Blog

ဇန်န၀ါရီ ၂၈၊ ၂၀၂၃

M-Media 

-အာဏာသိမ်းမှုဆန့်ကျင်တဲ့ အမျိုးသမီးတွေကို စစ်တပ်ထောက်ခံသူတွေက ဆိုရှယ်မီဒီယာမှာ စော်ကားမှု၊ ခြိမ်းခြောက်မှုတွေ ပိုမို ပြုလုပ်လာတယ်လို့ Myanmar Witness အဖွဲ့ရဲ့ လတ်တလောလေ့လာမှုမှာ တွေ့ရှိရပါတယ်။ 

အကြမ်းဖက်တိုက်ခိုက်ဖို့၊ အဓမ္မကျင့်ဖို့၊ သတ်ဖြတ်ဖို့အထိ လှုံ့ဆော်မှုတွေ ရှိနေပြီး Telegram၊ Facebook တို့လို ဆိုရှယ်မီဒီယာတွေက ဒီလိုပို့စ်တွေကို ဖယ်ရှားဖို့ ထိထိရောက်ရောက် လုပ်ဆောင်တာမျိုးမရှိဘူးလို့ အဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။ 

စစ်အာဏာသိမ်းမှုကို ဆန့်ကျင်တဲ့ အမျိုးသမီးတွေအပေါ် ဆိုရှယ်မီဒီယာမှာ တိုက်ခိုက်မှုဟာ ၂၀၂၁ ခုနှစ် ဖေဖော်၀ါရီ ၁ ရက်နေ့နောက်ပိုင်း အနည်းဆုံး ၅ ဆလောက် မြင့်တက်လာပါတယ်။ အခြား ဆိုရှယ်မီဒီယာတွေထက်စာရင် Telegram မှာ ဒီလို ကိစ္စတွေဟာ အဆ ၅၀၀ လောက် များပြားတယ်လို့ Myanmar Witness ရဲ့ လေ့လာမှုမှာ တွေ့ရှိရပါတယ်။ 

ဒီလိုတိုက်ခိုက်မှုအများစုကို ပြုလုပ်သူတွေဟာ စစ်အာဏာသိမ်းမှုကို ထောက်ခံကြောင်း ရေးသားတဲ့ အမျိုးသားအမည်နဲ့ အကောင့်တွေ ဖြစ်တယ်လို့လည်း ဆိုပါတယ်။ 

“အွန်လိုင်းက စော်ကားမှုတွေ၊ ကိုယ်ရေးကိုယ်အချက်အလက်တွေ ဖော်ထုတ်ပြီး တိုက်ခိုက်မှုတွေဟာ အမျိုးသမီးတွေရဲ့ အသံကို တိတ်အောင်၊ လူ့အဖွဲ့အစည်းအတွင်းကနေ ထွက်သွားအောင် လုပ်ဆောင်နေတာမျိုး ဖြစ်ပါတယ်”

“ရှုထောင့်အရ၊ ပုဂ္ဂိုလ်ရေးအရ၊ ဂုဏ်သိက္ခာပိုင်းအရ တိုက်ခိုက်မှုတွေ၊ အဓမ္မကျင့်မယ်၊ အကြမ်းဖက်တိုက်ခိုက်မယ်ဆိုတဲ့ ခြိမ်းခြောက်မှုတွေကြောင့် အမျိုးသမီးတွေဟာ စိတ်ပိုင်းဆိုင်ရာ ဆိုးဆိုးရွားရွား ထိခိုက်တာမျိုးတွေ ရှိနေပါတယ်” လို့ ထုတ်ပြန်ချက်မှာ ဖော်ပြထားပါတယ်။ 

စစ်အာဏာသိမ်းမှုကို ဆန့်ကျင်ကြောင်း၊ NUG၊ PDF နဲ့ တိုင်းရင်းသား လက်နက်ကိုင် အဖွဲ့အစည်းတွေကို ထောက်ခံကြောင်း ရေးသားတဲ့ အမျိုးသမီးတွေကို စစ်တပ်ထောက်ခံတဲ့သူတွေက အဓိက ပစ်မှတ်ထား တိုက်ခိုက်တာဖြစ်ပါတယ်။ 

များသောအားဖြင့် အမျိုးသမီးတွေရဲ့ နေရပ်လိပ်စာ၊ ဖုန်းနံပါတ်တွေ၊ ကိုယ်ရေးကိုယ်တာကိစ္စတွေ ဖော်ထုတ်ကာ နှောက်ယှက်တာမျိုးဖြစ်ပြီး အဲဒီလို ပို့စ်တွေရဲ့ ၂၈ ရာခိုင်နှုန်းလောက်က မြေပြင်မှာ တိုက်ခိုက်ဖို့အထိ ဆော်သြတတ်ကြပါတယ်။ 

လိင်ပိုင်းဆိုင်ရာ စော်ကားတဲ့ အရေးအသားတွေ၊ တိရစ္ဆာန်နဲ့ ခိုင်းနှိုင်းတာတွေ၊ မျိုးမစစ်သူ၊ လိင်ကျွန်ဖြစ်နေသူ စသဖြင့် စော်ကားပြောဆိုတဲ့ ပို့စ်တွေနဲ့ စစ်တပ်ထောက်ခံသူတွေက အမျိုးသမီးတွေကို တိုက်ခိုက်တာမျိုးလည်း တွေ့ရပြီး ဒီလိုအရေးအသားတွေကို ရိုဟင်ဂျာလူ့အဖွဲ့အစည်းအပေါ် တိုက်ခိုက်ပြောဆိုတုန်းကလည်း အများအပြားတွေ့ခဲ့ရတယ်လို့ Myanmar Witness ရဲ့ ထုတ်ပြန်ချက်မှာ ဖော်ပြထားပါတယ်။ 

လေ့လာမှုဟာ လူအများ ကြည့်ရှုလို့ရတဲ့ ပို့်စ်တွေကိုသာ အခြေခံတာကြောင့် စစ်တပ်ထောက်ခံသူတွေက အမျိုးသမီးတွေအပေါ် ဆိုရှယ်မီဒီယာမှာ စော်ကားတိုက်ခိုက်မှုဟာ အခုတွေ့ရှိချက်ထက် ပိုပိုများပြားနိုင်တယ်လို့လည်း အဖွဲ့က သုံးသပ်ထားပါတယ်။ 

Ref: Reuters