အောက်တိုဘာ ၉၊ ၂၀၂၂
M-Media
-သေနတ်သမား ၀င်ရောက်ပစ်ခတ်တဲ့အချိန် အမ်မီလေးတစ်ယောက် အချစ်ဆုံးသူငယ်ချင်းတွေနဲ့ အိမ်မောကျနေတာပါ။
အမ်မီနဲ့ သူ့သူငယ်ချင်း ၁၀ ယောက်ဟာ ၃ နှစ်၀န်းကျင်သာ ရှိပါသေးတယ်။ ဂြိုဟ်ဆိုးမ၀င်ခင် မနက် ၁၀ နာရီလောက်က သူတို့လေးတွေအားလုံးဟာ ပုံဆွဲကြ၊ အရောင်ခြယ်ကြနဲ့ ပျော်ရွှင်ခဲ့ကြပြီး ဆရာမတွေကလည်း သူတို့ ဓာတ်ပုံလေးတွေကို မိဘတွေဆီ ရိုက်ပို့ခဲ့ကြပါတယ်။
နောက်ထပ် ၂ နာရီအကြာ နေ့ခင်းအိပ်ချိန်မှာတော့ ရဲ၀န်ထမ်းဟောင်း Panya Kamrab ရဲ့ သတ်ဖြတ်မှုကို အမ်မီရဲ့ သူငယ်ချင်းတွေ ခံခဲ့ရပါတော့တယ်။
ထိုင်းနိုင်မြောက်ပိုင်း Nong Bua Lamphu မြို့က မူကြိုကျောင်းမှာ ကြာသာပတေးနေ့က ဖြစ်ပွားခဲ့တဲ့ ဒီပစ်ခတ်မှုအတွင်း ဆရာမတွေအပါအ၀င် စုစုပေါင်း ၃၇ ဦး သေဆုံးခဲ့ပြီး ၂၄ ဦးက ကလေးငယ်တွေ ဖြစ်ပါတယ်။
အမ်မီလေးဟာ ဒီပစ်ခတ်မှုမှာ ကံကောင်းထောက်မစွာ အသက်ရှင်ကျန်ရစ်တဲ့ တစ်ဦးတည်းသော ကျောင်းသားပါ။ သေဆုံးသွားတဲ့ သူငယ်ချင်းတွေရဲ့ အနားမှာ ကွေးကွေးလေး နိုးနေတဲ့ အမ်မီကို ပစ်ခတ်မှုအပြီးမှာ ရဲတွေက တွေ့ရှိခဲ့တာ ဖြစ်ပါတယ်။
“သူနိုးလာတဲ့အချိန် ဘာဖြစ်နေလဲဆိုတာ မသိဘူး။ သူငယ်ချင်းတွေ အိပ်နေတုန်းပဲလို့ ထင်နေတာ။ ရဲတစ်ယောက်က သူ့မျက်နှာကို အ၀တ်စည်းပြီး သွေးအိုင်ထဲကနေ ခေါ်ထုတ်သွားတယ်” လို့ အသက် ၅၉ နှစ်အရွယ် အဖိုးဖြစ်သူ Somsak Srithong က ပြောပါတယ်။
“မြေးလေး အသက်ရှင်တာကိုတွေ့တော့ တော်တော်လေး စိတ်သက်သာရာ ရသွားတယ်။ စတွေ့တွေ့ချင်း ဖက်ပြီး ငိုတာပေါ့”
အမ်မီရဲ့မိခင် အသက် ၃၅ နှစ်အရွယ် Panompai Srithong ဟာ ဘန်ကောက်မှာ အလုပ်သွားလုပ်နေတာပါ။ မူကြိုက ကလေးအားလုံး အသက်မရှင်တော့ဘူးဆိုတဲ့ သတင်းကြောင့် အမ်မီလေး မသေဘူးဆိုတာ အစပိုင်းက သူ မယုံပါဘူး။
“နောက်ဆုံး အမ်မီနဲ့ ဗီဒီယိုကောလ် ပြောတော့မှပဲ အလုံးကြီးကျသွားတော့တယ်” လို့ Panompai Srithong က ပြောပါတယ်။
သူငယ်ချင်းတွေ ဘာဖြစ်သွားလဲဆိုတာ မိဘတွေက အမ်မီကို အစက မပြောပြသေးပါဘူး။ အချစ်ဆုံးသူငယ်ချင်း အသက် ၃ နှစ်အရွယ် Pattarawut ကို အမ်မီလေးက ခဏခဏ မေးနေပါတယ်။
မူကြိုကသူငယ်ချင်းတွေအပေါ် အမ်မီက သံယောဇဥ်တွယ်သလို ကြီးလာရင် ဆရာမဖြစ်ချင်တယ်လို့လည်း ပြောပါတယ်။
“နောက်ပိုင်းကျတော့ သူ့အဘွားက သူငယ်ချင်းတွေအားလုံးနဲ့ ဆရာမတွေ မရှိကြတော့ဘူး၊ ကျောင်းပိတ်လိုက်ပြီဆိုတာ ပြောလိုက်တယ်။ သူကတော့ နေ့တိုင်း ကျောင်းသွားမယ်ပဲ ပြောနေတာ။ ကျောင်းပိတ်ထားတယ်လို့ ပြောရတာပေါ့။ သေတယ်ဘာညာဆိုတာကို သူ သေချာမသိသေးဘူး” လို့ မိခင် Panompai Srithong က ပြောပါတယ်။
သေဆုံးသွားသူတွေရဲ့ စျာပနကို Nong Bua Lamphu မြို့က ဘုန်းကြီးကျောင်းတွေမှာ ရက်ပိုင်းအတွင်း ပြုလုပ်ခဲ့ကြပါတယ်။
မကြာသေးခင်က အလုပ်ကထုတ်ခံခဲ့ရတဲ့ ရဲ၀န်ထမ်းဟောင်း ဘာ့ကြောင့် ဒီလို အစုလိုက်အပြုံလိုက်သတ်ဖြတ်မှု ကျူးလွန်လဲဆိုတာ မသိရပါဘူး။ လူသတ်သမားဟာ သူ့ဇနီးနဲ့ ဇနီးရဲ့ ကလေးကို ပစ်သတ်ခဲ့ပြီး သူကိုယ့်သူလည်း သတ်သေသွားခဲ့ပါတယ်။
ထိုင်းလူ့အဖွဲ့အစည်းမှာတော့ လက်နက်တွေ လွယ်လွယ်ရနေတာ၊ မူးယစ်ဆေး၀ါး ပြဿနာတွေကို ထောက်ပြပြောဆိုနေကြပါတယ်။
“ကလေးတွေအတွက် အန္တရာယ်ကင်းတဲ့နေရာ ဘယ်နေရာရှိသေးလဲ- ဆိုပြီး မိဘတွေက မေးနေကြပါတယ်။ စိတ်တော်တော်မကောင်းဘူး။ ပြည်သူ့တွေရဲ့လုံခြုံရေးကို ကောင်းမွန်အောင် ဆောင်ရွက်ပေးပါလို့ တာ၀န်ရှိတဲ့သူတွေကို တောင်းဆိုချင်ပါတယ်” လို့ အမ်မီရဲ့ ဦးလေး Veerachai Srithong က ပြောပါတယ်။
Ref: BBC
