သြဂုတ် ၁၉၊ ၂၀၁၆
M-Media
– သူ့နာမည်က အိုမရန် ဒက်နီးရ်ှပါ။ သွေးအလိမ်းလိမ်း ဖုန်အထပ်ထပ်နဲ့ လူနာတင်ယာဉ်ထဲမှာထိုင်ပြီး အကူအညီစောင့်နေတဲ့ သူ့ရဲ့ပုံဟာ ဆီးရီးယားမှာဖြစ်နေတဲ့ စစ်ပွဲရဲ့ အနိဌာရုံတွေကို သတိပေးနေတဲ့ နောက်ထပ် အမှတ်အသား တစ်ခုပါပဲ။
မျက်မြင်သက်သေတွေကတော့ ဒီကလေးငယ်ရဲ့အသက်ဟာ ၅ နှစ်လောက်သာရှိသေးပြီး ဆီးရီးယားပြည်တွင်းစစ်သက်တမ်းနဲ့ မတိမ်းမယိမ်းပါပဲ။ ဒါပေမယ့် သူ့ရဲ့ ၀ဖြိုးတဲ့ ခြေလက်တွေ၊ ဗုံးကြံခဲရတဲ့ အိမ်ကနေ သူ့ကို ဆွဲထုတ်လာသူရဲ့ ခန္ဓာကိုယ်မှာ တွဲခိုလာတွေကို ကြည့်မယ်ဆိုရင်တော့ သူဟာ ဒီထက်ပိုငယ်နိုင်ပြီး တောက်တောက်သွားတတ်တဲ့ အရွယ်လောက်သာ ရှိမယ့်ပုံပါပဲ။
အိုမရန်လေးဟာ မိခင် ဖခင်၊ အစ်ကိုတစ်ယောက်၊ အမတစ်ယောက်တို့နဲ့အတူ အဲလစ်ပိုမြို့မှာ နေထိုင်တာဖြစ်ပြီး ဗုဒ္ဓဟူးနေ့က သူတို့အိမ်ကို လေကြောင်းကတိုက်ခိုက်မှုမှာ တစ်မိသားစုလုံး ဒဏ်ရာရသွားခဲ့ပါတယ်။ ကံကောင်းထောက်မစွာနဲ့ပဲ တစ်ယောက်မှ အသက်ဆုံးရှုံးခြင်း မရှိခဲ့ပါဘူး။ ဒီတိုက်ခိုက်မှုကို ဆီးရီးယားအစိုးရနဲ့ ရုရှားတို့က ဆောင်ရွက်တာလို့ သတင်းတွေ ထွက်ခဲ့ပါတယ်။
နိုင်ငံမြောက်ပိုင်းက အဲလစ်ပိုမြို့ဟာ နှစ်တော်တော်ကြာ ပိတ်ဆို့ခံထားရပြီး ကလေးငယ် ၄၅၀၀ အပါအ၀င် လူသောင်းနဲ့ချီ သေဆုံးခဲ့ပြီးပါပြီ။
ကလေးငယ်ရဲ့ ဘ၀အကြောင်း
အိုမရန်လေးရဲ့ ကြောက်စရာ၊ ကြေကွဲဖွယ်ရာ ဗီဒီယိုကို ‘အဲလစ်ပိုမီဒီယာစင်တာ’က လွှင့်တင်ခဲ့တာဖြစ်ပြီး ဆိုရှယ်မီဒီယာတွေမှာ အလျင်အမြန်ပဲ ပြန့်နှံ့သွားခဲ့ပါတယ်။
တိုက်ခိုက်မှုအပြီး သွေးအလိမ်းလိမ်း၊ ဖုန်အထပ်ထပ်ပေးနေတဲ့ အိုမရန်လေးကို ကယ်ဆယ်ရေးလုပ်သားတစ်ဦးက အပျက်အဆီးတွေထဲက ဆွဲထုတ်ကာ ကယ်ဆယ်ခဲ့တာဖြစ်ပါတယ်။ လူနာတင်ယာဉ်ထဲမှာ ထိုင်နေပေမယ့် သူ ဘာဖြစ်နေတယ်ဆိုတာ အိုမရန်တစ်ယောက် မသိပါဘူး။
“သူ တုန်လှုပ်ချောက်ခြားသွားတာပါ” ပါလို့ အဲလစ်ပို မီဒီယာစင်တာက တာဝန်ရှိသူတစ်ဦးက ပြောကြားခဲ့ပါတယ်။
