သြဂုတ် ၁၄၊ ၂၀၂၄
M-Media
-ဘလ်ဂျီယံ တိုက်ကွမ်ဒို အားကစားမယ် ဆာရာ အလ် ရှယ်ရီဟာ ၂၀၂၄ ပဲရစ်အိုလံပစ်ပြိုင်ပွဲမှာ ဆုတံဆိပ်တစ်ခု ရရှိပြီး ဥပရောက အိုလံပစ်ဆုတံဆိပ်ရ ပထဆုံး ပု၀ါဆောင်း အမျိုးသမီးအဖြစ် မှတ်တမ်း၀င်ခဲ့ပါတယ်။
မော်ရိုကိုနွယ်ဖွား ဖခင်၊ ဘလ်ဂျီယံ မိခင်တို့က မွေးဖွားတဲ့ ဆာရာဟာ အသက် ၁၉ နှစ်သာ ရှိပါသေးတယ်။ ၂၀၂၂ ခုနှစ်က ကမ္ဘာ့ တိုက်ကွမ်ဒိုချန်ပီယံဖြစ်ခဲ့ပါတယ်။
သူမဟာ ပညာရေးဖက်မှာလည်း ထူးချွန်ခဲ့ပြီး ဆေးတက္ကသိုလ် တက်ရောက်နေပါတယ်။
Ref: Explore Islam
သြဂုတ် ၁၄၊ ၂၀၂၄
M-Media
-အီရန်ဟာ သူတို့ရဲ့ ပြည်တွင်းဖြစ် Mohajer-10 ဒရုန်းကို အခုတစ်ပတ် ရုရှားနိုင်ငံမှာလုပ်တဲ့ စစ်လက်နက်ပစ္စည်းပြပွဲမှာ ထုတ်ပြလာပါတယ်။
၂၀၂၃ ခုနှစ် သြဂုတ်လမှာ မိတ်ဆက်ခဲ့ပြီး အီရန်ပြင်ပ နိုင်ငံတစ်ခုမှာ ပထမဆုံးအကြိမ် ပြသတာ ဖြစ်ပါတယ်။
Mohajer-10 ဒရုန်းဟာ ၂၄ နာရီ မရပ်မနား ပျံသန်းနိုင်ပြီး မိုင်ပေါင်း ၁၂၄၀ အထိ ရောက်ရှိနိုင်ပါတယ်။ အီရန်ပြည်တွင်းထုတ် ဒရုန်းတွေထဲမှာ အဆင့်အမြင့်ဆုံး ဖြစ်ပါတယ်။ အမေရိကန်ရဲ့ နာမည်ကျော် MQ-9 Reaper ဒရုန်းနဲ့ ယှဥ်နိုင်တယ်လို့ အီရန်ပြည်တွင်း မီဒီယာတွေက ဖော်ပြပါတယ်။
Mohajer-10 ကို ထောက်လှမ်းရေး၊ ပစ်မှတ် စုဆောင်းရေးနဲ့ တိုက်ခိုက်ရေးတွေမှာ အသုံးပြုနိုင်ပြီး အလေးချိန် ကီလို ၃၀၀ တင်ဆောင်နိုင်ပါတယ်။ ပစ်မှတ်ကို ထိထိရောက်ရောက် ဗုံးကြဲတိုက်ခိုက်နိုင်တယ်လို့လည်း ဆိုပါတယ်။
ဒီဒရုန်းဟာ အစ္စရေး၊ ယူကရိန်းနဲ့ အနောက်နိုင်ငံတွေအတွက် ပြဿနာဖြစ်လာနိုင်တယ်လို့ ကျွမ်းကျင်သူတွေက သုံးသပ်ပါတယ်။
၁၀ လအတွင်း ပါလက်စတိုင်းပြည်သူ ၄ သောင်းနီးပါး သတ်ဖြတ်ထားတဲ့ အစ္စရေးနဲ့ အီရန်တို့အကြား တင်းမာမှုက ပိုမိုမြင့်တက်လာနေသလို၊ ရုရှားကလည်း ယူကရိန်းမှာ အီရန်လုပ်ဒရုန်းတွေကို အသုံးပြုနေတယ်လို့ သတင်းထွက်နေပါတယ်။
အီရန်ဟာ ရုရှားမှာလုပ်တဲ့ လက်နက်ပြပွဲမှာ ပြည်တွင်းဖြစ် လေကြောင်းရန် ကာကွယ်ရေးစနစ်တွေ၊ ရေဒါတွေအပါအ၀င် စစ်လက်နက်ပစ္စည်း အများအပြား ပြသခဲ့ပါတယ်။
Ref: Interesting Engineering
သြဂုတ် ၁၄၊ ၂၀၂၄
M-Media
