အောက်တိုဘာ ၃၁၊ ၂၀၁၆
M-Media
စာအုပ် ၁ သန်းခွဲရှိပြီး လာမည့်နှစ်တွင် ဖွင့်လှစ်နိုင်မည့် ဒူဘိုင်းမှ စာကြည့်တိုက် ပုံစံငယ်
– ၀န်ထမ်းများ အလုပ်ချိန်တွင် စာဖတ်ခွင့်ရပြီး စာဖတ်ခြင်းနှင့်သက်ဆိုင်သည့် ပစ္စည်းများ အခွန်ကင်းလွတ်ခွင့်ရမည့် ဥပဒေတစ်ခုကို အာရပ်စော်ဘွားများပြည်ထောင်စု (ယူအေအီး) က ပြဌာန်းလိုက်သည်။
ဒုတိယသမ္မတဖြစ်ပြီး ဒူဘိုင်းအုပ်ချုပ်ရေးမှူး ရှိခ် မိုဟာမက် ဘင် ရာရှစ်က အဆိုပါ ဥပဒေပြဌာန်းမှုကို ယနေ့တွင် Twitter စာမျက်နှာမှတစ်ဆင့် ကြေငြာခဲ့ခြင်းဖြစ်ပြီး ထိုကဲ့သို့ ပြဌာန်းနိုင်မှုအတွက် ၀မ်းမြောက်ဝမ်းသာ ဖြစ်ရသည်ဟုလည်း ဆိုသည်။
ထို့ပြင် အဆိုပါဥပဒေမှာ တစ်မူထူးခြားသည့် ယဉ်ကျေးမှုနှင့် ဥပဒေပြုမှုဆိုင်ရာ ဆောင်ရွက်ချက်ဟုလည်း ဒုတိယသမ္မတက ပြောကြားခဲ့သည်။
ယူအေအီးသမ္မတ ရှိခ်ခါလီဖာ ထုတ်ပြန်သည့် အဆိုပါဥပဒေတွင် ၀န်ထမ်းများ အလုပ်ချိန်၌ သတ်မှတ်အချိန်ထားကာ စာဖတ်နိုင်မည့် အခွင့်အရေးကို အာမခံထားပြီး အစိုးရအနေဖြင့် နိုင်ငံအတွင်း ကလေးတစ်ယောက်မွေးသည့်အခါတိုင်း မိသားစုအား ‘ဗဟုသုတ လက်ဆွဲအိတ်’ ဟု ခေါ်သည့် စာအုပ်အိတ်များ သွားရောက်ပေးအပ်ရန် မလုပ်မနေရတာဝန်အဖြစ် သတ်မှတ်ထားသည်။
“ဒီဥပဒေက ကျောင်းသားတွေအကြား စာဖတ်မှုကို တွန်းအားပေးတဲ့ နှစ်အလိုက်စီမံကိန်းတစ်ခု ကျောင်းတိုင်းမှာထားရှိဖို့၊ စာအုပ်တွေအပေါ် အလေးထားဖို့၊ စာအုပ်တွေကို ဖျက်ဆီးတာမျိုးမဟုတ်ဘဲ ထိန်းသိမ်းဖို့၊ ပြန်လည်အသုံးချဖို့၊ ဒါမှမဟုတ် လှူဒါန်းဖို့ ပြဌာန်းထားပါတယ်” ဟု ရှိခ် မိုဟာမက်က ပြောကြားခဲ့သည်။
ထိုဥပဒေအရ စာအုပ်များ၊ စာဖတ်ခြင်းနှင့်သက်ဆိုင်သည့် ပစ္စည်းကိရိယာများမှာ ဖြန့်ဖြူးခြင်း၊ ပုံနှိပ်ထုတ်ဝေခြင်းတို့အတွက် အခွန်ကင်းလွန်ခွင့် ရမည်ဖြစ်ပြီး၊ စာရေးဆရာများ၊ အယ်ဒီတာများနှင့် ပုံနှိပ်လုပ်ငန်းများအတွက် လိုအပ်သည်များကို ထောက်ပံ့ကူညီပေးရန်လည်း ပြဌာန်းထားသည်။
“ဒီဥပဒေက ကျွန်တော်တို့လူ့အဖွဲ့အစည်းမှာ စာအုပ်ယဉ်ကျေးမှုပုံရိပ်ကို အားကောင်းစေမှာဖြစ်ပြီး၊ ရှော့ပင်းမောလ်တွေက ကော်ဖီဆိုင်တွေမှာ ဈေးဝယ်သူတွေဖတ်ဖို့အတွက် စာအုပ်တွေထားပေးဖို့လည်း ဒီဥပဒေမှာ ပြဌာန်းထားပါတယ်”
ထို့ပြင် ဒုတိယသမ္မတက ပုဂ္ဂလိကလုပ်ငန်းများအနေဖြင့် စာကြည့်တိုက်များ၊ ယဉ်ကျေးမှုစင်တာများ တည်ဆောက်ရေးတွင် ရင်းနှီးမြှုပ်နှံရန် ထိုဥပဒေက အားပေးထားကြောင်း၊ လိုအပ်သည်များကိုလည်း ထောက်ပံ့သွားမည်ဖြစ်ကြောင်း ထည့်သွင်းပြောဆိုခဲ့သည်။
“စာဖတ်ခြင်းဆိုင်ရာ ဥပဒေကနေ စာဖတ်မှု ရှေ့ပြေးလုပ်ငန်းတွေကို ထောက်ပံ့ကူညီဖို့အတွက် နိုင်ငံလုံးဆိုင်ရာ ရန်ပုံငွေတစ်ခုကို တည်ထောင်ပေးသွားမှာဖြစ်ပြီး၊ မီဒီလုပ်ငန်းက စာဖတ်ခြင်းကို အားပေးတဲ့ အစီအစဉ်တွေကို သတ်မှတ်ထုတ်လွှင့်ပေးသွားဖို့ မလုပ်မနေရအဖြစ် ဒီဥပဒေမှာ ပြဌာန်းထားပါတယ်။ ကျွန်တော်တို့ရဲ့ ရည်ရွယ်ချက်က ၂၀၁၆ ဟာ မျိုးဆက်တွေမှာ ထာဝရတည်တံ့တဲ့ ယဉ်ကျေးမှုဆိုင်ရာ ပြောင်းလဲမှုရဲ့အစ ဖြစ်စေဖို့ဖြစ်ပြီး အဲဒီပြောင်းလဲမှုက စာဖတ်ခြင်းရဲ့ အရေးပါးမှုကို မြင်သာစေမှာဖြစ်ပါတယ်။ နောက်ပြီး ဗဟုသုတ ကြွယ်စေကာ စာဖတ်မှုအခြေအနေကို တိုးတက်စေမှာဖြစ်ပါတယ်”
Ref : thenational.ae