အိုမရန်လေးဟာ ကံကောင်းသွားခဲ့တာလည်းပါပြီး သူတို့မိသားစုထဲမှာ သူ့ကို ပထမဆုံး ကယ်ဆယ်နိုင်ခဲ့ကာ နောက်ပိုင်းကျမှ ကျန်တဲ့လူတွေကို ကယ်ထုတ်နိုင်ခဲ့တာဖြစ်ပါတယ်။
နေ့စဉ်ဖြစ်နေ
“ခင်ဗျားတို့ မြင်နေရတဲ့ ဒီပုံရိပ်မျိုး အဲလစ်ပိုမှာ နေ့စဉ်ဖြစ်နေတာပါ။ အဲလစ်ပိုမှာ နေ့တိုင်း ဒီလို ကြောက်စရာအဖြစ်အပျက်တွေ၊ စစ်ရာဇ၀တ်မှုတွေကို ကျွန်တော်တို့ ရိုက်ကူးနေရပါတယ်။ ဗုံးကြဲခံရတဲ့နေရာကို ကျွန်တော်တို့ သွားတဲ့အခါ အစိုးရတပ်က လေယာဉ်တွေက အဲဒီနေရာမှာ တစ်ဝဲလည်လည်လုပ်နေပြီး အရပ်သားတွေကို ကယ်ဆယ်တဲ့ သူတွေကိုသေအောင် ဗုံးထပ်ကြဲချတတ်ပါတယ်” လို့ မီဒီယာစင်တာက ကင်မရာဆရာ မွတ်စ်တာဖာ အလ် ဆာရူက်က ပြောကြားခဲ့ပါတယ်။
အိုမရန်လေးကတော့ အဲဒီတိုက်ခိုက်မှုအတွင်းက အခြားလူတွေထက်စာရင် ဒဏ်ရာအနည်းငယ်သာရခဲ့ပြီး လက်ရှိမှာ ဆေးရုံးကဆင်းသွားပြီလို့ သူ့ကိုကုသပေးတဲ့ ဒေါက်တာ မိုဟာမက်က ပြောကြားခဲ့ပါတယ်။
အဲဒီနေ့တစ်နေ့တည်းမှာပဲ အဲလစ်ပိုအရှေ့ပိုင်းက သူပုန်တွေ ထိန်းချုပ်ထားတဲ့ ကွာတာချီရပ်ကွက်မှာ ဗုံးကြဲတိုက်ခိုက်မှုကြောင့် နောက်ထပ် လူ ၃ ဦး သေဆုံးခဲ့ပြီး အနည်းဆုံး ၁၂ ဦး ဒဏ်ရာရရှိခဲ့ပါတယ်။ အဲဒီထဲက သေဆုံးသူတစ်ဦးဟာ အိုမရန်လေးရဲ့ ဆွေမျိုးထဲကဖြစ်တယ်လို့ ယုံကြည်ရပါတယ်။
၂၀၁၁ ခုနှစ် မတ်လ ၁၅ ရက်နေ့ကစလို့ ၂၀၁၆ ခုနှစ် သြဂုတ်လ ၁၈ ရက်နေ့အထိ အဲလစ်ပိုပြည်နယ်မှာ သေဆုံးခဲ့တဲ့ အရပ်သားအရေအတွက်ဟာ ၁၈၀၀၀ ကျော်ရှိတယ်လို့ ယူကေအခြေစိုက် ‘ဆီးရီးယားလူ့အခွင့်အရေး စောင့်ကြည့်အဖွဲ့’ က ပြောကြားခဲ့ပါတယ်။
သေဆုံးသူတွေထဲက ၄၅၀၀ ကျော်ကတော့ အသက် ၁၈ နှစ်အောက် ကလေးငယ်တွေ ဖြစ်ကြပါတယ်။
