News @ M-Media

ယူကရိန်းကို သိမ်းပိုက်ရန် ရုရှား၏ပြင်ဆင်မှု ၇၀ ရာခိုင်နှုန်းပြီးစီး

ဖေဖော်ဝါရီ ၇၊ ၂၀၂၂
M-Media

-ယူကရိန်းကို ကျူးကျော်သိမ်းပိုက်ဖို့ လိုအပ်တဲ့ စစ်အင်အားရဲ့ ၇၀ ရာခိုင်နှုန်းကို ရုရှားက ပြင်ဆင်ထားတယ်လို့ ယူဆကြောင်း ထောက်လှမ်းရေးသတင်းတွေကို ကိုးကားပြီး အမေရိကန်တာဝန်ရှိသူတွေက သုံးသပ်ပါတယ်။

ပြီးခဲ့တဲ့တစ်ပတ် အမေရိကန်တာဝန်ရှိသူတွေရဲ့ ၆ နာရီကြာ တံခါးပိတ်အစည်းအဝေးမှာ ရုရှားက ယူကရိန်းကို ကျူးကျော်နိုင်ခြေနဲ့ ပတ်သက်ပြီး ဆွေးနွေးခဲ့ကြတာပါ။ ဒီဆွေးနွေးပွဲက တစ်ချို့အချက်တွေကို အမည်မဖော်လိုတဲ့ တာဝန်ရှိသူတွေက ပြည်တွင်းမီဒီယာတွေက မနေ့က ဖွင့်ချခဲ့ပါတယ်။

ရုရှားဟာ ယူကရိန်းကို သိမ်းပိုက်ဖို့ လိုအပ်တဲ့ စစ်အင်အားရဲ့ ၇၀ ရာခိုင်နှုန်းကို ပြင်ဆင်ထားပြီး ဖြစ်သလို၊ ကျူးကျော်တိုက်ခိုက်မှု ဖြစ်နိုင်ချေတွေထဲက တစ်ခုဟာ မြို့တော်ကိဗ်ကို အလျင်အမြန် ထိုးစစ်ဆင် သိမ်းယူဖို့ ဖြစ်တယ်လို့ သတိပေးခဲ့ပါတယ်။

ဒီလိုသိမ်းပိုက်ဖို့ သမ္မတပူတင်က နောက်ဆုံး ဆုံးဖြတ်ချက် မချရသေးဘူးလို့ ထောက်လှမ်းရေးပညာရှင်တွေက ယူဆပေမယ့် တိုက်ခိုက်မှုဖြစ်လာရင် ယူကရိန်းအရပ်သား ၅ သောင်း၊ စစ်သား ၂၅၀၀၀ အသက်ဆုံးရှုံးလိမ့်မယ်လို့ တွက်ချက်ခဲ့ပါတယ်။

ယူကရိန်းနိုင်ငံခြားရေးဝန်ကြီး ဒီမီထရို ကူလီဘာက အမေရိကန်မီဒီယာတွေ ဖော်ပြတဲ့ ဒီခန့်မှန်းချက်တွေကို မယုံကြဖို့ တနင်္ဂနွေနေ့မှာ ပြောကြားခဲ့ပြီး မိမိတို့ကတော့ ဘယ်လိုအခြေအနေမျိုးအတွက်မဆို ပြင်ဆင်ထားပြီးဖြစ်တယ်လို့ တုန့်ပြန်ခဲ့ပါတယ်။

Ref: New York Times