-ပြီးခဲ့တဲ့တစ်ပတ်က စတင်တဲ့ ယူကရိန်းရဲ့ ရုရှားပိုင်နက်ထဲအထိ ရုတ်တရက် ထိုးစစ်ဟာ မြန်မြန်ဆန်ဆန်ပဲ အောင်မြင်မှု ရရှိနေပြီး ပြည်နယ်နှစ်ခုအထိ ၀င်ရောက်ထိုး ဖောက်နိုင်ပြီ ဖြစ်ပါတယ်။
ယူကရိန်းနဲ့ ကပ်နေတဲ့ ကာ့ဆ် ပြည်နယ်ကို စတင် ၀င်ရောက်ခဲ့တဲ့ ယူကရိန်းတပ်တွေဟာ ရုရှားရဲ့ ခံစစ်လိုင်း ၂ ခုကို အောင်မြင်စွာ ဖောက်ထွက်နိုင်ခဲ့ပြီး အနည်းဆုံး ရွာပေါင်း ၂၈ ရွာကို သိမ်းပိုက် ထားနိုင်ပါတယ်။ ရုရှားစစ်သား ၁၀၀ ကျော်ကို ဖမ်းဆီးထားနိုင်တယ်လို့ ယူကရိန်းဖက်က ထုတ်ပြန်ပါတယ်။
သြဂုတ်လ ၁၃ ရက်နေ့မှာတော့ ယူကရိန်းတပ်တွေဟာ ကာ့ဆ်နဲ့ ကပ်နေတဲ့ ဘယ်ဂိုရော့ဒ် ပြည်နယ်ကိုပါ တိုက်ခိုက်လာတဲ့အတွက် ရုရှားအစိုးရက အရေးပေါ်အခြေအနေ ကြေငြာထားရပါတယ်။
ယူကရိန်းစစ်တပ် နိုင်ငံထဲအထိ ထိုးဖောက်၀င်ရောက်လာတာကို ရုရှားကလည်း ၀န်ခံခဲ့ပါတယ်။
အမေရိကန်သမ္မတ ဂျိုးဘိုင်ဒန်က ယူကရိန်းရဲ့ ကာ့ဆ်ထိုးစစ်ဟာ ရုရှားသမ္မတ ပူတင်အတွက် ခေါင်းခဲစရာဖြစ်မယ်လို့ မှတ်ချက်ပေးခဲ့ပေမယ့် ဒီကိစ္စမှာ အမေရိကန်ဖက်က ပါ၀င်ပတ်သက်ခြင်းမရှိဘူးလို့ ပြောကြားခဲ့ပါတယ်။
Ref: Reuters
သြဂုတ် ၁၄၊ ၂၀၂၄
M-Media
-လာဘ်စားမှုနဲ့ ထောင်ဒဏ်ကျခံခဲ့ရတဲ့ ရှေ့နေဟောင်း ပီချစ် ချူအန်ဘန်ကို အစိုးရအဖွဲ့၀င်အဖြစ် ခန့်အပ်မှုအတွက် အခြေခံဥပဒေခုံရုံးက ထိုင်း၀န်ကြီးချုပ် ဆရက်သာ သာဗီဆင်ကို သြဂုတ်လ ၁၄ ရက်နေ့ မနက်ပိုင်းမှာ ရာထူးကနေ ဖယ်ရှားလိုက်ပါတယ်။
ပီချစ်ဟာ ထိုင်းစစ်တပ်ရဲ့ ဖယ်ရှားမှုကို ခံခဲ့ရတဲ့ ၀န်ကြီးချုပ်ဟောင်း သက်ဆင် ရှင်နာ၀ပ်ထရာရဲ့ ရှေ့နေဖြစ်ပါတယ်။ ၂၀၀၈ ခုနှစ် သက်ဆင်အတွက် ရှေ့နေလိုက်ပေးစဥ်မှာ တရားရုံးတာ၀န်ရှိသူကို လာဘ်ပေးမှုနဲ့ တရားစွဲဆိုခံရပြီး ထောင်ဒဏ် ၆ လ ချမှတ်ခံခဲ့ရပါတယ်။
နောက်ပိုင်းမှာ ပီချစ်ဟာ သက်ဆင်မိသားစုပါတီ Pheu Thai ရဲ့ ဥပဒေအကြံပေးအဖြစ် ဆောင်ရွက်ခဲ့ပါတယ်။
ပီချစ်ကို ၀န်ကြီးချုပ်ရုံး၀န်ကြီးအဖြစ် ခန့်အပ်မှုဟာ ကျင့်၀တ်ပိုင်းဆိုင်ရာ ဖောက်ဖျက်မှုဖြစ်တယ်လို့ အခြေခံဥပဒေခုံရုံးက ဆုံးဖြတ်ကာ သာဗီဆင်ကို ရာထူးကနေ ဖယ်ရှားလိုက်တာဖြစ်ပါတယ်။
