မတ် ၄၊ ၂၀၂၃
M-Media
-ကမ္ဘာတစ်၀ှမ်းက မွတ်စလင်ခရီးသွားတွေ ထိုင်းနိုင်ငံမှာ လွယ်ကူစွာ သွားလာစားသောက်နိုင်ဖို့အတွက် ထိုင်းအစိုးရက ခရီးသွားလမ်းညွှန်စာအုပ်တစ်ခု ထုတ်၀ေလိုက်ပါတယ်။
Muslim Friendly and Gastronomy Tourism Routes လို့ အမည်ပေးထားတဲ့ စာအုပ်ဖြစ်ပြီး ထိုင်းခရီးသွားလာရေး၀န်ကြီးဌာနရဲ့ ၀ဘ်ဆိုက်မှာ အခမဲ့ ဒေါင်းလုပ်ဆွဲနိုင်မှာ ဖြစ်ပါတယ်။ ထိုင်း၊ အင်္ဂလိပ် နှစ်ဘာသာနဲ့ ရေးသားထားတာပါ။
ဒီစာအုပ်မှာ ထိုင်းနိုင်ငံက မလေးလူမျိုးဒေသတွေဖြစ်တဲ့ တောင်ပိုင်း ပြည်နယ် ၁၄ ခုကနေ မလေးရှား၊ စင်ကာပူနဲ့ အင်ဒိုနီးရှားက ဘာတန်ကျွန်းအထိ ခရီးသွားလမ်းညွှန်တွေကို ထည့်သွင်းပေးထားတယ်လို့ ထိုင်းအစိုးရ ပြောရေးဆိုခွင့်ရှိသူ ရာချာဒါ ဒနာဒီရက်က ပြောပါတယ်။
စာအုပ်မှာ အပိုင်းနှစ်ပိုင်းပါ၀င်ပြီး တစ်ပိုင်းက ခရီးသွားလမ်းညွှန်နဲ့ နောက်တစ်ပိုင်းက အစားအသောက်လမ်းညွှန် ဖြစ်ပါတယ်။
ခရီးသွားလမ်းညွှန်မှာ မွတ်စလင်တွေ စိတ်၀င်တစား သွားရောက်လည်ပတ်ရမယ့် နေရာတွေကို ဖော်ပြထားပါတယ်။ အစားအသောက်လမ်းညွှန်မှာတော့ ဟာလာလ် အစားအသောက် ရရှိနိုင်မယ့် နေရာတွေ ပါ၀င်ပါတယ်။
ခရီးသွားလမ်းညွှန်ထဲက အချက်အလက်တွေဟာ ၂၀၂၂ ခုနှစ် သြဂုတ်လ ၉ ရက်နေ့အထိ ရရှိထားတာတွေဖြစ်ပြီး သက်ဆိုင်ရာ ၀ဘ်ဆိုက်တွေကိုလည်း စာအုပ်ကနေ တိုက်ရိုက် ကြည့်ရှုနိုင်မှာ ဖြစ်ပါတယ်။
လမ်းညွှန်စာအုပ်ထဲမှာ ရက် ၂၀ ကြာမယ့် ခရီးသွားလမ်းကြောင်းနှစ်ခုကို ဖော်ပြထားပြီး ထိုင်းနိုင်ငံတောင်ပိုင်း Chumphon ပြည်နယ်ကနေ စတင်ကာ အဲဒီမှာ အဆုံးသတ်မှာ ဖြစ်ပါတယ်။
ဖူးကတ်၊ ကရာဘီ၊ ဘာတမ်ကျွန်း၊ ပီနန်၊ စင်ကာပူ၊ နာရာသီ၀ပ်၊ ဆွန်ခလာ၊ စတဲ့ ဒေသတွေက နာမည်ကြီး အပန်းဖြေစခန်းတွေ၊ အစားအသောက်ကောင်းတဲ့ နေရာတွေကို လမ်းညွှန်စာအုပ်မှာ ဖော်ပြထားပါတယ်။
မလေးရှား၊ စင်ကာပူနဲ့ အင်ဒိုနီးရှားတို့ကို ၀င်ရောက်ဖို့ လိုအပ်တဲ့ သတင်းအချက်အလက်တွေကိုလည်း စာအုပ်ထဲမှာ ထည့်သွင်းပေးထားပါတယ်။
Ref: The Star