“အဲလစ်ပိုမှာ အမျိုးသမီးတွေ၊ ကလေးတွေအပေါ် ဖြစ်နေတဲ့ ဒီရာဇ၀တ်မှုတွေအတွက် တစ်ကမ္ဘာလုံးက နှုတ်ဆိတ်နေကြတယ်။ အိုမရန်လို ဗုံးကြံခံရတဲ့ကလေးမျိုး အဲလစ်ပို့မှာ နေ့စဉ် ထောင်နဲ့ချီရှိပါတယ်။ နေ့စဉ်နေ့တိုင်း မြို့ထဲကို လက်နက်ပေါင်းစုံနဲ့ ပစ်ခတ်ပြီး ရာဇ၀တ်မှု ပုံစံပေါင်းစုံကို ကျူးလွန်ကြပါတယ်။ နေရထိုင်ရတဲ့ဘ၀တွေဟာ တော်တော်လေး ဆိုးရွားပါတယ်။ မြို့အပြင်ထွက်ပေါက်ဟာလည်း စိတ်မချရလို့ ပိတ်ထားတယ်။ ဒီအစိုးရနဲ့ ပြည်သူ့စစ်တွေဟာ ကလေးတွေ၊ အထူးသဖြင့် အဲလစ်ပိုက ကလေးတွေကို သတ်ဖြတ်နေတယ်လို့ ကျွန်တော်တို့ ကမ္ဘာကြီးကို အသိပေးချင်ပါတယ်။ အဲလစ်ပိုက ဒီရာဇ၀တ်မှုတွေကို မဖြစ်မနေ ရပ်တန့်ရမှာပါ” လို့ ဆာရူက်က ထပ်လောင်းပြောကြားခဲ့ပါတယ်။
ရွေးစရာလမ်းမရှိ
တစ်ချိန်က ဆီးရီးယားရဲ့ အကြီးဆုံးမြို့ ဖြစ်ခဲ့တဲ့ အဲလစ်ပိုမှာ ပိတ်မိနေသူအရေအတွက်ဟာ တစ်သန်းခွဲကနေ နှစ်သန်းလောက်ရှိနေပြီး၊ မြို့ကလည်း အစိုးရထိန်းချုပ်တဲ့အပိုင်းနဲ့ သူပုန်ထိန်းချုပ်တဲ့အပိုင်းဆိုပြီး ၂ ပိုင်းကွဲနေပါတယ်။
ပြည်သူတွေကတော့ အတောမသတ်နိုင်တဲ့ဗုံးကြဲမှုတွေကြားမှာနေပြီး သူတို့အသက်၊ အထူးသဖြင့် ကလေးတွေရဲ့အသက်ကိုရင်းရမလား။ ဒါမှမဟုတ် ပြန်လမ်းမရှိနိုင်တဲ့ ပင်လယ်ပြင်ကိုဖြတ်ပြီး ဒုက္ခဆင်းရဲတွင်းကနေ လွတ်အောင် ပြေးရမလား – ဆိုတဲ့ ရွေးချယ်မှု ၂ ခုသာ ရှိပါတယ်။
ပြီးခဲ့တဲ့နှစ်ကလည်း လွတ်မြောက်ရာထွက်ပြေးရင် ပင်လယ်ပြင်မှာ မိသားစုလိုက် လှေနစ်သေဆုံးလို့ တူရကီမှာ လာတင်တဲ့ အသက် ၂ နှစ်အရွယ် အလန်ကာဒီလေးရဲ့ ဓာတ်ပုံကလည်း ကမ္ဘာကြီးကို တုန်လှုပ်စေခဲ့ပါတယ်။
အကူအညီတွေ ရပ်တန့်
တိုက်ခိုက်မှုတွေ မြင့်တက်နေလို့ ဆီးရီးယားကို ပို့ပေးနေတဲ့ အကူအညီတွေအားလုံးကို ကုလက ရပ်တန့်လိုက်ပါတယ်။
“ဆီးရီးယားမှာ ကျွန်တော်တို့ဟာ တိုက်ပွဲတွေ၊ ထိုးစစ်တွေ၊ ခံစစ်တွေ၊ အမြောက်တွေ၊ ဗုံးတွေ၊ မော်တာတွေ၊ အမြောက်ဆံတွေ၊ ကလိုရင်းဓာတ်ငွေ့တွ၊ စနိုက်ပါ၊ လေကြောင်းတိုက်ခိုက်မှု၊ အသေခံဗုံးခွဲသမား- ဒါတွေကိုပဲ မြင်နေ၊ ကြားနေရပါတယ်။ ပိတ်ဆို့ထားတဲ့ အဲဒီမြို့ကို ဒီတစ်လအတွင်းမှာ အကူအညီပေးရေးယာဉ်တန်း တစ်ခုတောင် မရောက်သေးပါဘူး။ တစ်ခုတောင် မရောက်သေးတာပါ။ ဘာဖြစ်လို့လဲဆိုတော့ တိုက်ခိုက်မှုတွေကြောင့်ပါပဲ” လို့ ဆီးရီးယားဆိုင်ရာ ကုလသံအမတ် စတာဖင် ဒီ မစ်တူရာက ဂျီနီဗာမှာ သတင်းထောက်တွေကို ပြောကြားခဲ့ပါတယ်။
