Blog

​ဖေဖော်ဝါရီ ၅၊ ၂၀၂၁
M-Media

-ဘင်္ဂလား​ဒေ့ရှ်နိုင်ငံ တောရွာတစ်ခုက ကုတင် ၈၀ ဆန့် ဆေးရုံဟာ ဗြိတိန်ဗိသုကာပညာရှင်များအဖွဲ့ Royal Institute of British Architects က ၂၀၂၁ ခုနှစ်အတွက် ချီးမြှင့်တဲ့ နိုင်ငံတကာဗိသုကာဆိုင်ရာဆုကို ဆွတ်ခူးရရှိသွားပါတယ်။

Friendship Hospital လို့အမည်ပေးထားတဲ့ အဲဒီဆေးရုံဟာ နိုင်ငံတောင်ပိုင်း ရှမ်နာဂါမြို့မှာ တည်ရှိပြီး ဒေသရဲ့ မြေမျက်နှာသွင်ပြင်၊ ရာသီဥတုအနေအထားတွေနဲ့ ကိုက်ညီအောင် ဆောက်လုပ်ထားတာ ဖြစ်ပါတယ်။

မိုးတွင်းမှာ မိုးများကာ ရေကြီးမှုကို ကာကွယ်နိုင်ဖို့အတွက် ရေဆင်းချောင်းငယ်တစ်ခုကို ထည့်သွင်းတည်ဆောက်ထားပြီး အဲဒီချောင်းက မိုးရေတွေကို သောက်သုံးရေအဖြစ် ပြန်လည်အသုံးပြုနိုင်အောင်လည်း ဖန်တီးထားပါတယ်။

“လူသားတွေရဲ့ လိုအပ်ချက်ကို ရည်ရွယ်ပြီး ဆောက်လုပ်ထားတဲ့ အဆောက်အဦး ဖြစ်ပါတယ်” လို့ 2021 RIBA International Prize ဆု ရွေးချယ်ရေးကော်မတီ ဥက္ကဌ ပြင်သစ်ဗိသုကာပညာရှင် အိုဒီလီဒတ်က ပြောပါတယ်။

ဆေးရုံကို ဒေသတွင်းမှာ အလွယ်တကူရရှိနိုင်တဲ့ တန်ဖိုးနည်း ဆောက်လုပ်ရေးပစ္စည်းတွေနဲ့ တည်ဆောက်ထားတာပါ။

“အကန့်အသတ်တွေ အများကြီးရှိတဲ့အနေအထားမျိုးမှာ ပိုက်ဆံသိပ်မကုန်ဘဲ ဒီ​ဇိုင်းကောင်းကောင်း အဆောက်အဦးတစ်ခုကို ဗိသုကာပညာနဲ့ ဘယ်လို လှလှပပ ဆောက်နိုင်လဲဆိုတာ ဒီဆေးရုံက ပြသသွားတာပါ” လို့ ဒတ်က ဆိုပါတယ်။

ဒီဇိုင်းကောင်းမွန်ပြီး၊ ဗိသုကာမြောက်ကာ လူထုအပေါ် အမှန်တကယ်အကျိုးပြုတဲ့ ကမ္ဘာတစ်ဝှမ်းက အဆောက်အဦးတွေကို ဗြိတိန်ဗိသုကာပညာရှင်များအဖွဲ့ (RIBA) က ၂ နှစ်တစ်ကြိမ် ရွေးချယ်ပြီး ဆုချီးမြှင့်တာ ဖြစ်ပါတယ်။

၂၀၂၁ ခုနှစ်အတွက် နိုင်ငံပေါင်း ၁၁ နိုင်ငံက အဆောက်အဦး ၁၆ ခုကို ရွေးချယ်ချီးမြှင့်ခဲ့ပါတယ်။

ဆေးရုံကို ဒီဇိုင်းဆွဲ တည်ဆောက်ခဲ့တဲ့ ဗိသုကာပညာရှင် ကာရှက်ဖ် ချောင်ဒရီက လူသားတွေနဲ့ သဘာ၀တရားကို ထည့်သွင်းစဉ်းစားတဲ့ ဗိသုကာလက်ရာတွေ ပေါ်ထွက်လာရေးအတွက် ဒီဆုက လူတွေကို တွန်းအားပေးနိုင်လိမ့်မယ်လို့ မျှော်လင့်ကြောင်း ပြောကြားခဲ့ပါတယ်။

ကာရှက်ဖ်တည်ထောင်ထားတဲ့ URBANA ကုမ္ပဏီနဲ့ အကူအညီပေးရေးအဖွဲ့ Friendship တို့ ပူးပေါင်းကာ ဆေးရုံကို တည်ဆောက်ခဲ့တာဖြစ်ပြီး ၂၀၁၈ ခုနှစ်မှာ ပြီးစီးခဲ့ပါတယ်။

ဆေးရုံတည်ရှိရာ ရှမ်နာဂါမြို့ဟာ အရင်က ကောက်ပဲသီးနှံ အဓိကစိုက်ပျိုးရာ ဒေသဖြစ်ပေမယ့် ရာသီဥတုပြောင်းလဲမှုနောက်ဆက်တွဲ ရေလွှမ်းမိုးမှုဒဏ် ခံရပြီးနောက်ပိုင်းမှာတော့ ပုဇွန်နဲ့ ရေထွက်လုပ်ငန်း အဓိက လုပ်ကိုင်ရာအဖြစ် ပြောင်းလဲလာခဲ့ပါတယ်။

ဘင်္ဂလားဒေ့ရှ်ဟာ ရာသီဥတုပြောင်းလဲမှုဒဏ်ကို အကြီးအကျယ်ခံစားနေရတဲ့ နိုင်ငံတွေထဲကတစ်ခုဖြစ်ပြီး နိုင်ငံရဲ့ ဒေသတော်တော်များများမှာ နှစ်စဉ် ရေကြီးရေလျှံမှုတွေ ဖြစ်ပေါ်နေပါတယ်။

Ref: NPR