ဇန်န၀ါရီ ၁၃၊ ၂၀၂၃
M-Media
– ဒီလာ၀ဲရ်ပြည်နယ် ၀ီလ်မင်တန်မြို့မှာရှိတဲ့ သမ္မတဂျိုးဘိုင်ဒန်ရဲ့ နေအိမ်မှာ ပြီးခဲ့တဲ့ရက်ပိုင်းက နိုင်ငံတော်လျှို့၀ှက် စာရွက်စာတမ်းအနည်းငယ် သိမ်းဆည်းရမိတယ်လို့ အိမ်ဖြူတော်က သတင်းထုတ်ပြန်ပါတယ်။
သမ္မတအိုဘာမားလက်ထက် ဂျိုးဘိုင်ဒန် ဒုတိယသမ္မတအဖြစ် တာ၀န်ထမ်းဆောင်စဥ်က စာရွက်စာတမ်းတွေဖြစ်ပြီး ကားဂိုထောင်နဲ့ ဂိုထောင်ဘေးက အခန်းငယ်တစ်ခုမှာ တွေ့ခဲ့ရတာပါ။
တရားရေးဌာနက လုပ်ငန်းစဥ်အတိုင်း သိမ်းဆည်းကာ စစ်ဆေးနေပြီး ဘိုင်ဒန်အစိုးရကလည်း အပြည့်အ၀ ပူးပေါင်းဆောင်ရွက်နေတယ်လို့ အိမ်ဖြူတော်ရဲ့ ထုတ်ပြန်ချက်မှာ ဖော်ပြထားပါတယ်။
ဒါဟာ ဂျိုးဘိုင်ဒန်နဲ့ သက်ဆိုင်တဲ့ နေရာတွေမှာ နိုင်ငံတော် လျှို့၀ှက် စာရွက်စာတမ်းတွေ ဒုတိယအကြိမ်တွေ့ရှိမှုပါ။
နို၀င်ဘာလအတွင်း ၀ါရှင်တန်ဒီစီက တတ်တိပညာရှင်များအဖွဲ့ ရုံးခန်းတစ်ခုမှာ ဂျိုးဘိုင်ဒန် ဒုတိယသမ္မတအဖြစ် တာ၀န်ထမ်းဆောင်စဥ်က နိုင်ငံတော်လျှို့၀ှက် စာရွက်စာတမ်းအချို့ သိမ်းဆည်းရမိတယ်လို့ ပြည်တွင်း မီဒီယာတွေက ပြီးခဲ့တဲ့ရက်ပိုင်းမှာ ဖော်ပြခဲ့ပါတယ်။
ဒီသတင်းမှန်ကန်တယ်လို့ အိမ်ဖြူတော်က တနင်္လာနေ့မှာ အတည်ပြုပါတယ်။
ဒီကိစ္စကို စုံစမ်းစစ်ဆေးဖို့အတွက် အထူးကိုယ်စားလှယ် ရောဘတ်ဟွာကို ခန့်အပ်ထားတယ်လို့ အမေရိကန်ရှေ့နေချုပ် မဲရစ် ဂါလန်းက မနေ့က သတင်းစာရှင်းလင်းပွဲမှာ ပြောပါတယ်။ ရောဘတ်ဟွာဟာ မေရီလန်းပြည်နယ်မှာ အရင်က ရှေ့နေချုပ်အဖြစ် တာ၀န်ထမ်းဆောင်ခဲ့ဖူးပါတယ်။
သမ္မတဘိုင်ဒန်က မိမိဟာ လျှို့၀ှက်စာရွက်စာတမ်းတွေကို သေသေချာချာ ကိုင်တွယ်တယ်ဆိုတာကို ပြည်သူလူထုက သိရှိကြောင်း မနေ့က သတင်းထောက်တွေကို ပြောကြားခဲ့ပြီး အခုကိစ္စနဲ့ပတ်သက်လို့ သက်ဆိုင်ရာနဲ့ အပြည့်အ၀ ပူးပေါင်းဆောင်ရွက်နေတယ်လို့ ဆိုပါတယ်။
အတိုက်အခံ ရီပက်ဘလစ်ကန်ပါတီက ဘိုင်ဒန်ဟာ ကြောင်သူတော်တစ်ယောက်ဖြစ်တယ်လို့ စွပ်စွဲပါတယ်။ သမ္မထရမ့် ပိုင်ဆိုင်တဲ့ အဆောက်အဦးတွေမှာ နိုင်ငံတော် ထိပ်တန်းလျှို့၀ှက်အချက်အလက်တွေ တွေ့ရှိစဥ်အချိန်က ဘိုင်ဒန်ရဲ့ ၀ေဖန်မှုကို ပြန်လည်ချေပတာလည်း ဖြစ်ပါတယ်။
ထရမ့်အဖြစ်အပျက်မှာ လျှို့၀ှက်စာရွက်စာတမ်း ထောင်ချီ တွေ့ရှိခဲ့တာဖြစ်ပြီး အခု ဘိုင်ဒန်ကိစ္စမှာ အနည်းငယ်သာ တွေ့ရှိခဲ့တာပါ။
ဘိုင်ဒန်က တရားရေးဌာနဲ့ အပြည့်အ၀ ပူးပေါင်းဆောင်ရွက်နေပေမယ့် ထရမ့်ကိစ္စမှာ ထရမ့်ဟာ ဥပဒေအရ ဆောင်ရွက်မှုကို လက်မခံတာကြောင့် တရားရုံးက အထူးအမိန့်ထုတ်ပြန်ကာ ၀င်ရောက်ရှာဖွေ သိမ်းဆည်းရတဲ့အထိ ဖြစ်ခဲ့ပါတယ်။
Ref: Reuters
