ဇွန် ၁၃၊ ၂၀၁၆
M-Media
– အိုက်စလန်က သိပ္ပံပညာရှင်တွေဟာ လပေါင်းများစွာကြာအောင် လေ့လာပြီးတဲ့နောက်မှာ ကာဘွန်ဒိုင်အောက်ဆိုက်ဓာတ်ငွေ့ကို မြေအောက်အတွင်း ပို့လွှတ်ကာ ကျောက်တုံးအဖြစ်ရောက်အောင် အောင်မြင်စွာ ပြောင်းလဲနိုင်ခဲ့တယ်လို့ သိရပါတယ်။
ဒါဟာ ရာသီဥတုပြောင်းလဲမှုနဲ့ပက်သက်ပြီး ဖန်လုံအိမ်ဓာတ်ငွေ့ကို သိုလှောင်ဖို့ နည်းလမ်းသစ်တစ်ခုကို ထုတ်ဖော်နိုင်ခဲ့တာလည်း ဖြစ်ပါတယ်။
အဲဒီစွန့်ဦးစမ်းသပ်ချက်မှာ ကာဘွန်ဒိုင်အောက်ဆိုက်ဓာတ်ငွေ့ကို ရေနဲ့ရောပြီး မီးတောင်ကျောက်ဆောင်များအောက် မီတာရာနဲ့ချီအနက်ဆီ ပန်းထုတ်လိုက်တာ ဖြစ်ပြီး အဲဒီလိုလုပ်ဆောင်ခြင်းအားဖြင့် အစိုင်အခဲအဖြစ်သို့ အလျင်အမြန်ကူးပြောင်းသွားတာ ဖြစ်ပါတယ်။
“ကာဘွန်ထုတ်လွှတ်မှုမြင့်မားလာတာနဲ့ပက်သက်ပြီး သေချာကိုင်တွယ်ဖို့ လိုနေပါပြီ၊ ဒီနည်းလမ်းဟာ ကျောက်တုံးအဖြစ် အမြဲတမ်းသိမ်းဆည်းနိုင်မယ့် အကောင်းဆုံးနည်းလမ်းတစ်ခု ဖြစ်ပါတယ်” လို့ ဦးဆောင်လေ့လာသူ ဂျော့ခ်ျမက်တာက ရှင်းပြခဲ့ပါတယ်။
ကာဘွန်ဒိုင်အောက်ဆိုက်ဓာတ်ငွေ့ဟာ ကမ္ဘာကြီးပူနွေးလာမှုရဲ့ အဓိကအကြောင်းရင်းဖြစ်ပြီး ကျွမ်းကျင်သူတွေအနေနဲ့ ကာဘွန်ကို ဖမ်းယူသိမ်းဆည်းနိုင်မယ့် နည်းလမ်းသစ်တွေကို ရှာဖွေဖော်ထုတ်နေကြပါတယ်။
Ref : Presstv
