ဒုက္ခသည်များကို ကယ်ဆယ်ရန် ဥရောပက ပျက်ကွက်ခဲ့သည်ဟု နယ်စည်းမခြားဆရာဝန်များအဖွဲ့ပြော

ဧပြီ ၂၇၊ ၂၀၁၆
M-Media

– အန္တရာယ်များတဲ့ ပင်လယ်ပြင်ခရီးကို ဖြတ်သန်းပြီး ဥရောပရောက်ဖို့ကြိုးစားနေတဲ့ ဒုက္ခသည်တွေကို ဥရောပအစိုးရတွေက သင့်လျော်တဲ့အကူအညီပေးဖို့ ပျက်ကွက်ခဲ့တယ်လို့ နယ်စည်းမခြားဆရာဝန်များအဖွဲ့ (MSF) က ပြောကြားလိုက်ပါတယ်။

တနင်္လာနေ့က ပြောကြားခဲ့တာဖြစ်ပြီး ဥရောပဘက်က ဒုက္ခသည်ကူညီရေးအစီအစဉ်တွေဟာ ဇန်န၀ါရီလကတည်းက ရပ်တန့်ခဲ့ကာ ပြန်လည်စတင်ခြင်းမရှိတဲ့အတွက် MSF အဖွဲ့ကနေ မြေထဲပင်လယ်ကယ်ဆယ်ရေးလုပ်ငန်းတွေ ပြန်လည်လုပ်ဆောင်သွားမှာဖြစ်တယ်လို့လည်း ထည့်သွင်းပြောကြားခဲ့ပါတယ်။

ဒုက္ခသည်တွေအနေနဲ့ နွေရာသီမှာ မြောက်အာဖရိကနဲ့ ဥရောပကြားက အန္တရာယ်များတဲ့ရေပြင်ကျယ်ကြီးကို ဖြတ်သန်းဖို့ကြိုးစားနေရတဲ့အတွက် ရေနစ်မယ့် အန္တရာယ်နဲ့လည်း ကြုံတွေ့နေရတာပါ။

“လက်ရှိဒုက္ခသည်အရေးကို ဖြေရှင်းနိုင်တဲ့ ကမ္ဘာလုံးဆိုင်ရာ အဖြေတစ်ခု မရှိတာနဲ့ ဥရောပနိုင်ငံတွေရဲ့ တားဆီးရေးမူဝါဒတွေအရ ပင်လယ်ဖြတ်ဒုက္ခသည်တွေကို ကူညီဖို့ငြင်းဆန်ထားတာတွေကြောင့် အသက်ထောင်ပေါင်းများစွာ သေဆုံးရဦးမှာ ဖြစ်ပါတယ်” လို့ MSF နိုင်ငံတကာအဖွဲ့ခေါင်းဆောင် ဂျိုအန်နီ လျူက ပြောကြားခဲ့ပါတယ်။

နိုင်ငံတကာ ပြောင်းရွှေ့အခြေချသူများဆိုင်ရာအဖွဲ့ (IOM) က ရေလမ်းခရီးကနေ ဥရောပကိုရောက်ဖို့ ကြိုးစားနေတဲ့အတွက် ၂၀၁၆ နှစ်စပိုင်းမှာပဲ လူ ၁၂၀၀ ခန့် သေဆုံးခဲ့ပြီးဖြစ်တယ်လို့ တနင်္လာနေ့က ထုတ်ပြန်ခဲ့ပါတယ်။ အဲဒီထဲကတစ်ဝက်က မြေထဲပင်လယ်ထဲမှာ အသက်ဆုံးရှုံးခဲ့ရတာဖြစ်ပါတယ်။

Ref: Presstv