ဒီဇင်ဘာ ၇၊ ၂၀၁၅
M-Media
– ဒီတစ်ပတ် ပရီးမီးယားလိဂ်မှာတော့ လက်စတာက အဝေးကွင်းမှာ ဆွမ်ဆီးကို ၃ ဂိုးပြတ်နဲ့ အနိုင်ကစားပြီး ဇယားထိပ်ဆုံးကို ဦးဆောင်လိုက်ပါတယ်။
၁၁ ပွဲဆက်တိုက် ဂိုးသွင်းစံချိန်သစ် တင်ထားတဲ့ ဂျာမီဗာဒီ ဂိုးသွင်းမှု ရပ်တန့်သွားပေမယ့် ရီယဒ် မဟ်ရက်ဇ်က ကစားသမားဘ၀ သူ့ရဲ့ ပထမဆုံးဟက်ထရစ်ကို သွင်းယူနိုင်ခဲ့တာပါ။ နည်းပြရာနီရေးရီကတော့ ထိပ်ဆုံးရောက်တာထက်၊ ၃ ဂိုးသွင်းနိုင်တာ၊ စွမ်းဆောင်ရည်ကောင်းတာ၊ အခွင့်အရေးတွေအများကြီးရတာနဲ့ Clean Sheet ရခဲ့တာတွေက ပိုပြီး အရေးကြီးတယ်လို့ ပွဲအပြီးမှာ ပြောကြားခဲ့ပါတယ်။
မန်စီးတီးကတော့ အဝေးကွင်းမှာ စတုတ်ကို ပထမပိုင်း ၁၅ မိနစ်အတွင်း သွင်းခဲ့တဲ့ ဂိုး ၂ ဂိုးနဲ့ အရှုံးပေးခဲ့ရပါတယ်။ ခံစစ်ကြောင်း ဖရိုဖရဲဖြစ်မှု၊ ကစားကွက်မတည်ငြိမ်မှုနဲ့ အခွင့်အရေးတွေ မဖန်တီးနိုင်မှုတွေနဲ့အတူ မန်စီးတီးရဲ့ အရှုံးဟာ ထိုက်တန်ခဲ့ပြီး ပယ်လီဂရီနီကတော့ သူ့ကစားသမားတွေဟာ ပွဲပမ်းနေပြီလို့ ဆိုပါတယ်။
ဒဏ်ရာရကစားသမား ၁၀ ဦးအထိရှိနေတဲ့ အာဆင်နယ်ဟာ အိမ်ကွင်းမှာ ဆန်းဒါးလန်းကို ၃ ဂိုး ၁ ဂိုးနဲ့ အနိုင်ရခဲ့ပြီး ၃ ပွဲဆက် နိုင်ပွဲပျောက်မှုကို အဆုံးသတ်လိုက်နိုင်ပါတယ်။ ဒါပေမယ့် ဆန်းဒါးလန်းကလည်း တော်တော်ကောင်းခဲ့ပြီး ဂိုးသွင်းမသေချာလို့သာ အရှုံးပေးခဲ့ရတာဖြစ်ပါတယ်။ အာဆင်နယ်အတွက် ဂိုးတွေကိုတော့ ဂျိုး ကမ်းဘဲလ်၊ ဂျရူးနဲ့ ရမ်ဆေးတို့က သွင်းယူပေးခဲ့တာဖြစ်ပါတယ်။ ဆန်းဒါးလန်းရတဲ့ ချေပဂိုးကလည်း ဂျရူးရဲ့ ကိုယ့်ဂိုးကိုယ်သွင်းမှုက ရရှိခဲ့တာပါ။
ချယ်ဆီးကတော့ စတမ်းဖို့ဒ်ဘရစ်ခ်ျမှာ တန်းတက်ဘုန်းမောက်အသင်းကို ဂလန်းမာရေးရဲ့ ၈၂ မိနစ်ဂိုးနဲ့ အရှုံးပေးခဲ့ရပြီး ဒီရာသီ ၈ ပွဲမြောက် အရှုံးနဲ့ ကြုံတွေ့ခဲ့ရပါတယ်။ ဒါဟာ ပရီးမီးယားလိဂ်သမိုင်းမှာ တန်းတက်လာတဲ့ ပထမန်း ချန်ပီယံဟာ ပရီးမီးယားလိဂ် လက်ရှိချိန်ပီယံကို ပထမဆုံး အနိုင်ရရှိခဲ့တာလည်း ဖြစ်ပါတယ်။ ဘုန်းမောက်ကတော့ ၃ ပွဲဆက် ရှုံးပွဲမရှိ မှတ်တမ်းနဲ့အတူ တန်းဆင်းဇုန်က လွတ်မြောက်လာခဲ့ပါတယ်။
တောက်လျှောက်ခြေပျက်လာတဲ့ နယူးကာဆယ်ဟာ အိမ်ကွင်းစိန့်ဂျိမ်းစ်ပါ့ခ်မှာ လီဗာပူးလ်အသင်းကို အံအားသင့်ဖွယ် အနိုင်ရခဲ့ပါတယ်။ ၂ ဂိုးပြတ်နဲ့ နိုင်ခဲ့တဲ့ အဲဒီပွဲမှာ စကာတယ်ရဲ့ ၆၉ မိနစ်မှာ ကိုယ့်ဂိုးကိုသွင်းမှု၊ ဒုတိယပိုင်းနောက်ဆုံးမိနစ်မှာ ၀စ်ဂ်ျနာလ်ဒမ်ရဲ့ ဂိုးတွေနဲ့ နယူးကာဆယ် မျက်နှာပန်းလှခဲ့တာ ဖြစ်ပါတယ်။ ယာဂန်ကလော့ပ်ကတော့ သူ့အသင်းဟာ အနည်းဆုံး သရေနဲ့ ထိုက်တန်တယ်လို့ ဆိုပါတယ်။
အဆုံးသတ်
ပိုင်းညံ့ဖျင်းမှုနဲ့အတူ မန်ယူဟာ ၀က်စ်ဟမ်းနဲ့ ဂိုးမရှိသရေကျခဲ့ပြီး၊ စပါးကလည်း ဦးဆောင်ဂိုး သွင်းနိုင်ခဲ့ပေမယ့် ချေပဂိုး ပြန်ပေးလိုက်ရတာကြောင့် ၀က်စ်ဘရွန်းနဲ့ ၁ ဂိုးစီ သရေကျခဲ့ပါတယ်။ ဒါပေမယ့် ၁၄ ပွဲဆက်တိုက် ရှုံးပွဲမရှိစံချိန်ကိုတော့ စပါးက ဆက်လက်ထိန်းသိမ်းထားနိုင်ခဲ့ပါတယ်။
ဒီတစ်ပတ် ပရီးမီးယားလိဂ် ရလဒ်ကတော့ အောက်ပါအတိုင်းဖြစ်ပါတယ်။
စတုတ် ၂-၀ မန်စီးတီး
အာဆင်နယ် ၃-၁ ဆန်းဒါးလန်း
မန်ယူ ၀-၀ ၀က်စ်ဟမ်း
ဆောက်သက်တမ် ၁-၁ အက်စတွန်ဗီလာ
ဆွမ်ဆီး ၀-၃ လက်စတာ
ဝက်ဖို့ဒ် ၂-၀ နော်ဝစ်ခ်ျ
ဝက်စ်ဘရွန်း ၁-၁ စပါး
ချယ်ဆီး ၀-၁ ဘုန်းမောက်
နယူးကယ်ဆယ် ၂-၀ လီဗာပူးလ်
