ဟူမာကို ပြောပါတယ်။ မွတ်စလင်အမျိုးသမီးအများစုက သူတို့ရဲ့ အခွင့်အရေးကို နကန်းတစ်လုံးတောင် မသိကြပါဘူး။ ဒါပေမယ့် ကုရ်အာန်ကပြောထားတာတွေကို ကျွန်မတို့ နားလည်ထားတာကြောင့် အခုတော့ အရာရာဟာ ပြောင်းလဲသွားမှာပါ” လို့ ဘေဂွမ်က ဆိုပါတယ်။
သူတို့နဲ့အတူထိုင်နေတဲ့ ဂျိုင်ပူးရ်က အမျိုးသမီးအဖွဲ့ Bharatiya Muslim Mahila Andolan အကြီးအကဲ နစ္စဟတ် ဟူစိုင်က ဒီအမျိုးသမီးကာဇီနှစ်ဦးအနေနဲ့ လုပ်စရာတွေ အများကြီးရှိသေးတယ်လို့ ဆိုပါတယ်။
“ဒီကာဇီသစ်နှစ်ဦးဟာ ထိမ်းမြားလက်ထပ်မှု မလုပ်ခင်မှာ အမျိုးသားတွေဆီက သက်ဆိုင်ရာ အထောက်အထားတွေကို တောင်းရမှာပါ။ သူတို့ဇနီးသေသွားပြီဆိုရင် သေစာရင်း၊ ကွာထားတယ်ဆိုရင်လည်း ကွာရှင်းစာချုပ်၊ ဆေးစစ်ချက်၊ အလုပ်အကိုင်ရှိကြောင်း သက်သေခံ ဒါတွေကို တောင်းရမှာပါ။ အမျိုးသမီးတွေကို ကာကွယ်ဖို့အတွက် ဒါတွေက လုပ်ကိုလုပ်ရမှာပါ။ ဒါပေမယ့် အဆက်ဆက်ကာဇီတွေကတော့ ဒါမျိုးတွေ မလုပ်ခဲ့ပါဘူး” လို့ ဟူစိုင်က ပြောကြားခဲ့ပါတယ်။
ကုရ်အာန်ကျမ်းတော်မြတ်က အမျိုးသမီးတွေကို တူညီတဲ့အခွင့်အရေးပေးထားတယ်ဆိုတာ နားလည်လာခဲ့ပြီးတဲ့နောက်မှာ ဂျဟာနာရာတစ်ယောက် ပိုပြီး ပျော်ရွှင်လာပါတယ်။ ယောက်ျားနဲ့ကွဲပြီးနောက်ပိုင်း ရတက်မအေးဖြစ်ရတဲ့ သူမဟာ နောက်ဆုံးမှာ ကာဇီသင်တန်းကို ရောက်ရှိလာခဲ့ပါတယ်။ အဲဒီသင်တန်းမှာ အစ္စလာမ်က အမျိုးသမီးတွေနဲ့ပတ်သက်ပြီး ဘာတွေပြောထားလဲဆိုတာကို အတိအကျ နားလည်လာခဲ့ပါတယ်။
တစ်ယောက်တည်းနေပြီး၊ တက်ကြွလှုပ်ရှားသူတစ်ယောက် ဖြစ်နေတဲ့အတွက်၊ ခင်ပွန်းနဲ့ ကွာရှင်းခဲ့တဲ့အတွက် ဘယ်အမျိုးသားကပဲ သူ့ကို လက်ညှိုးထိုးထိုး ဂျဟာနာရာကတော့ ဒီလိုလူမျိုးကို ကုရ်အာန်အကိုးအကားနဲ့ ပြန်လည်ချေပ ပြောဆိုနိုင်နေပါပြီ။
“အခု ကျွန်မက ကာဇီတစ်ယောက် ဖြစ်နေပြီ။ ကျွန်မမှာ အသိပညာရှိနေပြီ။ ဆွေးနွေးငြင်းခုံတတ်နေပြီ။ နောက်ဆုံးမှာတော့ ကျွန်မဟာ လွတ်မြောက်ပြီလို့ ခံစားရပါတယ်။ အခြားသော မွတ်စလင်အမျိုးသမီးတွေကိုလည်း ဒီလို လွတ်မြောက်စေချင်ပါတယ်” လို့ ဂျဟာနာရာက ပြောကြားခဲ့ပါတယ်။
Ref: The Guardian
(The Guardian တွင် ရေးသားထားသည့် Men deny us equality, not the Qur’an: a female Islamic judge in India speaks out ဆောင်းပါးကို ကိုတင်ရီက ဆီလျော်အောင် ဘာသာပြန်ဆိုသည်)
