ဧပြီ ၂၁ ၊ ၂၀၁၆
M-Media
သတင်း-ဖြူလေး
ခွဲစိတ် ဆရာဝန်ကြီး ပါမောက္ခ ဒေါက်တာဦးရဲမြင့် ဧပြီလ (၂၀) ရက်နေ့မှာ ကွယ်လွန်သွားခဲ့ကြောင်းသိရပါတယ်။
.
ပါမောက္ခ ဒေါက်တာဦးရဲမြင့်ကို (ဦးအီဘရာဟင်-ဒေါ်အေးချို )တို့မှ ၁၉၃၇ ခုနှစ် မန္တလေးတိုင်းဒေသကြီး၊ မြစ်သားမြို့မှာ မွေးဖွားခဲ့ပြီး မွေးချင်း (၇) ယောက်အနက် (၄) ယောက်မြောက်လည်း ဖြစ်ပါတယ်။
.
ငယ်စဉ်ကတည်းက ပညာမှာ ထူးချွန်ခဲ့တဲ့ ဦးရဲမြင့်ဟာ တက္ကသိုလ်ဝင်တန်း စာမေးပွဲကို မြန်မာနိုင်ငံတစ်ငံလုံး ပထမအဆင့် အမှတ်ပေါင်း (၅၅၄ မှတ်) ဖြင့် ဘာသာစုံဂုဏ်ထူးဖြင့် ထူးချွန်ခဲ့သူ တစ်ဦးလည်း ဖြစ်ပါတယ်။
.
မန္တလေး ဆေးတက္ကသိုလ်မှာ တတိယနှစ်ထိ ပညာသင်ကြားခဲ့ပြီး နောက်ပိုင်း ရန်ကုန်တက္ကသိုလ်သို့ ကူးပြောင်းလာခဲ့သည်။ ရန်ကုန် တက္ကသိုလ်တွင် M.B.B.S ဘွဲ့ကို ရယူခဲ့ပါတယ်။ ဘွဲ့ရပြီးနောက်ပိုင်းမှာတော့ မန္တလေးဆေးရုံကြီးမှာ ခွဲစိတ်ဌာနတွင် ပထမဆုံး လုပ်ကိုင်ခဲ့ပါတယ်။ ဦးရဲမြင့်ဟာ ခွဲစိတ်ရာမှာ ပါရမီပါသူတစ်ဦးဖြစ်ပြီး ဆရာဝန်ကြီးများ အားကိုးအားထားရသူ တစ်ဦးလည်း ဖြစ်လာခဲ့ပါတယ်။
.
၁၉၆၆ ခုနှစ်မှာတော့ အိမ်ထောင်ပြုခဲ့ပြီး သားရတနာတစ်ဦး ထွန်းကားခဲ့ပါတယ်။
.
ဦးရဲမြင့်ဟာ ရန်ကုန် ဆေးတ္ကသိုလ် (၁) ခွဲစိတ်ကုပညာဌာနမှာ ပါမောက္ခ ဌာနမှူးအဖြစ် အသက် (၆၀)အထိ နှစ်ပေါင်းများစွာ တာဝန်ထမ်းဆောင်ခဲ့သူ တစ်ဦးလည်း ဖြစ်ပါတယ်။
.
ထို့အပြင် ဦးရဲမြင့်ဟာ ရန်ကုန် အထွေထွေရောဂါကု ဆေးရုံသစ်ကြီးမှာ လည်းကောင်း၊ ပုဂ္ဂလိက ဆေးရုံဖြစ်တဲ့ ဗဟိုစည် ဆေးရုံတို့မှာလည်းကောင်း ခွဲစိတ်ကုဆရာဝန်ကြီးအဖြစ် လူနာပေါင်း များစွာရဲ့ အသက်ကို ကယ်တင်ခဲ့သူလည်း ဖြစ်ပါတယ်။
.
အသက် (၇၉) နှစ်အရွယ်ရှိပြီဖြစ်တဲ့ ပါမောက္ခ ဒေါက်တာဦးရဲမြင့်ဟာ ဧပြီလ (၂၀) ရက်နေ့ နံနက်မှာ ကွယ်လွန်သွားခဲ့ပြီး မသေဆုံးမီ သူ့ ကိုယ်ခန္ဓာကို ရန်ကုန်ဆေးတက္ကသိုလ် (၁) ကို လှူဒါန်းထားခဲ့သူလည်း ဖြစ်ပါတယ်။
