Blog

စက်တင်ဘာ ၁၊ ၂၀၂၄
M-Media

-ပါလက်စတိုင်းနိုင်ငံ အနောက်ဖက်ကမ်းဒေသ ဂျီနင်မြို့က အစ္စရေးရဲ့ ပိတ်ဆို့လူသတ်ပွဲဟာ ၅ ရက်တာ ကြာမြင့်လာပြီဖြစ်ပြီး အသတ်ခံရသူ ၁၄ ဦးအထိ ရှိလာပြီဖြစ်ပါတယ်။

ဂျီနင်မြို့နဲ့ မြို့ထဲက ပါလက်စတိုင်း ဒုက္ခသည်စခန်းကို အစ္စရေးက စစ်တပ်အလုံးအရင်းနဲ့ ပိတ်ဆို့ အကြမ်းဖက် သတ်ဖြတ်နေတာ ဖြစ်ပါတယ်။ နေအိမ်တွေ၊ အခြေခံအဆောက်အဦးတွေလည်း ဖျက်ဆီးခံထားရပြီး၊ တစ်မြို့လုံးရဲ့ ရေလိုင်းနဲ့ ဓာတ်အားလိုင်းတွေကိုလည်း အစ္စရေးက ဖြတ်တောက်ထားပါတယ်။

၁၁ လကြာပြီဖြစ်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ ပါလက်စတိုင်း ၅ သောင်းနီးပါး အသတ်ခံထားရပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။ ဂါဇာက လူသတ်ပွဲစတဲ့ ပြီးခဲ့တဲ့နှစ် အောက်တိုဘာလကစတင်ပြီး အနောက်ဖက်ကမ်းမှာလည်း အစ္စရေးရဲ့ အကြမ်းဖက်သတ်ဖြတ်မှုတွေ မြင့်တက်လာတာပါ။

လက်ရှိအချိန်မှာတော့ တပ်ဖွဲ့တွေနဲ့ ပိတ်ဆို့ပြီး ဂါဇာကလို လူအဖွဲ့အစည်းတစ်ခုလုံး ရှင်းလင်းသတ်ဖြတ်မှုမျိုး လုပ်ဆောင်လာခဲ့တာ ဖြစ်ပါတယ်။

(ဓာတ်ပုံ- ဂျီနင်မြို့က သစ်သီးစျေးတစ်ခုကို အစ္စရေးက မီးရှို့ဖျက်ဆီးထားမှု)

သြဂုတ် ၃၁၊ ၂၀၂၄
M-Media

-ဂါဇာကမ်းမြှောင်က Emirati ဆေးရုံဆီ ဆေး၀ါးနဲ့ ကိရိယာ သွားရောက်ပို့ဆောင်တဲ့ ယာဥ်တန်းကို သြဂုတ်လ ၂၉ ရက်နေ့မှာ အစ္စရေးက ဒုံးကျည်နဲ့ ပစ်ခတ် တိုက်ခိုက်တာကြောင့် အနည်းဆုံး လူ ၄ ဦး သေဆုံးခဲ့ပါတယ်။

ပြီးခဲ့တဲ့ နှစ်အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အကူအညီပေးရေး၀န်ထမ်း ၂၈၀ ကျော် သတ်ဖြတ်ခံထားရပါတယ်။

Emirati ဆေးရုံယာဥ်တန်း တိုက်ခိုက်ခံရမှုကို အမေရိကန် အကူအညီပေးရေးအဖွဲ့ American Near East Refugee Aid (Anera) ကလည်း အတည်ပြု ပြောဆိုပါတယ်။ ဒီယာဥ်တန်းဟာ အစ္စရေးတပ်ဖွဲ့တွေရဲ့ စစ်ဆေးမှုကို ခံယူပြီးမှ ထွက်ခွာခွင့် ရခဲ့တာဖြစ်ပါတယ်။

အစ္စရေးစစ်တပ်ရဲ့ ထုတ်ပြန်ချက်မှာတော့ စစ်သွေးကြွတွေက ယာဥ်တန်းကို စီးနင်းသိမ်းပိုက်တဲ့အတွက် တိုက်ခိုက်ရတာလို့ ဖော်ပြပါတယ်။ ခိုင်မာတဲ့ သက်သေအထောက်အထား ပြတာမျိုး မရှိပါဘူး။

သြဂုတ်လ ၂၈ ရက်နေ့ကလည်း World Food Programme ယာဥ်တန်းကို အစ္စရေးက ပစ်ခတ်ခဲ့ပါတယ်။ ဂါဇာမှာ လခြမ်းနီအဖွဲ့ အပါအ၀င် အကူအညီပေးရေး အဖွဲ့တွေကို အစ္စရေးက အကြမ်းဖက်တိုက်ခိုက်မှုများစွာ ပြုလုပ်ခဲ့ရာမှာ ဧပြီလအတွင်းက World Central Kitchen ယာဥ်တန်း တိုက်ခိုက်ခံရမှုကို ကမ္ဘာတစ်၀ှမ်းက ၀ေဖန် ရှုတ်ချခဲ့ကြပါတယ်။

Ref: Aljazeera

သြဂုတ် ၂၈၊ ၂၀၂၄
M-Media

-ဂါဇာက ဗလီ၀တ်ကျောင်းတော်တစ်လုံးကို အစ္စရေးတပ်ဖွဲ့တွေက အကြမ်းဖက်ဖျက်ဆီးပြီး ကုရ်အာန်ကျမ်းစာကို ဆုတ်ဖြဲမီးရှို့တဲ့ ဗီဒီယိုတစ်ခု ဆိုရှယ်မီဒီယာမှာ ထွက်ပေါ်လာပါတယ်။

အစ္စရေးစစ်သားတွေရဲ့ လူမဆန်တဲ့ အပြုအမူပေါင်းများစွာထဲက တစ်ခုလည်းဖြစ်ပါတယ်။ ကုန်အာန်ကျမ်းစာကို ဆုတ်ဖြဲခြင်းဟာ ဘာသာရေး စော်ကားအကြမ်းဖက်မှုလို့ အစ္စလာမ်ဘာသာ၀င်တွေက မှတ်ယူပါတယ်။

အစ္စရေးစစ်သားတွေရဲ့ ဒီလုပ်ရပ်ကို ကုလသမဂ္ဂ၊ ဥရောပသမဂ္ဂနဲ့ အမေရိကန်-အစ္စလာမ်အသင်းတို့က ရှုတ်ချခဲ့ကြပါတယ်။

၁၁ လတာ ကြာမြင့်ပြီဖြစ်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ ပါလက်စတိုင်းပြည်သူ ၄ သောင်းကျော် အသတ်ခံထားရပြီး၊ ဗလီ၀တ်ကျောင်းတော်ပေါင်း ၆၁၀၊ သမိုင်း၀င် ခရစ်ယာန်ဘုရားကျောင်း ၃ ကျောင်း ဖျက်ဆီးခံထားရပါတယ်။