နောက်ပြီး အလဲစ်ပိုမှာ ၄၈ နာရီအပစ်ရပ်ရေး အကောင်အထည်ဖော်ဖို့ကိုလည်း မစ်တူရာက အမေရိကန်ရဲ့ ရုရှားတို့ကို ဖိအားပေးခဲ့ပါတယ်။
ခံစားရမှု များလွန်း
နိုင်ငံတကာလူ့အခွင့်အရေးအဖွဲ့တစ်ခုဖြစ်တဲ့ Amnesty က လွတ်မြောက်လာသူတွေရဲ့ ပြောကြားမှုကို ကိုးကားပြီး အစီရင်ခံစာကို ထုတ်ပြန်ရာမှာ ဖမ်းဆီးခံထားရသူတွေရဲ့ ဆိုးရွားတဲ့ အခြေအနေတွေ၊ အဓမ္မကျင့်မှု၊ လိင်အကြမ်းဖက်မှု၊ ရိုက်နှက်မှု၊ မီးရှို့မှု၊ မီးမြှိုက်မှု စတဲ့ ရက်စက်တဲ့ နှိပ်စက်ငြှင်းပမ်းမှု နည်းလမ်းတွေကို အသေးစိတ် ဖော်ထုတ်ခဲ့ပါတယ်။
ယူနီဆက်ဖ်ကတော့ ဆီးရီးယားနဲ့ အိမ်နီးချင်းနိုင်ငံတွမှာ လူသားချင်း စာနာထောက်ထားမှုဆိုင်ရာ အကူအညီ လိုအပ်နေသူ ကလေးငယ် ၈.၄ သန်း ရှိနေတယ်လို့ ခန့်မှန်း တွက်ချက်ထားပါတယ်။
ကုလသမဂ္ဂရဲ့ ဒုတိယအတွင်းရေးမှူး ဂျန် အဲလီယက်ဆန်က အိုမရန်လေးရဲ့ ဇာတ်ကြောင်းနဲ့ သူ့ရဲ့ပုံရိပ်ဟာလူသားတွေနဲ့ နှလုံးသားနဲ့ ဦးနှောက်ကို စိုးမိုးနိုင်လိမ့်မယ်လို့ မျှော်လင့်နေပါတယ်။
“တစ်ကမ္ဘာလုံးက ဆီးရီးယားပြည်သူတွေအတွက် မလုပ်ပေးနိုင်ဘူးလို့ ကျွန်တော်ထင်ပါတယ်။ အိုမရန်လေးရဲ့ အဖြစ်အပျက် ဆီးရီးယားပြည်သူတွေ ဖြတ်သန်းနေရတဲ့ ဆိုးရွားတဲ့ ကပ်ဆိုးကို ဖော်ပြနေပါတယ်။ ဒါတွေကို ကျွန်တော်တို့က တစ်ခါတစ်ရံမှာ အိပ်မက်ဆိုးအဖြစ် ဖော်ပြကြတယ်။ ဒါပေမယ့် ဒါဟာ အိပ်မက်ဆိုးတစ်ခုထက်ကိုပိုပါတယ်။ အိပ်မက်ဆိုးက နိုးထနိုင်သေးတယ်လေ။ ဒါပေမယ့် ဆီးရီးယားမှာတော့ အိပ်မက်ဆိုးတွေထဲက နိုးထရဖို့ လမ်းမမြင်ပါဘူး” လို့ အဲလီယက်ဆန်က ပြာကြားခဲ့ပါတယ်။
Ref: CNN
(CNN သတင်းဌာနတွင် ဖော်ပြထားသည့် Little boy in Aleppo a vivid reminder of war’s horror ဆောင်းပါးကို
လေးမောင်မှ ကောက်နှုတ်ပြန်ဆိုသည်။)