သာဗီဆင်ကတော့ ဆုံးဖြတ်ချက်ကို လက်ခံကြောင်း ပြောကြားခဲ့ပေမယ့် သူ့အနေနဲ့ ကျင့်၀တ်ဖောက်ဖျက် လုပ်ဆောင်ခဲ့တာမရှိကြောင်း၊ ရိုးသားစွာ နိုင်ငံရေးလုပ်ခဲ့တာဖြစ်ကြောင်း ပြောကြားခဲ့ပါတယ်။
၂၀၂၃ ခုနှစ် ရွေးကောက်ပွဲမှာ ဒုတိယမဲအများဆုံး ရခဲ့တဲ့ သက်ဆင်မိသားစုရဲ့ Pheu Thai ပါတီဟာ စစ်တပ်နဲ့ ရင်ကြားစေ့ကာ စစ်တပ်ကြီးစိုးတဲ့ အထက်လွှတ်တော်ရဲ့ မျက်နှာသာပေးမှုနဲ့ သာဗီဆင်ကို ၀န်ကြီးချုပ်နေရာထားပြီး အစိုးရဖွဲ့နိုင်ခဲ့တာ ဖြစ်ပါတယ်။
အခု သာဗီဆင်ကို ဖယ်ရှားလိုက်မှုကြောင့် စစ်တပ်နဲ့ Pheu Thai ပါတီတို့အကြား အကွဲအပြဲ ပြန်ဖြစ်လာတယ်လို့ သတင်းတွေထွက်သလို၊ သက်ဆင်ရဲ့ သမီးဖြစ်ပြီး၊ Pheu Thai ပါတီ ခေါင်းဆောင်ဖြစ်တဲ့ အသက် ၃၇ နှစ်အရွယ် ပေထုံတန် ရှင်နာ၀ပ်ထရာ ၀န်ကြီးချုပ်ဖြစ်လာရေး အကွက်ချ လုပ်ဆောင်တယ်ဆိုတဲ့ သုံးသပ်မှုတွေလည်း ရှိနေပါတယ်။
Ref: CNA
သြဂုတ် ၁၃၊ ၂၀၂၄
M-Media
-အင်္ဂါဂြိုဟ် မြေလွှာဖြစ်တဲ့ ကျောက်သားအောက်ပိုင်းမှာ သမုဒ္ဒရာကြီးတစ်စင်း ဖြစ်လာနိုင်လောက်တဲ့ ရေအရင်းအမြစ် ရှိနိုင်တယ်ဆိုတာ လေ့လာမှုအသစ်မှာ တွေ့ရကြောင်း အမေရိကန်သိပ္ပံပညာရှင်တွေက ထုတ်ပြန်ပါတယ်။
အမေရိကန် အာကာသအေဂျင်စီ နာဆာရဲ့ အင်္ဂါဂြိုဟ်သွားယာဥ် InSight Lander က ဂြိုဟ်ပေါ်မှာ ကောက်ယူခဲ့တဲ့ အချက်အလက်တွေကို ပညာရှင်တွေ ၂ နှစ်ကျော်ကြာ လေ့လာသုံးသပ်ပြီး ကောက်ချက်ချခဲ့တာပါ။
အင်္ဂါဂြိုဟ်စည်ပင်ခဲ့စဥ် လွန်ခဲ့တဲ့ နှစ်သန်းပေါင်း ၃ ဘီလီယံက ရှိခဲ့တဲ့ မြစ်ချောင်းအင်းအိုင်တွေ၊ သမုဒ္ဒရာတွေဟာ လက်ရှိမှာတော့ မြောလွှာကျောက်သားအောက် ၇ မိုင်လောက်မှာ ရှိနေနိုင်တယ်လို့ ဆိုပါတယ်။
ရေရှိရင် သက်ရှိတွေ ရှိနိုင်တာကြောင့် အခုကောက်ချက်ချမှုသာ မှန်ကန်ခဲ့ရင် အင်္ဂါဂြိုဟ်ပေါ်မှာ သက်ရှိပိုးမွှားတွေကို တွေ့လာရနိုင်တယ်လို့လည်း သိပ္ပံပညာရှင်တွေက ပြောပါတယ်။
လွန်ခဲ့တဲ့နှစ် ၃ ဘီလီယံက ဂြိုဟ်ရဲ့လေထု ပါးလွှာသွားတာကြောင့် ဂြိုဟ်ပေါ်က ရေအရင်းမြစ်တွေဟာ အာကာသထဲ လျှံထွက်သွားတာ ဒါမှမဟုတ် မြေလွှာအောက် ရောက်သွားတာမျိုး ဖြစ်နိုင်တယ်လို့ ပညာရှင်တွေက ယူဆထားတာ ဖြစ်ပါတယ်။
Ref: Reuters