ဇွန် ၂၈၊ ၂၀၁၆
M-Media
– ယနေ့မနက်က ကစားခဲ့သည့် ယူရို ၁၆ သင့်အဆင့် ရှုံးထွက်ပွဲတွင် အိုက်စလန်အသင်းအား အံ့အားသင့်ဖွယ် ရှုံးနိမ့်ခဲ့ရပြီးနောက် အင်္ဂလန်အသင်းနည်းပြ ရွိုင်ဟဒ်ဆန်မှာ ရာထူးမှ နှုတ်ထွက်သွားခဲ့ပြီဖြစ်သည်။
ထိုပွဲတွင် အင်္ဂလန်မှာ ပွဲအစ ၄ မိနစ်မှာပင် ဦးဆောင်ဂိုး ရခဲ့သော်လည်း ၂ မိနစ်သာ ခံခဲ့ပြီး ချေပဂိုး ပြန်ပေးခဲ့ရသည်။ ထို့နောက် ၁၉ မိနစ်တွင် အိုက်စလန်အား အနိုင်ဂိုးထပ်ပေးခဲ့ရကာ နောက်ပိုင်းပွဲချိန်များတွင် ခြေအသာဖြင့် ကစားနိုင်ခဲ့သော်လည်း လိုအပ်သည့်ဂိုးများကို မရရှိခဲ့ပေ။
၂၀၁၂ ခုနှစ်မေလတွင် အင်္ဂလန်အသင်းနည်းပြတာဝန်ကို ရယူခဲ့သည့် ဟဒ်ဆန်ကမူ ရလဒ်အတွက် စိတ်ပျက်မိသည်ဟု ဆိုသည်။
“ဒီညရလဒ်အတွက် ကျွန်တော် တော်တော်လေး စိတ်ပျက်သလို ပြိုင်ပွဲကနေ ထွက်ရတဲ့အတွက် ပိုတောင် စိတ်ပျက်မိပါတယ်။ ကျွန်တော်တို့ လုပ်နိုင်တယ်လို့ ထင်ထားတဲ့ အတိုင်းအတာအထိ အသင်းက တိုးတက်မှု မရှိခဲ့ပါဘူး။ ပြီးတော့ ဒီလိုအခြေအနေမျိုးဟာ လုံးဝ လက်မခံနိုင်စရာပါပဲ။ ကျွန်တော် အသင်းမှာ နောက်ထပ် ၂ နှစ်လောက် နေချင်ပါတယ်။ ဒါပေမယ့် ကျွန်တော်ဟာ တာဝန်ယူတတ်သူတစ်ယောက်ဖြစ်ပြီး၊ ရလဒ်တွေပေါ်မူတည်တဲ့ အလုပ်လုပ်နေတယ်ဆိုတာကိုလည်း သိပါတယ်။ အခုအချိန်ဟာ ဒီ ငယ်ရွယ်ပြီး၊ ပါရမီရှိတဲ့၊ အောင်ပွဲကို ဆာလောင်မွတ်သိပ်နေတဲ့ ကစားသမားတွေ တိုးတက်မှုကို ကြီးကြပ်ဖို့ အခြားတစ်ယောက် လိုနေတဲ့အချိန်ဖြစ်ပါတယ်” ဟု ဟဒ်ဆန်က ၎င်း၏ နှုတ်ထွက်ကြောင်း ပြောကြားမှုတွင် ထည့်သွင်းပြောဆိုခဲ့သည်။
ထို့ပြင် အင်္ဂလန်အသင်းအား များမကြာမီတွင် အဓိကပြိုင်ပွဲများ၏ ဖိုင်နယ်များတွင် တွေ့မြင်ရမည်ဖြစ်ပြီး၊ မိမိကို ထောက်ခံအားပေးခဲ့သည့် ကစားသမားများ၊ ပရိတ်သတ်များနှင့် အင်္ဂလန်ဘောလုံးအဖွဲ့ချုပ်တို့ကို ကျေးဇူးတင်ကြောင်း ၎င်းက ထပ်လောင်းပြောကြားခဲ့သည်။
Ref: UEFA.com
